(vovworld)- ປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງປີ 2013 ພາຍໃຕ້ຫົວຂໍ້ວ່າ:“ອະລິຍະທຳແມ່ນ້ຳແດງ” ເພື່ອໂຄສະນາ, ເຊື່ອມຕໍ່, ຂຸດຄົ້ນບັນດາຜະລິດຕະພັນທ່ອງທ່ຽວໃນເຂດ ແລະ ທົ່ວປະເທດຢ່າງມີປະສິດທິຜົນ. ນີ້ແມ່ນກາລະໂອກາດເພື່ອໃຫ້ແຕ່ລະທ້ອງຖິ່ນໃນເຂດກຳນົດທິດພັດທະນາການທ່ອງທ່ຽວ, ເພີ່ມທະວີການຮ່ວມສຳພັນລະຫວ່າງເຂດ, ສ້າງຄວາມເປັນຫລາຍຮູບຫລາຍແບບ ແລະ ຄວາມແຕກຕ່າງກັນກ່ຽວກັບການທ່ອງທ່ຽວລະຫວ່າງເຂດທົ່ງພຽງແມ່ນ້ຳແດງ ກັບບັນດາເຂດອື່ນໃນທົ່ວປະເທດ ແລະ ກໍແມ່ນການສ້າງຄວາມແຕກຕ່າງກັນລະຫວ່າງຜະລິດຕະພັນທ່ອງທ່ຽວ ຫວຽດນາມ ກັບບັນດາປະເທດໃນພາກພື້ນ.
ກາດບ່າສະຖານທີ່ທ່ອງທ່ຽວດູດດື່ມ
ພາບ: internet
|
ປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງ 2013 ຊຶ່ງນະຄອນຫາຍຟ່ອງຈັດຕັ້ງຂຶ້ນ, ແມ່ນເງື່ອນໄຂເພື່ອໃຫ້ນະຄອນ ຫາຍຟ່ອງ ແນະນຳບັນດາຜະລິດຕະພັນທ່ອງທ່ຽວໃຫມ່, ຮັບກາລະໂອກາດພັດທະນາ ແລະ ສ້າງບາດກ້າວບຸກທະລຸໃນການຍົກສູງຄຸນນະພາບການບໍລິການ. ຢູ່ ນະຄອນ ຫາຍຟ່ອງ, ບັນດາການເຄື່ອນໄຫວພົ້ນເດັ່ນໃນປີທ່ອງທ່ຽວແຫ່ງຊາດເຂດທົ່ງພຽງແມ່ນ້ຳແດງ 2013 ແມ່ນສຸມໃສ່ຢູ່ເຂດໃຈກາງນະຄອນຫາຍຟ່ອງ ແລະ ໂດ່ເຊີນ, ກາດບ່າ ຊື່ງແມ່ນສະຖານທີ່ທ່ອງທ່ຽວຈຸດສຸມສອງແຫ່ງ. ນີ້ແມ່ນໂອກາດເພື່ອໃຫ້ຫາຍຟ່ອງ ແນະນຳວັດທະນະທຳທີ່ເປັນເອກະລັກສະເພາະຂອງເຂດທົ່ງພຽງແມ່ນ້ຳແດງ ເວົ້າລວມ ແລະ ນະຄອນ ຫາຍຟ່ອງ ເວົ້າສະເພາະ. ທ່ານ ດວານຢີລີງ, ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ຫາຍຟ່ອງ ໃຫ້ຮູ້ວ່າ:
“ຫາຍຟ່ອງ ທັງມີລັກສະນະລວມຂອງເຂດທົ່ງພຽງແມ່ນ້ຳແດງ, ທັງມີລັກສະນະພິເສດສະເພາະຂອງເຂດທະເລ, ດ້ວຍບັນດາປູຊະນີຍະສະຖານວັດທະນະທຳ ປະຫວັດສາດ, ງານບຸນ, ທັດສະນິຍະພາບ, ທຳມະຊາດທີ່ສວຍງາມ, ວັດທະນະທຳອາຫານການກິນ, ໝູ່ບ້ານຫັດຖະກຳ, ການລະຫລິ້ນພື້ນເມືອງທີ່ດູດດື່ມ. ນີ້ເປັນພື້ນຖານເບື້ອງຕົ້ນເພື່ອພັດທະນາການທ່ອງທ່ຽວ, ຫາຍຟ່ອງ ບໍ່ພຽງແຕ່ມີລະບົບຄົມມະນາຄົມທີ່ສະດວກສະບາຍເທົ່ານັ້ນ ຫາກຍັງນອນໃນສະຖານທີ່ທ່ອງທ່ຽວແຫ່ງຊາດ ແລະ ສວມບົດບາດສຳຄັນ ໃນຍຸດທະສາດພັດທະນາການທ່ອງທ່ຽວຂອງເຂດອີກດ້ວຍ.”
