ກ່ອນທີ່ເຕັກໂນໂລຊີບັນດາພາຫະນະສື່ສານມີການພັດທະນາ, ວິທະຍຸກະຈາຍສຽງ ແມ່ນພາຫະນະທີ່ມີປະສິດທິຜົນທີ່ສຸດ ເພື່ອສົ່ງຂ່າວປະຈຳວັນໃຫ້ທຸກຄົນ. ປະຈຸບັນ, ເມື່ອເຕັກໂນໂລຊີພັດທະນາ, ບັນດາປະເພດການສື່ສານໄດ້ກຳເນີດຂຶ້ນ, ແຕ່ວິທະຍຸກະຈາຍສຽງຍັງມີບົດບາດໃດໜຶ່ງໃນຄວາມຕ້ອງການສຳພັດກັບຂໍ້ມູນຂ່າວສານຂອງປະຊາຊົນ.
ວິທະຍຸກະຈາຍສຽງຫວຽດນາມ-ປະດິດສ້າງເພື່ອພັດທະນາ
(ພາບ: vov.vn)
ວິທະຍຸກະຈາຍສຽງຫວຽດນາມ ໄດ້ຮັບການສ້າງຕັ້ງຂຶ້ນເມື່ອປີ 1945 ດ້ວຍບົດບາດແມ່ນສຽງເວົ້າສຳຄັນຂອງພັກ ແລະ ລັດຫວຽດນາມ, ແມ່ນພາຫະນະສ່ອງແສງບັນດາຄວາມໃນໃຈ, ຄວາມມຸ້ງຫວັງຂອງປະຊາຊົນ ມາຍັງພັກ ແລະ ລັດ. ປະຈຸບັນ, ວິທະຍຸກະຈາຍສຽງຫວຽດນາມ ແມ່ນອົງການສື່ມວນຊົນໜຶ່ງດຽວທີ່ມີທັງ 4 ປະເພດການສື່ສານຄື: ກະຈາຍສຽງ, ໂທລະພາບ, ໜັງສືພິມ, ສື່ເອເລກໂຕນິກ. ປະຈຸບັນ, ຄື້ນຂອງວິທະຍຸກະຈາຍສຽງຫວຽດນາມ ໄດ້ປົກຄຸມ 99,5% ເຂດດິນແດນຫວຽດນາມ ແລະ ເຂດຊາຍແດນທະເລຫວຽດນາມເກືອບທັງໝົດບົນທະເລຕາເວັນອອກ ດ້ວຍເວລາອອກອາກາດຂອງລາຍການຕ່າງໆທັງໝົດກ່ວາ 200 ຊົ່ວໂມງ/ວັນ. ວິທະຍຸກະຈາຍສຽງຫວຽດນາມ ມີ 5 ລະບົບກະຈາຍສຽງ ແລະ 5 ສຳນັກງານປະຈຳຢູ່ພາຍໃນປະເທດ ແລະ 9 ສຳນັກງານປະຈຳ 9 ປະເທດໃນໂລກ ຊື່ງໄດ້ໃຫ້ຂ່າວໃຫມ່ກ່ຽວກັບຫວຽດນາມ ແລະ ໂລກຢ່າງທັນການ. ທ່ານຫງວຽນແທນເຊີນ (Nguyễn Thanh Sơn) ຮອງລັດຖະມົນຕີການຕ່າງປະເທດຫວຽດນາມ ໄດ້ກ່າວວ່າ:
