(vovworld) - ໃນປີ 2015, ແຂວງ ກວາງນີງ ໄດ້ປະກາດການວາງແຜນຜັງເຂດເສດຖະກິດດ່ານຊາຍແດນ 2 ແຫ່ງໂດຍນາຍົກລັດຖະມົນຕີອະນຸມັດຜ່ານນັ້ນແມ່ນ: ແຮ່ວງໂມ - ດົ່ງວັນ ແລະ ມ໋ອງກ໋າຍ, ດ້ວຍວິໄສທັດຮອດປີ 2030. ເລື່ອງປະກາດການວາງແຜນຜັງແມ່ນພື້ນຖານສຳຄັນເພື່ອພັດທະນາບັນດາເຂດເສດຖະກິດດ່ານຊາຍແດນເວົ້າສະເພາະ, ການພັດທະນາເສດຖະກິດ - ວັດທະນະທຳ - ສັງຄົມເຂດຊາຍແດນຂອງແຂວງ ກວາງນີງ ເວົ້າລວມ. ນັກຂ່າວ VOV ເຂດຕາເວັນອອກສ່ຽງເໜືອ ມີບົດຂຽນ “ແງ່ຫວັງພັດທະນາຈາກບັນດາເຂດເສດຖະກິດດ່ານຊາຍແດນຢູ່ແຂວງກວາງນີງ”.
ເຂດເສດຖະກິດດ່ານຊາຍແດນ ແຮ່ວງໂມ- ດົ່ງວັນ, ຕິດກັບດ່ານຊາຍແດນ ແຮ່ວງໂມ, ນອນໃນບໍລິເວນເມືອງ ບີ່ງລຽວ, ຕິດກັບນະຄອນທ່າກ່ຳປັ່ນ ຝາງເຈີ໋ງ, ແຂວງ ກວາງສີ, ປະເທດຈີນ. ເຂດເສດຖະກິດດ່ານຊາຍແດນນີ້ໄດ້ຮັບການວາງແຜນຜັງພັດທະນາຕາມທິດແມ່ນເຂດເສດຖະກິດຫຼາຍຂະແໜງ, ປະກອບສ່ວນເປີດກ້ວາງການພົວພັນແລກປ່ຽນ, ຄ້າຂາຍ, ຫັນປ່ຽນໂຄງປະກອບເສດຖະກິດ, ຍົກສູງຊີວິດຂອງປະຊາຊົນ. ຕາມທ່ານ ກາວເຕື່ອງຮູຍ, ເລຂາຄະນະພັກເມືອງ ບີ່ງລຽວ ແລ້ວ, ທີ່ຕັ້ງ, ຄວາມສຳຄັນ ແລະ ກຳລັງຄວາມດຶງດູດຂອງດ່ານຊາຍແດນ ແຮ່ວງໂມ ຍັງຈະເພີ່ມຂຶ້ນສູງເມື່ອລັດຖະບານຮັບຮອງເອົາແຮ່ວງໂມແມ່ນດ່ານຊາຍແດນ 2 ຝ່າຍຢ່າງເປັນທາງການ. ຝ່າຍປະເທດເພື່ອນບ້ານ ຈີນ ກໍພວມຜັນຂະຫຍາຍວິວັດການນຳສະຖານທີ່ນີ້ກາຍເປັນດ່ານຊາຍແດນສາກົນ ແລະ ພວມກໍ່ສ້າງເສັ້ນທາງຄວາມໄວສູງຈາກດ່ານຊາຍແດນນີ້ໄປແຂວງ ຝາງເຈີ໋ງ. ທ່ານ ກາວເຕື່ອງຮູຍ, ໃຫ້ຮູ້ວ່າ:
“ໄລຍະຜ່ານມາ, ພວກຂ້າພະເຈົ້າໄດ້ກຳນົດວ່າຕ້ອງລົບລ້າງແນວຄິດລໍຖ້າ, ເອື່ອຍອີງເຂົ້າໃນການໜູນຊ່ວຍຂອງລັດ ແລະ ວິສາຫະກິດ. ຕ້ອງບືນຕົວຂຶ້ນເພື່ອຫລຸດພົ້ນອອກຈາກຄວາມທຸກຍາກ, ສ້າງຄວາມຮັ່ງມີດ້ວຍຄວາມສາມາດບົ່ມຊ້ອນທ່າແຮງຂອງຕົນ. ພວກຂ້າພະເຈົ້າຫວັງວ່າ, ເມື່ອບັນດາວິສາຫະກິດເຮັດທຸລະກິດຢູ່ ບີ່ງລຽວ ຈະພັດທະນາໄດ້ດີຍ້ອນຊອກຫາໄດ້ບັນດາສິ່ງທີ່ແຕກຕ່າງກັນ.”
