ຕອນຄ່ຳວັນທີ 21/6, ທ່ານປະທານປະເທດ ຫວຽດນາມ ເຈືອງເຕີນຊາງ ແລະ ຄະນະຜູ້ແທນຂັ້ນສູງ ຫວຽດນາມ ໄດ້ກັບເມືອຮອດ ຮ່າໂນ້ຍ, ສິ້ນສຸດການຢ້ຽມຢາມທາງລັດຖະກິດ ສປ ຈີນ ຕາມຄຳເຊື້ອເຊີນຂອງທ່ານເລຂາທິການໃຫຍ່, ປະທານປະເທດ ຈີນ ສີຈິ້ນຜິງ ຢ່າງຈົບງາມ. ບັນດາຄຳໝັ້ນສັນຍາດ້ານການເມືອງ ແລະ ເອກະສານຮ່ວມມືຫຼາຍສະບັບລະຫວ່າງ 2 ປະເທດ ໄດ້ຮັບການລົງນາມໃນການຢ້ຽມຢາມຄັ້ງນີ້, ອັນຈະເປີດແງ່ຫວັງໃໝ່ໃນການພົວພັນ 2 ຝ່າຍ ຫວຽດນາມ - ຈີນ. ເນື່ອງໃນໂອກາດນີ້, ບັນນາທິການວິທະຍຸກະຈາຍສຽງ ຫວຽດນາມ ມີບົດທີພາດຫົວເລື່ອງວ່າ “ບາດກ້າວພັດທະນາໃໝ່ໃນການພົວພັນ ຫວຽດນາມ - ຈີນ”, ເຊີນທ່ານຕິດຕາມຮັບຟັງ.
ໃນມື້ເຮັດວຽກທຳອິດຂອງການຢ້ຽມຢາມ, ທີ່ການເຈລະຈາກັບປະທານປະເທດ ເຈືອງເຕີນຊາງ, ທ່ານປະທານປະເທດ ສີຈິ້ນຜິງ ໄດ້ຢືນຢັນວ່າ: ຈີນ ຖືການພົວພັນຮ່ວມມື, ມິດຕະພາບກັບ ຫວຽດນາມ ເປັນສຳຄັນ, ເນັ້ນໜັກເຖິງມູນເຊື້ອຮ່ວມມືມິດຕະພາບໂດຍການນຳລຸ້ນກ່ອນຂອງ 2 ປະເທດເພີ່ມພຸນຄຸນສ້າງ, ແມ່ນຊັບສົນບັດອັນລຳ້ຄ່າຂອງ 2 ພັກ, 2 ລັດ, ເຊິ່ງ 2 ຝ່າຍຄວນສືບທອດ ແລະ ເສີມຂະຫຍາຍ. ທ່ານປະທານປະເທດ ເຈືອງເຕີນຊາງ ກໍ່ຢືນຢັນນະໂຍບາຍອັນເປັນພື້ນຖານ, ສະເໝີຕົ້ນສະເໝີປາຍຍາວນານຂອງພັກ, ລັດ ແລະ ປະຊາຊົນ ຫວຽດນາມ ແມ່ນ ຖືເປັນສຳຄັນການພົວພັນຖານບ້ານໃກ້ເຮືອນຄຽງມິດຕະພາບ ແລະ ຮ່ວມມືຍຸດທະສາດຮອບດ້ານກັບ ຈີນ, ພ້ອມແລ້ວທີ່ຈະພ້ອມກັບພັກ, ລັດ ແລະ ປະຊາຊົນ ຈີນ ນຳການພົວພັນຄູ່ຮ່ວມມື, ການຮ່ວມມືຍຸດທະສາດຮອບດ້ານ ຫວຽດນາມ - ຈີນ ກ້າວຂຶ້ນສູ່ລະດັບສູງໃໝ່. ທີ່ການເຈລະຈາ, ທ່ານປະທານປະເທດ ຫວຽດນາມ ເຈືອງເຕີນຊາງ ແລະ ທ່ານປະທານປະເທດ ຈີນ ສີຈິ້ນຜິງ ໄດ້ເປັນເອກະສັນກັນວ່າຄວນເຮັດໃຫ້ຄວາມໄວ້ເນື້ອເຊື່ອໃຈດ້ານການເມືອງລະຫວ່າງ 2 ພັກ, 2 ລັດ ແລະ ປະຊາຊົນ 2 ປະເທດເລິກເຊິ່ງກ່ວາອີກ ດ້ວຍຫຼາຍມາດຕະການ, ພິເສດແມ່ນເພີ່ມທະວີການພົບປະຂັ້ນສູງ, ປະຕິບັດບັນດາໂຄງການ, ຂໍ້ຕົກລົງເຊິ່ງ 2 ຝ່າຍໄດ້ລົງນາມ ຢ່າງມີປະສິດທິຜົນ.
