ໃນລາຍການໂອ້ລົມກັບເພື່ອນລາວ ພາກນີ້, ພວກເຮົາຂໍຕອບບາງຄຳຖາມເຊິ່ງທ່ານຜູ້ຟັງຝາກມາລາຍການໃນອາທິດຜ່ານມາ. ເຊີນທ່ານຕິດຕາມຮັບຟັງ.
ເພື່ອນ ແກ້ວຕາ, ນັກສຶກສາພະແນກທ່ອງທ່ຽວ, ມະຫາວິທະຍາໄລແຫ່ງຊາດ ລາວ ຢາກຮູ້ວ່າໃນເດືອນ 4 ນີ້, ຢູ່ ຫວຽດນາມ ຈະຈັດຕັ້ງເຫດການ, ພິທີສະເຫຼີມສະຫຼອງທີ່ພົ້ນເດັ່ນໃດແດ່?
ເພື່ອນ ແກ້ວຕາ ທີ່ຮັກແພງ, ໃນເດືອນ 4 ນີ້, ຢູ່ ຫວຽດນາມ ຈະຈັດຕັ້ງ 2 ເຫດການໃຫຍ່, ທີ່ໜຶ່ງແມ່ນງານບຸນວິຫານ ຮູ່ງ (ວັນທີ 10/3 ໄລ່ຕາມຈັນທະປະຕິທິນ) ກົງກັບວັນທີ 9/4/2014. ນີ້ແມ່ນວັນບຸນທີ່ເປັນມູນເຊື້ອຂອງຊາວເຜົ່າກິງ ເພື່ອອາໄລຫາຄຸນງາມຄວາມດີຂອງເຈົ້າຊີວິດຮູ່ງໃນການສ້າງສາປະເທດຊາດ. ງານບຸນຖືກຈັດຕັ້ງຢູ່ ວິຫານ ຮູ່ງ, ນະຄອນ ວຽດຈີ່, ແຂວງ ຟູ໋ທໍ້. ງານບຸນວິຫານ ຮູ່ງ ໄດ້ຮັບການຮັບຮອງວ່າແມ່ນໜຶ່ງໃນບັນດາງານບຸນໃຫຍ່ຂອງ ຊາດ. UNSECO ກໍ່ໄດ້ຮັບຮອງວ່າ “ການເຫຼື້ອມໃສໄຫວ້ບູຊາເຈົ້າຊີວິດ ຮູ່ງ” ແມ່ນມໍລະດົກບໍ່ມີຮູບຮ່າງຂອງມວນມະນຸດ.
ໃນທ້າຍເດືອນ 4, ຫວຽດນາມ ຈະຈັດຕັ້ງພິທີສະເຫຼີມສະຫຼອງວັນໂຮມປະເທດຊາດເປັນເອກະພາບຄົບຮອບ 39 ປີ (30/4/1975 – 30/4/2014), ນີ້ແມ່ນເຫດການຢຸດຕິສົງຄາມຢູ່ ຫວຽດນາມ ເມື່ອປະທານາທິບໍດີ ສ. ຫວຽດນາມ ເຢືອງວັນມິງ ພ້ອມກັບຄະນະລັດຖະບານຖືກຈັບຕົວຢູ່ກັບທີ່ ແລະ ຕ້ອງຖະແຫຼງຍອມຈຳນົນໂດຍບໍ່ມີເງື່ອນໄຂຕໍ່ກຳລັງ ສາທາລະນະລັດ ປະຊາທິປະໄຕ ຫວຽດນາມ ແລະ ແນວໂຮມປົດປ່ອຍພາກໃຕ້ ຫວຽດນາມ ໃນວັນທີ 30/4/1975. ນະຄອນໄຊງ່ອນ ກ່ອນນີ້ໄດ້ຮັບການປ່ຽນຊື່ເປັນນະຄອນ ໂຮ່ຈີມິນ.
ພາບປະກອບ
ສ່ວນທ່ານ ທອງມີ ພິມມາລາ, ແຂວງ ບໍລິຄຳໄຊ ໄດ້ໂທລະສັບຫາລາຍການໂດຍຖາມວ່າ: ຂ້າພະເຈົ້າມີຫຼານຍິງຜູ້ໜຶ່ງທີ່ພວມຮຳ່ຮຽນຢູ່ມະຫາວິທະຍາໄລວັດທະນະທຳ ຮ່າໂນ້ຍ, ຫຼານໄດ້ເຫຼົ່າສູ່ຟັງວ່າ: ຢູ່ ຫວຽດນາມ ມີນັກສຶກສາ, ນັກຮຽນລາວຫຼາຍຄົນ ພວມຮຳ່ຮຽນ, ຂ້າພະເຈົ້າສົນໃຈເຖິງສະພາບການຮຳ່ຮຽນ, ການດຳລົງຊີວິດຂອງພວກຫຼາຍທີ່ສຸດ. ຜ່ານລາຍການຂ້າພະເຈົ້າຢາກຮູ້ສະພາບການລວມຂອງນັກຮຽນ, ນັກສຶກສາລາວຢູ່ ຫວຽດນາມແດ່?
