(ພາບປະກອບ: baotintuc.vn)
(vovworld): ປະຊາຄົມບັນດາປະເທດອາເມລິກາລາຕິນ ແລະ ກາຣີເບ (CELAC) ໄດ້ໃຫ້ຄຳໝັ້ນສັນຍາສ້າງກຸ່ມຮ່ວມມືເອກະລາດ ແລະ ມີອະທິປະໄຕ, ກ້າວໄປເຖິງເສັ້ນທາງພັດທະນາແບບຍືນຍົງຢູ່ພາກພື້ນນີ້. ນີ້ແມ່ນໜຶ່ງໃນບັນດາເນື້ອໃນລະບຸໄວ້ໃນຖະແຫຼງການ Santiago ໂດຍບັນດາປະເທດສະມາຊິກ CELAC ຮັບຮອງເອົາທີ່ວາລະອັດກອງປະຊຸມສຸດຍອດຄັ້ງທີ 2 ປະຊາຄົມບັນດາປະເທດອາເມລິກາລາຕິນ ແລະ ກາຣີເບ ຊື່ງໄດ້ດຳເນີນໄປໃນວັນທີ 28/1 ຢູ່ນະຄອນຫຼວງ Santiago ປະເທດຈີເລ. ການນຳບັນດາປະເທດເຂົ້າຮ່ວມກອງປະຊຸມໄດ້ເຫັນດີເປັນເອກະສັນກັບບັນດາມາດຕະການລະອຽດເພື່ອແນໃສ່ລົບລ້າງຄວາມອຶດຫິວ ຫລຸດຜ່ອນຄວາມທຸກຍາກ, ຕ້ານການຂາດຄວາມສະເໝີພາບ, ຮັບມືກັບໄພທຳມະຊາດ....ຄຽງຄູ່ກັນນັ້ນ, ກອງປະຊຸມໄດ້ຮັບຮອງເອົາບັນດາແຈ້ງການພິເສດ, ໃນນັ້ນສະໜັບສະໜູນອະທິປະໄຕຂອງອັກຊັງຕິນ ຕໍ່ເຂດໝູ່ເກາະ Malvinas ພວມເກີດການພິພາດກັບອັງກິດ, ຄັດຄ້ານເລື່ອງອາເມລິກາ ຂວ້ຳບາດກູບາ, ສະໜັບສະໜູນປະຊາຊົນຮາຍຕີ ສ້າງສາປະເທດຄືນໃໝ່ພາຍຫຼັງເຫດແຜ່ນດິນໄຫວ....
ທີ່ກອງປະຊຸມ, ປະທານາທິບໍດີປະເທດເຈົ້າພາບ Sebastian Pinera ໄດ້ມອບໂອນຕຳແໜ່ງປະທານໝູນວຽນ CELAC ໃຫ້ແກ່ທ່ານປະທານກູບາ Raul Castro. ທ່ານປະທານກູບາ Raul Castro ໄດ້ຢືນຢັນຈຸດໝາຍສູງສົ່ງທີ່ສຸດຂອງປະເທດນີ້ ແມ່ນປະກອບສ່ວນທຸກໆຄວາມມານະພະຍາຍາມເພື່ອປັບປຸງ “ກົນໄກປະສານສົມທົບ ແລະ ເຊື່ອມໂຍງທຳອິດໂດຍມີການເຂົ້າຮ່ວມຂອງທັງໝົດ 33 ປະເທດຢູ່ອາເມລິກາລາຕິນ ແລະ ກາຣີເບ“.