ການເຈລະຈາລະຫວ່າງ 2ຝ່າຍ
ການຮ່ວມມືພັດທະນາດ້ານເສດຖະກິດ, ການຄ້າ ຫວຽດນາມ ແລະ ຈີນ ແມ່ນເນື້ອໃຈຈຸດສຸມຂອງການຢ້ຽມຢາມ ຈີນ ຂອງທ່ານປະທານປະເທດ ເຈືອງເຕີນຊາງ. ມີເອກະສານ 10 ສະບັບ ເຊິ່ງລວມມີບັນດາຂໍ້ຕົກລົງ, ໂຄງການດຳເນີນງານ, ສັນຍາແມ່, ແຜນການຮ່ວມມື ຫວຽດນາມ - ຈີນ ໄດ້ຮັບການລົງນາມ ພາຍຫຼັງການເຈລະຈາຂອງປະທານປະເທດ 2 ທ່ານ, ອັນຈະສ້າງກຳລັງໜູນໃໝ່ນຳການພົວພັນຮ່ວມມື, ຄູ່ຮ່ວມມືຍຸດທະສາດຮອບດ້ານ ຫວຽດນາມ - ຈີນ ພັດທະນາ. ໃນນັ້ນ, ໃນຂໍ້ຕົກລົງສະບັບປັບປຸງຄັ້ງທີ 4 ລະຫວ່າງ ກຸ່ມບໍລິສັດນ້ຳມັນອາຍແກັດແຫ່ງຊາດ ຫວຽດນາມ ແລະ ບໍລິສັດໃຫຍ່ນ້ຳມັນອາຍແກັດແຫ່ງຊາດ ຈີນ, ທີ່ກ່ຽວຂ້ອງເຖິງຂໍ້ຕົກລົງສຳຫຼວດລວມຢູ່ເຂດຕົກລົງທີ່ອ່າວພາກເໜືອ, ຫວຽດນາມ ແລະ ຈີນ ໄດ້ເຫັນດີເປັນເອກະສັນເປີດກ້ວາງເຂດສຳຫຼວດ ແລະ ແກ່ຍາວເວລາປະຕິບັດຂໍ້ຕົກລົງເພື່ອໃຫ້ວິສາຫະກິດນ້ຳມັນອາຍແກັດ 2 ປະເທດຊຸກຍູ້ການເຄື່ອນໄຫວສຳຫຼວດລວມ. ພ້ອມກັນນັ້ນ, ຂໍ້ຕົກລົງລະຫວ່າງກະຊວງກະສິກຳ ແລະ ພັດທະນາຊົນນະບົດ ຫວຽດນາມ ແລະ ກະຊວງກະສິກຳ ຈີນ ສ້າງຕັ້ງສາຍໂທລະສັບດ່ວນກ່ຽວກັບບັນດາກໍລະນີເກີດຂຶ້ນໂດຍບັງເອີນຂອງອາຊີບປະມົງບົນທະເລ, ກໍ່ໄດ້ແກ້ໄຂບັນຫາພັດທະນາອາຊີບປະມົງຢ່າງສົມເຫດສົມຜົນ ສົມກັບການພົວພັນມິດຕະພາບລະຫວ່າງ ຫວຽດນາມ ແລະ ຈີນ. ເອກະສານ 10 ສະບັບດັ່ງກ່າວໂດຍບັນດາກະຊວງ, ຂະແໜງການ ຫວຽດນາມ - ຈີນ ເຊັນໃນຂອບເຂດການຢ້ຽມຢາມ ຈີນ ຂອງທ່ານປະທານປະເທດ ເຈືອງເຕີນຊາງ, ອັນໄດ້ເປີດແງ່ຫວັງໃໝ່ໃນການເພີ່ມທະວີການຮ່ວມມືຕ່າງຝ່າຍຕ່າງມີຜົນປະໂຫຍດໃນທຸກໆຂົງເຂດ ເສດຖະກິດ, ການຄ້າ, ວັດທະນະທຳ, ກິລາ, ການທ່ອງທ່ຽວ, ສາທາລະນະສຸກ, ວິທະຍາສາດເຕັກນິກ, ເຮັດໃຫ້ການພົວພັນຄູ່ຮ່ວມມື, ການຮ່ວມມືຍຸດທະສາດຮອບດ້ານ ຫວຽດນາມ - ຈີນ ອຸດົມສົມບຸນຂຶ້ນຕື່ມ. ພິເສດ, ບັນດາເອະກະສານ, ຂໍ້ຕົກລົງຮ່ວມມືນີ້ ຈະຊຸກຍູ້ການຮ່ວມມືໃນຂົງເຂດເສດຖະກິດ, ການຄ້າ ແລະ ຊຸກຍູ້ 2 ປະເທດທັງເຕີບໂຕເປັນປົກກະຕິທັງ ຫລຸດຜ່ອນການນຳເຂົ້າເກີນດຸ່ນຂອງ ຫວຽດນາມ, ສູ້ຊົນຍົກວົງເງິນການຄ້າລະຫວ່າງ 2 ປະເທດບັນລຸ 60 ຕື້ USD ໃນປີ 2015.
ພ້ອມກັບບັນດາການຮ່ວມມືດ້ານເສດຖະກິດ, ການຄ້າ, ເລື່ອງແກ້ໄຂບັນດາສິ່ງທີ່ຍັງຄົງຄ້າງໃນການພົວພັນ 2 ປະເທດກໍ່ແມ່ນເນື້ອໃນສຳຄັນໃນການຢ້ຽມຢາມ ຈີນ ຂອງທ່ານປະທານປະເທດ ເຈືອງເຕີນຊາງ. 2 ຝ່າຍໄດ້ແລກປ່ຽນຢ່າງກົງໄປກົງມາ ແລະ ເປັນເອກະພາບກັນຮັກສາການແລກປ່ຽນ, ສົນທະນາເປັນປະຈຳກ່ຽວກັບບັນຫາບົນທະເລ, ປະຕິບັດຂໍ້ຕົກລົງກ່ຽວກັບ ຫຼັກການພື້ນຖານຊີ້ນຳບັນຫາບົນທະເລລະຫວ່າງ ຫວຽດນາມ - ຈີນ ຢ່າງເຂັ້ມງວດ. 2 ຝ່າຍເປັນເອກະພາບກັນແກ້ໄຂການພິພາດກັນຜ່ານບັນດາມາດຕະການໂດຍສັນຕິວິທີ, ບົນພື້ນຖານກົດໝາຍສາກົນ, ຊອກຫາບັນດາມາດຕະການພື້ນຖານ, ຍາວນານເຊິ່ງ 2 ຝ່າຍອາດຈະຮັບຮູ້ໄດ້, ແກ້ໄຂບັນດາບັນຫາເກີດຂຶ້ນຢ່າງສົມເຫດສົມຜົນ, ບໍ່ປະໃຫ້ສົ່ງຜົນສະທ້ອນເຖິງການພັດທະນາຢ່າງໂປ່ງໃສຂອງ 2 ປະເທດກໍ່ຄືສັນຕິພາບ, ສະຖຽນລະພາບຢູ່ທະເລຕາເວັນອອກ. 