ທ່ານ ທອງມີ ພິມມາລາ ທີ່ເຄົາລົບ, ທ້າຍເດືອນ 1 ຜ່ານມາ, ສະຖານທູດ ສປປ ລາວ ປະຈຳ ຫວຽດນາມ ໄດ້ຈັດຕັ້ງກອງປະຊຸມນັກສຶກສາລາວ ສົກຮຽນ 2012 – 2013, ໃນນັ້ນມີບົດລາຍງານສະພາບການຮຳ່ຮຽນ, ຝຶກອົບຮົມຂອງນັກຮຽນ, ນັກສຶກສາ ລາວ ທີ່ພວມຮຳ່ຮຽນຢູ່ ຫວຽດນາມ ສົກຮຽນ 2012 – 2013 ແລະ ທິດທາງ, ແຜນການໃຫ້ປີ 2014. ຕາມບົດລາຍງານດັ່ງກ່າວແລ້ວ, ໄລ່ຮອດທ້າຍປີ 2013, ຈຳນວນນັກຮຽນ, ນັກສຶກສາ ລາວ ທີ່ພວມຮຳ່ຮຽນຢູ່ໂຮງຮຽນ 150 ແຫ່ງໃນທົ່ວປະເທດຫວຽດນາມ ແມ່ນ 6.496 ຄົນ. ບັນດານັກຮຽນ, ນັກສຶກສາ ລາວ ຢູ່ ຫວຽດນາມ ລ້ວນແຕ່ໄດ້ຮັບຄວາມເອົາໃຈໃສ່ຈາກລັດຖະບານ ຫວຽດນາມ ກ່ຽວກັບເງື່ອນໄຂກິນ, ຢູ່, ກໍ່ຄືວັດຖຸອຸປະກອນການຮຽນຢ່າງຄົບຖ້ວນ.
ກ່ຽວກັບເງື່ອນໄຂເຊິ່ງບັນດາມະຫາວິທະຍາໄລ, ສະຖາບັນ ຂອງ ຫວຽດນາມ ສະຫງວນໃຫ້ແກ່ນັກສຶກສາ ລາວ, ທ່ານ ບຸນທັດ ລັດທິປັນຍາ, ທູດວັດທະນະທຳ - ສຶກສາ ສະຖານທູດ ລາວ ປະຈຳ ຫວຽດນາມ, ໃຫ້ຮູ້ວ່າ:
“ມະຫາວິທະຍາໄລ, ສະຖາບັນແຫ່ງຕ່າງໆຂອງ ຫວຽດນາມ ໄດ້ສະຫງວນບັນດາວັດຖຸ, ອຸປະກອນດີທີ່ສຸດໃຫ້ແກ່ນັກສຶກສາ ລາວ, ນັກສຶກສາລາວ ໄດ້ນຳໃຊ້ ແລະ ຢື່ມເອກະສານຮັບໃຊ້ໃຫ້ການຮຳ່ຮຽນຢ່າງຄົບຖ້ວນ. ໂຮງຮຽນແຫ່ງຕ່າງໆກໍ່ມີແຜນການຝຶກອົບຮົມດ້ານພາສາສະເພາະຂະແໜງ, ແລະຈັດຕັ້ງການໄປທັດສະນະສຶກສາອີກດ້ວຍ.”
ໃນຕົ້ນເດືອນ 3 ຜ່ານມາ, ສະຖານທູດ ລາວ ກໍ່ໄດ້ຈັດຕັ້ງງານແຂ່ງຂັນກິລາ ໃຫ້ນັກສຶກສາລາວ ທີ່ຮຳ່ຮຽນຢູ່ບັນດາໂຮງຮຽນໃນບໍລິເວນນະຄອນ ຮ່າໂນ້ຍ. ໃນນັ້ນມີປະເພດກິລາຫຼາຍຢ່າງຄື: ຕີດອກປີກໄກ່, ບານສົ່ງ, ບີງບອງ... ການເຄື່ອນໄຫວນີ້ບໍ່ພຽງແຕ່ຊ່ວຍຍົກສູງສຸຂະພາບໃຫ້ແກ່ບັນດານັກສຶກສາເທົ່ານັ້ນ ຫາກຍັງຊ່ວຍໃຫ້ບັນດານັກຮຽນ, ນັກສຶກສາລາວທີ່ພວມຮຳ່ຮຽນຢູ່ໂຮງຮຽນຕ່າງໆມີຄວາມສະໜິດຕິດພັນກ່ວາອີກ.
ລາຍການໂອ້ລົມກັບເພື່ອນລາວຂອງພວກເຮົາຂໍສິ້ນສຸດລົງພຽງເທົ່ານີ້, ຖ້າຫາກຜູ້ໃດມີຄວາມສົນໃຈ ແລະ ຢາກປະກອບຄຳເຫັນໃຫ້ລາຍການສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ວິທະຍຸກະຈາຍສຽງຫວຽດນາມ-ພາກພາສາລາວ-ເຮືອນເລກທີ 45 ຖະໜົມບາຈ້ຽວ-ຮ່າໂນ້ຍ ຫຼືໂທລະສັບມາໂດຍກົງຕາມເບີໂທ: 00844.38256631, ອີແມວ: Laovov@.yahoo.com. ພວກເຮົາຍິນດີຕ້ອນຮັບ ແລະ ພ້ອມແລ້ວທີ່ຈະຕອບຄຳຖາມຂອງທ່ານທຸກປະການ. ຂໍຂອບໃຈທ່ານທີ່ໄດ້ຕິດຕາມຮັບຟັງ ແລະ ຊົມລາຍການຂອງພວກເຮົາ. ສະບາຍດີ