(vovworld) - ລ້າງເຊີນ ແມ່ນແຂວງໜຶ່ງຢູ່ເຂດຕາເວັນອອກສ່ຽງເໜືອຫວຽດນາມ. ຢູ່ທີ່ນີ້ໃນແຕ່ລະປີເຄີຍດຳເນີນງານບຸນລົງທົ່ງທີ່ເປັນມູນເຊື້ອຂອງຊາວເຜົ່າໄຕ. ງານບຸນເລີ່ມດຳເນີນແຕ່ວັນທີ 4 ຂອງບຸນເຕັດເຖິງວັນທີ 30 ເດືອນຈຽງ ເພື່ອເປີດສາກໃຫ້ລະດູການປູກຝັງໃໝ່. ໃນໄລຍະເວລານີ້, ງານບຸນລົງທົ່ງຖືກຈັດຂຶ້ນຢູ່ແຕ່ລະບ້ານ, ຕາແສງຂອງຊາວເຜົ່າໄຕຢ່າງຟົດຟື້ນມ່ວນຊື່ນ.
ງານບຸນລົງທົ່ງ
ງານບຸນລົງທົ່ງຫຼືເອີ້ນວ່າງານບຸນພາວະນາໃຫ້ລະດູການເກັບກ່ຽວໄດ້ຮັບຜົນດີຂອງຊາວເຜົ່າໄຕຢູ່ແຂວງລ້າງເຊີນ ແມ່ນງານບຸນທີ່ໄດ້ຮັບຄວາມຄອຍຖ້າທີ່ສຸດໃນປີ. ຜູ້ໃດທີ່ມີໂອກາດເຂົ້າຮ່ວມງານບຸນລົງທົ່ງແລ້ວ ແມ່ນບໍ່ອາດຫຼົງລືມບັນຍາກາດຟົດຟື້ນມ່ວນຊື່ນຂອງງານບຸນໄດ້. ຊາວບ້ານນັບແຕ່ຜູ້ເຖົ້າ, ຜູ້ແກ່ຕະຫຼອດຮອດເດັກນ້ອຍລ້ວນແຕ່ນຸ່ງຊຸດອາພອນສວຍງາມທີ່ສຸດ, ເຂົາເຈົ້າເຕົ້າໂຮມກັນ, ພ້ອມກັນລະຫຼິ້ນໃນເດີນທີ່ກວ້າງຂວາງຂອງບ້ານ. ທ່ານ ຮ່ວາງມີ໋ລ່ານ, ປະທານຕາແສງແທງຮ່ວາ, ເມືອງອຽນລ້າງ, ໃຫ້ຮູ້ວ່າ:
“ສຳລັບຊາວເຜົ່າໄຕຢູ່ລ້າງເຊີນ ແລ້ວ, ງານບຸນລົງທົ່ງແມ່ນງານບຸນຖືກຈັດຂຶ້ນເພື່ອແຈ້ງຜົນງານແຫ່ງການຜະລິດໃນປີຜ່ານມາກັບເທວະກະສີກຳ, ພ້ອມທັງຂໍເທວະກະສີກຳບັນດານໃຫ້ທຸກສິ່ງທຸກຢ່າງດີທີ່ສຸດແກ່ຂະແໜງກະສີກຳ, ຂໍໃຫ້ດິນຟ້າອາກາດໃນປີໃໝ່ເອື້ອອຳນວຍຄວາມສະດວກ, ສັດສາວາສິ່ງຈະເລີນພັນ, ມະນຸດມີສຸຂະພາບເຂັ້ມແຂງ. ຜ່ານງານບຸນ ໄດ້ຢືນຢັນໃຫ້ເຫັນຈິດໃຈຂອງຊາດ, ຄວາມສາມັກຄີຂອງຊາວເຜົ່າ“.
