 ພໍ່ລ້ຽງ ຍາມໃດກໍ່ເອົາໃຈໃສ່ຕໍ່ການຮຽນຂອງລູກ. ພາບ:hagiangtv.vn |
ເກືອບ 3 ເດືອນຜ່ານມາ, ເມື່ອສຽງລະຄັງຂອງປ້ອມປ້ອງກັນຊາຍແດນ ເຫງ໊ຍທ້ວນ ເມືອງ ກວ໋ານບະ ແຂວງຮ່າຢາງ ດັງຂຶ້ນ ກໍ່ແມ່ນຮອດເວລາທີ່ ນ້ອງ ຊຸ່ງຊ່າວຖູຍ ແລະ ຢ່າງງອກຟຸກ, ລູກລ້ຽງ 2 ຄົນຂອງປ້ອມຕື່ນນອນ ແລະ ມາອອກກຳລັງກາຍຢູ່ເດີ່ນພ້ອມກັບບັນດາພະນັກງານ, ນັກຮົບ. ໂດຍອອກຈາກຄອບຄົວ, ພວກນ້ອງນ້ອຍຍ້າຍໄປຢູ່ນຳບັນດາພໍ່ລ້ຽງ “ຊື່ງແມ່ນທະຫານປ້ອງກັນຊາຍແດນ” ໄດ້ຮັບການຝຶກຝົນຫລໍ່ຫລອມໃນສະພາບແວດລ້ອມຂອງກອງທັບ, ໄດ້ຮ່ຳຮຽນ, ໄດ້ຮັບຄວາມຮັກແພງ ແລະ ອະນາຄົດຈະພັດທະນາ. ນ້ອງ ຊຸ່ງຊ່າວຖູຍ, ອາຍຸ 13 ປີ ຊາວເຜົ່າມົ້ງ ຢູ່ ບ້ານ ມາຊ່າວໂຟ ພວມຮຽນ ຊັ້ນ ມ3 ໂຮງຮຽນມັດທະຍົມຕອນຕົ້ນ ຕາແສງ ເຫງ໊ຍທ້ວນ ແບ່ງປັນວ່າ:
“ຫລານມານີ້ແຕ່ຕົ້ນສົກຮຽນ. ຢູ່ທີ່ນີ້ ຫລານໄດ້ກິນເຂົ້າພ້ອມກັບພວກອາວ, ໄດ້ດຳເນີນຊີວິດຢູ່ ປ້ອມເລີຍ. ພວກອາວກິນເຂົ້າເຊົ້າແລ້ວ ໄດ້ໄປສົ່ງພວກຫລານໄປໂຮງຮຽນ. ຕອນຄ່ຳ ເວລາ 7 ໂມງຄ່ຳ ພວກຫລານເລີ່ມຮຽນ ແລະ ຖ້າຫາກມີບົດໃດຍາກ ຫລານກໍ່ຖາມພວກອາວ, ລຸງ ບອກສອນໃຫ້”.
ພັນຕີ ເລືອງແມ້ງຮຸ່ງ, ກອງຂົນຂວາຍມະຫາຊົນ ປ້ອມປ້ອງກັນຊາຍແດນ ເຫງ໊ຍທ້ວນ ໃຫ້ຮູ້ວ່າ:
“ມາຢູ່ນຳພວກຂ້າພະເຈົ້າ, ພວກຫລານໄດ້ກິນຢູ່ຕາມລະບອບຂອງພະນັກງານ, ນັກຮົບໃນກົມກອງ. ພະນັກງານ, ນັກຮົບ ຈັດເວລາເພື່ອສົ່ງ ແລະ ຮັບພວກຫລານເມື່ອໄປໂຮງຮຽນ. ຕອນຄ່ຳ ພວກຂ້າພະເຈົ້າບອກສອນໃຫ້ພວກຫລານຮ່ຳຮຽນ. ຍ້ອນຢູ່ຫ່າງໄກກັບຄອບຄົວ, ສະນັ້ນ ພວກຂ້າພະເຈົ້າ ໄດ້ຕາງຫນ້າໃຫ້ພໍ່ແມ່ພວກຫລານເພື່ອສຶກສາ ແລະ ບອກສອນພວກຫລານຮ່ຳຮຽນ. ພວກຂ້າພະເຈົ້າ ກໍ່ມີຄວາມປາດຖະຫນາຢາກໃຫ້ພວກຫລານພະຍາຍາມຮ່ຳຮຽນ, ເມື່ອເຕີບໃຫຍ່ຂຶ້ນມາ ກໍ່ຈະມີອະນາຄົດທີ່ດີ”.
