(vovworld) - ຊາວເຜົ່າ K’ho ແມ່ນຊາວເຜົ່າທີ່ມີປະຫວັດແຫ່ງການພັດທະນາມາແຕ່ດົນນານແລ້ວ. ຊາວເຜົ່າ K’ho ສ່ວນຫຼາຍແມ່ນດຳລົງຊີວິດຢູ່ເຂດທິດໃຕ້ ໄຕງວຽນ. ໝູ່ບ້ານຂອງ ຊາວເຜົ່າ K’ho ເຄີຍຕັ້ງຢູ່ເນີນພູ ຫຼືຢູ່ຕາມຮ່ອມພູ. ຊາວເຜົ່າ K’ho ດຳລົງຊີວິດໃກ້ຊິດຕິດພັນກັບທຳມະຊາດ, ເສດຖະກິດຕົ້ນຕໍແມ່ນກຸ້ມຕົນເອງ, ດັ່ງນັ້ນ ຊາວເຜົ່າ K’ho ຈຶ່ງມີນຳ້ໃຈສາມັກຄີໃນປະຊາຄົມສູງ. ຍ້ອນເຫດນັ້ນ, ບັນດາງານບຸນປະເພນີຂອງ ຊາວເຜົ່າ K’ho ຍັງຄົງໄດ້ຮັບການຮັກສາໄວ້ມາເຖິງປະຈຸບັນ.
![ການຈັດຕັ້ງປະຊາຄົມຂອງ ຊາວເຜົ່າ K’ho - ảnh 1](https://photo-cms-vovworld.zadn.vn/w500/uploaded/vovworld/bcgmbuiq/2016_09_26/541.jpg)
ຊາວເຜົ່າ K’ho ດຳລົງຊີວິດໃນບັນດາໝູ່ບ້ານ, ຕາມແບບໝູ່ບ້ານຊົນນະບົດທີ່ເປັນມູນເຊື້ອ. ແຕ່ລະໝູ່ບ້ານລ້ວນແຕ່ມີກົງຈັກຄຸ້ມຄອງສະເພາະ, ຫົວໜ້າກົງຈັກນັ້ນແມ່ນນາຍບ້ານ. ໜ້າທີ່ຂອງນາຍບ້ານ ແມ່ນຄຸ້ມຄອງ ແລະ ບໍລິຫານວຽກງານລວມຂອງໝູ່ບ້ານເຊັ່ນ: ເລືອກເຟັ້ນ, ຈັດແບ່ງທີ່ດິນປູກຝັງ, ຍົກຍ້າຍໝູ່ບ້ານ, ໄກ່ເກ່ຍປອງດອງ, ພິພາກສາ, ຈົດຈຳຊາຍແດນ, ປົກປັກຮັກສາຜືນແຜ່ນດິນຂອງໝູ່ບ້ານ. ຊາວເຜົ່າ K’ho ກໍ່ເຄີຍຖາມນາຍບ້ານວຽກງານທຸກຢ່າງໃນຄອບຄົວຂອງເຂົາເຈົ້າອີກ. ບັນດາສະມາຊິກຂອງໝູ່ບ້ານມີສະຕິ, ມີຄວາມຮັບຜິດຊອບໃນການປັບປຸງຄວາມໝັ້ນຄົງ ແລະ ຄວາມສາມັກຄີຂອງວົງຕະກຸນ, ໝູ່ບ້ານ; ຮັກສາດິນ, ປ່າ, ແຫຼ່ງນ້ຳ ກໍ່ຄືຊັບສົມບັດເຊິ່ງໄດ້ຮັບຖືວ່າແມ່ນຂອງລວມ ແລະ ປະຕິບັດບັນດາກົດໝາຍ, ປະເພນີທີ່ເປັນມູນເຊື້ອ.
