ເຕິນຮ໊ວາໄດ້ຮັບຖືວ່າ ແມ່ນ ເຂດໃຈກາງຂອງນ້ຳຖ້ວມ (ພາບ: baochinhphu.vn) |
ເຕິນຮ໊ວາ ແມ່ນຕາແສງແຫ່ງໜຶ່ງຢູ່ເຂດຫ່າງໄກສອກຫຼີກ ຂອງເມືອງ ມິງຮ໊ວາ, ແຂວງ ກ໋ວາງບິ່ງ. ຕາແສງນີ້ ນອນຢູ່ທ່າມກາງເຂດພູຫີນປູນ, ມີລະບົບຖ້ຳເປັນຈຳນວນຫຼາຍ ທີ່ໄດ້ຮັບການສ້າງຂຶ້ນມາເປັນເວລານັບຫຼາຍລ້ານປີ, ຄື: ຖ້ຳ ຈວດ (ໜູ), ຖ້ຳ ເຢິຍ (ເຈຍ), ຖ້ຳຕຸງ, ຖ້ຳ ຕູລານ… ທ່ານ ປ.ອ ຫງວຽນງອກຮຸຍ, ນັກຊ່ຽວຊານດ້ານການປ່ຽນແປງຂອງດິນຟ້າອາກາດ ແລະ ຫຼຸດຜ່ອນຄວາມສ່ຽງຈາກໄພທຳມະຊາດ ໃຫ້ຮູ້ວ່າ:
ຢູ່ສະຖານທີ່ແຫ່ງນີ້ ມີຫຼາຍສິ່ງທີ່ເປັນພົ້ນເດັ່ນ. ອ້ອມແອ້ມເຂດ ແຫ່ງນີ້ໄດ້ຮັບການປົກຄຸ້ມ ດ້ວຍພູຜາ, ປ່າດົງດິບ. ຢູ່ລຸ້ມແມ່ນເຂດດິນທີ່ ຮາບພຽງ ໂດຍປະຊາຊົນເລືອກເອົາເປັນບ່ອນດຳລົງຊີວິດຢູ່ທີ່ຍາວນານ. ປະຊາຊົນໄດ້ດຳລົງຊີວິດຢູ່ແຫ່ງນີ້ມາເປັນເວລາປະມານ 300 ປີແລ້ວ. ມີເຮືອນໄມ້ຫຼາຍຫຼັງຢູ່ແຫ່ງນີ້ ໄດ້ຮັບການກໍ່ສ້າງເປັນເວລາກ່ວາ50 ປີແລ້ວ. ໃນນັ້ນກໍ່ມີເຮືອນຈຳນວນ 1 ໄດ້ຮັບການກໍ່ສ້າງໃໝ່.
ຍ້ອນມີທີ່ຕັ້ງພູມສາດ ແລະ ໂຄງປະກອບທີ່ພິເສດສະເພາະ, ທຸກປີຢູ່ ເຕິນຮ໊ວາ ອາກາດຮ້ອນ, ປຽກຊຸ່ມຕະຫຼອດ, ມີຝົນຕົກຫຼາຍໃນຍາມລະດູຮ້ອນ ແລະ ໜາວຈັດຍາມລະດູໜາວ. ຍ້ອນອາກາດທີ່ເປັນຫຼາຍຮູບຫຼາຍແບບ ຄືດັ່ງກ່າວ ຈຶ່ງໄດ້ສ້າງຄວາມສະດວກທີ່ສຸດ ເພື່ອໃຫ້ຊາວກະສິກອນຢູ່ແຫ່ງນີ້ ປູກຕົ້ນໄມ້ຫຼາຍຊະນິດ. ແຕ່ວ່າ ທຸກໆປີ, ຕາແສງເຕິນຮ້ວາ ມັກເກີດນ້ຳຖ້ວມເປັນປະຈຳ, ໃນໄລຍະແຕ່ເດືອນ 