ພວກເດັກນ້ອຍເປັນລູກລ້ຽງຂອງທະຫານປ້ອງກັນຊາຍແດນ ເຫງ໊ຍທ້ວນ ລ້ວນແຕ່ປະສົບກັບຄວາມຫຍຸ້ງຍາກທີ່ສຸດ, ຜູ້ຫນຶ່ງແມ່ນພໍ່ເສຍຊີວິດ, ຜູ້ຫນຶ່ງແມ່ນແມ່ເສຍຊີວິດ, ຄອບຄົວປະສົບກັບຄວາມຫຍຸ້ງຍາກ ແລະ ການໄປໂຮງຮຽນຂອງພວກຫລານແມ່ນຫຍຸ້ງຍາກລຳບາກແທ້ໆ. ພັນຕີ ຊຸ່ງມີງຟຸກ ຫົວຫນ້າປ້ອມປ້ອງກັນຊາຍແດນ ເຫງ໊ຍທ້ວນ, ກອງບັນຊາການທະຫານປ້ອງກັນຊາຍແດນ ແຂວງຮ່າຢາງ ໃຫ້ຮູ້ວ່າ: ໂດຍປະຕິບັດຕາມໂຄງການ “ທະຫານປ້ອງກັນຊາຍແດນຊ່ວຍໃຫ້ເດັກນ້ອຍໄດ້ໄປໂຮງຮຽນ”, ປ້ອມປ້ອງກັນຊາຍແດນ ເຫງ໊ຍທ້ວນ ກຳລັງຊ່ວຍຄ່າໃຊ້ຈ່າຍໃຫ້ນ້ອງນ້ອຍ 14 ຄົນເພື່ອໄປໂຮງຮຽນ ແລະ ຮັບ 2 ຄົນມາເປັນລູກລ້ຽງ.
“ປ້ອມປ້ອງກັນຊາຍແດນ ເຫງ໊ຍທ້ວນ ຍາມໃດກໍ່ສົມທົບກັບ ຄະນະກຳມະການປະຊາຊົນ ເຫງ໊ຍທ້ວນ ແລະ ໂຮງຮຽນ ເພື່ອຊ່ວຍພວກຫລານມີເງື່ອນໄຂຮ່ຳຮຽນພ້ອມກັບໝູ່ເພື່ອນ. ພວກຂ້າພະເຈົ້າເລືອກເອົາບັນດາຄອບຄົວທີ່ປະສົບກັບຄວາມຫຍຸ້ງຍາກເປັນພິເສດ, ພວກຫລານບໍ່ມີຜູ້ເພິ່ງພາອາໄສ, ພາພວກຫລານມາຢູ່ນຳພວກອາວຢູ່ປ້ອມປ້ອງກັນຊາຍແດນເພື່ອໃຫ້ພວກຫລານມີເງື່ອນໄຂຮ່ຳຮຽນ. ລູກລ້ຽງຂອງທະຫານປ້ອງກັນຊາຍແດນ ຈະໄດ້ກິນຢູ່ພັກເຊົາໃນປ້ອມເລີຍ. ນອກນັ້ນ ພະນັກງານ, ນັກຮົບ ຍັງປະກອບສ່ວນເພື່ອຊື້ໂສ້ງເສື້ອ, ເກີບ, ປື້ມຮຽນ ແລະ ເຄື່ອງໃຊ້ສ່ວນຕົວໃຫ້ພວກຫລານ”.
ດ້ວຍຄວາມຮັກແພງຂອງພະນັກງານ, ນັກຮົບປ້ອມປ້ອງກັນຊາຍແດນ ເຫງ໊ຍທ້ວນ ໄດ້ຊ່ວຍໃຫ້ນ້ອງໆນ້ອຍມີຄວາມເຊື່ອໝັ້ນ, ມານະຈິດຕື່ມອີກເພື່ອໄປໂຮງຮຽນ.
“ມາຢູ່ນຳພວກອາວແມ່ນດີທີ່ສຸດ. ຄາບເຂົ້າໃດກໍ່ແຊບ, ມີປາມີຊີ້ນກິນ... ຫລານຫວັງວ່າ ຫລັງຈາກໄດ້ຮ່ຳຮຽນແລ້ວ ພວກຫລານຈະກາຍເປັນນັກຮົບປ້ອງກັນຊາຍແດນຄືພວກອາວ”.