ຊາວເຜົ່າ K’ho ຜະລິດກະສິກຳ, ປູກເຂົ້າ, ສາລີຢູ່ໄຮ່, ເຮັດສວນຢູ່ບ້ານ, ລ້ຽງສັດເປັນກຳລັງແກ່ລາກ, ລ້ຽງສັດປີກເປັນອາຫານ. ສ່ວນອາຊີບຫັດຖະກຳຂອງ ຊາວເຜົ່າ K’ho ສ່ວນຫຼາຍແມ່ນ: ຕີເຫຼັກ, ຖັກສານ, ຕ່ຳຫູກ…
ໃນສັງຄົມຂອງ ຊາວເຜົ່າ K’ho, ມາຮອດປະຈຸບັນຍັງຄົງຮັກສາຮູບການຄອບຄົວຕາມລະບອບມານດາສິດທິລາດ, ຜູ້ຍິງເປັນເຈົ້າຂອງຄອບຄົວ ແລະ ເປັນເຈົ້າການໃນການສົມລົດ. ພາຍຫຼັງງານແຕ່ງດອງ, ເຈົ້າບ່າວຈະມາຢູ່ນຳຄອບຄົວເຈົ້າສາວ. ລູກຂອງເຂົາເຈົ້າຖືສະກຸນຂອງແມ່ ແລະ ໃນຄອບຄົວ, ລູກສາວເປັນຜູ້ສືບມູນ. ສິ່ງທີ່ສະແດງອອກຢ່າງຈະແຈ້ງທີ່ສຸດໃນການສົມລົດຂອງຊາວເຜົ່າ K’ho ນັ້ນແມ່ນປະເພນີ “ຈັບຜົວ“. ເພື່ອເອົາຜູ້ຊາຍເປັນຜົວ. ຄອບຄົວຜູ້ສາວຕ້ອງຍອມຮັບຄ່າສິນສອດຈາກຄອບຄົວຝ່າຍຜູ້ຊາຍ. ຜູ້ຊາຍຍິ່ງມີສຸຂະພາບເຂັ້ມແຂງ, ມີຄວາມເກັ່ງກ້າສາມາດ, ຄ່າສິນສອດກໍ່ຍິ່ງຫຼາຍ. ເຖິງວ່າປະຈຸບັນຊີວິດໄດ້ມີການປ່ຽນແປງຫຼາຍຢ່າງແລ້ວກໍ່ຕາມ, ແຕ່ປະເພນີ “ຈັບຜົວ“ ຍັງຄົງຮັກສາໄວ້ຈົນເຖິງປະຈຸບັນຢູ່ບາງແຫ່ງ, ເຖິງຢ່າງໃດກໍ່ຕາມ, ການແອ່ວຄ່າສິນສອດບໍ່ໜັກໜ່ວງຄືກ່ອນນີ້ອີກ. ທ່ານນາງ K’nam, ຊາວເຜົ່າ K’ho ເລົ່າສູ່ຟັງວ່າ:
“ໃນເມື່ອກ່ອນ, ຜູ້ສາວຕ້ອງມີຂອງສືບມູນຈຶ່ງສາມາດເອົາຜົວໄດ້. ແຕ່ປະຈຸບັນ, ບັນຫານີ້ບໍ່ໜັກໜ່ວງປານໃດແລ້ວ. ສອງຄົນຮັກກັນ, ຈະອີງໃສ່ເງື່ອນໄຂຕົວຈິງຂອງຄອບຄົວຜູ້ສາວເພື່ອແອ່ວຄ່າສິນສອດໃຫ້ເໝາະສົມ“.
ຕາມປະເພນີຂອງຊາວເຜົ່າ K’ho, ຍິງຊາຍມີການພົວພັນທາງເພດກ່ອນການສົມລົດບໍ່ຖືກຫ້າມຢ່າງເດັດຂາດ, ແຕ່ເມື່ອໄດ້ສ້າງຄອບຄົວແລ້ວ, ແຕ່ຍັງມີການພົວພັນທາງເພດກັບຜູ້ອື່ນຈະຖືກລົງໂທດຢ່າງໜັກໜ່ວງ. ສະພາບເກີດການປະກັນແມ່ນໜ້ອຍທີ່ສຸດ ແລະ ຕ້ອງໄດ້ຮັບຄວາມເຫັນດີຈາກນາຍບ້ານ. ລະບອບຜົວໜຶ່ງເມຍດຽວຂອງຊາວເຜົ່າ K’ho ໄດ້ສ້າງຄວາມປອງດອງໃຫ້ແກ່ຄອບຄົວຊາວເຜົ່າ K’ho.
(ພາບປະກອບ)
ເຮືອນຢູ່ຂອງ ຊາວເຜົ່າ K’ho ແມ່ນເຮືອນຮ້ານເປັນຕົ້ນ. ເຮືອນຮ້ານຖືກມຸງຫຍ້າ, ມີແຕະສານດ້ວຍໄມ້ເຮ້ຍຫຼືໄມ້ໄຜ່ເພື່ອຕ້ານທານກັບຄວາມໜາວ. ກ່ອນນີ້ບັນດາເຮືອນຮ້ານເຄີຍຖືກປຸກສ້າງສູງກວ່າປະຈຸບັນ ເພື່ອກັນສັດຮ້າຍ, ຢູ່ຕໍ່ໜ້າປະຕູເຄີຍມີຂັ້ນໄດກວ້າງ.
