ພາບປະກອບ: THX/TTXVN

ວັນທີ 14 ພະຈິກ, ສຳນັກຂ່າວສານ SANA ຂອງຊີຣີ ໄດ້ລົງຂ່າວວ່າ ເຂດເມືອງ Mazzeh ຢູ່ນະຄອນຫຼວງ Damascus ຂອງປະເທດນີ້ ເຊິ່ງແມ່ນສະຖານທີ່ມີຫຼາຍສະຖານທູດ, ສຳນັກງານຄວາມໝັ້ນຄົງ ແລະ ຫ້ອງການຕາງໜ້າ ຂອງ ສປຊ ຖືກບຸກໂຈມຕີ. ມີຜູ້ເສຍຊີວິດຢ່າງໜ້ອຍສຸດ 15 ຄົນໃນເຫດບຸກໂຈມຕີນີ້. ຕາມ SANA ແລ້ວ, ການບຸກໂຈມຕີ ແມ່ນໂດຍອິດສະລາແອັນ ດຳເນີນ. ເຖິງຢ່າງໃດກໍຕາມ, ອິດສະລາແອັນ ຍັງບໍ່ທັນຍົກອອກຄຳເຫັນຫຍັງຕໍ່ຂໍ້ມູນຂ່າວນີ້. ແລະກໍ່ໃນວັນດຽວກັນ ກອງທັບອິດສະລາແອັນ ໄດ້ບຸກໂຈມຕີທາງອາກາດປະມານ 30 ເປົ້າໝາຍຢູ່ເຂດຊານເມືອງທາງທິດໃຕ້ຂອງນະຄອນຫຼວງ Beirut ຂອງລີບັງ. ກອງທັບອິດສະລາແອັນ ປະກາດວ່າ ອິດສະລາແອັນບຸກໂຈມຕີບັນດາເປົ້າໝາຍນີ້ເພື່ອແນໃສ່ທຳລາຍ ແລະ ເຮັດໃຫ້ກຳລັງທະຫານຂອງກຸ່ມ ປະກອບອາວຸດ Hezbollah ຢູ່ລີບັງອ່ອນແອລົງ.

ໃນເຫດການທີ່ກ່ຽວຂ້ອງ, ໃນຖະແຫຼງການທີ່ອອກໃນວັນທີ 14 ພະຈິກ, ທ່ານ Eli Cohen ລັດຖະມົນຕີກະຊວງພະລັງງານ ອິດສະລາແອັນ ໃຫ້ຮູ້ວ່າ ປະເທດນີ້ຫຍັບໃກ້ກັບຂໍ້ຕົກລົງຢຸດຕິການປະທະກັນກັບ Hezbollah. ທ່ານລັດຖະມົນຕີ Eli Cohen ໃຫ້ຮູ້ວ່າ ຈຸດຫຼັກແຫຼ່ງໃນຂໍ້ຕົກລົງນີ້ແມ່ນ ອິດສະລາແອັນ ຢາກຮັບປະກັນວ່າ ປະເທດນີ້ຍັງມີສິດເສລີໃນການກະທຳຖ້າຫາກວ່າ Hezbollah ກັບຄືນບັນດາເຂດຊາຍແດນ.