(vovworld) - ໂດຍຫ່າງຈາກນະຄອນ ຮ້າລອງ ປະມານ 50 ກິໂລແມດ, ເມືອງເກາະ ເວີນໂດນ ຂຶ້ນກັບແຂວງ ກວ໋າງນີງ ພວມແມ່ນສະຖານທີ່ດຶງດູດນັກທ່ອງທ່ຽວເປັນຈຳນວນຫລວງຫລາຍ ດ້ວຍຮູບການທ່ອງທ່ຽວພະຈົນໄພ, ຊີວະພາບ,ວັດທະນະທຳ ແລະອື່ນໆ. ອຳນາດການປົກຄອງແຂວງ ກວ໋າງນີງ ໄດ້ ແລະ ພວມມີນະໂຍບາຍດຶງດູດການລົງທຶນຫຼາຍຢ່າງເພື່ອຂຸດຄົ້ນຄວາມສາມາດບົ່ມຊ້ອນດ້ານການທ່ອງທ່ຽວຂອງເມືອງເກາະແຫ່ງນີ້.
ເມືອງເກາະ ເວີນດົນ ພວມໃນໄລຍະພັດທະນາ
ພາບ:khudothi.com
|
ເມືອງເກາະເວີນດົນຕັ້ງຢູ່ອ້ອມຮອບອ່າວ ບາຍຕື໋ລອງແມ່ນເຂດທະເລໝູ່ເກາະທີ່ມະຫັດສະຈັນ, ເຊິ່ງຄຸນຄ່າດ້ານທໍນີສາດ, ຊີວະນາໆພັນ ມີຫລາຍປັດໄຈແມ່ນຄ້າຍຄືກັນກັບອ່າວຮ້າລອງ. ທິວທັດທຳມະຊາດຢູ່ ເວີນດົນແມ່ນໃຫຍ່ໂຕມະໂຫຖານ ແລະ ສວຍງາມ. ຢູ່ທີ່ນີ້ ສິ່ງແວດລ້ອມແຫ່ງການທ່ອງທ່ຽວແມ່ນສົດໃສ. ທະເລ ແລະ ປ່າດົງ ຢູ່ ເວີນດົນ ໄດ້ສ້າງເປັນຮູບພາບທີ່ມີຊີວິດຊີວາ. ໂດຍຕັ້ງຢູ່ມໍ່ກັບອ່າວຮ້າລອງ, ຊຶ່ງແມ່ນມໍລະດົກທຳມະຊາດຂອງໂລກ ແຕ່ ໃນສອງສາມປີມໍ່ໆມານີ້, ນັກທ່ອງທ່ຽວຈຶ່ງຮູ້ຈັກເຖິງສະຖານທີ່ທ່ອງທ່ຽວ ເວີນດົນ . ທ່ານ ຮ່າກວາງລອງ, ຫົວຫນ້າພະແນກ ວັດທະນະທຳ ກິລາ ແລະ ທ່ອງທ່ຽວ ແຂວງ ກວ໋າງນີງ ໄດ້ຂະຫນານນາມວ່າ: ເວີນດົນແມ່ນແດນສະຫວັນບໍ່ທັນໄດ້ຮັບການຂຸດຄົ້ນເທື່ອ.ເພື່ອເຮັດໃຫ້ເວີນດົນ ກາຍເປັນສະຖານທີ່ທ່ອງທ່ຽວ, ແຂວງ ກວ໋າງນີງ ໄດ້ມານະພະຍາຍາມພັດທະນາລະບົບຄົມມະນາຄົມໄປຍັງ ເວີນດົນ, ທຳອິດແມ່ນເລື່ອງເປີດໃຊ້ການຂົວ 3 ແຫ່ງຈາກເທດສະບານ ເກີມຝາ ໄປຍັງເມືອງເກາະ ເວີນດົນ. ສິ່ງດັ່ງກ່າວໄດ້ສ້າງຄວາມອຸ່ນອ່ຽນໃຈໃຫ້ນັກລົງທຶນພັດທະນາບັນດາໂຄງການຢູ່ເມືອງເກາະ ເວີນດົນ. ທ່ານ ດັ້ງຢູຍເຮົ້າ ຮອງປະທານຄະນະກຳມະການປະຊາຊົນ ແຂວງ ກວ໋າງນີງ ໃຫ້ຮູ້ວ່າ:
“ເວີນດົນ ແມ່ນເມືອງເກາະທີ່ເໝາະສົມກັບການຈັດຕັ້ງການເຄື່ອນໄຫວເສດຖະກິດຈຳນວນຫນຶ່ງຄື: ການທ່ອງທ່ຽວທີ່ມີຄຸນນະພາບສູງ, ທ່ອງທ່ຽວພັກຜ່ອນບຳລຸງສຸຂະພາບ, ທ່ອງທ່ຽວພະຈົນໄພ. ເພ່ືອປະຕິບັດສິ່ງນັ້ນໃຫ້ໄດ້ ເວີນດົນ ຕ້ອງລົງທຶນກໍ່ສ້າງພື້ນຖານໂຄງລ່າງຈຳນວນຫນຶ່ງ ແລະ ກ່ອນອື່ນໝົດ ແມ່ນລະບົບຄົມມະນາຄົມ. ແຂວງ ກວ໋າງນີງ ພວມພ້ອມກັບກະຊວງ, ຂະແຫນການຕ່າງໆຢູ່ຂັ້ນສູນກາງກຳນົດທີ່ຕັ້ງເພື່ອກໍ່ສ້າງສະຫນາມບິນ, ແລະ ບູລະນະຍົກລະດັບລະບົບເສັ້ນທາງຄົມມະນາຄົມ. ”