ດ່ານຊາຍແດນ ແຮ່ວງໂມ - ດົ່ງວັນ
(ພາບປະກອບ)
|
ໃນຂະນະນັ້ນ, ເຂດເສດຖະກິດດ່ານຊາຍແດນ ມ໋ອງກ່າຍ ແມ່ນເຂດເສດຖະກິດດ່ານຊາຍແດນແຫ່ງໜຶ່ງດຽວໃນທົ່ວປະເທດໂດຍນາຍົກລັດຖະມົນຕີ ເຊັນອະນຸມັດຜ່ານນັບທັງແຜນຜັງພັດທະນາເສດຖະກິດ - ສັງຄົມ ແລະ ແຜນຜັງກໍ່ສ້າງລວມ. ເຂດເສດຖະກິດດ່ານຊາຍແດນມ໋ອງກາຍ, ໃນນັ້ນມີດ່ານຊາຍແດນສາກົນ ມ໋ອງກາຍ, ຕິດກັບນະຄອນ ຕູງສີ, ແຂວງ ກວາງສີ, ປະເທດຈີນ. ເຂດເສດຖະກິດດ່ານຊາຍແດນນີ້ລວວມີເນື້ອທີ່, ພົນລະເມືອງທັງໝົດຂອງນະຄອນ ມ໋ອງກ່າຍ ແລະ 9 ຕາແສງ, ເທດສະບານຂອງເມືອງ ຫາຍຮ່າດ້ວຍເນື້ອທີ່ທັງໝົດກ່ວາ 121.000 ha. ເຂດເສດຖະກິດດ່ານຊາຍແດນນີ້ຈະພັດທະນາໃນ 3 ເສົາຄ້ຳເສດຖະກິດຕົ້ນຕໍແມ່ນການຄ້າ, ການທ່ອງທ່ຽວ ແລະ ອຸດສາຫະກຳ. ທ່ານ ຫງວຽນງອກຖູຍ, ຮອງຫົວໜ້າພະແນກອຸດສາຫະກຳ - ການຄ້າແຂວງ ກວາງນີງ, ຢັ້ງຢືນວ່າ:
“ເມື່ອພວກເຮົາມີແຜນຜັງແລ້ວ, ບັນດານັກລົງທຶນຍຸດທະສາດຈະມີແຜນການລະອຽດເພື່ອລົງທຶນເຂົ້າເຂດນີ້. ພິເສດແມ່ນເມື່ອ ຫວຽດນາມ ໄດ້ສິ້ນສຸດການເຈລະຈາສັນຍາຄູ່ຮ່ວມມືຂ້າມປາຊີຟິກ (TPP) ແລະ ເມື່ອ TPP ມີຜົນສັກສິດຢ່າງເປັນທາງການນີ້ແມ່ນໜຶ່ງໃນບັນດາຜະລິດຕະພັນທີ່ມີກຳລັງແກ່ງແຍ້ງຂອງແຂວງ ກວາງນີງ.”
