ບັນດາຜູ້ແທນເຂົ້າຮ່ວມພິທີ (ພາບ: TTXVN)

ຕອນເຊົ້າວັນທີ 15 ພະຈິກ, ຢູ່ຮ່າໂນ້ຍ ກະຊວງແຮງງານ - ທະຫານເສຍອົງຄະ ແລະ ສັງຄົມ ຫວຽດນາມ, ໄດ້ສົມທົບກັບກະຊວງຕຳຫຼວດ ຫວຽດນາມ ແລະ ອົງການຂອງ ສປຊກ່ຽວກັບຄວາມສະເໝີພາບລະຫວ່າງຍິງຊາຍ ແລະ ການມອບສິດໃຫ້ແກ່ແມ່ຍິງ (UN Women) ຈັດຕັ້ງພິທີປຸກລະດົມເດືອນກະກທຳເພື່ອຄວາມສະເໝີພາບລະຫວ່າງຍິງຊາຍ ແລະ ການປ້ອງກັນ, ຕ້ານການໃຊ້ຄວາມຮຸນແຮງທາງເພດໃນປີ 2024. ຫົວຂໍ້ຂອງເດືອນກະທຳແມ່ນ “ຮັບປະກັນຊີວິດສັງຄົມ, ເພີ່ມທະວີສິດອຳນາດ ແລະ ສ້າງໂອກາດໃຫ້ແກ່ແມ່ຍິງ ແລະ ເດັກຍິງເພື່ອແນໃສ່ປະຕິບັດຄວາມສະເໝີພາບລະຫວ່າງຍິງຊາຍ ແລະ ລົບລ້າງການນຳໃຊ້ຄວາມຮຸນແຮງກັບແມ່ຍິງ ແລະ ເດັກຍິງ”.

ກ່າວຄຳເຫັນທີ່ພິທີ, ທ່ານ ດ່າວງອກຢຸງ ລັດຖະມົນຕີກະຊວງແຮງງານ - ທະຫານເສຍອົງຄະ ແລະ ສັງຄົມ ຫວຽດນາມ, ປະທານ ຄະນະກຳມະການແຫ່ງຊາດເພື່ອຄວາມກ້າວໜ້າຂອງແມ່ຍິງ ຫວຽດນາມ ຢັ້ງຢືນວ່າ ຫວຽດນາມ ຍາມໃດກໍ່ມານະພະຍາຍາມໃນການປະຕິບັດບັນດາມາດຕະການເພື່ອແນໃສ່ຮັບປະກັນການໜູນຊ່ວຍສັງຄົມ, ຊຸກຍູ້ຄວາມສະເໝີພາບລະຫວ່າງຍິງຊາຍ ແລະ ການປ້ອງກັນ, ຕ້ານການຮັບມືກັບການໃຊ້ຄວາມຮຸນແຮງທາງເພດ, ພິເສດແມ່ນການໃຊ້ຄວາມຮຸນແຮງກັບແມ່ຍິງ ແລະ ເດັກນ້ອຍ. ການສຸມໃສ່ເຂົ້າການພັດທະນາລະບົບໜູນຊ່ວຍສັງຄົມແບບກວມລວມ, ເປັນຫຼາຍຮູບແບບ, ຍົກສູງຄວາມສາມາດໃນການເຂົ້າເຖິງ ຂອງກຸ່ມເປົ້າໝາຍ; ສ້າງເງື່ອນໄຂ, ໂອກາດເພື່ອໃຫ້ແມ່ຍິງ ແລະ ຜູ້ຊາຍເຂົ້າຮ່ວມ, ໄດ້ຮັບການຊົມໃຊ້ຄວາມມີຄວາມສະເໝີພາບໃນບັນດາຂົງເຂດຂອງຊີວິດສັງຄົມແມ່ນໜ້າທີ່ສຳຄັນ ແລະ ແມ່ນໜຶ່ງໃນບັນດາບຸລິມະສິດຂອງຂະແໜງແຮງງານ, ທະຫານເສຍອົງຄະ ແລະ ສັງຄົມ ໃນໄລຍະຈະມາເຖິງ. ທ່ານໃຫ້ຮູ້ວ່າ:

ດ້ວຍຫົວຂໍ້ “ຮັບປະກັນຊີວິດສັງຄົມ, ເພີ່ມສິດອຳນາດ ແລະ ສ້າງໂອກາດໃຫ້ແກ່ແມ່ຍິງ ແລະ ເດັກຍິງ ເພື່ອແນໃສ່ປະຕິບັດຄວາມສະເໝີພາບທາງເພດ ແລະ ລົບລ້າງການນຳໃຊ້ຄວາມຮຸນແຮງກັບແມ່ຍິງ ແລະ ເດັກນ້ອຍ”, ເດືອນກະທຳປີນີ້ເນັ້ນໜັກເຖິງຄວາມສຳຄັນ, ບັນດາມາດຕະການຮັກສາຄວາມສະຖຽນລະພາບສັງຄົມ, ຄວາມຍຸຕິທຳ, ປະຊາທິປະໄຕ, ຮັບປະກັນຊີວິດສັງຄົມ, ຄວາມໝັ້ນຄົງ, ຄວາມປອດໄພໃຫ້ແກ່ປະຊາຊົນ ເປັນຕົ້ນແມ່ນແມ່ຍິງ ແລະ ເດັກນ້ອຍ. ຂ້າພະເຈົ້າສະເໜີທຸກຂັ້ນ, ທຸກຂະແໜງການ, ທຸກອົງການໝູ່ຄະນະ, ອົງການຈັດຕັ້ງສາກົນ, ອົງການສື່ມວນຊົນ ແລະ ປະຊາຊົນພ້ອມກັນໃຫ້ຄຳໝັ້ນສັນຍາ ເຂົ້າຮ່ວມ ແລະ ມີການກະທຳທີ່ແທ້ຈິງ, ມີປະສິດທິຜົນຕໍ່ບັນຫານີ້.