(vovworld) - ຕອນເຊົ້າວັນທີ 14/8, ກອງປະຊຸມຄັ້ງທີ 40 ຂອງຄະນະປະຈຳສະພາແຫ່ງຊາດສືບຕໍ່ເຮັດວຽກ, ໃຫ້ຄຳເຫັນໃສ່ຮ່າງກົດໝາຍວ່າດ້ວຍການເຊື່ອຖື, ສາສະໜາ. ຄະນະປະຈຳສະພາແຫ່ງຊາດໄດ້ຮັບຟັງທ່ານລັດຖະມົນຕີວ່າການກະຊວງພາຍໃນລາຍງານໃບສະເໜີກ່ຽວກັບຮ່າງກົດໝາຍວ່າດ້ວຍການເຊື່ອຖື, ສາສະໜາ; ຮັບຟັງທ່ານຫົວໜ້າກຳມາທິການວັດທະນະທຳ, ສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນຂອງສະພາແຫ່ງຊາດ ດ່າວຈ້ອງທີ ລາຍງານຜົນແຫ່ງການກວດກາ. ຕາມບົດລາຍງານຜົນແຫ່ງການກວດກາແລ້ວ, ກຳມາທິການວັດທະນະທຳ, ສຶກສາ, ຊາວໜຸ່ມ, ເຍົາວະຊົນ ແລະ ອະນຸຊົນຂອງສະພາແຫ່ງຊາດ ເຫັນດີຕໍ່ຄວາມຈຳເປັນຕ້ອງປະກາດໃຊ້ ຮ່າງກົດໝາຍວ່າດ້ວຍການເຊື່ອຖື, ສາສະໜາ. ຮ່າງກົດໝາຍວ່າດ້ວຍການເຊື່ອຖື, ສາສະໜາເພື່ອແນໃສ່ຫັນສິດເສລີ ໃນການເຊື່ອຖື, ສາສະໜາເຊິ່ງລະບຸໄວ້ໃນລັດຖະທຳມະນູນປີ 2013 ເປັນລະອຽດ ແລະ ເໝາະສົມກັບສົນທິສັນຍາສາກົນກ່ຽວກັບສິດພົນລະເມືອງ ແລະ ການເມືອງ ເຊິ່ງຫວຽດນາມໄດ້ລົງນາມເຂົ້າເປັນສະມາຊິກໃນວັນທີ 24/9/1982.
ຕອນບ່າຍວັນທີ 14/8, ບັນດາຜູ້ແທນໄດ້ສຸມໃສ່ໃຫ້ຄຳເຫັນໃສ່ຮ່າງກົດໝາຍປົກປ້ອງ,ເບິ່ງແຍງເດັກ(ສະບັບປັບປຸງ). ຄຳເຫັນສ່ວນຫລາຍສະແດງຄວາມເຫັນດີເຫັນພ້ອມກັບບັນດາຂໍ້ກຳນົດເປີດກວ້າງບັນດາສິດຂອງເດັກ, ພ້ອມທັງສະເຫນີ ຮ່າງກົດໝາຍຄວນກຳນົດຄວາມຮັບຜິດຊອບຂອງຄອບຄົວ, ໂຮງຮຽນ, ສັງຄົມຕື່ມອີກ ເພື່ອປະຕິບັດສິດຂອງເດັກນ້ອຍ ແລະ ສະກັດກັ້ນສະພາບການທາລຸນເດັກນ້ອຍ. ທີ່ກອງປະຊຸມ, ທ່ານປະທານສະພາແຫ່ງຊາດ ຫງວຽນຊີງຮຸ່ງ ຖືວ່າ ກົດໝາຍຄວນກຳນົດຢ່າງລະອຽດຄວາມຮັບຜິດຊອບ ເພື່ອໃຫ້ວຽກງານສະກັດກັ້ນສະພາບການທາລຸນເດັກນ້ອຍ ຢ່າງມີປະສິດທິຜົນ.