ໂດຍມີແຜນຜັງດ້ວຍບັນດາວິໄສທັດຍາວນານ, ວິສາຫະກິດຫຼາຍແຫ່ງກໍມີຄວາມອຸ່ນອ່ຽນໃຈເມື່ອລົງທຶນຢູ່ແຂວງ ມ໋ອງກ່າຍ. ທ່ານ ເຈີ່ນແມ້ງຮູ່ງ, ຮອງຜູ້ອຳນວຍການບໍລິສັດສົ່ງອອກ-ນຳເຂົ້າ ງອກຮ່າ, ໃຫ້ຮູ້ວ່າ:
“ກ່ອນນີ້, ເມື່ອຢາກລົງທຶນເຂົ້າຂົງເຂດໃດໜຶ່ງແມ່ນຕ້ອງຊອກຫາສະຖານທີ່ກ່ອນ, ຫຼັງຈາກນັ້ນແມ່ນສຳຫລວດ ແລະ ເຮັດບັນດາລະບຽບການບໍລິຫານ ດັ່ງນັ້ນຕ້ອງເສຍເວລາຫຼາຍທີ່ສຸດອັນໄດ້ສ້າງຄວາມຫຍຸ້ງຍາກຫຼາຍໃຫ້ບັນດາວິສາຫະກິດ. ປະຈຸບັນ, ແຜນຜັງພັດທະນາຂອງແຂວງ ມ໋ອງກ່າຍ ໄດ້ຮັບການປະກາດໄດ້ສ້າງຄວາມສະດວກທີ່ສຸດໃຫ້ບັນດາວິສາຫະກິດພວກຂ້າພະເຈົ້າ. ແຜນຜັງນີ້ແມ່ນຍາວນານດັ່ງນັ້ນເມື່ອວິສາຫະກິດພວກຂ້າພະເຈົ້າລົງທຶນເຂົ້າກໍມີຄວາມອຸ່ນອ່ຽນໃຈກ່ວາ”
ດ້ວຍເລື່ອງສ້າງເງື່ອນໄຂພິເສດຫຼາຍຢ່າງເພື່ອດຶງດູດບັນດາວິສາຫະກິດ, ນັກລົງທຶນ, ພັດທະນາພື້ນຖານໂຄງລ່າງການທ່ອງທ່ຽວ, ບັນດາເຂດເສດຖະກິດດ່ານຊາຍແດນຢູ່ແຂວງ ກວາງນີງ ພວມຄ່ອຍໆກາຍເປັນສະຖານທີ່ທ່ອງທ່ຽວຂອງແຂກທັງພາຍໃນປະເທດ ແລະ ສາກົນ. ທ່ານນາງ ຫງວຽນທິແທງຮ່ວຽນ, ບໍລິສັດທ່ອງທ່ຽວ ຫາຍເລີມຊາ, ໃຫ້ຮູ້ວ່າ:
“ໃນໄລຍະຜ່ານມາ, ພວກຂ້າພະເຈົ້າໄດ້ຕ້ອນຮັບນັກທ່ອງທ່ຽວເຂົ້າຢ້ຽມຢາມ ມ໋ອງກາຍເປັນຈຳນວນຫຼວງຫຼາຍ, ພິເສດແມ່ນແຂກ ຫວຽດນາມ ແລະ ຈີນ. ເຂົາເຈົ້າຕີລາຄາສູງກ່ຽວກັບການພັດທະນາຂອງນະຄອນ ມ໋ອງກ່າຍ. ໃນໄລຍະຈະມາເຖິງ, ຕາມການຄາດຄະເນຂອງພວກຂ້າພະເຈົ້າແລ້ວ, ຈະມີແຂກທ່ອງທ່ຽວຫຼາຍຄົນມາຈາກບັນດາປະເທດໃນພາກພື້ນ, ນັບທັງແຂກທ່ອງທ່ຽວ ເອີລົບ ກໍຈະຢ້ຽມຢາມມ໋ອງກາຍ.”
ມາຮອດປະຈຸບັນ, ເຂດເສດຖະກິດດ່ານຊາຍແດນມ໋ອງກ່າຍ ໄດ້ດຶງດູດໂຄງການ FDI 20 ແຫ່ງ, ດ້ວຍຍອດຈຳນວນທຶນຈົດທະບຽນແມ່ນກ່ວາ 1 ຕື້ USD ແລະ ນັບຮ້ອຍໂຄງການລົງທຶນ DDI. ສ່ວນເຂດເສດຖະກິດດ່ານຊາຍແດນ ແຮ່ວງໂມ - ດົ່ງວັນ, ວັນປະກາດແຜນຜັງກໍໄດ້ດຶງດູດເງິນລົງທຶນໄດ້ກ່ວາ 1.100 ຕື້ດົ່ງຈາກບັນດານັກລົງທຶນໃນ. ໃນໄລຍະຈະມາເຖິງ, ມີປະມານ 40 ໂຄງການທີ່ຂຶ້ນກັບ 7 ຂົງເຂດຄື: ຄົມມະນາຄົມ, ພື້ນຖານໂຄງລ່າງ, ວັດທະນະທຳ, ການຄ້າ, ການບໍລິການ, ສາທາລະນະສຸກ, ການສຶກສາ, ໄຟຟ້າ, ການສະໜອງ ແລະ ລະບາຍນ້ຳ, ສິ່ງແວດລ້ອມ, ກະສິກຳ, ອຸດສາຫະກຳຈະໄດ້ຮັບບຸລິມະສິດຮຽກຮ້ອງການລົງທຶນເຂົ້າບັນດາເຂດອຸດສາຫະກຳນີ້.