6 ຫາ ເດືອນ 9 ໄລ່ຕາມຈັນທະປະຕທິນ. ໄພນ້ຳຖ້ວມຄັ້ງປະຫວັດສາດ ໃນປີ 2010 ດ້ວຍລະດັບນ້ຳຂຶ້ນສູງ 12 ແມັດ ໄດ້ຖ້ວມເຮືອນ ເກືອບທັງໝົດ ຢູ່ແຫ່ງນີ້, ເຮັດໃຫ້ປະຊາຊົນຕ້ອງອົບພະຍົບໄປຍັງເຂດພູສູງ, ລໍຖ້າ, ນ້ຳຫຼຸດລົງ, ຈາກນັ້ນ ເຕິນຮ໊ວາ ໄດ້ຮັບຂະໜາມນາມວ່າ ແມ່ນເຂດໃຈກາງຂອງນ້ຳຖ້ວມ. ພາຍຫຼັງໄພນ້ຳຖ້ວມຄັ້ງດັ່ງກ່າວ, ປະຊາຊົນ ເຕິນຮ໊ວາ ມີຂໍ້ລິເລີ່ມເຮັດເຮືອນແພ ເພື່ອອາດສາມາດ ດຳລົງຊີວິດທີ່ເປັນປົກກະຕິເມື່ອເກີດນ້ຳຖ້ວມ. ທ່ານ ຫງວຽນເຈົ້າອ໊າ, ຜູ້ອຳນວຍການໃຫຍ່ບໍລິສັດ Oxallis ຫົວໜ່ວຍຂຸດຄົ້ນການທ່ອງທ່ຽວ ຢູ່ໝູ່ບ້ານເຕິນຮ໊ວາ ໃຫ້ຮູ້ວ່າ:
ຢູ່ເຕິນຮ໊ວາ ປະມານ 700 ຄອບຄົວ ໄດ້ກໍ່ສ້າງເຮືອນແພ ແລະ ສາມາດດຳລົງຊີວິດຮ່ວມກັບນ້ຳຖ້ວມໄດ້. ໝາຍຄວາມວ່າເມື່ອເກີດນ້ຳຖ້ວມ ເຂົາເຈົ້າຍັງປອດໄພ ແລະ ສາມາດດຳລົງຊີວິດຢ່າງສະດວກສະບາຍ ແລະ ບໍ່ຂາດເຂີນຫຍັງຍ້ອນວ່າ ເຂົາເຈົ້າມີອາຫານການກິນສະສົມແລ້ວ. ນອກຈາກນັ້ນ, ເຂົາເຈົ້າຍັງມີເຮືອລ້ຳເພື່ອ ສາມາດໄປມາຢ່າງສະດວກ.
homestay ຮັບມືກັບໄພທຳມະຊາດ ຢູ່ ເຕິນຮ໊ວາ (ພາບ: baochinhphu.vn) |
ໃນເມື່ອກ່ອນ, ຊາວເຕິນຮ໊ວາ ໄດ້ເຮັດກະສິກຳເປັນຕົ້ນ, ເຮັດໄຮ່ໄຖນາ, ລ້ຽງສັດ. ເຖິງຢ່າງໃດກໍ່ຕາມ, ຊີວິດການເປັນຢູ່ຂອງປະຊາຊົນຢູ່ແຫ່ງນີ້ ກໍ່ມີການປ່ຽນແປງຫຼາຍຢ່າງນັບແຕ່ປີ 2011 ເມື່ອແຂວງ ກ໋ວາງບິ່ງ ເລີ່ມອະນຸຍາດການສຳຫຼວດ ແລະ ທົດລອງບັນດາ tour