ໂດຍກຳໄດ້ກາລະໂອກາດດັ່ງກ່າວ, ບັນດາບໍລິສັດທ່ອງທ່ຽວຢູ່ໃນບໍລິເວນນະຄອນ ໄດ້ເປັນເຈົ້າການໃນການສ້າງ, ປ່ຽນໃຫມ່, ຍົກລະດັບບັນດາຜະລິດຕະພັນທ່ອງທ່ຽວເດີມຂອງນະຄອນຫາຍຟ່ອງ. ໃນນັ້ນ ບໍລິສັດ Viettravel ສາຂາ ຫາຍຟ່ອງ ໄດ້ວາງອອກບັນດາຜະລິດຕະພັນໃຫມ່ ດ້ວຍສານທີ່ວ່າ: “ທ່ອງທ່ຽວທີ່ມີຄວາມຮັບຜິດຊອບຕໍ່ວົງຄະນາຍາດ ແລະ ສິ່ງແວດລ້ອມ”. ເພື່ອເພີ່ມທະວີການຂຸດຄົ້ນບັນດາຜະລິດຕະພັນທ່ອງທ່ຽວທີ່ດູດດື່ມ ແລະ ເປັນເອກະລັກສະເພາະຂອງ ຫາຍຟ່ອງຢ່າງມີປະສິດທິຜົນ, ດຶງດູດຈຳນວນນັກທ່ອງທ່ຽວສາກົນຢູ່ບັນດາຕະຫລາດຈຸດສຸມໃນເຂດທົ່ງພຽງແມ່ນ້ຳແດງ ກໍຄືນັກທ່ອງທ່ຽວພາຍໃນປະເທດມາຢ້ຽມຢາມ ຫາຍຟ່ອງ, ບໍລິສັດ Saigontourist ສາຂາ ຫາຍຟ່ອງ ຍູ້ແຮງການເຄື່ອນໄຫວສົ່ງເສີມ, ໂຄສະນາພາບພົດ, ເຄື່ອງໝາຍການຄ້າ, ວາງອອກ 8 ຜະລິດຕະພັນທ່ອງທ່ຽວໃຫມ່ ເພື່ອໂຄສະນາເຖິງນັກທ່ອງທ່ຽວພາຍໃນ ແລະ ຕ່າງປະເທດ. ບັນດາຜະລິດຕະພັນທ່ອງທ່ຽວຂອງ ຫາຍຟ່ອງ ທີ່ໄດ້ຮັບການຂຸດຄົ້ນຈາກບໍລິສັດທ່ອງທ່ຽວຕ່າງໆນັ້ນແມ່ນ ທ່ອງທ່ຽວຊີວະພາບ, ທ່ອງທ່ຽວວົງຄະນາຍາດ, ທ່ອງທ່ຽວມີຄວາມຮັບຜິດຊອບ ຫລື ທ່ອງທ່ຽວພະຈົນໄພ. ລາຍການທ່ອງທ່ຽວ ຫາຍຟ່ອງ - ກາດບ່າ ແມ່ນລາຍການທ່ອງທ່ຽວທີ່ເປັນເອກະລັກສະເພາະ ເຊິ່ງໄດ້ສ້າງຄວາມດູດດື່ມໃຫ້ແກ່ນັກທ່ອງທ່ຽວເມື່ອມາຢ້ຽມຢາມ ຫາຍຟ່ອງ. ທ່ານ ບູ່ຍຈູງເຫງ໋ຍ, ປະທານຄະນະກຳມະການປະຊາຊົນ ເມືອງ ກາດບ່າ, ນະຄອນ ຫາຍຟ່ອງໃຫ້ຮູ້ວ່າ:
“ໃນຊຸມປີມໍ່ໆມານີ້ ກໍມີບາງຮູບການທ່ອງທ່ຽວພະຈົນໄພໄດ້ຮັບການພັດທະນາຢູ່ ກາດບ່າຄື ປີນພູ ແລະ ດຳນ້ຳ. ປະຈຸບັນ ລາຍການທ່ອງທ່ຽວດຳນ້ຳພຽງດຳເນີນດ້ວຍຂະໜາດນ້ອຍເທົ່ານັ້ນ. ນະຄອນ ຫາຍຟ່ອງ ພວມຜັນຂະຫຍາຍໂຄງການປີນພູຢູ່ຕາແສງ ອຽນມີງ ດ້ວຍຂອບຂະຫນາດໃຫຍ່. ຢູ່ບໍລິເວນ ອ່າວ ລານຫ້າ ທັງມີສິ່ງແວດລ້ອມ, ທັດສະນີຍະພາບສວຍງາມ ແລະ ເໝາະສົມກັບການພາຍເຮືອເພື່ອຄົ້ນຫາ. ”
ອ່າວ ລານຫ້າ
ພາບ:internet
|
ເພື່ອຕອບສະຫນອງຄວາມຕ້ອງການໄປມາຢ່າງສະດວກໃຫ້ແກ່ນັກທ່ອງທ່ຽວເມື່ອມາຢ້ຽມຢາມ ກາດບ່າ, ຫາຍຟ່ອງ, ທາງນະຄອນພວມຮີບເຮັ່ງປັບປຸງພາຫະນະຂົນສົ່ງ. ທ່ານ ດວານຢີລີງ, ຫົວຫນ້າພະແນກວັດທະນະທຳ ກິລາ ແລະ ທ່ອງທ່ຽວ ນະຄອນຫາຍຟ່ອງໃຫ້ຮູ້ຕື່ມອີກວ່າ:
“ຫນຶ່ງໃນບັນດາປັດໄຈສຳຄັນນັ້ນແມ່ນ, ບັນດາບໍລິການຫນູນຊ່ວຍຄື: ຂົນສົ່ງຕ້ອງຖືເປັນສຳຄັນ. ພິເສດ ເມື່ອນັກທ່ອງທ່ຽວຢ້ຽມຢາມນະຄອນ ຫາຍຟ່ອງ ຈະມີລາຍການທ່ອງທ່ຽວອັນດູດດື່ມ ນັ້ນແມ່ນຈາກນະຄອນ ຫາຍຟ່ອງ ໄປກາດບ່າ. ປະຈຸບັນ, ການເດີນທາງໃນເມືອງກາດບ່າ ຍັງເສຍເວລາຫລາຍຢູ່, ແຕ່ໃນໄລຍະຈະມາເຖິງ ເພື່ອແກ້ໄຂຈຸດອ່ອນນີ້, ບັນດາຫົວຫນ່ວຍຂົນສົ່ງ ໄດ້ປະກອບກຳປັ່ນດ່ວນ ເພື່ອຫລຸດຜ່ອນເວລາໄປມາຈາກ 2 ຊົ່ວໂມງ ລົງເຫລືອພຽງ 30 ນາທີ. ”