ເດືອນ 8/2009, ທ່ານນາຍົກລັດຖະມົນຕີ ໄດ້ອະນຸມັດແຜນຮ່າງພັດທະນາເສດຖະກິດ ເວີນດົນ ຮອດປີ 2020 ແລະ ວິໄສທັດຮອດປີ 2030. ຕາມນັ້ນແລ້ວ, ເວີນດົນ ຈະກາຍເປັນເຂດເສດຖະກິດສັງລວມ, ເປັນສູນເສດຖະກິດຂອງແຂວງ ກວ໋າງນີງ ແລະ ເຂດແຄມທະເລ ພາກເຫນືອ, ເຂດໃຈກາງທ່ອງທ່ຽວທະເລໝູ່ເກາະຕິດພັນກັບການທ່ອງທ່ຽວພັກຜ່ອນຢ່ອນອາລົມທີ່ມີຄຸນນະພາບສູງເພື່ອດຶງດູດນັກທ່ອງທ່ຽວທີ່ມາຈາກບັນດາປະເທດອາຊີຕາເວັນອອກສຽງເຫນືອ ແລະ ໃນອະນາຄົດແມ່ນຂອງອາຊີຕາເວັນອອກສຽງໃຕ້. ດ້ວຍການກຳນົດທິດຄືແນວນັ້ນ, ນັບແຕ່ຕົ້ນປີ 2012, ແຂວງ ກວ໋າງນີງ ກໍຄືເມືອງເກາະ ເວີນດົນ ໄດ້ຍູ້ແຮງຄວາມຄືບໜ້າຂອງໂຄງການກໍ່ສ້າງທາງຄົມມະນາຄົມທີ່ເຊື່ອມຕໍ່ກັບທາງຫລວງ 14B, ວາງແຜນກຳນົດທີ່ດິນໃຫ້ສະຫນາມບິນສາກົນ ເວີນດົນ, ເຂດລະຫລິ້ນບັນເທິງຢູ່ ຕາແສງ ວ້ານອຽນ, ເຂດທ່ອງທ່ຽວທີ່ມີຄຸນນະພາບສູງ ເວີນຫາຍ, ເຂດທ່ອງທ່ຽວຊີວະພາບ ເຟື້ອງຮ່ວາງ. ຕາມທ່ານ ເລກວາງແທກ ຮອງປະທານຄະນະກຳມະການປະຊາຊົນ ເມືອງ ເວີນດົນ ແລ້ວ, ອຳນາດການປົກຄອງ ແລະ ປະຊາຊົນ ເມືອງເກາະ ເວີນດົນ ຍາມໃດກໍສ້າງເງື່ອນໄຂອຳນວຍຄວາມສະດວກທີ່ສຸດໃຫ້ບັນດານັກລົງທຶນ ພິເສດແມ່ນນັກລົງທຶນໃນຂົງເຂດພັດທະນາການທ່ອງທ່ຽວຢູ່ເມືອງເກາະນີ້.
“ໂດຍອີງໃສ່ແຜນກຳນົດຂອງທ່ານນາຍົກລັດຖະມົນຕີ, ທາງເມືອງຈະບຸລິມະສິດໃຫ້ບັນດານັກລົງທຶນເຂົ້າເມືອງເກາະກ່ອນນີ້, ບົນພື້ນຖານແຜນກຳນົດລວມຂອງເຂດເສດຖະກິດ ແລະ ຈະກຳນົດທິດເພື່ອໃຫ້ບັນດານັກລົງທຶນປະຕິບັດຕາມ. ພ້ອມກັນນັ້ນ ທາງອຳນາດການປົກຄອງເມືອງເວີນດົນ ກໍ່ຈະສ້າງເງື່ອນໄຂເພື່ອໃຫ້ນັກລົງທຶນເສີມຂະຫຍາຍກຳລັງແຮງພາຍໃນ, ຄວາມສາມາດບົ່ມຊ້ອນຂອງຕົນເພື່ອກໍ່ສ້າງສະຖານທີ່ທ່ອງທ່ຽວ ເວີນດົນ ໃຫ້ກາຍເປັນແຫ່ງທີ່ມີຄວາມດູດດື່ມແກ່ນັກທ່ອງທ່ຽວ.”