ທ່ອງທ່ຽວແບບຄົ້ນຫາ. ທາງແຂວງ ໄດ້ສົມທົບກັບບັນດາຫົວໜ່ວຍທ່ອງທ່ຽວສ້າງຍຸດທະສາດພັດທະນາ ຕາແສງ ເຕິນຮ໊ວາ ຢ່າງໝັ້ນແກ່ນເທື່ອລະກ້າວ. ຕາມນັ້ນແລ້ວ, ປະຊາຊົນທ້ອງຖິ່ນ ກໍ່ພ້ອມກັນເຂົ້າຮ່ວມການເຮັດທ່ອງທ່ຽວຢູ່ບັນດາບໍລິສັດ ຂຸດຄົ້ນການບໍລິການ, ນຳປະຊາຊົນ ກາຍເປັນເຈົ້າຂອງບັນດາການບໍລິການເຊິ່ງເຂົາເຈົ້າສະໜອງ ໃຫ້ແກ່ແຂກທ່ອງທ່ຽວເປັນເທື່ອລະກ້າວ; ສ້າງຜະລິດຕະພັນການທ່ອງທ່ຽວຄົ້ນຫາລະບົບຖ້ຳ ຕູລ່ານ, ຜະລິດຕະພັນ tour ຂີ່ລົດໂມໂຕ ຄົ້ນຫາປ່າກາຈະ ແລະ ບັນດາຜະລິດຕະພັນອື່ນໆ ເພື່ອແນໃສ່ຫັນບັນດາການບໍລິການທ່ອງທ່ຽວເປັນຫຼາຍຮູບແບບ… ມາຮອດຈຸດເວລານີ້, ການພັດທະນາຮູບແບບການທ່ອງທ່ຽວຢູ່ ເຕິນຮ໊ວາ ໄດ້ສ້າງວຽກເຮັດງານທຳທີ່ເປັນປົກກະຕິ ໃຫ້ແກ່ຜູ້ອອກແຮງງານທ້ອງຖິ່ນ ກ່ວາ 100 ຄົນ. ປະຊາຊົນໄດ້ຮັບການຝືກອົບຮົບ ເພື່ອເຮັດວຽກງານພະລາທິການ, ຮັບໃຊ້ແຂກທ່ອງທ່ຽວ ໃນບັນດາ tour ທ່ອງທ່ຽວ ຄົ້ນຫາ ຕູລ່ານ. ອ້າຍ ກາວວັນແທັງ, ປະຊາຊົນ ຕາແສງ ເຕິນຮ໊ວາ, ເມືອງ ມິງຮ໊ວາ ໃຫ້ຮູ້ວ່າ:
ໃນເມື່ອກ່ອນ, ຂ້າພະເຈົ້າເປັນຊາວກະສິກອນ ແລະ ໄປນະຄອນ ໂຮ່ຈີມິນ ເພື່ອອອກແຮງງານແບບເສລີ. ແຕ່ພາຍຫຼັງໄດ້ຮູ້ວ່າ ຢູ່ບ້ານ ມີບໍລິສັດການທ່ອງທ່ຽວ ເປີດປະຕູ, ຂ້າພະເຈົ້າໄດ້ຂໍສະໝັກເຂົ້າເຮັດວຽກ, ມາຮອດປັດຈຸບັນ ກໍ່ເຮັດວຽກໄດ້ 5 ປີແລ້ວ. ຂ້າພະເຈົ້າໄດ້ເຮັດວຽກງານ, ຮັບໃຊ້ດ້ານອາຫານການກິນ ແລະ ຮັບໃຊ້ການຕັ້ງຄ້າຍໃຫ້ແກ່ລູກຄ້າ.
