ໃນອາທິດ, ເພື່ອນ ອຳພາວັນ, ແຂວງ ໄຊສົມບູນ ໄດ້ຝາກອີເມວເຖິງລາຍການ, ເພື່ອນຝາກຄຳອວຍພອນເຖິງບັນນາທິການ ພາກພາສາລາວ ເນື່ອງໃນໂອກາດວັນສື່ມວນຊົນປະຕິວັດ ຫວຽດນາມ (ຄືວັນທີ 21 ມິຖຸນາ), ເພື່ອນໄດ້ຂຽນວ່າ: ເນື່ອງໃນໂອກາດສະເຫຼີມສະຫຼອງ 98 ປີແຫ່ງວັນສື່ມວນຊົນປະຕິວັດ ຫວຽດນາມ, ຂໍອວຍພອນໃຫ້ບັນດາບັນນາທິການຂອງພາກພາສາລາວ ຈົ່ງມີສຸຂະພາບເຂັ້ມແຂງ, ປະຕິບັດສຳເລັດທຸກວຽກງານຂອງຕົນ, ໝູນໃຊ້ນະວັດຕະກຳ 4.0 ເຂົ້າໃນການຜະລິດລາຍການກະຈາຍສຽງ ເພື່ອເຂົ້າເຖິງຫຼາຍເປົ້າໝາຍກ່ວາອີກ. ໂດຍແມ່ນຜູ້ຟັງ, ຜູ້ອ່ານທີ່ຕິດຕາມລາຍການມາດົນ, ຍາມໃດຂ້າພະເຈົ້າຈະຕິດຕາມຂ່າວຄາວໃນເວບໄຊ vovworld.vn ໄປຕະຫຼອດ.
ກໍ່ໃນອາທິດນີ້, ເນື່ອງໃນໂອກາດວັນສື່ມວນຊົນປະຕິວັດ ຫວຽດນາມ, ເພື່ອມ ພິມ ໄຊຍະຈັກ, ແຂວງ ຫົວພັນ ໄດ້ຝາກອີເມວ ເຖິງລາຍການດ້ວຍເນື້ອໃນ: ຂ້າພະເຈົ້າມັກອ່ານຂ່າວໃນເວບໄຊ vovworld.vn ຂອງພວກເພື່ອນ. ນອກຈາກອ່ານຂ່າວດ້ວຍພາສາລາວ ແລ້ວ, ຂ້າພະເຈົ້າຍັງໄດ້ອ່ານຂ່າວດ້ວຍພາສາອັງກິດ ແລະ ພາສາຍີ່ປຸ່ນ ອີກດ້ວຍ. ສຳລັບຂ້າພະເຈົ້າເອງ, vovworld.vn ແມ່ນເວບໄຊທີ່ມີຫຼາຍພາສາຕ່າງປະເທດທີ່ສຸດ. ຂ້າພະເຈົ້າຖືວ່າ ນີ້ແມ່ນເວບໄຊທີ່ມີຜົນປະໂຫຍດ, ຊ່ວຍໃຫ້ຂ້າພະເຈົ້າຮຽນພາສາຕ່າງປະເທດຕື່ມອີກ. ຜ່ານຂ່າວຕ່າງໆ, ຂ້າພະເຈົ້າຮູ້ວ່າ ວັນທີ 21 ມິຖຸນາ ແມ່ນວັນສື່ມວນຊົນປະຕິວັດ ຫວຽດນາມ, ວັນເຊີດຊູບັນດານັກຂ່າວ, ຂ້າພະເຈົ້າຂໍອວຍພອນໃຫ້ບັນດານັກຂ່າວຂອງພາກພາສາຕ່າງປະເທດ, ວິທະຍຸກະຈາຍສຽງ ຫວຽດນາມ ປະຕິບັດສຳເລັດທຸກໜ້າທີ່ວຽກງານທີ່ໄດ້ຮັບມອບໝາຍ, ອຸທິດສ່ວນ ເພື່ອມີຫຼາຍບົດຂຽນ, ບົດຂ່າວທີ່ມ່ວນໆ, ມີປະໂຫຍດ ແລະ ຈົ່ງມີຄວາມຜາສຸກໃນຊີວິດຂອງຕົນ.
ບັນດານັກຂ່າວ VOV ໄດ້ຮັບລາງວັນໃນຄັ້ງນີ້
|
ກໍ່ມີເນື້ອໃນກ່ຽວຂ້ອງເຖິງວັນສື່ມວນຊົນປະຕິວັດ ຫວຽດນາມ, ເພື່ອນ ວັນໄຊ ລາວລີ, ແຂວງ ຊຽງຂວາງ ໄດ້ມີຄຳຖາມກ່ຽວກັບລາງວັນສື່ມວນຊົນໃຫຍ່ສຸດ, ເວທີເຊີດຊູບັນດານັກຂ່າວ, ບັນດາຜະລິດຕະພັນສື່ມວນຊົນທີ່ດີເດັ່ນຂອງ ຫວຽດນາມ.
