ໂຮງຮຽນມັດທະຍົມຕອນຕົ້ນ ບີ່ງຈີ້ດົງ B. (ພາບ:ຫ້ອງການສຶກສາ)

ໄລ່ຮອດທ້າຍເດືອນ ກໍລະກົດ, ນະຄອນ ໂຮ່ຈີມິນ ໄດ້ມີໂຮງຮຽນໃຫມ່ຕື່ມອີກ 12 ແຫ່ງ, ໃນນັ້ນ ເມືອງ ບີ່ງເຕີນ ມີຈຳນວນໂຮງຮຽນໃຫມ່ຫລາຍສຸດ ດ້ວຍ 7 ແຫ່ງ, ຖັດຈາກນັ້ນແມ່ນ ເມືອງ ຮອກມົນ, ບີ່ງແຈງ, ເມືອງ 12, 8, 6. ຢູ່ຕາແສງ ບີ່ງຈີ້ດົງ B, ເມືອງ ບີ່ງເຕີນ, ນີ້ແມ່ນປີທຳອິດ, ນັກຮຽນຊັ້ນມັດທະຍົມຕອນຕົ້ນ ບໍ່ຕ້ອງຍ້າຍໄປຮຽນຢູ່ຕາແສງໃກ້ຄຽງອີກແລ້ວ. ໂຮງຮຽນແຫ່ງນີ້ກໍ່ແມ່ນໂຮງຮຽນມັດທະຍົມຕອນຕົ້ນທຳອິດທີ່ໄດ້ຮັບການກໍ່ສ້າງຢູ່ຕາແສງ, ອັນໄດ້ຊ່ວຍຫລຸດຜ່ອນຄວາມຫຍຸ້ງຍາກສ່ວນໃດຫນຶ່ງໃຫ້ແກ່ນັກຮຽນຢູ່ເຂດນີ້ ໂດຍບໍ່ຕ້ອງໄດ້ໄປຮຽນຢູ່ໄກ. ທ່ານ ໂຮ່ແທ່ງແຢງ, ຜູ້ອຳນວຍການໂຮງຮຽນ ມັດທະຍົມຕອນຕົ້ນ ບີ່ງຈີ້ດົງ B ໃຫ້ຮູ້ວ່າ: ປີນີ້ ໂຮງຮຽນ ມີ 16 ຫ້ອງຮຽນ ດ້ວຍນັກຮຽນກວ່າ 660 ຄົນ. ນັກຮຽນ ແລະ ຄູອາຈານທັງໝົດຈະໄດ້ຮ່ຳຮຽນ ແລະ ສອນໃນໂຮງຮຽນຫລັງໃຫມ່.

“ໂຮງຮຽນໄດ້ຮັບການກໍ່ສ້າງໃຫມ່ ດ້ວຍບັນດາຫ້ອງຕ່າງໆຮັບໃຊ້ການຮຽນການສິດສອນ. ນອກນັ້ນ ຍັງມີຫລາຍຫ້ອງອື່ນຄື: ຫໍສະມຸດທີ່ກວ້າງໃຫຍ່, ຫ້ອງທົດລອງສຳລັບວິຊາຟີຊິກ, ເຄມີ-ຊີວະສາດ, ຫ້ອງເຕັກໂນໂລຊີ, ວິຈິດສິນ, ຄອມພິວເຕີ… ລ້ວນແຕ່ໄດ້ຮັບການຕິດຕັ້ງອຸປະກອນຄົບທຸກຢ່າງເພື່ອຮັບໃຊ້ວຽກງານປ່ຽນແປງໃຫມ່ວິທີການຮຽນການສິດສອນ ກໍ່ຄືສ້າງເງື່ອນໄຂໃຫ້ແກ່ຄູ່ອາຈານ ແລະ ນັກຮຽນມີຄວາມອຸ່ນອ່ຽນໃຈໃນການຮຽນການສອນ”.

ຢູ່ ເມືອງ ຮອກມົນ ເຖິງວ່າ ສົກຮຽນໃຫມ່ນີ້ ມີໂຮງຮຽນຕື່ມອີກພຽງແຫ່ງຫນຶ່ງທີ່ໄດ້ນຳເຂົ້າເຄື່ອນໄຫວ ແຕ່ນີ້ກໍ່ແມ່ນໂຮງຮຽນທີ່ທັນສະໄຫມ. ນັ້ນແມ່ນໂຮງຮຽນປະຖົມ ເລວັນຟຽນ ດ້ວຍຫ້ອງຮັບໃຊ້ການຮຽນການສອນຄົບທຸກຢ່າງ: ມີໂຮງອາຫານ, ຫນອງລອຍນ້ຳ, ສະຫນາມກິລາ, ເພື່ອຮັບປະກັນໃຫ້ການຮຽນການສອນ 2 ຕອນ / ມື້ ຕາມໂຄງການສິດສອນໃຫມ່. ທ່ານ ຫງວຽນແອັງຕວນ, ຮອງຫົວຫນ້າຫ້ອງການສຶກສາ ແລະ ບຳລຸງສ້າງ ເມືອງ ຮອກມົນ ໃຫ້ຮູ້ວ່າ:

“ສົກຮຽນ 2024-2025 ມີໂຮງຮຽນໃຫມ່ອີກແຫ່ງຫນຶ່ງໄດ້ຮັບການກໍ່ສ້າງຂຶ້ນ ນັ້ນແມ່ນໂຮງຮຽນປະຖົມ ເລວັນຟຽນ ຕາແສງ ເຕີນເທີຍຍີ່ ລວມມີ 30 ຫ້ອງຮຽນ ແລະ ຫ້ອງຮັບໃຊ້ການຮຽນການສອນ. ໂຮງຮຽນແຫ່ງນີ້ໄດ້ຮັບການກໍ່ສ້າງຢ່າງໃຫຍ່ໂຕສວຍງາມ, ທັນສະໄຫມ, ຕອບສະຫນອງຄວາມຮຽກຮ້ອງຕ້ອງການການຮ່ຳຮຽນຂອງນັກຮຽນຢູ່ຕາແສງ ເຕີນເທີຍຍີ່ ແລະ ຕາແສງ ໃກ້ຄຽງ”.

ທ່ານ ໂງວັນຕວຽນ, ຫົວຫນ້າຫ້ອງການສຶກສາ ແລະ ບຳລຸງສ້າງ ເມືອງ ບີ່ງເຕີນ ໃຫ້ຮູ້ວ່າ: ໃນສົກຮຽນ 2024-2025, ເມືອງ ບີ່ງເຕີນ ມີໂຮງຮຽນໃຫມ່ 7 ແຫ່ງໄດ້ນຳເຂົ້າເຄື່ອນໄຫວໃນສົກຮຽນໃຫມ່ດ້ວຍ 204 ຫ້ອງຮຽນ, ຍົກຍອດຈຳນວນຫ້ອງຮຽນຢູ່ ເມືອງ ບີ່ງເຕີນຂຶ້ນເຖິງກວ່າ 4.000 ຫ້ອງ. ນີ້ແມ່ນຄວາມມານະພະຍາຍາມຂອງນະຄອນ, ຂອງເມືອງ ໃນການພັດທະນາການສຶກສາ. ທ່ານ ໂງວັນຕວຽນ ໃຫ້ຮູ້ວ່າ:

 “ຊັ້ນປະຖົມປະຈຸບັນ ພວກຂ້າພະເຈົ້າປະຕິບັດການແບ່ງຈຳນວນນັກຮຽນທີ່ມີນັກຮຽນຫລາຍຄົນ. ໂຮງຮຽນມີນັກຮຽນ 2.000 ຄົນຂຶ້ນໄປຈະໄດ້ຍ້າຍມາຮຽນຢູ່ໂຮງຮຽນໃຫມ່. ເພາະສະນັ້ນ ໃນສົກຮຽນໃຫມ່ນີ້ ຈຳນວນນັກຮຽນທີ່ຮຽນ 2 ຕອນ / ມື້ ແມ່ນເພີ່ມຂຶ້ນ, ຈາກ 52% ຂຶ້ນເປັນ 62% ໃນຊັ້ນປະຖົມ, ສ່ວນຊັ້ນມັດທະຍົມຕອນຕົ້ນແມ່ນ 38% ເປັນ 48%”.

ຫ້ອງຮຽນຂອງໂຮງຮຽນປະຖົມ ເລວັນຟຽນ. ພາບ: VOV

ແຕ່ນີ້ຮອດທ້າຍປີ, ນະຄອນ ໂຮ່ຈີມິນ ຄາດວ່າ ຈະມີໂຮງຮຽນໃຫມ່ຕື່ມອີກ 6 ແຫ່ງ ຢູ່ ເມືອງ 4, ເມືອງ ບີ່ງແທ້ງ, ເມືອງ ບີ່ງເຕີນ ແລະ ເມືອງ ຍ່າແບ່, ຮອກມົນ, ບີ່ງແຈງ. ຕໍ່ຈາກນັ້ນ ໃນສົກຮຽນຈະມາເຖິງ ທາງນະຄອນຈະກໍ່ສ້າງສຳເລັດຕື່ມອີກ 280 ຫ້ອງຮຽນ. ພະແນກສຶກສາ ແລະ ບຳລຸງສ້າງນະຄອນ ໂຮ່ຈີມິນ ໃຫ້ຮູ້ວ່າ: ນະຄອນຈະສືບຕໍ່ເຮັດວຽກກັບບັນດາພະແນກ, ຂະແຫນງການຂອງນະຄອນ ເພື່ອຜັນຂະຫຍາຍມາເຖິງບັນດາເມືອງກ່ຽວກັບພື້ນຖານດ້ານວັດຖຸໃຫ້ແກ່ການສຶກສາ. ພ້ອມກັນນັ້ນ ກໍ່ຮຽກຮ້ອງໃຫ້ບັນດາເມືອງ ຕ້ອງມີຄວາມເປັນເຈົ້າການໃນການສຳຫລວດກວດກາ, ຈົດທະບຽນບັນຊີລາຍຊື່ໂຄງການສຶກສາເພີ່ມເຕີມເຂົ້າແຜນການລົງທຶນໄລຍະກາງ  2021 – 2025. ຈາກນັ້ນ ນະຄອນ ຈະຍູ້ແຮງຄວາມຄືບຫນ້າການປະຕິບັດແຜນຮ່າງ 4.500 ຫ້ອງຮຽນ ຕາມຂັ້ນຕອນທີ່ໄດ້ຂຶ້ນແຜນກ່ອນນັ້ນ.