(vovworld) – ຕອນເຊົ້າວັນທີ 29/12, ກອງປະຊຸມໃຫຍ່ຜູ້ແທນທົ່ວປະເທດສະຫະພັນຊາວໜຸ່ມ ຫວຽດນາມ ຄັ້ງທີ 7 ອາຍຸການ 2014 – 2019 ໄຂຂຶ້ນຢ່າງເປັນທາງການຢູ່ ຮ່າໂນ້ຍ. ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດ ຫວຽດນາມ ຫງວຽນຟູ໋ຈ້ອງ, ທ່ານປະທານສະພາແຫ່ງຊາດ ຫງວຽນຊິງຮູ່ງ ແລະ ການນຳລັດ, ແນວໂຮມປະເທດຊາດ ແລະ ຜູ້ແທນ 800 ຄົນເຊິ່ງແມ່ນບັນດາພະນັກງານ, ສະມາຊິກຄະນະຊາວໜຸ່ມ, ຊາວໜຸ່ມ ດີເດັ່ນທີ່ຕາງໜ້າໃຫ້ສະມາຊິກສະຫະພັນຊາວໜຸ່ມ ຫວຽດນາມ ໃນທົ່ວປະເທດເຂົ້າຮ່ວມ. ກ່າວຄຳເຫັນທີ່ກອງປະຊຸມໃຫຍ່, ທ່ານເລຂາທິການໃຫຍ່ ຫງວຽນຟູ໋ຈ້ອງ ຍ້ອງຍໍຊົມເຊີຍບັນດາຜົນງານຂອງຂະບວນການຊາວໜຸ່ມ ແລະ ການເຄື່ອນໄຫວຂອງຂອງສະຫະພັນຊາວໜຸ່ມ ທຸກຂັ້ນໃນທົ່ວປະເທດໃນໄລຍະຜ່ານມາ, ພິເສດແມ່ນອາຍຸການ 2010 – 2014. ທ່ານເລຂາທິການໃຫຍ່ ຊີ້ແຈ້ງວ່າ:
“ໜຶ່ງໃນບັນດາໜ້າທີ່ສຳຄັນອັນດັບໜຶ່ງຂອງສະຫະພັນຊາວໜຸ່ມ ຫວຽດນາມ ໃນຊຸມປີຈະມາເຖິງແມ່ນຕ້ອງສືບຕໍ່ກໍ່ສ້າງ ແລະ ເພີ່ມທະວີກຸ່ມກ້ອນມະຫາສາມັກຄີ, ເຕົ້າໂຮມຊາວໜຸ່ມທຸກຊັ້ນຢ່າງກ້ວາງຂວາງ, ຮັບປະກັນເປັນເອກະພາບກ່ຽວກັບແນວຄິດ ແລະ ການກະທຳ, ສຸ້ຊົນປະຕິບັດບັນດາແຜນນະໂຍບາຍ, ແນວທາງຂອງພັກ, ນະໂຍບາຍ, ກົດໝາຍຂອງລັດຢ່າງມີປະສິດທິຜົນ.”
ທ່ານເລຂາທິການໃຫຍ່ ຫງວຽນຟູ໋ຈ້ອງ ໃສ່ໃຈສະຫະພັນຊາວໜຸ່ມ ຫວຽດນາມ ຄວນສືບຕໍ່ພ້ອມກັບຄະນະຊາວໜຸ່ມກອມມູນິດ ໂຮ່ຈີມິນ ປະຕິບັດວຽກງານການສຶກສາ, ກຳນົດທິດຊາວໜຸ່ມ, ປະກອບສ່ວນສ້າງສາລຸ້ນຊາວໜຸ່ມມີພູມປັນຍາ, ມີຄວາມເກັ່ງກ້າສາມາດ… ທ່ານເລຂາທິການໃຫຍ່ ຫງວຽນຟູ໋ຈ້ອງ, ເນັ້ນໜັກວ່າ:
“ພັກ, ລັດ ແລະ ປະຊາຊົນຍາມໃດກໍ່ມີຄວາມໄວ້ເນື້ອເຊື່ອໃຈ ແລະ ມີຄວາມຫວັງຕໍ່ລຸ້ນໜຸ່ມ, ປາດຖະໜາຢາກໃຫ້ລຸ້ນໜຸ່ມສືບຕໍ່ມູນເຊື້ອຂອງລຸ້ນພໍ່ລຸ້ນອ້າຍ, ຢືດໝັ້ນແນວທາງເຊິ່ງພັກ, ປະທານ ໂຮ່ຈີມິນ ແລະ ປະຊາຊົນ ຫວຽດນາມ ໄດ້ເລືອກເຟັ້ນ, ອຸທິສ່ວນເຂົ້າໃນພາລະກິດປ່ຽນໃໝ່, ສ້າງສາ ແລະ ປົກປັກຮັກສາປະເທດສັງຄົມນິຍົມໃນໄລຍະໃໝ່.”