(vovworld)- ວັນທີ 19/8, ປະຊາຊົນຫວຽດນາມ ສະເຫລີມສະຫລອງ 68 ປີແຫ່ງວັນການປະຕິວັດເດືອນສິງຫາປະສົບຜົນສຳເລັດ, ສະຖາປະນາປະເທດ ສາທາລະນະລັດປະຊາທິປະໄຕ ຫວຽດນາມ, ລັດຂອງຊົນຊັ້ນກຳມະກອນ, ຊາວກະສິກອນທຳອິດຢູ່ ອາຊີຕາເວັນອອກສຽງໃຕ້. 68 ປີໄດ້ລ່ວງເລີຍໄປ ແຕ່ບົດຮຽນກ່ຽວກັບການກຳແຫນ້ນກາລະໂອກາດ ແລະ ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດຂອງການປະຕິວັດຄັ້ງປະຫວັດສາດຍັງຄົງຮັກສາຄຸນຄ່າໄວ້ຄືເກົ່າ. ກ່ອນອື່ນໝົດຕ້ອງຢືນຢັນວ່າ: ການປະຕິວັດເດືອນສິງຫາປີ 1945 ຍາດໄດ້ໄຊຊະນະຢ່າງວ່ອງໄວ ແມ່ນໝາກຜົນຂອງກຳລັງແຮງກຸ່ມກ້ອນສາມັກຄີທົ່ວປວງຊົນທັງຊາດ. ພັກກອມມູນິດ ຫວຽດນາມ ໄດ້ເລີ່ມມາຈາກຜົນປະໂຫຍດ, ຄວາມຕ້ອງການ, ຄວາມມຸ່ງມາດປາດຖະຫນາຂອງປະຊາຊົນເພື່ອຈັດຕັ້ງ, ເຕົ້າໂຮມກຳລັງ. ຕາມທ່ານ ຟ້າມເທຢວຽດ, ອະດີດປະທານຄະນະກຳມະການສູນກາງແນວໂຮມປະເທດຊາດ ຫວຽດນາມ ແລ້ວ, ໃນຈຸດເວລານັ້ນ ພັກບໍ່ທັນນຳພາຢ່າງເປີດເຜີຍ. ດ້ວຍ ສະມາຊິກພັກ 5000 ທ່ານ, ຜ່ານແນວໂຮມຫວຽດມີງ, ພັກໄດ້ເຕົ້າໂຮມປະຊາຊົນກວ່າ 20 ລ້ານຄົນສ້າງເປັນການປະຕິວັດຂະຫນາດໃຫຍ່ບໍ່ທັນມີມາກ່ອນໃນປະຫວັດສາດ. ຮູບພາບມະຫາສາມັກຄີທົ່ວປວງຊົນທັງຊາດໄດ້ສະແດງອອກຢ່າງຈະແຈ້ງໃນ “ກອງປະຊຸມໃຫຍ່ຜູ້ແທນທົ່ວປະເທດ” ໂດຍປະທານໂຮ່ຈິມີນ ເປັນປະທານ ແລະ ດຳເນີນພຽງໃນ 2 ວັນ ກ່ອນທີ່ການລຸກຮືຂຶ້ນທົ່ວປະເທດເດືອນສິງຫາດຳເນີນໄປ. ຢູ່ທີ່ນັ້ນ ມີບັນດາຜູ້ແທນຂອງບັນດາພັກການເມືອງ, ໝູ່ມະຫາຊົນ, ບັນດາຊົນເຜົ່າ, ສາສະຫນາ, ຜູ້ແທນມາຈາກ ສາມພາກ: ພາກກາງ, ພາກໃຕ້ ແລະ ພາກເຫນືອ ພ້ອມກັບຜູ້ຕາງຫນ້າຊາວຫວຽດນາມ ອາໄສຢູ່ຕ່າງປະເທດ. ກອງປະຊຸມໃຫຍ່ດັ່ງກ່າວໄດ້ຊົມເຊີຍແຜນນະໂຍບາຍລຸກຮືຂຶ້ນໃນທົ່ວປະເທດຂອງພັກ ແລະ ສ້າງຕັ້ງຄະນະກຳມະການປົດປ່ອຍຊາດ ຫວຽດນາມ ໂດຍ ປະທານໂຮ່ຈິມີນ ເປັນປະທານ.
