(vovworld) – ຊາວຊົນເຜົ່າເວິນກ່ຽວ ຢູ່ແຂວງກວາງຈີ້ ແມ່ນຊົນເຜົ່າໜຶ່ງດຽວຢູ່ຫວຽດນາມ ທີ່ຖືສະກຸນ ໂຮ່ ຂອງປະທານ ໂຮ່ຈີມິນ ເປັນສະກຸນໃຫ້ທັງຊົນເຜົ່າຂອງຕົນ. ເລື່ອງຖືສະກຸນ ໂຮ່ ຂອງຊາວເຜົ່າເວິນກ່ຽວ ສະແດງໃຫ້ເຫັນຄວາມຮູ້ບຸນຄຸນຂອງເຂົາເຈົ້າທີ່ມີຕໍ່ການປະຕິວັດ ແລະ ປະທານ ໂຮ່ຈີມິນ, ຜູ້ທີ່ໄດ້ນຳເອົາຊີວິດທີ່ອີ່ມໜຳສຳລານ ແລະ ຄວາມຜາສຸກມາໃຫ້ຊາວເວິນກ່ຽວ. ປະຈຸບັນ, ຊາວເວິນກ່ຽວ ພວມຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານ ໂຮ່ຈີມິນ ຜ່ານວຽກງານທຳມະດາສາມັນ ປະຈຳວັນ.
ຊາວເຜົ່າເວິນກ່ຽວຢູ່ແຂວງກວາງຈີ້
ເລື່ອງລາວກ່ຽວກັບລະດູຮ້ອນປີ 1964, ເຊິ່ງຊາວເວິນກ່ຽວ ຢູ່ແຂວງກວາງຈີ້ ຜູ້ໃດກໍ່ຮູ້ຈັກເຖິງນັ້ນແມ່ນ, ໃນປີນັ້ນ, ຢູ່ເຂດຕໍ່ຕ້ານຫວຽດບັກ, ປະທານ ໂຮ່ຈີມິນ ໄດ້ຈັດພະນັກງານໄປຢື້ນຢາມຖາມຂ່າວຊາວຊົນເຜົ່າເວິນກ່ຽວ ຢູ່ແຂວງກວາງຈີ້ ແລະ ຊາວເຜົ່າອື່ນໆອີກ. ຄະນະພະນັກງານໄດ້ນຳເອົາຮູບພາບປະທານ ໂຮ່ຈີມິນ ຫຼາຍແຜ່ນມາມອບໃຫ້ຊາວເຜົ່າຢູ່ບັນດາໝູ່ບ້ານທີ່ຫ່າງໄກສອກຫຼີກ, ມອບເສື້ອໃຫ້ຜູ້ທີ່ມີອາຍຸຍື່ນກວ່າ 90 ປີ. ປະຊາຊົນເວີນກ່ຽວ ໄດ້ຈັດໃຫ້ເຈົ້າບ້ານລົງຕີນພູ ກອກລາປັງຊອງ ເພື່ອຈັດພິທີສາບານ. ເມື່ອກອງໄຟຖືກດັງຂຶ້ນ, ຊາວເວີນກ່ຽວ ກໍ່ປ່ຽນມືກັນຖ້ວຍເຫຼົ້າ, ສາບານກັບຟ້າ, ກັບພູຜາປ່າໄມ້ທີ່ໃຫຍ່ໂຕມະໂຫຖານວ່າ, ຊາວເວິນກ່ຽວ ແລະ ຊາວເຜົ່າອື່ນໆ ຈະໄປຕາມການປະຕິວັດ, ໄປຕາມປະທານ ໂຮ່ຈີມິນ ຕະຫຼອດໄປ. ໃນພິທີຮ່ວມສາບານ. ເຈົ້າກົກເຈົ້າເຫຼົ່າ ແລະ ປະຊາຊົນທັງບ້ານລ້ວນແຕ່ເຫັນດີຖືສະກຸນ ໂຮ່ ເປັນສະກຸນລວມໃຫ້ວົງຄະນາຍາດຊາວເຜົ່າເວິນກ່ຽວ. ຄຳສາບານທ່າມກາງພູຜາປ່າໄມ້ນັ້ນ ໄດ້ກະຕຸກຊຸກຍູ້ລູກຫຼານຊົນເຜົ່າເວິນກ່ຽວ ຫຼາຍຄົນໄປຕາມການປະຕິວັດ.