ນັບແຕ່ດົນນານມາແລ້ວ, ຊາວເຜົ່າ K’ho, ໄດ້ມີຄວາມຕິດພັນກັບການຜະລິດກະສິກຳ, ຖືອາຊີບປູກເຂົ້າເປັນສຳຄັນ, ຍ້ອນເຫດນັ້ນຈຶ່ງມີຫຼາຍງານບຸນບູຊາເທວະດາເຂົ້າ, ແລະ ກ່ຽວຂ້ອງເຖິງບັນດາຂັ້ນຕອນປູກເຂົ້າຄື: ງານບຸນຕົກກ້າ, ງານບຸນພາວະນາໃຫ້ການປູກເຂົ້າມີສະມັດຕະພາບສູງ, ງານບຸນພາວະນາໃຫ້ເຂົ້າສຸກເຫຼືອງ, ງານບຸນພາວະນາໃຫ້ການເກັບກ່ຽວໄດ້ຮັບຜົນດີ, … ພິເສດ, ຊາວເຜົ່າ K’ho ມີງານບຸນໃຫຍ່ສຸດໃນປີ, ນັ້ນແມ່ນງານບຸນບູຊາຕົ້ນເຂົ້າ. ໃນເມື່ອກ່ອນ, ງານບຸນນີ້ຖືກຈັດຕັ້ງຕາມແຕ່ລະຄອບຄົວ. ປະຈຸບັນມັນໄດ້ກາຍເປັນງານບຸນໃຫຍ່ໃນປີຂອງທັງໝູ່ບ້ານ. ໃນງານບຸນ, ຊາວບ້ານໄດ້ເຂົ້າຮ່ວມຄວາມມ່ວນຊື່ນພ້ອມກັບແຕ່ລະຄອບຄົວ. ງານບຸນກໍ່ແມ່ນໂອກາດເພື່ອໃຫ້ບັນດາເຈົ້າກົກເຈົ້າເຫຼົ່າແນະນຳໃຫ້ລູກຫຼານວິທີຮັກສາສີສັນວັດທະນະທຳທີ່ເປັນມູນເຊື້ອຂອງຊົນເຜົ່າຕົນ. ທ່ານ K’do, ຊາວເຜົ່າ K’ho, ໃຫ້ຮູ້ວ່າ:
“ງານບຸນບູຊາຕົ້ນເຂົ້າແມ່ນປະເພນີໂດຍບັນພະບຸລຸດປະໄວ້. ແລະ ພວກເຮົາພຽງແຕ່ປະຕິບັດຕາມເທົ່ານັ້ນ. ແຕ່ລະຄອບຄົວເຄີຍຈັດພາເຂົ້າ, ພ້ອມກັບໄຫເຫຼົ້າເພື່ອຖະຫວາຍບູຊາ, ເຊື້ອເຊີນບັນພະບຸລຸດກັບມາເຂົ້າຮ່ວມງານບຸນແລະ ດົນບັນດານໃຫ້ທັງຄອບຄົວມີສຸຂະພາບເຂັ້ມແຂງ, ເຮັດອັນໃດກໍ່ປະສົບຜົນສຳເລັດອັນນັ້ນ“.
ຊາວເຜົ່າ K’ho, ມີຊີວິດທາງດ້ານຈິດໃຈອຸດົມສົມບຸນ ແລະ ເປັນເອກະລັກສະເພາະທີ່ສຸດ. ບົດເພງ, ບົດກະວີເຕັມໄປດ້ວຍທຳນອງດົນຕີ ແລະຄວາມຮັກ. ເຄື່ອງດົນຕີກໍ່ຄ້າຍຄືກັນກັບຊາວເຜົ່າອື່ນໆຢູ່ເຂດ ໄຕງວຽນຄື: ມີຊຸດຄ້ອງປະກອບດ້ວຍ 6 ໜ່ວຍ, ມີແຄນ, ມີພິນດ້ວຍລຳໄມ້ໄຜ່. ເຄື່ອງດົນຕີຂອງ ຊາວເຜົ່າ K’ho, ເຄີຍນຳມາສະແດງໃນໂອກາດງານບຸນບູຊາເທວະດາຟ້າແຖນ, ແລະ ໃນການເຄື່ອນໄຫວວັດທະນະທຳປະຊາຄົມ.
ໃນຊຸມປີຜ່ານມາ, ລັດໄດ້ປະຕິບັດແຜນນະໂຍບາຍຕ່າງໆກ່ຽວກັບການລົງທຶນພັດທະນາເຂດຊົນເຜົ່າສ່ວນໜ້ອຍ, ໃນນັ້ນມີ ຊາວເຜົ່າ K’ho,. ມີຫຼາຍເຂດທີ່ ຊາວເຜົ່າ K’ho ເຄີຍດຳລົງຊີວິດ ໄດ້ສ້າງເຂດປູກສະເພາະຕົ້ນໄມ້ທັນຍາຫານ, ຕົ້ນໄມ້ອຸດສາຫະກຳ ແລະ ພັດທະນາການບໍລິການທ່ອງທ່ຽວ. ຍ້ອນເຫດນັ້ນ ຊາວເຜົ່າ K’hoຈຶ່ງມີເງື່ອນໄຂເພື່ອພັດທະນາເສດຖະກິດ, ກໍ່ສ້າງຊີວິດໃໝ່.