ບີ່ງເຢືອງ ວາດເປົ້າໝາຍ ໃຫ້ກາຍເປັນເຂດຕົວເມືອງ,  ອຸດສາຫະກຳ,ການບໍລິການທັນສະໄຫມ,ມີລະດັບພາກພື້ນ ແລະ ສາກົນໃນປີ 2050. (ພາບ:Thiên Lý/VOV)

ປະຈຸບັນ ບີ່ງເຢືອງ ມີ 33 ເຂດອຸດສາຫະກຳ, ໃນນັ້ນ ມີ 28 ແຫ່ງໄດ້ນຳເຂົ້າເຄື່ອນໄຫວ ດ້ວຍຍອດເນື້ອທີ່ກວ່າ 11.960 ha, ອັດຕາສ່ວນນຳໃຊ້ແມ່ນກວ່າ 93%. ຕາມການວາງແຜນຜັງ ຮອດປີ 2030, ບີ່ງເຢືອງ ຈະພັດທະນາຕື່ມອີກ 10 ເຂດອຸດສາຫະກຳ ດ້ວຍເນື້ອທີ່ປະມານ 16.000 ha. ສຳລັບເຂດໃຫມ່, ບີ່ງເຢືອງ ໄດ້ຄົ້ນຄ້ວາພັດທະນາເຂດອຸດສາຫະກຳຊີວະພາບ, ດຶງດູດການລົງທຶນຢູ່ບັນດາຂົງເຂດຄື: ການຫັນເປັນອັດຕະໂນມັດ, ຂັ້ນຕອນອັດສະລິຍະ ແລະ ນຳໃຊ້ພະລັງງານສະອາດ, ພະລັງງານທົດແທນ, ຜະລິດຕະພັນມີມູນຄ່າສົ່ງອອກໃຫຍ່, ການຜະລິດ ຕິດພັນກັບການພັດທະນາການບໍລິການອຸດສາຫະກຳ. ທ່ານ ເຈືອງວັນຟອງ, ຮອງຫົວຫນ້າຄະນະຄຸ້ມຄອງບັນດາເຂດອຸດສາຫະກຳ ແຂວງ ບີ່ງເຢືອງ ໃຫ້ຮູ້ວ່າ:

 “ການກຳນົດທິດພັດທະນາໃນໄລຍະຈະມາເຖິງ ນັ້ນແມ່ນ ແຂວງ ຈະພັດທະນາບັນດາເຂດອຸດສາຫະກຳຕາມຮູບແບບເຂດອຸດສາຫະກຳຊີວະພາບ, ເຂດອຸດສາຫະກຳສີຂຽວ. ແຂວງ ຈະວາງແຜນຜັງເສັ້ນທາງອ້ອມຮອບເຂດອຸດສາຫະກຳຢູ່ທາງທິດເຫນືອ ເພື່ອສຸມໃສ່ດຶງດູດບັນດາໂຄງການລົງທຶນ, ຈັດວາງການຍົກຍ້າຍບັນດາໂຄງການຕັ້ງຢູ່ໃນເຂດຊຸມຊົນຢູ່ເຂດທາງທິດໃຕ້ມາຢູ່ເຂດທິດເຫນືອ”.

          ເລື່ອງພັດທະນາເຂດອຸດສາຫະກຳຊີວະພາບ ແມ່ນທ່າອ່ຽງທົ່ວໂລກ ແລະ ແຂວງ ບີ່ງເຢືອງ ພວມຜັນຂະຫຍາຍ. ເຖິງຢ່າງໃດກໍຕາມ, ຄວາມຫຍຸ້ງຍາກທີ່ສຸດຂອງແຂວງ ນັ້ນແມ່ນຕ້ອງຫັນປ່ຽນບັນດາເຂດອຸດສາຫະກຳແບບເກົ່າມາເປັນທັນສະໄຫມ. ທ່ານ ມາຍຮຸ່ງຢູ໋ງ, ຮອງປະທານຄະນະກຳມະການປະຊາຊົນ ແຂວງ ບີ່ງເຢືອງ ໃຫ້ຮູ້ວ່າ: ແຂວງ ຈະມີບັນດານະໂຍບາຍຫນູນຊ່ວຍໃຫ້ເຈົ້າຂອງການລົງທຶນຕາມການກຳນົດ.

 “ແຂວງ ຈະລົງທຶນບັນດາເສັ້ນທາງຕົ້ນຕໍເຂົ້າບັນດາເຂດອຸດສາຫະກຳ ເພື່ອເຊື່ອມຕໍ່, ຄຸ້ມຄອງຄວາມເປັນລະບຽບຮຽບຮ້ອຍ ທັງຫນູນຊ່ວຍໃຫ້ວິສາຫະກິດສ່ວນໃດຫນຶ່ງໃນໄລຍະຈະມາເຖິງ ເພື່ອໃຫ້ທັງຫັນເປັນສີຂຽວ, ຫັນເປັນສະອາດ, ຫັນເປັນອັດສະລິຍະ, ຊີວະພາບ”.         

