ອາຊີບຕົ້ມເຫຼົ້າສາລີ ຈາກໝາກຫົວເຊື້ອຢູ່ບ້ານຈີ່, ຕາແສງຊວັນຢາງ, ເມືອງກວາງບິນ (ພາບ: VOV)

 ເມືອງກວາງບິນ ຫາກໍ່ໄດ້ຮັບການສ້າງຕັ້ງຂຶ້ນໃນເວລາກ່ວາ 10 ປີມານີ້ ແລະ ແມ່ນເມືອງທີ່ຍັງປະສົບກັບຄວາມຫຍຸ້ງຍາກຫຼາຍຢ່າງຢູ່ແຂວງ ຮ່າຢາງ. ປະຈຸບັນ, ເມືອງກວາງບິນ ມີ 5 ຕາແສງ, 39 ບ້ານ ດ້ວຍຫຼາຍໝູ່ບ້ານອາຊີບມູນເຊື້ອ ທີ່ພວມໄດ້ຮັບການອະນຸລັກຮັກສາ ຈາກອຳນາດການປົກຄອງຂັ້ນຕ່າງໆ ດ້ວຍບັນດາຜະລິດຕະພັນທີ່ມີຄຸນນະພາບ, ໄດ້ຮັບຄວາມນິຍົມຈາກຕະຫຼາດ.

ຕາແສງ ຊວັນຢາງ ຖືກຖືວ່າ ມີຄວາມສາມາດບົ່ມຊ້ອນ ໃນການພັດທະນາເສດຖະກິດຢູ່ເມືອງ ກວາງບິນ ດ້ວຍຫຼາຍຜະລິດຕະພັນມູນເຊື້ອທີ່ເປັນເອກະລັກສະເພາະຄື: ເຫຼົ້າສາລີ, ປາແດກ, ຊີ້ນແຊ່ນຳ້ປາ. ໃນຊຸມປີມໍ່ໆມານີ້, ໂດຍໄດ້ຮັບການກຳນົດທິດ, ໜູນຊ່ວຍຈາກບັນດາຂັ້ນ, ຂະແໜງການ, ຜະລິດຕະພັນທີ່ເປັນມູນເຊື້ອຂອງໝູ່ບ້ານອາຊີບ ໄດ້ເປັນທີ່ຮູ້ຈັກຂອງຜູ້ບໍລິໂພກ, ຜ່ານນັ້ນ, ຄຸນຄ່າຂອງຜະລິດຕະພັນກໍ່ໄດ້ຍົກສູງຂຶ້ນ. ເອື້ອຍ ຮ່ວາງທິງາ, ຢູ່ບ້ານຈີ່, ຕາແສງ ຊັວນຢາງ ໃຫ້ຮູ່ວ່າ: ທາງທ້ອງຖິ່ນ ໄດ້ຟື້ນຟູອາຊີບຕົ້ມເຫຼົ້າທີ່ເປັນມູນເຊື້ອ ຈາກນັ້ນ ໄດ້ຊ່ວຍເພີ່ມລາຍຮັບຂອງ ປຊຊ ຂຶ້ນ:

 ແຕ່ກ່ອນ ຕົ້ມເຫຼົ້າພຽງແຕ່ເພື່ອກິນເທົ່ານັ້ນ, ແຕ່ປະຈຸບັນກໍ່ເພື່ອຂາຍ, ແຕ່ລະເດືອນກໍ່ໄດ້ 15-20 ຕຸກ, ແຕ່ລະຕຸກແມ່ນ 20 ລິດ. ລາຍຮັບກໍ່ໄດ້ແຕ່ 2-5 ລ້ານດົ່ງ/ເດືອນ. ປະຈຸບັນ, ນອກຈາກການເຮັດກະສິກຳແລ້ວ, ພວກຂ້າພະເຈົ້າກໍ່ມີອາຊີບຕົ້ມເຫຼົ້າຕື່ມອີກ.

