ການຕີລາຄາກ່ຽວກັບຄວາມເສລີດ້ານສາສະຫນາຢູ່ ຫວຽດນາມ ຕ້ອງປະຕິບັດດ້ວຍການສັງເກດແບບສັງລວມ
ຢູ່ ຫວຽດນາມ, ໂດຍບໍ່ວ່າຢູ່ທ້ອງຖິ່ນໃດ, ຈາກອົງການບໍລິຫານຂັ້ນຕ່ຳສຸດແມ່ນ ບ້ານ, ຕາແສງ, ບ່ອນໃດກໍ່ມີຮາກຖານສາສະຫນາ, ການເຊື່ອຖືສາສະຫນາ ນັບທັງເຂດປະສົບກັບຄວາມຫຍຸ້ງຍາກກວ່າໝູ່ຄື ຢູ່ ໝູ່ເກາະທີ່ຫ່າງໄກ ຫລື ຢູ່ບັນດາຕາແສງເຂດພູສູງຢູ່ຊາຍແດນ. ມີບ່ອນບູຊາກວ່າ 30.000 ແຫ່ງ ທີ່ໄດ້ຕັ້ງຢູ່ທົ່ວທຸກ 3 ພາກຂອງປະເທດຊາດ. ປະຊາຊົນຖືສາສະຫນາພຸດ ລ້ວນແຕ່ມີຄວາມເສລີໃນການເຄື່ອນໄຫວດ້ານສາສະຫນາຢູ່ວັດວາອາຮາມ. ປະຊາຊົນຖືສາສະຫນາໂປແຕັດສະຕັງ, ກາໂຕລິກ ທຸກວັນ, ທຸກອາທິດ ກໍ່ລ້ວນແຕ່ໄປທຳພິທີການດ້ານສາສະຫນາຢູ່ໂບດ, ຫໍແຈກ. ປະຊາຊົນ ຖືສາສະຫນາ ກາວດ່າຍ, ຮ່ວາຫາວ.. ກໍ່ມີຄວາມເສລີໃນການເຄື່ອນໄຫວສາສະຫນາຢູ່ບັນດາຮາກຖານບູຊາທີ່ໄດ້ກໍ່ສ້າງຢ່າງໃຫຍ່ໂຕສວຍງາມ ຊ້ຳບໍ່ໜຳບັນດາສະຖານທີ່ດັ່ງກ່າວໄດ້ກາຍເປັນບ່ອນທ່ອງທ່ຽວດ້ານຈິດວິນຍານຂອງນັກທ່ອງທ່ຽວນັບໝື່ນໆຄົນ.
ປະຈຸບັນ ຫວຽດນາມ ມີສາສະນິກກະຊົນກວ່າ 27 ລ້ານຄົນທີ່ກຳລັງເຊື່ອຖືບັນດາສາສະຫນາ ກວມເອົາປະມານ 27% ຈຳນວນພົນລະເມືອງ. ນອກຈາກບັນດາສາສະຫນາຫລັກໂດຍມີສາສະນິກກະຊົນກວມເອົາຈຳນວນຫລາຍນັ້ນຄື: ສາສະຫນາພຸດ, ກາໂຕລິກ, ໂປແຕດສະຕັງ, ສາສະຫນາ ຮ່ວາຫາວ, ກາວດ່າຍ ຢູ່ ຫວຽດນາມຍັງມີຫລາຍສາສະຫນາອື່ນອີກ. ແລະ ຢູ່ ຫວຽດນາມບໍ່ມີບ່ອນໃດ ອຳນາດການປົກຄອງ ຈຳກັດ ຫລື ຄວບຄຸມການເຄື່ອນໄຫວສາສະຫນາຂອງປະຊາຊົນ ຖ້າເຂົາເຈົ້າປະຕິບັດການເຄື່ອນໄຫວສາສະຫນາຕາມຈິດໃຈ “ ຢູ່ໃນສິນກິນໃນທຳ”, ນັບຖືສາສະຫນາ, ຮັກຊາດ, ຮັບໃຊ້ທຳມະ - ປະເທດຊາດ. ກົງກັນຂ້າມ ສິ່ງໃດມີລັກສະນະຫັນເປັນແງ່ບໍ່ດີ ເປັນຕົ້ນແມ່ນບັນດາປະກົດການສາສະຫນາຫົວຮຸນແຮງ ໄປຝືນກັບຮີດຄອງປະເພນີອັນດີງາມຂອງຊາດ ຫລື ສວຍໃຊ້ສາສະຫນາເພື່ອເຕົ້າໂຮມກຳລັງ, ໂຄສະນາຕ້ານທຳລາຍລັດ ສສ ຫວຽດນາມ … ແມ່ນການລະເມີດກົດໝາຍ ຫວຽດນາມ.