“ວິທະຍຸກະຈາຍສຽງຫວຽດນາມ ດ້ວຍຄຳຂຶ້ນຕົ້ນລາຍການກະຈາຍສຽງທີ່ວ່າ: ທີ່ນີ້, ສະຖານີວິທະຍຸກະຈາຍສຽງຫວຽດນາມ, ກະຈາຍສຽງຈາກຮ່າໂນ້ຍ, ນະຄອນຫຼວງຂອງປະເທດ ສສ ຫວຽດນາມ” ແມ່ນຄວາມເອກອ້າງທະນົງໃຈ, ຄວາມຕັດສິນໃຈຂອງພັກ, ລັດຖະບານຫວຽດນາມ, ແມ່ນສຽງເວົ້າຂອງບ້ານເກີດເມືອງນອນ, ຂອງປະເທດຊາດ. ພັກ, ລັດ ແລະ ລັດຖະບານຫວຽດນາມ ປາດຖະໜາວ່າ ຄື້ນຂອງວິທະຍຸກະຈາຍສຽງຫວຽດນາມ ບໍ່ພຽງແຕ່ສາມາດປົກຄຸມໄປທົ່ວເຂດ, ຢູ່ພາຍໃນປະເທດເທົ່ານັ້ນ ຫາກຍັງສາມາດຈະອອກສູ່ທົ່ວຫ້າທະວີບໃນໂລກອີກດ້ວຍ.“
(ພາບປະກອບ: nienlich.vn)
ການນຳພັກ, ລັດ ແລະ ລັດຖະບານຫວຽດນາມ ກໍ່ຢືນຢັນວ່າ ຍາມໃດປະຊາຄົມຊາວຫວຽດນາມ ອາໄສຢູ່ຕ່າງປະເທດ ແມ່ນພາກສ່ວນໜຶ່ງທີ່ບໍ່ອາດຕັດແຍກອອກຈາກຊາດຫວຽດນາມໄດ້. ບໍ່ພຽງແຕ່ແມ່ນຊ່ອງຂໍ້ມູນຂ່າວສານບັນລຸປະສິດທິຜົນຢູ່ພາຍໃນປະເທດເທົ່ານັ້ນ, ວິທະຍຸກະຈາຍສຽງຫວຽດນາມ ຍັງແມ່ນຂົວເຊື່ອມຕໍ່ລະຫວ່າງຫວຽດນາມກັບປະຊາຊົນຜູ້ຢູ່ຫ່າງໄກຈາກບ້ານເກີດເມືອງນອນອີກດ້ວຍ. ລາຍການກະຈາຍສຽງສະຫງວນໃຫ້ແກ່ຊາວຫວຽດນາມອາໄສຢູ່ຕ່າງປະເທດ-ລະບົບລາຍການກະຈາຍສຽງເປັນພາສາຕ່າງປະເທດ-ວິທະຍຸກະຈາຍສຽງຫວຽດນາມ ດ້ວຍການປົກຄຸມຄື້ນເຖິງ 70 ປະເທດ ແລະ ເຂດແຄ້ວນໃນໂລກ ເໝືອນກັບເພື່ອນຜູ້ສະໜິດສະໜົມຂອງປະຊາຊົນຜູ້ຢູ່ຫ່າງໄກຈາກບ້ານເກີດເມືອງນອນ. ພໍ່ຕູ້ເລວັນຢວຽນ, ອາຍຸ 84 ປີ, ຊາວຫວຽດນາມ ອາໄສຢູ່ອາເມລິກາ ໃຫ້ຮູ້ວ່າ:
“ໃນເວລາວິທະຍຸອອກອາກາດ, ຂ້າພະເຈົ້າໄດ້ຕິດຕາມຮັບຟັງຂ່າວກ່ຽວກັບຫວຽດນາມ. ຂ້າພະເຈົ້າ ແລະ ລູກຫຼານຢາກຮັບຟັງຂ່າວການເມືອງ, ວັດທະນະທຳ, ສິລະປະວັນນະຄະດີ…ວິທະຍຸຍັງອອກອາກາດລາຍການເພງພື້ນເມືອງອີກດ້ວຍ, ຄ່ຳຄືນໃດສອງຜົວເມຍພວກຂ້າພະເຈົ້າກໍ່ໄດ້ຮັບຟັງ. ຖ້າມີຫຍັງບໍ່ທັນເຂົ້າໃຈແຈ້ງ, ວິທະຍຸກະຈາຍສຽງຫວຽດນາມ ກໍ່ສະໜອງຂໍ້ມູນຂ່າວສານໃຫ້ຂ້າພະເຈົ້າ“.