 ພະນັກງານ, ທະຫານປ້ອງກັນຊາຍແດນ ພ້ອມກັບພວກນ້ອງນ້ອຍທົບທວນຄືນບົດຮຽນພາຍຫລັງຊົ່ວໂມງຂຶ້ນຫ້ອງ. (ພາບ:ຫວີງຟອງ vov5) |
ທ່ານນາງ ຫວູທິກວຽນ, ເລຂາພັກຕາແສງ ເຫງ໊ຍທ້ວນ ແບ່ງປັນວ່າ:
“ຮູບແບບນີ້ແມ່ນວຽກງານທີ່ມີຄວາມໝາຍທີ່ສຸດຂອງພະນັກງານ, ນັກຮົບປ້ອມປ້ອງກັນຊາຍແດນ ເຫງ໊ຍທ້ວນ ມຸ່ງເຖິງປະຊາຊົນບັນດາເຜົ່າສ່ວນຫນ້ອຍຢູ່ເຂດຊາຍແດນ. ນີ້ກໍ່ແມ່ນບ່ອນອີງອັນຫນັກແຫນ້ນ, ຊ່ວຍໃຫ້ພວກຫລານນ້ອຍທີ່ປະສົບກັບຄວາມຫຍຸ້ງຍາກມີໂອກາດໄດ້ໄປໂຮງຮຽນ, ປະກອບສ່ວນຍົກສູງລະດັບຄວາມຮູ້ຂອງປະຊາຊົນ, ເພີ່ມທະວີຄວາມສາມັກຄີລະຫວ່າງປະຊາຊົນ ກັບທະຫານປ້ອງກັນຊາຍແດນ, ແລະ ປົກປັກຮັກສາເຂດຊາຍແດນຂອງປະເທດຊາດໃຫ້ໝັ້ນແກ່ນ”.
ໄປຄຽງຄູ່ກັບການປະຕິບັດໂຄງການຊ່ວຍເດັກນ້ອຍທີ່ປະສົບກັບຄວາມຫຍຸ້ງຍາກໃຫ້ໄດ້ໄປໂຮງຮຽນ ແລະ “ລູກລ້ຽງຂອງປ້ອມປ້ອງກັນຊາຍແດນ”, ປ້ອມປ້ອງກັນຊາຍແດນ ເຫງ໊ຍທ້ວນ ໄດ້ພ້ອມກັບພໍ່ແມ່ປະຊາຊົນ ຂອງ 9 ຊົນເຜົ່າໃນບໍລິເວນລົບລ້າງຮີດຄອງປະເພນີທີ່ຫລ້າຫລັງ, ກໍ່ສ້າງວິຖີຊີວິດຢ່າງສິວິໄລ, ພັດທະນາເສດຖະກິດສັງຄົມ. ໂດຍໄດ້ຮັບການຜັນຂະຫຍາຍກ່ອນນີ້ 5 ປີ (ປີ 2019), ໂຄງການດັ່ງກ່າວ ໂດຍແມ່ນປ້ອມປ້ອງກັນຊາຍແດນ ເຫງ໊ຍທ້ວນ ປະຕິບັດຢ່າງລອບຄອບຖີ່ຖ້ວນ. ມີຫລານນ້ອຍຫລາຍຄົນຍາດໄດ້ຜົນງານດີໃນການຮ່ຳຮຽນ ແລະ ໄດ້ຮັບຄວາມຍ້ອງຍໍຊົມເຊີຍຈາກອຳນາດການປົກຄອງເມືອງ, ແຂວງ, ມີບາງຄົນສາມາດເສັງໄດ້ເຂົ້າຮຽນຢູ່ມະຫາວິທະຍາໄລ. ວຽກງານທີ່ພະນັກງານ, ນັກຮົບປ້ອມປ້ອງກັນຊາຍແດນຊ່ວຍເຫລືອເດັກນ້ອຍທີ່ປະສົບກັບຄວາມຫຍຸ້ງຍາກໃຫ້ໄດ້ໄປໂຮງຮຽນນັ້ນ ໄດ້ສ້າງຄວາມເຊື່ອໝັ້ນໃຫ້ແກ່ພໍ່ແມ່ປະຊາຊົນບັນດາເຜົ່າ ແລະ ກໍ່ແມ່ນສາຍເຊື່ອມຕໍ່ລະຫວ່າງທະຫານປ້ອງກັນຊາຍແດນ ກັບປະຊາຊົນໃນວຽກງານປົກປັກຮັກສາຊາຍແດນຂອງປະເທດຊາດ.