(vovworld) - ພິທີພາວະນາຂໍຄວາມຢູ່ເຢັນເປັນສຸກ ຫຼືເອີ້ນວ່າ puh ho drih, ແມ່ນໜຶ່ງໃນບັນດາງານບຸນທີ່ເປັນມູນເຊື້ອມາແຕ່ບູຮານ, ງານບຸນກ່ຽວຂ້ອງເຖິງມະນຸດ ແລະ ລະດູການເກັບກ່ຽວ ເຊິ່ງຖືກຈັດຂຶ້ນດ້ວຍຄວາມປາດຖະໜາຢາກໃຫ້ຊາວບ້ານມີສຸຂະພາບເຂັ້ມແຂງ, ມີຄວາມອິ່ມໜຳສຳລານ, ຢູ່ເຢັນເປັນສຸກ, ຫຼີກເວັ້ນສົງຄາມ, ໂລກລະບາດ, ຍູ້ໂຊກຮ້າຍ, ໄພພິບັດໃຫ້ຖອຍໄປ
ງານບຸນພາວະນາຂໍໃຫ້ຊີວິດຢູ່ເຢັນເປັນສຸກຂອງຊາວເຜົ່າບານາຢູ່ແຂວງຢາລາຍ
ງານບຸນພາວະນາຂໍໃຫ້ຊີວິດຢູ່ເຢັນເປັນສຸກຂອງຊາວເຜົ່າບານາ
ທີ່ຈັດຂຶ້ນຢູ່ບ້ານວັດທະນະທຳ - ທ່ອງທ່ຽວບັນດາເຜົ່າຫວຽດນາມ (ດົ່ງໂມ, ເຊີນໄຕ, ຮ່າໂນ້ຍ) ຫວ່າງແລ້ວນີ້, ໄດ້ຮັບການຮັບຮູ້ຈາກປະຊາຊົນ ແລະ ນັກທ່ອງທ່ຽວເປັນຈຳຫຼວງຫຼາຍວ່າແມ່ນງານບຸນທີ່ມີຊີວິດຊີວາ ແລະ ເປັນເອກະລັກສະເພາະ. ງານບຸນນີ້ຖືກຈັດຂຶ້ນໃນຂອບເຂດຊຸມວັນ “ມະຫາສາມັກຄີອາຊຽນ - ວິໄສທັດ, ສີສັນ, ປະຊາຄົມດຽວ“ ໂດຍກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມ ຈັດຕັ້ງແຕ່ວັນທີ 20-24/11. ຕາມປົກກະຕິ, ງານບຸນນີ້ຖືກຈັດຂຶ້ນໃນເດືອນ 11, 12, ພາຍຫຼັງການເກັບກ່ຽວສຳເລັດ. ນັກສິລະປະການ ອາທຸດ, ຢູ່ຕາແສງເຮີມອງ, ເມືອງຊາໄທ່, ແຂວງກອນຕຸມ, ໃຫ້ຮູ້ວ່າ. ນີ້ແມ່ນງານບຸນທີ່ມີມາແຕ່ດົນນານແລ້ວ. ງານບຸນເລີ່ມມາຈາກເຫດໝູ່ບ້ານຊາວເຜົ່າບານາ ຖືກໂລກລະບາດ, ເຮັດໃຫ້ຊາວບ້ານຫຼາຍຄົນເສຍຊີວິດ, ດັ່ງນັ້ນປະຊາຊົນຈຶ່ງຈັດພິທີບູຊາເທວະດາ, ພາວະນາຂໍໃຫ້ເທວະດາຍູ້ຜີສາງໃຫ້ຖອຍໄປ. ນັກສິລະປະການ ອາທຸດ, ໃຫ້ຮູ້ວ່າ:
“ງານບຸນນີ້ ເພື່ອພາວະນາເທວະດາຟ້າແຖນຂໍໃຫ້ມີສຸຂະພາບເຂັ້ມແຂງ, ຍູ້ໂລກພະຍາດ, ໂຊກຮ້າຍອອກຈາກບ້ານ. ຊາວບ້ານມີສຸຂະພາບເຂັ້ມແຂງເພື່ອເຮັດໄຮ່ເຮັດນາ, ປູກສາລີ, ມັນ, ລ້ຽງງົວ, ຄວາຍໃຫ້ຫຼາຍ, ເຮັດໃຫ້ຊີວິດຂອງປະຊາຊົນອິ່ມໜຳສຳລານ, ເພື່ອກໍ່ສ້າງບ້ານໃຫ້ນັບມື້ນັບພັດທະນາ ແລະ ຈົບງາມກວ່າ “.