2 ຝ່າຍກໍ່ເຫັນດີເປັນເອກະພາບກັນໃນວິວັດການເຈລະຈາກ່ຽວກັບບັນຫາບົນທະເລ, ປະຕິບັດຂໍ້ຕົກລົງ ແລະ ຄວາມຮັບຮູ້ລວມເຊິ່ງການນຳຂັ້ນສູງ 2 ປະເທດບັນລຸໄດ້ຢ່າງເຂັ້ມງວດ, ປະຕິບັດຫລັກການ ແລະ ຈິດໃຈຖະແຫຼງການກ່ຽວກັບການປະພຶດຂອງຝ່າຍຕ່າງໆຢູ່ທະເລຕາເວັນອອກ (DOC) ຢ່າງເຂັ້ມງວດ. ຕາມນັ້ນແລ້ວ, ສົ່ງເສີມບັນດາຝ່າຍທີ່ກ່ຽວຂ້ອງແກ້ໄຂບັນດາການພິພາດກ່ຽວກັບຜືນແຜ່ນດິນ ແລະ ສິດຕັດສິນອັນຖືກຕ້ອງດ້ວຍມາດຕະການໂດຍສັນຕິວິທີ, ບໍ່ນຳໃຊ້ ຫຼື ນາບຂູ່ນຳໃຊ້ອາວຸດ, ຜ່ານການທາບທາມ ແລະ ເຈລະຈາມິດຕະພາບລະຫວ່າງບັນດາປະເທດທີ່ມີອະທິປະໄຕທີ່ກ່ຽວຂ້ອງໂດຍກົງ, ບົນພື້ນຖານຫຼັກການພື້ນຖານຂອງກົດໝາຍສາກົນ, ເຊິ່ງລວມມີສົນທິສັນຍາສະຫະປະຊາຊາດ ກ່ຽວກັບກົດໝາຍວ່າດ້ວຍທະເລ 1982. ທັງ ຫວຽດນາມ ແລະ ຈີນ ລ້ວນແຕ່ເປັນເອກະພາບກັນປະຕິບັດ DOC ຮອບດ້ານ, ມີປະສິດທິຜົນ, ພ້ອມກັນຮັກສາສັນຕິພາບ ແລະ ສະຖຽນລະພາບຢູ່ທະເລຕາເວັນອອກ.
ບັນດາຂໍ້ຕົກລົງ, ຄຳໝັ້ນສັນຍາລະຫວ່າງທ່ານປະທານປະເທດ ຈີນ ສີຈິ້ນຜິງ ແລະ ທ່ານປະທານປະເທດ ຫວຽດນາມ ເຈືອງເຕີນຊາງ ໃນການຢ້ຽມຢາມທາງລັດຖະກິດ ສປ ຈີນ ຄັ້ງນີ້ມີລັກສະນະຍຸດທະສາດ, ສ້າງບາດກ້າວພັດທະນາໃໝ່ໃນການພົວພັນ ຫວຽດນາມ, ຈີນ. ບັນດາເອກະສານຮ່ວມມືທາງດ້ານເສດຖະກິດ, ການຄ້າໄດ້ຮັບການລົງນາມໃນການຢ້ຽມຢາມຄັ້ງນີ້ຈະແມ່ນກຳລັງໜູນໃໝ່ນຳການພົວພັນຄູ່ຮ່ວມມື, ການຮ່ວມມືຍຸດທະສາດຮອບດ້ານຫວຽດນາມ - ຈີນ ນັບມື້ນັບພັດທະນາ.