(vovworld) - ວັນທີ 5/7, ເມື່ອຕອບຄຳຖາມທີ່ສະເໜີໃຫ້ຮູ້ກ່ຽວກັບຄວາມໝາຍຂອງເລື່ອງວັນທີ 3/7 ທີ່ຜ່ານມາ, ກຸ່ມການຄ້າເສລີເອີລົບ (ຫຼື EFTA) ໄດ້ຮັບຮູ້ພື້ນຖານເສດຖະກິດຕະຫຼາດຂອງຫວຽດນາມ ແລະ ເລີ່ມດຳເນີນການເຈລະຈາກ່ຽວກັບເຂດການຄ້າເສລີ (ຫຼື FTA) ລະຫວ່າງຫວຽດນາມ ແລະ ກຸ່ມການຄ້າເສລີເອີລົບ, ໂຄສົກກະຊວງການຕ່າງປະເທດຫວຽດນາມ Luong Thanh Nghi ເວົ້າວ່າ:
“ເລື່ອງບັນດາປະເທດທີ່ສັງກັດກຸ່ນການຄ້າເສລີເອີລົບ (ຫຼື EFTA) ເຊິ່ງລວມມີ: ນອກແວ, ຊູແອດ, ອຽກລັງ ແລະ Liechtenstein ຮັບຮູ້ຂໍ້ກຳນົດເສດຖະກິດການຕະຫຼາດຂອງຫວຽດນາມ, ພ້ອມກັບການເລີ່ມດຳເນີນການເຈລະຈາ FTA ແມ່ນບາດກ້າວພັດທະນາສຳຄັນໃນການພົວພັນລະຫວ່າງຫວຽດນາມ ແລະ EFTA ໃນໄລຍະໃໝ່, ພິເສດແມ່ນເສດຖະກິດການຄ້າ, ສ້າງຂອບເຂດໃໝ່ຊ່ວຍເປີດກ້ວາງ ແລະ ເຮັດໃຫ້ການພົວພັນຮ່ວມມືຫຼາຍດ້ານເລິກເຊິ່ງກ່ວາ, ຕ່າງຝ່າຍຕ່າງມີຜົນປະໂຫຍດລະຫວ່າງຫວຽດນາມ ແລະ EFTA ດ້ວຍຖານະແມ່ນບັນດາຄູ່ຮ່ວມມືທີ່ສະເໝີພາບ. ພ້ອມທັງ, ເລື່ອງເປັນຄັ້ງທຳອິດ EFTA ໄດ້ຮັບຮູ້ຂໍ້ກຳນົດເສດຖະກິດການຕະຫຼາດຂອງຫວຽດນາມ ອີກເທື່ອໜຶ່ງໄດ້ສະແດງໃຫ້ເຫັນການສະໜັບສະໜູນຢ່າງຕັ້ງໜ້າ, ກ້ວາງແຂວງຂອງປະຊາຄົມໂລກ ຕໍ່ພາລະກິດປ່ຽນໃໝ່, ລະບອບເສດຖະກິດການຕະຫຼາດ, ກຳນົດທິດສັງຄົມນິຍົມ ແລະ ວິວັດທະນາການເປັນເຈົ້າການ, ຕັ້ງໜ້າເຊື່ອມໂຍງເຂົ້າກັບສາກົນຂອງຫວຽດນາມ”
ກ່ຽວຂ້ອງເຖິງຄຳຖາມທີ່ວ່າ: ໃນຂອບເຂດກອງປະຊຸມອາຊຽນ ເຊິ່ງຖືກຈັດຂຶ້ນຢູ່ ກຳປູເຈຍ ໃນເວລາຈະມາເຖິງ, ທີ່ເວທີປາໄສຄວາມໝັ້ນຄົງພາກພື້ນ (ຫຼື ARF), ຫວຽດນາມ ຈະຍົກອອກບັນດາຂໍ້ສະເໜີຄືແນວໃດທີ່ກ່ຽວຂ້ອງເຖິງບັນດາການພິພາດຢູ່ທະເລຕາເວັນອອກໃນໄລຍະມໍ່ໆມານີ້. ທ່ານ Luong Thanh Nghi ຢືນຢັນວ່າ: ສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນເຮືອຢູ່ທະເລຕາເວັນອອກ ແມ່ນຄວາມສົນໃຈລວມຂອງອາຊຽນ ກໍຄືບັນດາປະເທດໃນພາກພື້ນ ແລະ ໃນໂລກ. ຫຼັກໝັ້ນທີ່ເປັນເອກະພາບກັນຂອງ ອາຊຽນແມ່ນຮັກສາສັນຕິພາບ, ສະຖຽນລະພາບ, ຄວາມໝັ້ນຄົງ, ຄວາມປອດໄພໃນການເດີນເຮືອບົນທະເລຕາເວັນອອກ, ແຜນນະໂຍບາຍແກ້ໄຂໂດຍສັນຕິວິທີກ່ຽວກັບບັນດາການພິພາດກັນບົນພື້ນຖານກົດໝາຍສາກົນ, ພິເສດແມ່ນສົນທິສັນຍາຂອງສະຫະປະຊາຊາດກ່ຽວກັບກົດໝາຍວ່າດ້ວຍທະເລເມື່ອປີ 1982 ແລະ ເນື້ອໃນຈິດໃຈຂອງຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (ຫຼື DOC). ໂດຍແມ່ນສະມາຊິກຂອງ ອາຊຽນ, ຫວຽດນາມ ຈະມານະພະຍາຍາມ ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ ຢູ່ພາກພື້ນ.