ງານບຸນຖືກຈັດຂຶ້ນຢູ່ເຂດທົ່ງນາທີ່ກວ້າງຂວາງ ໃນວັນບຸນ, ປະຊາຊົນຕາແສງແທງຮ່ວາ ຕ່າງກໍ່ເຂົ້າຮ່ວມພິທີ. ຄອບຄົວໃດກໍ່ຈັດພາເຂົ້າບູຊາເທວະດາທີ່ດິນ, ເທວະດາພູ, ເທວະກະສີກຳ ແລະ ອໍລະຫັນ. ເຄື່ອງຂອງບູຊາມີເຂົ້າໜຽວ, ເຫຼົ້າຂາວ ແລະ ເຂົ້າໜົມຫຼາຍປະເພດ… ແຕ່ໄກ່ຕອນລວກ, ຊີ້ນໝູປິ່ນ, ເຂົ້າໜຽວ, ເຂົ້າຕົ້ມ… ແມ່ນຂາດບໍ່ໄດ້. ເຄື່ອງຂອງບູຊາແຕ່ລະຢ່າງທີ່ຖະຫວາຍຂຶ້ນເທວະກາ ລ້ວນແຕ່ມີຄວາມໝາຍສະແດງໃຫ້ເຫັນການພົວພັນລະຫວ່າງດິນ, ຟ້າ, ກໍ່ຄືຜົນງານຂອງປະຊາຊົນ ເພື່ອສະແດງຄວາມຮູ້ບຸນຄູນຕໍ່ເທວະດາຟ້າແຖນ ທີ່ຍາມໃດກໍ່ດົນບັນດານ, ປົກປ້ອງ, ອຸ້ມຊູຊ່ວຍເຫຼືອ, ສ້າງຄວາມສະດວກເພື່ອໃຫ້ການຜະລິດໄດ້ຮັບຜົນດີ, ປະຊາຊົນຢູ່ເຢັນເປັນສຸກ. ງານບຸນລົງທົ່ງຖືກຈັດຂຶ້ນຢູ່ກາງແຈ້ງ, ໃນທົ່ງນາຄັນໃຫຍ່ທີ່ມີຄວາມສະດວກທຸກຢ່າງ. ທ່ານ ຮ່ວາງມີ໋ລ໋ານ, ໃຫ້ຮູ້ວ່າ:
“ໃນວັນບຸນ, ເຮົາຕ້ອງໄຖນາເປັນສັນຍາລັກໃຫ້ປີໃໝ່, ຕ້ອງເລືອກເຟັ້ນຜູ້ເຮັດວຽກງານກະສີກຳໄດ້ດີໃນປີຜ່ານມາເປັນຜູ້ໄຖ. ເພື່ອເຮັດໃຫ້ວຽກງານກະສີກຳໃນປີໃໝ່ສະດວກສະບາຍ ແລະ ຮັບຜົນດີ“.
ການໄຖນາເປີດສາກໃຫ້ງານບຸນ
ພາຍຫຼັງໄຂງານບຸນດ້ວຍພິທີໄຖນາທີ່ເປັນສັນຍາລັກແລ້ວ ແມ່ນການລະຫຼິ້ນໂຍນໝາກຄອນ. ບັນດາໝາກຄອນນ້ອຍໆເຕັມໄປດ້ວຍສີສັນຫຼາກຫຼາຍຖືກໂຍນຂຶ້ນປາຍຕົ້ນໄມ້ໄຜ່. ບ່າວສາວພ້ອມກັນໂຍນໝາກຄອນ ແລະ ລໍຖ້າຢາກຈັບໄດ້ໝາກຄອນແຫ່ງຄວາມຮັກຈາກແຟນຂອງຕົນ. ຍ້ອນເຫດນັ້ນວັນບຸນລົງທົ່ງຍັງແມ່ນໂອກາດເພື່ອໃຫ້ບ່າວສາວສະແດງຄວາມຮັກ, ໃຫ້ຄຳໝັ້ນສັນຍານຳກັນອີກ. ທ່ານ ເລືອງກວົກຈິງ, ຕາແສງແທງຮ່ວາ, ໃຫ້ຮູ້ວ່າ:
“ຊາວໜຸ່ມຊົນເຜົ່າລໍຖ້າຮອດງານບຸນເພື່ອພົບປະກັນ, ນັດພົບກັນ. ເຂົາເຈົ້ານຸ່ງຊຸດອາພອນປະຈຳເຜົ່າ, ທັງຂັບຮ້ອງ, ທັງໂອ້ລົມກັນຢ່າງເບີກບານມ່ວນຊື່ນ. ສຳລັບຜູ້ສ້າງຄອບຄົວແລ້ວນີ້ກໍ່ແມ່ນໂອກາດເພື່ອໃຫ້ເຂົາເຈົ້າພົບກັບແຟນເກົ່າ“.