ເພື່ອນ ວັນໄຊ ລາວລີ ທີ່ຮັກແພງ, ເມື່ອເວົ້າເຖິງບັນດາລາງວັນສຳລັບບັນດາຜົນງານສື່ມວນຊົນ ກໍ່ຄືນັກຂ່າວ ຢູ່ຫວຽດນາມ ແມ່ນອາດເວົ້າເຖິງບັນດາລາງວັນສື່ມວນຊົນໃຫຍ່ຄື: ລາງວັນ ຢຽນຮົ່ງ - ເຊິ່ງແມ່ນລາງວັນກ່ຽວກັບການເຄື່ອນໄຫວຂອງສະພາແຫ່ງຊາດ ແລະ ສະພາຜູ້ແທນປະຊາຊົນ; ລາງວັນທົ່ວປະເທດຖະແຫຼງຂ່າວກ່ຽວກັບການຕ່າງປະເທດ; ລາງວັນສື່ມວນຊົນກ່ຽວກັບການປ້ອງກັນ, ຕ້ານການສໍ້ລາດບັງຫຼວງ, ກ່ຽວກັບວິທະຍາສາດ ແລະ ເຕັກໂນໂລຊີ… ແຕ່ສຳລັບບັນດາຜົນງານສື່ມວນຊົນແຫ່ງຊາດແລ້ວ, ລາງວັນສູງສົ່ງທີ່ສຸດແມ່ນລາງວັນສື່ມວນຊົນແຫ່ງຊາດ. ປີນີ້, ສະພາລາງວັນສື່ມວນຊົນແຫ່ງຊາດ ໃຫ້ຮູ້ວ່າ: ໃນຈຳນວນ 157 ຜົນງານໄດ້ລອດເຂົ້າຮອບສຸດທ້າຍ, ສະພາກຳມະການ ໄດ້ປຶກສາຫາລື, ກວດກາ ແລະ ປ່ອນບັດຄັດເລືອກເອົາ 124 ຜົນງານດີເດັ່ນທີ່ໄດ້ຮັບລາງວັນສື່ມວນຊົນແຫ່ງຊາດຄັ້ງທີ XVII ປີ 2022, ເຊິ່ງລວມມີ: ລາງວັນ A 9 ລາງວັນ, ລາງວັນ B 24 ລາງວັນ, ລາງວັນ C 46 ລາງວັນ ແລະ ລາງວັນ ຊົມເຊີຍ 45 ລາງວັນ. ໃນນັ້ນ, ວິທະຍຸກະຈາຍສຽງ ຫວຽດນາມ ໄດ້ຮັບລວມທັງໝົດ 6 ລາງວັນ, ລາງວັນ A ໜຶ່ງລາງວັນ, ລາງວັນ B ໜຶ່ງລາງວັນ, ລາງວັນ C ສອງລາງວັນ, ລາງວັນຊົມເຊີຍສອງລາງວັນ.
ຕອນໜຶ່ງຂອງເສັ້ນທາງລົດໄຟ ເໜືອ - ໃຕ້
|
ເພື່ອນ ຈັນເພັງ, ຢູ່ນະຄອນຫຼວງ ວຽງຈັນ, ໄດ້ໂທລະສັບມາຍັງລາຍການພາກພາສາລາວ ຊຶ່ງຢາກຊອກຮູ້ ກ່ຽວກັບເສັ້ນທາງລົດໄຟ ເໜືອ - ໃຕ້ ຂອງ ຫວຽດນາມ.
ເພື່ອນ ຈັນເພັງ ທີ່ຮັກແພງ, ຫວ່າງມໍ່ໆມານີ້, ເວບໄຊການທ່ອງທ່ຽວ Lonely Planet - ເຊິ່ງເປັນເວບໄຊການທ່ອງທ່ຽວໃຫຍ່ສຸດໃນໂລກ, ໄດ້ຄັດເລືອກໃຫ້ເສັ້ນທາງລົດໄຟ ເໜືອ - ໃຕ້ຂອງ ຫວຽດນາມ ຢືນອັນດັບທີ 1 ໃນບັນຊີລາຍຊື່ບັນດາເສັ້ນທາງລົດໄຟງາມທີ່ສຸດໃນໂລກ. ຕາມ Lonely Planet ວາດພາບແລ້ວ, ເສັ້ນທາງລົດໄຟ ເໜືອ - ໃຕ້ ມີຄວາມຍາວ 1.730 ກມ, ແມ່ນໜຶ່ງໃນບັນດາເສັ້ນທາງລົດໄຟທີ່ໄດ້ຮັບຄວາມນິຍົມທີ່ສຸດໃນພາກພື້ນ ອາຊີຕາເວັນອອກສ່ຽງໃຕ້. ໃນການເດີນທາງເປັນເວລາ 2 ວັນ ແຕ່ເໜືອ (ນະຄອນຫຼວງ ຮ່າໂນ້ຍ) ຮອດໃຕ້ (ນະຄອນ ໂຮ່ຈີມິນ), ແຂກທ່ອງທ່ຽວຈະໄດ້ໄປຜ່ານເຂດຕົວເມືອງທີ່ຄັບຄາໜ້າແໜ້ນ, ຟົດຟື້ນ ຕະຫຼອດຮອດເຂດຊົນນະບົດທີ່ສະຫງົບງຽບ. ບໍ່ພຽງແຕ່ເທົ່ານັ້ນ, ໃນການເດີນທາງ, ແຂກໂດຍສານຈະໄດ້ຮັບຊົມທິດທັດທຳມະຊາດຂອງ ຫວຽດນາມ ມີທັງພູຜາປ່າໄມ້ທີ່ຂຽວອຸ່ມທຸ່ມ ແລະ ທັງເຂດນ່ານຟ້າ, ທະເລທີ່ສວຍສົດງົດງາມ. ຫວັງວ່າ ເພື່ອນ ຈັນເພັງ ຈະຍາດໂອກາດມາ ຫວຽດນາມ ແລະ ໄດ້ເດີນທາງໃນເສັ້ນທາງລົດໄຟເໜືອ - ໃຕ້ ນີ້ແດ່ເດີ.
ທ່ານຜູ້ຟັງທີ່ເຄົາລົບ, ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼືໂທມາໂດຍກົງກໍ່ໄດ້ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມບັນດາລາຍການທີ່ໄດ້ເອົາລົງໃນເວບໄຊດັ່ງກ່າວ. ຂໍຂອບໃຈ.