ບ້ານຈີ່, ຕາແສງ ຊັວນຢາງ ມີເກືອບ 130 ຄອບຄົວ ໄດ້ຕົ້ມເຫຼົ້າສາລີ ຈາກໝາກຫົວເຊື້ອ, ສົມທົບກັບການພັດທະນາການທ່ອງທ່ຽວຊຸມຊົນ. ທ່ານຮ່ວາງວັນຕ່ວານ, ເລຂາຄະນະພັກ, ທັງເປັນນາຍບ້ານຈີ່, ຕາແສງ ຊວັນຢາງ ໃຫ້ຮູ້ວ່າ: ພາຍຫຼັງໄດ້ປະຕິບັດມາດຖານກໍ່ສ້າງຊົນນະບົດໃໝ່ສຳເລັດຜົນ, ໂດຍໄດ້ຮັບການກຳນົດທິດ, ຊ່ວຍເຫຼືອຈາກຄະນະກຳມະການ ປຊຊ ເມືອງ ກວາງບິນ ພັດທະນາໝູ່ບ້ານອາຊີບທີ່ເປັນມູນເຊື້ອນັ້ນ, ຜະລິດຕະພັນເຫຼົ້າສາລີຂອງບ້ານ ກໍ່ໄດ້ຮັບການຈຳໜ່າຍເປັນປົກກະຕິ:

ຄະນະຄຸ້ມຄອງບ້ານ ໄດ້ຂົນຂວາຍ ປຊຊ ເຮັດຜະລິດຕະພັນເຫຼົ້າສາລີ, ແຕ່ລະເດືອນລາຍຮັບກໍ່ເພີ່ມຂຶ້ນ, ຊື່ງໄດ້ຍົກສູງຊີວິດການເປັນຢູ່ຂອງ ປຊຊ. ປະຈຸບັນ, ຢູ່ນີ້ກໍໍ່ສາມາດຂາຍສະເລ່ຍໄດ້ນັບຮ້ອຍຕຸກ/ເດືອນ.

ຕາມແສງກວາງບິນ ມີ 27 ສະຫະກອນຜະລິດ, ໃຫ້ບໍລິການດ້ານກະສິກຳ. ຈາກການເຄື່ອນໄຫວຂອງບັນດາສະຫະກອນຢ່າງມີປະສິດທິຜົນນັ້ນ, ເຊິ່ງໄດ້ຊຸກຍູ້, ໜູນຊ່ວຍ ປຊຊ ຜະລິດບັນດາຜະລິດຕະພັນກະເສດທີ່ມີລັກສະນະສິນຄ້າສູງ, ພ້ອມທັງນຳຜະລິດຕະພັນກະສິກຳ ມາເຖິງມືຂອງຜູ້ບໍລິໂພກໄດ້ຫຼາຍກ່ວາ.

ຕາແສງວີ້ເມື້ອງ, ເມືອງກວາງບິນ ແມ່ນທ້ອງຖິ່ນທີ່ມີຊື່ສຽງດ້ວຍຜະລິດຕະພັນເຂົ້າສານ. ນັບແຕ່ເມື່ອໄດ້ກໍ່ສ້າງຊົນນະບົດໃໝ່ ກໍ່ຄືສ້າງຮູບແບບສະຫະກອນ ສຳເລັດຜົນ, ຊີວິດຂອງ ປຊຊ ໄດ້ຍົກສູງຂຶ້ນຢ່າງເຫັນໄດ້ຊັດ. ທ່ານລອງດຶກຈຸງ, ເລຂາຄະນະພັກຕາແສງວີ້ເທື້ອງ ໃຫ້ຮູ້ວ່າ: ປະຈຸບັນ, ຕາແສງວີ້ເທື້ອງ ມີ 5 ສະຫະກອນເຄື່ອນໄຫວຢ່າງມີປະສິດທິຜົນຫຼາຍພໍສົມຄວນ:

ຮູບແບບສະຫະກອນແມ່ນດີທີ່ສຸດ, ເມື່ອມີສະຫະກອນຈະຊ່ວຍ ປຊຊ ຈຳໜ່າຍສິນຄ້າ, ຜະລິດຕະພັນກະເສດໄດ້ສະດວກສະບາຍກ່ວາ. ສະຫະກອນຈະໄປຊອກຫາບັນດາຄູ່ຮ່ວມມືຢູ່ນອກເພື່ອຊ່ວຍຊາວກະສິກອນ.