ເມື່ອໄດ້ຮັບສັນຕິພາບ, ກໍ່ເຊັ່ນດຽວກັບຊົນເຜົ່າອື່ນໆ, ຊາວເວິນກ່ຽວໄດ້ຮ່ວມແຮງຮ່ວມໃຈກໍ່ສ້າງປະເທດຄືນໃໝ່. ໃນເບື້ອງຕົ້ນເຂົາເຈົ້າຊິນເຄີຍກັບການຜະລິດແບບເຄື່ອນທີ່, ແຕ່ປະຈຸບັນ, ຊາວເວິນກ່ຽວ ບໍ່ພຽງແຕ່ຮູ້ຈັກເຖິງການເຮັດເຂົ້ານາທາມເທົ່ານັ້ນ, ຫາກຍັງຮູ້ສ້າງເສດຖະກິດຟາມ, ລ້ຽງສັດດ້ວຍຂະໜາດໃຫຍ່ອີກດ້ວຍ. ຄວາມທຸກຍາກຖືກລົບລ້າງເທື່ອລະກ້າວ, ປະຊາຊົນຮ່ວມແຮງຮ່ວມໃຈ, ຊ່ວຍເຫຼືອກັນພັດທະນາເສດຖະກິດຄອບຄົວ. ທ່ານ ໂຮ່ແທງບິ່ງ, ເຈົ້າກົກບ້ານກາຕັງ, ເທດສະບານລາວບາວ, ໃຫ້ຮູ້ວ່າ:
“ໂດຍຮຳ່ຮຽນຕາມແບບຢ່າງຄຸນສົມບັດປະທານ ໂຮ່ຈີມິນ, ເມື່ອຮອດເດືອນ 5 ຂອງທຸກປີ, ພວກເຮົາກໍ່ດຳເນີນການໂຄສະນາໃຫ້ພໍ່ແມ່ປະຊາຊົນ. ພວກເຮົາເຮັດໄຮ່, ປູກກ້ວຍ, ປູກຕົ້ນໄມ້ແມ່ນຕາມການແນະນຳຂອງການປະຕິວັດ. ປະທານ ໂຮ່ຈິມິນ ໄດ້ເວົ້າວ່າ, ຖ້າບໍ່ພະຍາຍາມຜ່ານຜ່າຄວາມຫຍຸ້ງຍາກ, ຊີວິດຂອງປະຊາຊົນຈະທຸກຍາກ ແລະ ສັບສົນກວ່າອີກ. ເມື່ອປະຕິບັດຕາມຄຳສັ່ງສອນຂອງປະທານ ໂຮ່ຈີມິນ ຊີວິດຂອງເຂົາເຈົ້າກໍ່ດີຂຶ້ນ, ກ່ອນນີ້ມີແຕ່ເຮືອນມຸ່ງຫຍ້າ, ແຕ່ປະຈຸບັນລ້ວນແຕ່ແມ່ນເຮືອນຕຶກ. ແຕ່ລະປີເມື່ອຈັດການປະຊຸມ, ໂຄສະນາກ່ຽວກັບການຮຳ່ຮຽນຕາມແບບຢ່າງຄຸນສົມບັດປະທານ ໂຮ່ຈີມິນ ເຂົ້າເຈົ້າກໍ່ມາຮ່ວມເປັນຈຳນວນຫຼວງຫຼາຍ“.
ຊາວເວິນກ່ຽວເຮັດເສດຖະກິດ ຊາວເວິນກ່ຽວ ຢູ່ລາວບາວມີຄວາມຕັດສິນໃຈສູງ, ບໍ່ມີໃຜຍອມດຳລົງຊີວິດໃນຄວາມທຸກຍາກ, ເຂົາເຈົ້າຊ່ວຍເຫຼືອກັນ, ແບ່ງປັນບົດຮຽນໃນການລ້ຽງສັດ, ປູກຝັງ, ການຄ້ານຳກັນ. ເອື້ອຍ ຫງວຽນທິທູຮ່ຽນ, ພະນັກງານສະມາຄົມແມ່ຍິງເທດສະບານລາວບາວ, ໃຫ້ຮູ້ວ່າ:
“ພວກຂ້າພະເຈົ້າຜັນຂະຫຍາຍວຽກງານຜ່ານການປະຊຸມ ແລະ ຫັນເປັນລະອຽດຜ່ານຮູບແບບຕ່າງໆ ໂດຍອີງໃສ່ສະພາບຕົວຈິງຢູ່ທ້ອງຖີ່ນເພື່ອນຳໃຊ້ໃຫ້ເໝາະສົມ. ປະຈຸບັນ, ແມ່ຍິງມີການເຄື່ອນໄຫວຫຼາຍຢ່າງໃນການຊ່ວຍເຫຼືອກັນພັດທະນາເສດຖະກິດ, ຫຼຸດຜ່ອນຄວາມທຸກຍາກຢ່າງໝັ້ນຄົງ, ເຂົ້າຮ່ວມການປະຢັດ, ລ້ຽງດູສັ່ງສອນລູກເຕົ້າ, ສ້າງຄອບຄົວໃຫ້ມີຄວາມ ສຸກ. ຢູ່ບ້ານແຄດ໋າ ມີຮູບແບບແມ່ຍິງຊ່ວຍເຫຼືອກັນພັດທະນາເສດຖະກິດ, ຫຼຸດຜ່ອນຄວາມທຸກຍາກແບບຍືນຍົງ, ຢູ່ເງ້ຍຈຸງ, ເຕິນກິມ ມີຮູບແບບປູກຜັກປອດສານພິດ...“
ຍ້ອນຕັ້ງໜ້າຮຳ່ຮຽນ, ມີຫຼາຍຄອບຄົວຊາວເຜົ່າເວິນກ່ຽວ ຈຶ່ງຮັບປະກັນເສດຖະກິດຄອບຄົວ, ແຕ່ລະປີສ້າງລາຍຮັບໄດ້ນັບສິບລ້ານດົ່ງ. ພິເສດແມ່ນຄອບຄົວເຈົ້າກົກ ໂຮ່ເມີ, ຢູ່ຕາແສງອາເຢີຍ ພັດທະນາເສດຖະກິດດ້ວຍການປູກປ່າ, ສົມທົບກັບການລ້ຽງສັດ, ປູກກາເຟ, ແຕ່ລະປີສ້າງລາຍຮັບໄດ້ 50 ລ້ານກວ່າດົ່ງ. ຫຼືຄອບຄົວອ້າຍ ໂຮ່ບ໋ານຸກ, ຄອບຄົວເອື້ອຍ ໂຮ່ທິຮວາ ຢູ່ເຮື໋ອງໂລກ, ຍ້ອນພັດທະນາການລ້ຽງສັດ, ປູກຝັງ, ແຕ່ລະປີສ້າງກຳໄລໄດ້ 30 ລ້ານກວ່າດົ່ງ… ຄອບຄົວທ່ານ ໂຮ່ແທງບິ່ງ, ກໍ່ນຳໜ້າໃນຂະບວນການພັດທະນາເສດຖະກິດປູກປ່າ, ເຮັດເສດຖະກິດຟາມ, ແຕ່ລະປີສ້າງລາຍຮັບໄດ້ປະມານ 200 ລ້ານກວ່າດົ່ງ. ທ່ານໃຫ້ຮູ້ວ່າເສດຖະກິດຂອງປະຊາຊົນໃນບ້ານໄດ້ດີກວ່າເກົ່າຫຼາຍ.
“ເມື່ອຄິດໄລ່ບໍ່ຖືກ, ການອອກແຮງງານຈະບໍ່ໄດ້ຮັບຜົນ. ປະຈຸບັນ, ປະຊາຊົນຫຼາຍຄົນໄດ້ເຮັດຕາມການແນະນຳ. ຂ້າພະເຈົ້າກໍ່ແບ່ງປັນບົດຮຽນໃນການປູກເຂົ້າໃຫ້ແກ່ເຂົາເຈົ້າ. ກ່ອນນີ້ປູກເຂົ້າໃນເນື້ອທີ່ 1 ເຮັກຕາ ມີແຕ່ເກັບກ່ຽວເຂົ້າໄດ້ພຽງ 500 ກິໂລກຼາມເທົ່ານັ້ນ, ແຕ່ປະຈຸບັນຫັນມາປູກກ້ວຍ, ແຕ່ລະປີສ້າງລາຍຮັບໄດ້ 70 ລ້ານກວ່າດົ່ງ“.
ປະຈຸບັນ, ຊາວເຜົ່າເວິນກ່ຽວ ບໍ່ທຸກຍາກຄືແຕ່ກ່ອນອີກ, ຍ້ອນຕັ້ງໜ້າຮຳ່ຮຽນ ແລະ ປະຕິບັດຕາມແບບຢ່າງຄຸນສົມບັດປະທານໂຮ່ຈີມິນ, ປະຊາຊົນໄດ້ຮູ້ຈັກເຖິງການປູກນາທາມ, ຮູ້ນຳໃຊ້ອຸປະກອນທຳການຜະລິດ ແລະ ປູກຜັກຊະນິດຕ່າງໆທີ່ໃຫ້ສະມັດຕະພາບສູງ; ຮູ້ຂຸດໜອງລ້ຽງປາ, ພັດທະນາເສດຖະກິດຄອບຄົວ ແລະ ສອນລູກເຕົ້າໃຫ້ກາຍເປັນຄົນດີອີກດ້ວຍ.