ຫາດຊາຍທະເລ ເວີນດົນ
ພາບ:vietbao.com
|
ເຖິງຢ່າງໃດກໍຕາມ, ເພື່ອຂຸດຄົ້ນຄວາມສາມາດບົ່ມຊ້ອນດ້ານການທ່ອງທ່ຽວຂອງເມືອງເກາະ ເວີນດົນ ໃຫ້ມີປະສິດທິຜົນ, ອຳນາດການປົກຄອງເມືອງ ພວມສົ່ງເສີມບັນດານັກລົງທຶນພັດທະນາບັນດາເຂດທ່ອງທ່ຽວ, ຜະລິດຕະພັນທ່ອງທ່ຽວ, ການ ບໍລິການທ່ອງທ່ຽວ ພິເສດແມ່ນສ້າງຜະລິດຕະພັນສະເພາະຂອງ ເວີນດົນ. ທ່ານ ຕ້າດຶກກວຽດ ຜູ້ອຳນວຍການບໍລິສັດ ມາຍກວ່ຽນ ດຳເນີນທຸລະກິດການທ່ອງທ່ຽວພັກຜ່ອນບຳລຸງສຸຂະພາບ ຢູ່ ເວີນດົນ ໄດ້ແບ່ງບັນກ່ຽວກັບເລື່ອງສົ່ງເສີມການລົງທຶນພັດທະນາການທ່ອງທ່ຽວຢູ່ ເວີນດົນ.
“ຕາມທັດສະນະຂອງຂ້າພະເຈົ້າແລ້ວ, ເພື່ອສົ່ງເສີມການລົງທຶນເຂົ້າເຂດທ່ອງທ່ອງທ່ຽວ ເວີນດົນ ແມ່ນຕ້ອງຊອກຫາບັນດານັກລົງທຶນລາຍໃຫຍ່ ທ່ີມີລັກສະນະມະຫາພາກທີ່ລົງທຶນໃນວຽກງານສັງລວມຈຳນວນຫນຶ່ງ. ເຖິງຢ່າງໃດກໍຕາມ, ພວກເຮົາຄວນຖືວຽກງານເສີມຂະຫຍາຍກຳລັງແຮງພາຍໃນແມ່ນສຳຄັນ. ພວກເຮົາຄວນໃຫ້ບຸລິມະສິດນັບທັງນັກລົງທຶນພາຍໃນ ແລະ ຕ່າງປະເທດ ພິເສດແມ່ນບຸລິມະສິດຕົ້ນຕໍໃຫ້ແກ່ນັກລົງທຶນໃນຂະແຫນງທ່ອງທ່ຽວ.”
ດ້ວຍ 17 ໂຄງການທ່ອງທ່ຽວທີ່ມີຂອບຂະຫນາດໃຫຍ່ພວມໄດ້ຮັບການຜັນຂະຫຍາຍ, ພື້ນຖານໂຄງລ່າງທ່ອງທ່ຽວຢູ່ເມືອງເກາະ ເວີນດົນ ໄດ້ຮັບການປັບປຸງດີພໍສົມຄວນ. ໃນແຕ່ລະປີຈຳນວນນັກທ່ອງທ່ຽວພາຍໃນປະເທດ ແລະ ຕ່າງປະເທດ ມາຢ້ຽມຢາມ ແລະ ພັກຜ່ອນບຳລຸງສຸຂະພາບຢູ່ ເວີນດົນ ເພີ່ມຂຶ້ນ ແຕ່ 20.000 - 30.000 ເທື່ອຄົນ. ຄວາມສາມາດບົ່ມຊ້ອນດ້ານການທ່ອງທ່ຽວ ຢູ່ ເວີນດົນ ຍັງມີຫລາຍຢູ່, ກົນໄກນະໂຍບາຍລົງທຶນຢູ່ທີ່ນີ້ ກໍສະດວກສະບາຍກວ່າ. ນັ້ນແມ່ນບັນດາເງື່ອນໄຂສະດວກເພື່ອໃຫ້ບັນດານັກລົງທຶນພັດທະນາບັນດາໂຄງການໃຫມ່ ຂຸດຄົ້ນຄວາມສາມາດບົ່ມຊ້ອນທ່ອງທ່ຽວຢູ່ ເວີນດົນ.
ນັກຂ່າວ ທູຮວາ