ງານບຸນຖືກຈັດຂຶ້ນດ້ວຍຄວາມໝາຍຂັບໄລ່ໂຊກຮ້າຍ ແລະ ໂລກພະຍາດອອກຈາກບ້ານ ກ່ອນຈັດງານບຸນ, ເຈົ້າກົກເຈົ້າເຫຼົ່າໃນບ້ານຕ້ອງຊີ້ນຳໃຫ້ປະຊາຊົນໃນບ້ານເຮັດອະນາໄມທາງໄປຢ່າງສະອາດ, ສ້ອມແປງເຮືອນຣົງ, ທ່ານຳ້, ກະກຽມຫຸ່ນເຮັດດ້ວຍວັດຖຸທີ່ມີຢູ່ແລ້ວໃນທຳມະຊາດ ຫຼືຈາກຜະລິດຕະພັນກະເສດ. ໂດຍອີງໃສ່ເງື່ອນໄຂເສດຖະກິດ, ປະຊາຊົນໃນບ້ານຈະຈັດພິທີບູຊາເທວະດາຟ້າແຖນທີ່ເໝາະສົມກັບຄວາມສາມາດຂອງຕົນ. ຕາມປົກກະຕິ, ເຄື່ອງຂອງບູຊາເທວະດາຟ້າແຖນຂອງຊົນເຜົ່າບານາແມ່ນງົວ, ໝູ, ແບ້, ໄກ່... ເຖິງຢ່າງໃດກໍ່ຕາມ, ໃນຊຸມປີມໍ່ໆມານີ້, ຊາວເຜົ່າບານາເຄີຍບູຊາດ້ວຍໂຕແບ້. ຕາມທັດສະນະຂອງເຂົາເຈົ້າແລ້ວ, ແບ້ແມ່ນສັດທີ່ມີສັກສິດ, ແມ່ນອ້າຍຂອງສັດທຸກປະເພດໃນບ້ານ. ໃນວັນບຸນ, ສະມາຊິກທັງໝົດໃນບ້ານລ້ວນແຕ່ເຕົ້າໂຮມຢູ່ຕໍ່ໜ້າເຮືອນຣົງເພື່ອທຳພິທີບູຊາພາວະນາເທວະດາຟ້າແຖນ. ເຈົ້າກົກເຈົ້າເຫຼົ່າເປັນເຈົ້າພິທີ. ເຂົາເຈົ້າກຳເຂນ, ງ້າວນຳໜ້າ, ຄຽງຂ້າງນັ້ນແມ່ນຊາວໜຸ່ມຜູ້ໜຶ່ງໃຊ້ໜ້າກາກ, ກຳງ້າວ , ຖັດມາແມ່ນຊາວໜຸ່ມອີກ 4 ຄົນຖືຫຸ່ນ, ຈາກນັ້ນແມ່ນນາງສາວ 2 ຄົນກຳກິ່ງໄມ້ຊະນິດໜຶ່ງ, ສຸດທ້າຍແມ່ນກອງຄ້ອງ ແລະ ໄປຕາມຫຼັງແມ່ນຊາວບານາທຸກຄົນ. ຈຸດເວລາສຳຄັນທີ່ສຸດນັ້ນແມ່ນເວລາທີ່ເຈົ້າກົກເຈົ້າເຫຼົ່າທຳພິທີພາວະນາເທວະດາຟ້າແຖນ, ໃນສຽງຄ້ອງທີ່ດັງກ້ອງກັງວ່ານນັ້ນ ແມ່ນສຽງຮ້ອງຂັບໄລ່ຜີສາງຂອງຊາວບ້ານ. ພາຍຫຼັງພິທີ, ປະຊາຊົນຈະກັບມາເຕົ້າໂຮມຢູ່ເຮືອນຣົງແລ້ວພ້ອມກັນຕີຄ້ອງ, ສະແດງຊຸດອາພອນທີ່ເປັນມູນເຊື້ອ, ດື່ມເຫຼົ້າໄຫ, ຮັບປະທານອາຫານ ແລະ ຂັບຮ້ອງເພງພື້ນເມືອງ. ພາຍຫຼັງຊົມພິທີງານບຸນ, ທ່ານ ມາເລ, ຊາວຊົນເຜົ່າບານາ, ປະຈຸບັນພວມດຳລົງຊີວິດຢູ່ຮ່າໂນ້ຍ ແບ່ງປັນວ່າ:
“ຂ້າພະເຈົ້າໄດ້ອອກຈາກບ້ານເກີດແຕ່ເວລາຍັງນ້ອຍ, ດັ່ງນັ້ນເມື່ອໄດ້ຊົມວາດຟ້ອນ ແລະ ສຽງຄ້ອງຂ້າພະເຈົ້ານິຍົມຫຼາຍ. ພິທີງານບຸນກໍ່ດຳເນີນໄປຢ່າງຖືກຕ້ອງຕາມປະເພນີຂອງຊາວເຜົ່າບານາ. “
ງານບຸນຖືກຈັດຂຶ້ນໃນສຽງຄ້ອງທີ່ດັງກ້ອງກັງວານ ງານບຸນພາວະນາຂໍຄວາມຢູ່ເຢັນເປັນສຸກຂອງຊາວເຜົ່າບານາທີ່ຈັດຂຶ້ນຢູ່ບ້ານວັດທະນະທຳທ່ອງທ່ຽວບັນດາເຜົ່າຫວຽດນາມ ຢູ່ນະຄອນຫຼວງຮ່າໂນ້ຍ ໄດ້ສ່ອງແສງໃຫ້ເຫັນຊີວິດດ້ານວັດທະນະທຳທີ່ອຸດົມສົມບຸນຂອງຊາວເຜົ່າບານາ, ອັນໄດ້ສ້າງຄວາມປະທັບໃຈອັນດີງາມໃຫ້ແກ່ຜູ້ຊົມ. ອ້າຍ ຫງວຽນຮົ່ງຫວຽດ, ນັກທ່ອງທ່ຽວມາຈາກຮ່າໂນ້ຍ ເວົ້າວ່າ:
“ຂ້າພະເຈົ້າຮູ້ສຶກປະທັບໃຈຕໍ່ງານບຸນນີ້ຫຼາຍ, ເພາະວ່າຜ່ານງານບຸນ, ຜູ້ຊົມສາມາດເຂົ້າໃຈໄດ້ຊີວິດຂອງຊາວເຜົາບານາ ໃນຕົ້ນສະຕະວັດກ່ອນ. ມາຮອດປະຈຸບັນ, ມີຫຼາຍສິ່ງຫຼາຍຢ່າງໄດ້ເສຍຫາຍໄປ, ແຕ່ງານບຸນນີ້ໄດ້ເຮັດໃຫ້ຜູ້ຊົມເຂົ້າໃຈຫຼາຍສິ່ງຫຼາຍຢ່າງທີ່ບໍ່ເຄີຍຮູ້ໃນອະດີດຕະການ“.
ປະຈຸບັນ, ບັນດາງານບຸນຂອງຊາວເຜົ່າບານາ ບໍ່ພຽງແຕ່ແມ່ນການເຄື່ອນໄຫວດ້ານຈິດວີນຍານທີ່ເປັນມູນເຊື້ອ ເພື່ອແນໃສ່ສະແດງຄວາມຮູ້ບຸນຄຸນຕໍ່ດິນຟ້າ ເຊິ່ງໄດ້ອຳນວຍຄວາມສະດວກເພື່ອເຮັດໃຫ້ລະດູການເກັບກ່ຽວໄດ້ຮັບຜົນດີເທົ່ານັ້ນ, ຫາກຍັງແມ່ນໂອກາດເພື່ອໃຫ້ຊາວເຜົ່າບານາລະຫຼິ້ນ, ຕີຄ້ອງ, ດື່ມເຫຼົ້າໄຫອີກດ້ວຍ... ງານບຸນກໍ່ແມ່ນໂອກາດເພື່ອໃຫ້ຊາວເຜົ່າບານາສະແດງຄວາມສາມັກຄີ, ປະກອບສ່ວນສຶກສາລູກຫຼານອະນຸລັກຮັກສາວັດທະນະທຳທີ່ເປັນມູນເຊື້ອ, ສ້າງຄວາມຮັ່ງມີຕື່ມອີກໃຫ້ແກ່ຊີວິດທາງດ້ານຈິດໃຈຂອງຊາວເຜ່າບານາໃນປະຈຸບັນ.