ក្នុងប៉ុន្មានថ្ងៃកន្លងទៅ កងទ័ពទួរគីបានជូនដំណឹងជាបន្តបន្ទាប់អំពី ករណីវាយប្រហារតម្រង់ទៅលើកងទ័ពស៊ីរីនៅខេត្ត Idlib ភាគឦសានស៊ីរី។ លើសពីនេះទៅទៀត អាជ្ញាធរអង់ការ៉ាថែមទាំងប្រកាសថា ការវាយប្រហារ យ៉ាងដូច្នេះនឹងបន្តប្រព្រឹត្តទៅ សំដៅអនុវត្តការថ្លែងរបស់ ប្រធានាធិបតីទួរគីលោក Tayyip Erdogan កាលពីថ្ងៃទី២៦កុម្ភៈថា អង់ការ៉ា នឹងមិនថយក្រោយឡើយ ហើយស្បថវាយបណ្ដេញកងកម្លាំងរដ្ឋាភិបាលស៊ីរីចេញ ពីស្ថានីយ៍សង្កេតមើលនៅ Idlib។ ការថ្លែងពោលខាងលើបានឆ្លុះបញ្ចាំងស្ថានភាព ដ៏តានតឹងហួសហេតុនាបច្ចុប្បន្ននៅតំបន់ភាគឦសានស៊ីរី ដែលជាកំពែង ចុងក្រោយនៃកម្លាំងបះបោរនៅស៊ីរី។

        ប៉ុន្តែ សមរភូមិ Idlib (និងផ្នែកមួយនៃតំបន់ Aleppo) មិនត្រឹមតែជាការ ប្រឈមមុខដាក់គ្នារវាងកងកម្លាំងស៊ីរីនិងទួរគីប៉ុណ្ណោះទេប៉ុន្តែតាមពិតទៅ នេះជាការប្រយុទ្ធខាងស្មារតីរវាងរុស្ស៊ី (គាំទ្ររដ្ឋាភិបាលស៊ីរី)និងទួរគី (គាំទ្រកម្លាំងបះ បោរ)។

         ដោយមានការប្ដេជ្ញាចិត្តវាយបំបាក់ជម្រកចុងក្រោយនៃកម្លាំងឧទ្ទាម និងកម្លាំងប្រឆាំងនានានៅ Idlib កងទ័ពរដ្ឋាភិបាលស៊ីរីបានជំរុញយុទ្ធនាការ វាយប្រហារទៅលើ Idlib ចាប់ពីចុងឆ្នាំមុន ហើយដណ្ដើមបានសិទ្ធិគ្រប់គ្រង ទីរួមខេត្ត ភូមិស្រុកជាច្រើន។ យុទ្ធនាការនេះក៏មានការចូលរួមរបស់កងទ័ព ជើងអាកាសរុស្ស៊ី ជាសម្ព័ន្ធមិត្តធំបំផុតរបស់ស៊ីរី ដែលបានធ្វើអន្តរាគមន៍យ៉ាង ខ្លាំងទៅក្នុងវិបត្តិនេះចាប់ពីខែកញ្ញាឆ្នាំ២០១៥មក។

        ឆ្លើយតបតនឹងកាយវិការបស់សម្ព័ន្ធភាពទ័ពរុស្ស៊ី-ស៊ីរី ទួរគីចាត់ទុកថា យុទ្ធនាការវាយប្រហារទៅលើ Idlib បានរំលោភបំពានទៅលើកិច្ចព្រម ព្រៀងឆ្នាំ២០១៨រវាងរុស្ស៊ីនិងទួរគីស្ដីពីការបង្កើតតំបន់បន្ថយភាពតានតឹងនៅ Idlib។ ហេតុដូច្នេះក្នុងប៉ុន្មានសប្ដាហ៍ថ្មីៗនេះ អង់ការ៉ាបានដាក់ពង្រាយ ទាហាននិងយុទ្ធភ័ណ្ឌដ៏សន្ធឹកសន្ធាប់ទៅកាន់ Idlib និង Aleppo។ វត្តមានរបស់ កងទ័ពទួរគីបានរារាំងវឌ្ឍនភាពរបស់កងទ័ពស៊ីរី ខណៈដែលភាពញឹកញាប់ នៃការប៉ះទង្គិចគ្នាដោយផ្ទាល់រវាងកងទ័ពរដ្ឋាភិបាលស៊ីរីនិងកងទ័ពទួរគី កាន់តែកើនឡើងៗ។

