(vovworld) - ວັນທີ 20/07, ຄະນະກຳມະການສາມັກຄີອິນເດຍ - ຫວຽດນາມ ອອກຖະແຫຼງການສະໜັບສະໜູນຄຳຕັດສິນຂອງສານອະນຸຍາໂຕຕຸລາການ (PCA) ຢູ່ລາໄຮ, ປະເທດໂຮນລັງ ທີ່ກ່ຽວຂ້ອງເຖິງການຂັດແຍ້ງກັນຢູ່ທະເລຕາເວັນອອກ ປະຕິເສດອະທິປະໄຕທີ່ໄຮ້ເຫດຜົນຂອງຈີນ ທີ່ເອີ້ນວ່າ “ເສັ້ນ 9 ຕອນ” ຢູ່ທະເລຕາເວັນອອກ. ຖະແຫຼງການໄດ້ຖືວ່າ, ຄຳຕັດສິນຂອງ PCA ມີລັກສະນະປະຫວັດສາດ ແລະ ຮຽກຮ້ອງໃຫ້ບັນດາປະເທດທີ່ກ່ຽວຂ້ອງຈົ່ງຮັບຮູ້ ແລະ ເຄົາລົບຄຳຕັດສິນນີ້ ເພື່ນສັນຕິພາບ, ຄວາມປອງດອງ ແລະ ອະທິປະໄຕແຫ່ງຊາດຂອງບັນດາປະເທດໃນພາກພື້ນ. ຖະແຫຼງການຢືນຢັນວ່າ, ຄຳຕັດສິນແມ່ນຂີດໝາຍສຳຄັນເພື່ອແກ້ໄຂບັນດາການຂັດແຍ້ງກັນຢູ່ທະເລຕາເວັນອອກໂດຍສັນຕິວິທີ. ຖະແຫຼງການກໍ່ກະຕຸກຊຸກຍູ້ລັດຖະບານຈີນ ຈົ່ງເຄົາລົບຄຳຕັດສິນ, ພ້ອມທັງຊີ້ແຈ້ງວ່າ, ຖ້າຫາກບໍ່ວ່າປະເທດໃດໆບໍ່ເຄົາລົບກົດໝາຍສາກົນ ແລະ ມີການກະທຳພຽງລຳພັງຝ່າຍດຽວ, ເມີນເສີຍຕໍ່ເຖິງພາລະກິດຄວາມເປັນທຳຂອງບັນດາປະເທດບ້ານໃກ້ເຮືອນຄຽງ, ປະເທດນັ້ນຈະສ້າງຄວາມວຸ້ນວາຍ ແລະ ນາບຂູ່ເຖິງສັນຕິພາບ ບໍ່ພຽງແຕ່ຢູ່ພາກພື້ນອາຊີເທົ່ານັ້ນ ຫາກຍັງຢູ່ທົ່ວໂລກອີກດ້ວຍ.
ໃນເຫດການທີ່ກ່ຽວຂ້ອງ, ວັນທີ 21/07, ທ່ານລັດຖະມົນຕີການຕ່າງປະເທດ ການາດາ Stephane Dion ໄດ້ອອກຖະແຫຼງການເນັ້ນໜັກເຖິງຄຳຕັດສິນຂອງ PCA ກ່ຽວກັບທະເລຕາເວັນອອກມີລັກສະນະບັງຄັບໃຫ້ຝ່າຍຕ່າງໆ. ຖະແຫຼງການໄດ້ຮຽກຮ້ອງບັນດາຝ່າຍເຄົາລົບຄຳຕັດສິນ, ລະງັບບັນດາການກະທທີ່ຳເຮັດໃຫ້ເພີ່ມຄວາມເຄັ່ງຕຶງຂຶ້ນຕື່ມ, ປະຕິບັດຖະແຫຼງການວ່າດ້ວຍການປະພຶດຂອງບັນດາຝ່າຍຢູ່ທະເລຕາເວັນອອກ (DOC) ຢ່າງຄົບຖ້ວນ ແລະ ມີປະສິດທິຜົນ, ພ້ອມທັງບັນລຸກົດແຫ່ງການປະພຶດຂອງບັນດາຝ່າຍຢູ່ທະເລຕາເວັນອອກ (COC) ທີ່ມີລັກສະນະບັງຄັບໂດຍໄວ.