ໃນງານບຸນບ່າວສາວມັກໂຍນໝາກຄອນ
ປະຊາຊົນໃນໝູ່ບ້ານເບີກບານມ່ວນຊື່ນ ແລະ ເມົາມົວກັບການລະຫຼິ້ນຫຼາຍຢ່າງເຊັ່ນ: ແຫ່ຄັນທຸງ, ຍ່າງຂາໂຢກເຢກ, ຕີໄກ່, ດຶງເຊືອກ, ຫຼິ້ນອົ່ນລົ່ນຊາ, ໃນນັ້ນຟົດຟື້ນກວ່າໝູ່ແມ່ນການຟ້ອນສິງໂຕ. ທ່ານມີ໋ລ່ານ, ໃຫ້ຮູ້ວ່າ, ຖ້າບໍ່ມີຟ້ອນສິງໂຕຈະບໍ່ແມ່ນບຸນລົງທົ່ງ,
“ໃນງານບຸນລົງທົ່ງຕ້ອງມີການຟ້ອນສິງໂຕ. ໂຕສິງສະແດງໃຫ້ເຫັນກຳລັງແຮງຂອງອະພິທຳມະຊາດ. ຟ້ອນສິງໂຕແມ່ນເພື່ອຂໍໂຊກຂໍໄຊ, ຂໍມີສຸຂະພາບເຂັ້ມແຂງ, ຂ້າສັດຕູພືດ, ນຳມາເຊິ່ງສິ່ງທີ່ດີງາມ, ລົບລ້າງຄວາມຊົ່ວຮ້າຍ“.
ຟ້ອນສິງໂຕໃນງານບຸນລົງທົ່ງ ງານບຸນລົງທົ່ງ ຖືກຈັດຂຶ້ນໃນຍາມລະດູບານໃໝ່, ລະດູແຫ່ງຄວາມໄຝ່ຝັນ, ລໍຄອຍ. ລະດູບານໃໝ່ປີນີ້, ເມື່ອມາຢ້ຽມຢາມລ້າງເຊີນ, ນັກທອງທ່ຽວຈະໄດ້ເຂົ້າຮ່ວມການລະຫຼິ້ນພື້ນເມືອງທີ່ເປັນເອກະລັກສະເພາະຂອງງານບຸນລົງທົ່ງ ແລະ ໄດ້ເຈືອຈານໃນທີວທັດທຳມະຊາດ, ພູຜາປ່າໄມ້ທີ່ສວຍງາມ, ບັນດາໝູ່ບ້ານທີ່ເຕັມໄປດ້ວຍນຳ້ໝອກ, ເຊິ່ງແມ່ນບ່ອນດຳລົງຊີວິດຂອງຊາວເຜົ່າໄຕຢູ່ແຂວງລ້າງເຊີນ. ງານບຸນລົງທົ່ງໄດ້ສ້າງຄວາມປະທັບໃຈໃຫ້ແຂກທ່ອງທ່ຽວທີ່ມາຈາກທຸກສາລະທິດ ແລະ ຄິດວ່າຮອດລະດູບານໃໝ່ປີໜ້າ, ເຂົາເຈົ້າກໍ່ຈະກັບມາເຂົ້າຮ່ວມງານບຸນລົງທົ່ງອີກ.