ບໍ່ພຽງແຕ່ສ້າງບັນດາຜະລິດຕະພັນທ່ອງທ່ຽວໃຫມ່ ຢູ່ ຫາຍຟ່ອງ ເທົ່ານັ້ນ, ບັນດາທ້ອງ ຖິ່ນໃນເຂດທົ່ງພຽງແມ່ນ້ຳແດງຄື: ຮ່າໂນ້ຍ, ຮືງອຽນ, ນາມດີ້ງ, ທາຍບີ່ງ, ຫວີງຟຸກ ຍັງສຸມໃສ່ສ້າງບັນດາຜະລິດຕະພັນທ່ອງທ່ຽວໃຫມ່ອີກດ້ວຍ. ປີທ່ອງທ່ຽວແຫ່ງຊາດ 2013 ແມ່ນໂອກາດເພື່ອໃຫ້ແຕ່ລະທ້ອງຖິ່ນໃນເຂດທົ່ງພຽງແມ່ນ້ຳແດງ ກຳນົດທິດພັດທະນາການທ່ອງທ່ຽວ, ສ້າງຜະລິດຕະພັນທ່ອງທ່ຽວທີ່ແຕກຕ່າງກັນ. ສະນັ້ນ ນີ້ພວມແມ່ນຈຸດເວລາເພື່ອໃຫ້ບັນດາວິສາຫະກິດຍາດແຍ່ງກາລະໂອກາດຂຸດຄົ້ນ ແລະ ເສີມຂະຫຍາຍຄວາມສາມາດບົ່ມຊ້ອນກ່ຽວກັບການທ່ອງທ່ຽວ, ຄຸນຄ່າສະຖານທີ່ທ່ອງທ່ຽວ. ບໍລິສັດ Saigon Tourist ຍູ້ແຮງການຂຸດຄົ້ນລາຍການທ່ອງທ່ຽວປີທ່ອງທ່ຽວແຫ່ງຊາດລະຫວ່າງບັນດາແຂວງ, ນະຄອນ ຮ່າໂນ້ຍ, ຮ້າລອງ, ນີງບີ່ງ, ກາດບ່າ, ຫາຍຟ່ອງ ແລະ ຊາປາ. ບໍລິສັດ Viettravel ມີບັນດາລາຍການທ່ອງທ່ຽວພາຍໃນຕົວເມືອງ, ທ່ອງທ່ຽວຢ້ຽມຢາມເຂດບ້ານນາ, ຄົ້ນຫາປ່າດົ່ງດີບເກາະ ເຢົາ, ທ່ອງທ່ຽວເພື່ອສີຂຽວເຂດທະເລ ແລະ ໝູ່ເກາະ.
ຫາຍຟ່ອງ ປາດຖະຫນາວ່າ ບັນດາການເຄື່ອນໄຫວໂຄສະນາປີທ່ອງທ່ຽວແຫ່ງຊາດຢ່າງແຂງແຮງ ກໍຄືບັນດາຜະລິດຕະພັນທ່ອງທ່ຽວທີ່ເປັນເອກະລັກສະເພາະຂອງນະຄອນກຳປັ່ນ ຈະດຶງດູດນັກທ່ອງທ່ຽວສາກົນມາຢ້ຽມຢາມນະຄອນກວ່າ 10%. ປະຈຸບັນ ນັກທ່ອງທ່ຽວສາກົນ ມາຢ້ຽມຢາມ ຫາຍຟ່ອງ ຍັງຄົງກວມອັດຕາສ່ວນຈຳກັດຢູ່, ສະເລ່ຍ ບັນລຸພຽງ 400.000- 500.000 ເທື່ອຄົນໃນຍອດຈຳນວນແຂກມາຢ້ຽມຢາມນະຄອນ ຫາຍຟ່ອງໃນແຕ່ລະປີ 3,6 ລ້ານເທື່ອຄົນ.