ບົດຮຽນດີເລີດຂອງການປະຕິວັດເດືອນສິງຫາປີ 1945 ແມ່ນການກໍ່ສ້າງ, ປັບປຸງ ແລະ ເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ. ຮອງສາດສະດາຈານ, ດຣ ຫວຽນຈ້ອງຟຸກ, ອະດີດຫົວຫນ້າສະຖາບັນປະຫວັດສາດພັກ, ສະຖາບັນການເມືອງ ການປົກຄອງແຫ່ງຊາດ ໂຮ່ຈິມີນ ຖືວ່າ: ຍ້ອນກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດໄດ້ເລັ່ງລັດປະຊາຊົນລຸກຮືຂຶ້ນເພື່ອປົດປ່ອຍຊາດ.
“ ກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ ແມ່ນທັດສະນະສະເຫມີຕົ້ນສະເຫມີປາຍ, ມີຍຸດທະສາດຂອງພັກກອມມູນິດ ອິນດູຈີນ ນັບແຕ່ເມື່ອຫາກໍ່ໄດ້ຮັບການສ້າງຕັ້ງຂຶ້ນ ແລະ ກໍແມ່ນແນວຄິດໃຫຍ່ຂອງປະທານໂຮ່ຈິມີນ. ການລຸກຮືຂຶ້ນທົ່ວປະເທດເດືອນສິງຫາ ແມ່ນການລຸກຮືຂຶ້ນຂອງທົ່ວປວງຊົນ, ກຳມະກອນ, ຊາວກະສິກອນ, ປັນຍາຊົນ, ນັກປະພັນທັງໝົດ ຊ້ຳບໍ່ໜຳຍັງຂົນຂວາຍນາຍທະຫານຝ່າຍຄ້ານເຂົ້າຮ່ວມພາລະກິດປົດປ່ອຍຊາດ. ອາດຈະເວົ້າໄດ້ວ່າ ການລຸກຮືຂຶ້ນທົ່ວປະເທດເດືອນສິງຫາ ແມ່ນແບບຢ່າງໃຫ້ແກ່ກຳລັງແຮງຂອງຊົນຊາດ ແລະ ກຸ່ມກອ້ນມະຫາສາມັກຄີທົ່ວປວງຊົນຂອງພັກ ແລະ ປະທານໂຮ່ຈີມີນ.”
ພາບເອກະສານ:internet
|
ຄຽງຄູ່ກັບປັດໄຈສາມັກຄີ, ການປະຕິວັດເດືອນສິງຫາສຳເລັດຜົນ ຍັງອີງໃສ່ການສຸມທຸກເງື່ອນໄຂພາວະວິໄສ ແລະ ອັດຕະວິໄສທີ່ແຕກຕ່າງກັນ ແລະ ຫນຶ່ງໃນບັນດາເງື່ອນໄຂນັ້ນແມ່ນ ພັກກອມມູນິດ ຫວຽດນາມ ເຫັນໄດ້ກາລະໂອກາດ ແລະ ກຳແຫນ້ນກາລະໂອກາດຢ່າງວ່ອງໄວ. ດຣ ປະຫວັດສາດ ຟ້າມແຊງ ໄຈ້ແຍກວ່າ:
“ສະຖານະການ ຟາດສິດຍີ່ປຸ່ນ ຍອມຈຳນົນພັນທະມິດເມື່ອວັນທີ 13/8 ແມ່ນກາລະໂອກາດດີສຸດເພື່ອໃຫ້ບັນດາປະເທດ ອາຊີ ລຸກຮືຂຶ້ນເຮັດການປະຕິວັດ. ເຖິງຢ່າງໃດກໍຕາມ, ສະເພາະພັກກອມມູນິດ ຫວຽດນາມ ຍາດແຍ່ງກາລະໂອກາດ, ສະແຫວງຫາກາລະໂອກາດນັ້ນ ເພື່ອຍາດເອົາໄຊຊະນະ. ຖ້າພວກເຮົາຍາດເອົາອຳນາດການປົກຄອງກ່ອນວັນທີ 15/8, ພວກເຮົາອາດຈະຖືກປະລາໄຊ ຍ້ອນເວລານັ້ນ ມີນັບທັງຝລັ່ງ, ຍີ່ປຸ່ນ ແລະ ຊ້ຳບໍ່ໜຳມີຫລາຍພັກພວກ. ຖ້າຫາກການປະຕິວັດຂອງພວກເຮົາດຳເນີນໄປຫລັງວັນທີ 5/9, ຊື່ງແມ່ນວັນກຳລັງຂອງພັນທະມິດເຂົ້າປົດອາວຸດຂອງກຳລັງຟາດສິດຍີ່ປຸ່ນຢູ່ ຫວຽດນາມຕາມສົນທິສັນຍາຂອງພັນທະມິດ, ພວກເຮົາບໍ່ພຽງແຕ່ຕ້ອງສູ້ຢັນກັບສັດຕູໂຕດຽວເທ່ົານັ້ນ ຫາກນັບທັງສັດຕູຫລາຍໂຕອີກດ້ວຍ, ສະນັ້ນ ບໍ່ອາດຍາດໄຊຊະນະໄດ້. ການປະຕິວັດເດືອນສິງຫາ ສາມາດຍາດເອົາອຳນາດການປົກຄອງ ພຽງໃນເວລາແຕ່ວັນທີ 15/8 - 5/9 ແລະ ຍຸດໂທບາຍນັ້ນ ພວກເຮົາໄດ້ປະຕິບັດຢ່າງດີເລີດ. ນີ້ແມ່ນບົດຮຽນໃຫຍ່ກ່ຽວກັບກາລະໂອກາດ.”
ຍ້ອນໄດ້ໝູນໃຊ້ກຳລັງແຮງມະຫາສາມັກຄີທົ່ວປວງຊົນທັງຊາດເປັນຢ່າງດີ ກໍຄືກຳໄດ້ກາລະໂອກາດຢ່າງທັນການ, ການລຸກຮືຂຶ້ນທົ່ວປະເທດເດືອນສິງຫາປີ 1945 ຍາດໄດ້ໄຊຊະນະຢ່າງວ່ອງໄວ, ບໍ່ເສຍເລືອດເນື້ອເຫ່ືອແຮງປານໃດ, ສ້າງເປັນຫນ້າປະຫວັດສາດອັນສະຫງ່າລາສີໃນການສ້າງສາ ແລະ ປົກປັກຮັກສາຂອງປະເທດຊາດຫວຽດນາມ. ໄຊຊະນະຂອງການປະຕິວັດເດືອນສິງຫາ ໄດ້ຊ່ວຍໃຫ້ປະຊາຊົນຫວຽດນາມ ທຳລາຍແອກຂ້ອຍຂ້າຂອງຟາດສິດຍີ່ປຸ່ນ, ໂຄ່ນລົ້ມແອກຄອບຄອງຂອງພວກລ່າເມືອງຂຶ້ນ ຝລັ່ງ, ລົບລ້າງລະບອບສັກດີນາທີ່ຄົງຕົວນັບພັນປີ, ເຮັດໃຫ້ປະຊາຊົນຫວຽດນາມ ຈາກຜູ້ເປັນຂ້ອຍຂ້າກາຍເປັນເຈົ້າຂອງປະເທດຊາດ, ເປັນເຈົ້າ ຊາຕະກຳຂອງຕົນ.