ຄວາມເສລີດ້ານສາສະຫນາຢູ່ ຫວຽດນາມ: ບັນດາການຫັນປ່ຽນຢ່າງຕັ້ງຫນ້າໃນສະພາບຕົວຈິງ
ວັນທີ 23 ທັນວາ ປີ 2023, ສຳນັກວາຕີກັງ ໄດ້ປະກາດເລື່ອງ ສັງຄະນາຍົກ Marek Zalewski ໄດ້ຮັບການແຕ່ງຕັ້ງຈາກສັນຕະປາປາ Francis ເປັນຜູ້ຕາງຫນ້າຄົນທຳອິດຂອງສຳນັກວາຕີກັງ ປະຈຳຢູ່ ຫວຽດນາມ. ນີ້ແມ່ນໝາກຜົນຂອງວິວັດການປຶກສາຫາລືຢ່າງຕັ້ງຫນ້າບົນຈິດໃຈເຄົາລົບ, ຮ່ວມມື ແລະ ເຂົ້າໃຈ ເຊິ່ງກັນ ແລະກັນ ພ້ອມທັງສະແດງໃຫ້ເຫັນນະໂຍບາຍສະເໝີຕົ້ນສະເໝີປາຍໃນການເຄົາລົບ ແລະ ຮັບປະກັນຄວາມເສລີໃນການເຊື່ອຖື, ສາສະຫນາ, ສ້າງເງື່ອນໄຂສະດວກໃຫ້ແກ່ການເຄື່ອນໄຫວຂອງບັນດາສາສະຫນາ, ໃນນັ້ນ ມີສາສະຫນາ ກາໂຕລິກ ຂອງລັດຫວຽດນາມ.
ລັດ ຫວຽດນາມກໍ່ໄດ້ປະຕິບັດຫລາຍໆມາດຕະການ ເພື່ອສ້າງເງື່ອນໄຂດີກວ່າໃຫ້ແກ່ປະຊາຊົນເຊື່ອຖືສາສາສະຫນານັບລ້ານໆຄົນ. ສະພາແຫ່ງຊາດ ໄດ້ຮັບຮອງເອົາກົດໝາຍວ່າດ້ວຍການເຊື່ອຖື, ສາສະຫນາ ປີ 2016. ລັດຖະບານໄດ້ປະກາດໃຊ້ດຳລັດຫລາຍສະບັບເພື່ອນຳກົດໝາຍເຂົ້າປະຕິບັດໃນຊີວິດ. ພິເສດ ແມ່ນກົດໝາຍວ່າດ້ວຍທີ່ດິນ (ສະບັບປັບປຸງ) ມີຜົນສັກສິດແຕ່ວັນທີ 1 ກໍລະກົດປີນີ້ ຈະປະກອບສ່ວນແກ້ໄຂຄວາມຫຍຸ້ງຍາກດ້ານທີ່ດິນທີ່ກ່ຽວຂ້ອງເຖິງສາສະຫນາ. ໄລ່ມາຮອດປະຈຸບັນດ 70% ຮາກຖານສາສະຫນາໄດ້ຮັບຫນັງສືຢັ້ງຢືນສິດນຳໃຊ້ທີ່ດິນໃນຂອບເຂດທົ່ວປະເທດ. ລັດ ຫວຽດນາມກໍ່ໄດ້ສ້າງເງື່ອນໄຂໃຫ້ບັນດາອົງການສາສະຫນາ ໃນການສ້ອມແປງ, ບູລະນະປະຕິສັງຂອນ ແລະ ກໍ່ສ້າງຮາກຖານສາສະຫນາແຫ່ງໃຫມ່.
 ສາສະນິກກະຊົນ ຖືສາສະຫນາ ກາວດ່າຍ ທຳພິທີການທາງສາສະຫນາຢູ່ ໂບດ ໄຕນິງ. ພາບ: VOV |
ບັນດາວັນບຸນສຳຄັນຂອງສາສະຫນາຕ່າງໆນັ້ນ ລ້ວນແຕ່ໄດ້ຮັບການຈັດຕັ້ງດ້ວຍຂອບຂະຫນາດໃຫຍ່, ດຶງດູດຜູ້ເຊື່ອຖືສາສະຫນາມາເຂົ້າຮ່ວມເປັນຈຳນວນຫລວງຫລາຍ. ປີ 2023, ກະຊວງພາຍໃນ ໄດ້ຮັບຮູ້ຕື່ມອີກ 2 ອົງການສາສະຫນາ. ໄລ່ຮອດຕົ້ນປີນີ້ ລັດ ຫວຽດນາມ ໄດ້ຮັບຮູ້ 43 ອົງການສາສະຫນາ.
ກ່ຽວກັບການພົວພັນກັບສາກົນ, ປີກາຍນີ້ ຕາມການສະຖິຕິຂອງຄະນະສາສະຫນາ ຂອງລັດຖະບານ, ຜູ້ມີຍົດສັກຕຳແຫນ່ງ, ນັກບວດ .. ກວ່າ 300 ຄົນຂອງບັນດາສາສະຫນາໄດ້ເຂົ້າຮ່ວມກອງປະຊຸມ, ກອງປະຊຸມສຳມະນາ, ບັນດາຊຸດບຳລຸງດ້ານສາສະຫນາຢູ່ຕ່າງປະເທດ, ມີຊາວຕ່າງປະເທດເກືອບ 400 ຄົນກໍ່ໄດ້ມາຫວຽດນາມ ເຂົ້າຮ່ວມການເຄື່ອນໄຫວສາສະຫນາ.
ສະພາບຕົວຈິງການເຄື່ອນໄຫວດ້ານສາສະຫນາ ແລະການພັດທະນາຂອງບັນດາສາສະຫນາ ຢູ່ຫວຽດນາມ ເປັນການພິສູດໃຫ້ເຫັນຢ່າງພາວະວິໄສກ່ຽວກັບຄວາມເສລີດ້ານສາສະຫນາຢູ່ຫວຽດນາມ. ຄວາມຈິງນີ້ສະແດງໃຫ້ເຫັນຢ່າງຈະແຈ້ງກ່ຽວກັບສາສະຫນາຢູ່ ຫວຽດນາມ ແມ່ນບໍ່ຄວນອີງໃສ່ບາງກໍລະນີຍ່ອຍ.