ເຕິນຮ໊ວາ ໄດ້ຮັບການກຳນົດທິດພັດທະນາຕາມຮູບແບບໝູ່ບ້ານທ່ອງທ່ຽວ ທີ່ປັບຕົວເຂົ້າກັບສະພາບອາກາດ, ສະໜອງ ການບໍລິການທ່ອງທ່ຽວ ຈາກ Homestay ເປັນຫຼາຍຮູບແບບຄື: ການເຮັດວຽກງານກະສິກຳ, ການກິນດື່ມພັກເຊົ່າຢູ່ເຮືອນປະຊາຊົນ, ຮ້ານຂາຍເຄື່ອງ ທີ່ລະນຶກ ແລະ ການບໍລິການທີ່ເປັນຫຼາຍຮູບຫຼາຍແບບໃຫ້ແກ່ແຂກທ່ອງທ່ຽວອື່ນໆອີກ. ຕາມທ່ານ ໂຮ່ອານຟອງ, ຮອງປະທານຄະນະກຳມະການປະຊາຊົນ ແຂວງ ກ໋ວາງບິ່ງ ແລ້ວ, ໝູ່ບ້ານທ່ອງທ່ຽວ ເຕິນຮ໊ວາ ໄດ້ຮັບການເຊີດຊູແມ່ນໜຶ່ງໃນບັນດາໝູ່ບ້ານທ່ອງທ່ຽວດີທີ່ສຸດ ໃນໂລກ, ຂັ້ນຕອນທຳອິດແມ່ນສ້າງພື້ນຖານເພື່ອພັດທະນາການທ່ອງທ່ຽວ ຢູ່ເຕິນຮ໊ວາ.
ສຳລັບເຕິນຮ໊ວາແລ້ວ, ຖ້າປະຕິບັດວຽກງານໂຄສະນາ, ສົ່ງເສີມ, ແນະນຳເປັນຢ່າງດີແມ່ນ ຈະດຶງດູດແຂກທ່ອງທ່ຽວໄດ້, ຈາກນັ້ນ ກໍ່ຈະນຳຜົນປະໂຫຍດມາໃຫ້ປະຊາຊົນ. ພວກຂ້າພະເຈົ້າພວມມານະພະຍາຍາມໃນອະນາຄົດ ຈະສ້າງເຕິນຮ໊ວາກາຍເປັນສະຖານທີ່ພົ້ນເດັ່ນກ່ຽວກັບການທ່ອງທ່ຽວ. ພວກຂ້າພະເຈົ້າຈະສືບຕໍ່ສຶກສາ, ຍົກສູງສະຕິຄວາມຮັບຮູ້ໃຫ້ແກ່ປະຊາຊົນ ໃນການເອົາໃຈໃສ່ເປັນພິເສດຕໍ່ການປົກປັກຮັກສາສິ່ງແວດລ້ອມ, ທຳມະຊາດ ແລະ ປັບຕົວເຂົ້າກັບທຳມະຊາດ, ເຮັດແນວໃດໃຫ້ທັງພັດທະນາ ທັງຮັກສາໄດ້ຄວາມປະຖົມປະຖານ, ລຽບງ່າຍ ແລະ ສະຫງົບສຸກຂອງດິນແດນແຫ່ງນີ້.
ຈາກເຂດທີ່ຕ້ອງປະສົບກັບຄວາມຫຍຸ້ງຍາກ ໂດຍ ໄພນ້ຳຖ້ວນກໍ່ຂຶ້ນ, ເຮັດໃຫ້ຊີວິດການເປັນຢູ່ຂອງປະຊາຊົນປະສົບກັບຄວາມຫຍຸ້ງຍາກຂາດເຂີນຫຼາຍຢ່າງ, ເຂດໃຈກາງຂອງນ້ຳຖ້ວມ ເຕິນຮ໊ວາ ໃນປັດຈຸບັນໄດ້ ປ່ຽນແປງຢ່າງເຫັນໄດ້ຊັດ. ສຳລັບແຂວງ ກ໋ວາງບິ່ງແລ້ວ, ເລື່ອງ ເຕິນຮ໊ວາ ໄດ້ຮັບການເຊີດຊູນັ້ນຈະສ້າງ ໂອກາດພັດທະນາການທ່ອງທ່ຽວ ເພື່ອກາຍເປັນຈຸດພົ້ນເດັ່ນໃນການທ່ອງທ່ຽວໃນພາກພື້ນ, ເປັນປະຖົມປັດໄຈ ແລະ ໜູນຊ່ວຍໃຫ້ສະຖານທີ່ທ່ອງທ່ຽວໃກ້ຄຽງ ໃນການໂຄສະນາ ແລະ ດຶງດູດແຂກທ່ອງທ່ຽວໃນອະນາຄົດ.