ຜ່ານຄື້ນຂອງວິທະຍຸກະຈາຍສຽງຫວຽດນາມ, ເພື່ອນມິດສາກົນກໍ່ສາມາດເຂົ້າໃຈກ່ຽວກັບພາບພົດປະເທດຫວຽດນາມ ທີ່ສວຍງາມ, ປະຊາຊົນຫວຽດນາມ ຜູ້ສະໜິດສະໜົມ, ຮັກແພງແຂກ. ການຮັບຟັງບັນດາລາຍການຂອງລະບົບລາຍການກະຈາຍສຽງເປັນພາສາຕ່າງປະເທດ (VOV5) -ວິທະຍຸກະຈາຍສຽງຫວຽດນາມ ໄດ້ກາຍເປັນອາຫານດ້ານຈິດໃຈທີ່ຂາດບໍ່ໄດ້ຂອງບັນດາຜູ້ຟັງຊາວຕ່າງປະເທດ. ປະຈຸບັນ, ເນື້ອໃນຂອງບັນດາລາຍການຂອງ VOV5 ຍັງໄດ້ບັນທຶກໃນເວັບໄຊ www.vovworld.vn ອັນໄດ້ຊ່ວຍໃຫ້ຜູ້ຟັງຕ່າງປະເທດສາມາດມີວິທີສຳພັດກັບຂ່າວສານຈາກຫວຽດນາມ ຕື່ມອີກ. ຜູ້ຟັງຊາວອິນໂດເນເຊຍ ຜູ້ໜຶ່ງໃຫ້ຮູ້ວ່າ:
“ບັນດາຂໍ້ມູນຂ່າວໂດຍວິທະຍຸກະຈາຍສຽງຫວຽດນາມ ສະໜອງມີເນື້ອໃນແທ້ຈິງ. ຂ້າພະເຈົ້າມີຄວາມນິຍົມທີ່ສຸດ. ບັນດາບັນຫາທີ່ຜູ້ຟັງອິນໂດເນເຊຍ ສົນໃຈແມ່ນ: ວັດທະນະທຳ ແລະ ການພັດທະນາຂອງຫວຽດນາມ. ນອກຈາກນັ້ນແລ້ວ, ພວກຂ້າພະເຈົ້າຍັງນິຍົມບັນດາລາຍການເພງຂອງວິທະຍຸກະຈາຍສຽງຫວຽດນາມ ອີກດ້ວຍ. ຊີວິດປະຈຳວັນ, ບັນດາບັນຫາກ່ຽວກັບເຂດບ້ານນາຂອງຫວຽດນາມ ມີຄວາມດູດດື່ມໃຈທີ່ສຸດ, ນັ້ນກໍ່ແມ່ນບັນຫາທີ່ພວກຂ້າພະເຈົ້າເຄີຍປຶກສານຳກັນ“
ປະຈຸບັນ, ບັນດາພາຫະນະສື່ສານພວມພັດທະນາຢ່າງບໍ່ຢຸດຢັ້ງ. ຂະແໜງກະຈາຍສຽງໄດ້ປະສົບກັບບັນດາການແກ່ງແຍ້ງບໍ່ແມ່ນໜ້ອຍ. ແຕ່ເຖິງຢ່າງໃດກໍ່ຕາມ, ດ້ວຍບັນດາທ່າໄດ້ປຽບກ່ຽວກັບຄວາມສາມາດສົ່ງຂ່າວ, ການລົງທຶນໜ້ອຍ, ການກະຈາຍສຽງຍັງແມ່ນຊ່ອງຂໍ້ມູນຂ່າວບັນລຸປະສິດທິຜົນສຳລັບຄວາມຕ້ອງການຂອງປະຊາຊົນຫວຽດນາມ ແລະ ເພື່ອນມິດສາກົນທຸກຄົນ.