        ទោះបីជាបានរារាំងវឌ្ឍនភាពរបស់កងទ័ពរដ្ឋាភិបាលស៊ីរីនៅ Idlib ឲ្យយឺតជាងមុនក្ដី ប៉ុន្តែទួរគីក៏ដូចជាភាគីគាំទ្រកម្លាំងបះបោរនៅស៊ីរី កំពុង ទទួលយកការពិតថា កងទ័ពរដ្ឋាភិបាលស៊ីរីនឹងដណ្ដើមសិទ្ធិគ្រប់គ្រង Idlib និងតំបន់ភាគឦសាន្តយ៉ាងឆាប់ៗ មានន័យថា កម្លាំងគាំទ្រអង់ការ៉ានៅទី នេះនឹងត្រូវបានកំទិចជាពុំខានឡើយ។ ហេតុដូច្នេះ ទួរគីនិងប្រទេសមួយ ចំនួនបានដាស់ តឿនឲ្យរុស្ស៊ីនិងស៊ីរីបញ្ឈប់យុទ្ធនាការវាយប្រហារនៅ Idlib។ ប៉ុន្តែ នៅពេលថ្លែងនៅក្រុមប្រឹក្សាសិទ្ធិមនុស្សអង្គការសហប្រជាជាតិ កាលពីថ្ងៃទី២៥កុម្ភៈ លោករដ្ឋមន្រ្តីការបរទេសរុស្ស៊ី Sergei Lavrov បាន ច្រានចោលសេចក្ដីអំពាវនាវពោលខាងលើ ហើយលើកច្បាស់ថា ការ បញ្ឈប់យុទ្ធនាការនៅ Idlib “ជាការចុះចាញ់ភេរវកម្ម ហើយថែមទាំងជារង្វាន់ សម្រាប់ពួកភេរវករទៀតផង”។

        អាចឃើញបានថា ទាំងរុស្ស៊ី ស៊ីរីនិងទួរគី សុទ្ធតែមានការប្ដេជ្ញាចិត្តនិង ទស្សនៈមិនធ្វើសម្បទានដ៏រឹងមាំក្នុងបញ្ហា Idlib។ ប្រការនេះបានបង្កឡើង ការព្រួយបារម្ភអំពីគ្រោះអាសន្នផ្ទុះឡើងការប្រយុទ្ធដ៏បង្ហូរឈាមនៅ Idlib នាពេលខាងមុខ។ តាមមជ្ឈដ្ឋានអ្នកវិភាគបានចាត់ទុកថា ផលវិបាកនិង ផលប៉ះពាល់នៃការប្រឈមមុខដាក់គ្នាប្រដាប់អាវុធនេះ គឺសាហាវណាស់ ចំពោះភាគីទាំងអស់ មិនថាលទ្ធផលគឺអ្វីទេ។ ជាពិសេសគឺ ទំនាក់ទំនង សេដ្ឋកិច្ចដ៏ល្អប្រសើររវាងរុស្ស៊ីនិងទួរគីអាចរងការខូចខាត ហើយប្រទេស ទាំងពីរសុទ្ធតែយល់ ច្បាស់អំពីគ្រោះអាសន្ននេះ។ ហេតុដូច្នេះ ក្រៅពីការថ្លែងយ៉ាងខ្លាំងក្លាស្ដីពីសកម្មភាពយោធា ទាំងម៉ូស្គូនិងអង់ការ៉ា សុទ្ធតែបង្ហាញនូវគោលបំណងចង់ធ្វើសន្ទនា ហើយបានដំណើរការកិច្ច សន្ទនាមួយចំនួននាពេលថ្មីៗនេះ។ ប៉ុន្តែ ដោយសារស្ថានភាពកាន់តែស្មុគ ស្មាញ រួមជាមួយការខ្វែងគំនិតអំពីផលប្រយោជន៍យុទ្ធសាស្ត្រនោះ ដំណើរ ការចរចាអំពីជោគវាសនារបស់ Idlib មិនទាន់មានការបញ្ចប់ ក៏ដូចជាមិន ទាន់នាំមកនូវក្ដីសង្ឃឹមអំពីសន្តិភាពសម្រាប់ពលរដ្ឋស៊ីរីរាប់ម៉ឺននាក់ដែល កំពុងជាប់គាំងក្នុងការប្រឈមមុខដាក់គ្នានេះនៅឡើយទេ៕