ປະຈຸບັນ ບັນດາວິສາຫະກິດຢູ່ໃນແຂວງ ໄດ້ ແລະ ພວມຫັນປ່ຽນໄປຍັງທ່າອ່ຽງພັດທະນາສີຂຽວ. ຫນຶ່ງໃນຈຳນວນບັນດາວິສາຫະກິດພົ້ນເດັ່ນ, ນຳຫນ້າໃນການເຄື່ອນໄຫວດັ່ງກ່າວ ນັ້ນແມ່ນ ໂຮງງານຂອງກຸ່ມບໍລິສັດ LEGO ຂອງ ແດນມາກ ຕັ້ງຢູ່ເຂດອຸດສາຫະກຳ ຫວຽດນາມ - ສິງກະໂປ 3 (VSIP 3). ກຸ່ມບໍລິສັດ LEGO ໄດ້ວາງອອກເປົ້າໝາຍ ຫລຸດຜ່ອນການກະທົບຕໍ່ສິ່ງແວດລ້ອມ, ສະນັ້ນ ພຽງໃນ 1 ປີ ນັບແຕ່ເມື່ອເລີ່ມລົງມືກໍ່ສ້າງ, LEGO ໄດ້ປູກຕົ້ນໄມ້ສຳເລັດ 50.000 ຕົ້ນ ຢູ່ ບໍລິເວນໂຮງງານ. ທ່ານ Preben Elnef, ຮອງປະທານກຸ່ມບໍລິສັດ LEGO ທັງເປັນຜູ້ອຳນວຍການໃຫຍ່ LEGO Manufacturing Vietnam ໃຫ້ຮູ້ວ່າ:

 “ນີ້ເປັນຄັ້ງທຳອິດທີ່ພວກຂ້າພະເຈົ້າທົດລອງມາດຕະການສ້າງແຫລ່ງພະລັງງານເພື່ອນຳໃຊ້ໃນໂຮງງານ. ພວກຂ້າພະເຈົ້າເລືອກເຟັ້ນມາດຕະການພະລັງງານແສງຕາເວັນ. ຢູ່ຂ້າງໂຮງງານ ກໍ່ຈັດສັນເນື້ອທີ່ດິນກວ້າງໃຫຍ່ເປັນເຂດຕັ້ງຖ່ານພະລັງງານເພື່ອສ້າງພະລັງງານໃຫ້ແກ່ພວກຂ້າພະເຈົ້າ. ສະນັ້ນ ແຫລ່ງພະລັງງານຕົ້ນຕໍຂອງພວກຂ້າພະເຈົ້າຈະໄດ້ນຳໃຊ້ຈາກພະລັງງານແສງຕາເວັນ”.

          ການຫັນມາຜະລິດແບບສີຂຽວກໍ່ຊ່ວຍໃຫ້ວິສາຫະກິດເພີ່ມທີ່ຕັ້ງໃນການແກ້ງແຍ່ງ, ເຖິງຢ່າງໃດກໍຕາມ ການຫັນປ່ຽນການຜະລິດແບບສີຂຽວ ແລະ ຍືນຍົງກໍ່ຍັງປະສົບກັບຄວາມຫຍຸ້ງຍາກດ້ານລະບຽບການ, ສະນັ້ນ ວິສາຫະກິດ ສະເຫນີຕ້ອງມີບັນດາກົນໄກ, ນະໂຍບາຍ, ໂຄງການຫນູນຊ່ວຍທີ່ເໝາະສົມ, ກອບນິຕິກຳທີ່ສະດວກ. ທ່ານ ຫງວຽນວັນເລິ້ຍ, ເລຂາຄະນະພັກແຂວງ ບີ່ງເຢືອງ ໃຫ້ຮູ້ວ່າ:

“ຄະນະພັກແຂວງ, ຄະນະກຳມະການປະຊາຊົນແຂວງ ຈະຍາດເວລາເປັນສ່ວນໃຫຍ່ເພື່ອເຮັດວຽກກັບປະຊາຄົມວິສາຫະກິດ ເພື່ອຊອກຮູ້ວິສາຫະກິດຍັງປະສົບກັບຄວາມຫຍຸ້ງຍາກແນວໃດ, ມີຂໍ້ສະເຫນີໃດແດ່, ຂໍ້ຕິດຂັດໃດເພື່ອແກ້ໄຂ. ຖ້າຫາກຢູ່ເໜືອສິດອຳນາດກໍ່ຈະລາຍງານຕໍ່ສູນກາງ. ດ້ວຍວິທີເຮັດແບບນີ້, ພວກຂ້າພະເຈົ້າພ້ອມກັນເຮັດ, ຮ່ວມເດີນທາງນຳກັນເພື່ອບັນລຸຜົນສຳເລັດ ແລະ ພັດທະນາ”.

ທ່ານ ມາຍຮຸ່ງຢູ໋ງ, ຮອງປະທານ ຄະນະກຳມະການປະຊາຊົນ ແຂວງ ບີ່ງເຢືອງ. (ພາບ:binhduong.gov.vn)

           ຮູບພາບແຂວງ ບີ່ງເຢືອງ ຂະຫຍັນຂັນເຄື່ອນ ຕັດສິນໃຈຫັນບັນດາເຂດອຸດສາຫະກຳເປັນສີຂຽວ ໄດ້ ແລະ ພວມດຶງດູດບັນດານັກລົງທຶນຢູ່ພາຍໃນ ແລະ ຕ່າງປະເທດ, ນຳແຂວງ ບີ່ງເຢືອງ ກາຍເປັນຫນຶ່ງໃນບັນດາແຂວງອຸດສາຫະກຳຈຸດສຸມຢູ່ ຫວຽດນາມ. ນີ້ຈະແມ່ນແຫລ່ງກຳລັງເພື່ອໃຫ້ແຂວງ ບີ່ງເຢືອງ ຍູ້ແຮງການພັດທະນາເສດຖະກິດ ສັງຄົມ ໃຫ້ນັບມື້ນັບຍືນຍົງກວ່າ, ຫັນຄວາມຄາດຫວັງກໍ່ສ້າງແຂວງ ບີ່ງເຢືອງ ພັດທະນາ ແລະ ຈະເລີນຮຸ່ງເຮືອງໃຫ້ປະກົດຜົນເປັນຈິງ.