ດ້ວຍການເຄື່ອນໄຫວທີ່ມີປະສິດທິຜົນຂອງຮູບແບບສະຫະກອນ, ກໍ່ຄືການກຳນົດທິດທາງພັດທະນາໝູ່ບ້ານອາຊີບມູນເຊື້ອນັ້ນ ໄດ້ຊ່ວຍ ປຊຊ ສາມາດຜະລິດ ບັນດາຜະລິດຕະພັນກະເສດຕາມມາດຖານທີ່ໄດ້ກຳນົດ ເຊິ່ງສາມາດແກ່ງແຍ້ງໃນຕະຫຼາດໄດ້, ປະກອບສ່ວນຍົກສູງຊີວິດຂອງ ປຊຊ ເທື່ອລະກ້າວ. ມາຮອດປະຈຸບັນ, ລາຍຮັບສະເລ່ຍຕໍ່ຫົວຄົນຢູ່ເມືອງກວາງບິນ ບັນລຸເກືອບ 32 ລ້ານດົ່ງ/ປີ. ທ່ານ ຫງວຽນວັນຮ່ວາງ, ຫົວໜ້າຫ້ອງການກະສິກຳເມືອງກວາງບິນ ຖືວ່າ:

   ບົນພື້ນຖານຄວາມສາມາດບົ່ມຊ້ອນທີ່ມີໃນປະຈຸບັນຂອງທ້ອງຖິ່ນ, ພວກຂ້າພະເຈົ້າ ໄດ້ໜູນຊ່ວຍບັນດາໝູ່ບ້ານອາຊີບມູນເຊື້ອໃນບໍລະເວນ ເພື່ອເພີ່ມປະລິມານ ແລະ ຄຸນນະພາບບັນດາຜະລິດຕະພັນກະເສດ ເພື່ອສ້າງບັນດາເຄື່ອງໝາຍການຄ້າຕາມທິດ 1 ຕາແສງ 1 ຜະລິດຕະພັນ. ໃນຂອບຂະໜາດຍົກລະດັບບັນດາກຸ່ມຄອບຄົວ ສ້າງຕັ້ງເປັນບັນດາສະຫະກອນ ເພື່ອຊ່ວຍ ປຊຊ ຍົກສູງລະດັບຄວາມຮູ້ກ່ຽວກັບການຜະລິດ, ຜະລິດອັນໃດທີ່ຕະຫຼາດຕ້ອງການ ເພື່ອໃຫ້ຄຸນຄ່າຜະລິດຕະພັນສູງຂຶ້ນ, ເພີ່ມລາຍຮັບໃຫ້ແກ່ ປຊຊ.

ການພັດທະນາບັນດາໝູ່ບ້ານອາຊີບມູນເຊື້ອ ພ້ອມກັບຮູບແບບການຜະລິດສະຫະກອນທີ່ບັນລຸປະສິດທິຜົນ ໄດ້ປະກອບສ່ວນຊ່ວຍເມືອງກວາງບິນ ເວົ້າສະເພາະ ແລະ ແຂວງຮ່າຢາງ ເວົ້າລວມ ສາມາດລົບລ້າງຄວາມອຶດຫິວ ຫລຸດຜ່ອນຄວາມທຸກຍາກແບບຍືນຍົງ, ຍົກສູງຊີວິດການເປັນຢູ່ຂອງ ປຊຊ ເທື່ອລະກ້າວ.