(vovworld) - ໃນລະຫວ່າງວັນທີ 08 – 12/06, ຢູ່ສຳນັກງານສະຫະປະຊາຊາດ, ທີ່ນິວຢອກ, ປະເທດອາເມລິກາ ໄດ້ດຳເນີນກອງປະຊຸມຄັ້ງທີ 25 ບັນດາປະເທດສະມາຊິກສົນທິສັນຍາສະຫະປະຊາຊາດກ່ຽວກັບກົດໝາຍວ່າດ້ວຍທະເລ (UNCLOS) ປີ 1982, ດ້ວຍການເຂົ້າຮ່ວມຂອງ 136/167 ປະເທດສະມາຊິກ, ບັນດາອົງການຈັດຕັ້ງສາກົນ ແລະ ບັນດາປະເທດສັງເກດການ. ກອງປະຊຸມໄດ້ພິຈາລະນາ, ຮັບຮອງເອົາບົດລາຍງານກ່ຽວກັບການເຄື່ອນໄຫວໃນປີ 2014 ຂອງສານສາກົນກ່ຽວກັບກົດໝາຍວ່າດ້ວຍທະເລ, ອົງການສິດອຳນາດພື້ນມະຫາສະມຸດ ແລະ ກຳມະການຊາຍແດນຢູ່ເຂດນອກໄຫຼ່ທະວີບ.
ກ່າວຄຳເຫັນທີ່ກອງປະຊຸມ, ທ່ານນາງເອກອັກຄະລັດຖະທູດຫວຽດນາມ ຫງວຽນເຟືອງງາ, ຫົວໜ້າຄະນະຜູ້ຕາງໜ້າຂອງຫວຽດນາມ ຢູ່ສະຫະປະຊາຊາດ, ຫົວໜ້າຄະນະຫວຽດນາມ ເຂົ້າຮ່ວມກອງປະຊຸມ ໄດ້ເນັ້ນໜັກວ່າ, ທະເລຕາເວັນອອກແມ່ນເຂດມີຊັບພະຍາກອນສິ່ງແວດລ້ອມຫຼາຍຢ່າງ ແລະ ມີເສັ້ນທາງເດີນທະເລໃຫຍ່ທີ 2 ໃນໂລກ, ຄວນໄດ້ຮັບການປົກປັກຮັກສາ ແລະ ໄດ້ນຳໃຊ້ແບບຍືນຍົງ. ທ່ານນາງເອກອັກຄະລັດຖະທູດຊີ້ແຈ້ງວ່າ, ຫວຽດນາມ ມີຄວາມວິຕົກກັງວົງກ່ຽວກັບບັນດາການຜັນແປທີ່ສັບສົນຢູ່ທະເລຕາເວັນອອກໃນປະຈຸບັນ, ພິເສດແມ່ນການເຄື່ອນໄຫວກໍ່ສ້າງໄດ້ເຮັດໃຫ້ປ່ຽນແປງສະພາບເດີມທຳມະຊາດຢູ່ທະເລຕາເວັນອອກ, ທຳລາຍສິ່ງແວດລ້ອມ ແລະ ລະບົບຊີວະນາໆພັນຢູ່ທະເລ, ສົ່ງຜົນທະທ້ອນຢ່າງຮ້າຍແຮງເຖິງສັນຕິພາບ, ສະຖຽນລະພາບ ແລະ ຄວາມສະຫງົບປອດໄພໃນພາກພື້ນ, ກໍ່ຄວາມວິຕົກກັງວົນທີ່ໃຫຍ່ຫຼວງໃນບັນດາປະເທດອາຊຽນ ກໍຄືປະເທດຕ່າງໆຢູ່ພາຍໃນ ແລະ ນອກພາກພື້ນ. ທ່ານນາງ ຫງວຽນເຟືອງງາ ເນັ້ນໜັກວ່າ, ຕ້ອງຢຸດຕິບັນດາການກະທຳເຮັດໃຫ້ປ່ຽນແປງສະພາບເດີມ, ທຳລາຍສິ່ງແວດລ້ອມທະເລ ແລະ ເຮັດໃຫ້ສະພາບຂັດແຍ້ງຢູ່ທະເລຕາເວັນອອກສັບສົນຂຶ້ນຕື່ມ.
ທ່ານນາງ ຫງວຽນເຟືອງງາ ຢັ້ງຢືນຫຼັກໝັ້ນຂອງຫວຽດນາມ ທີ່ວ່າ ບັນດາການຂັດແຍ້ງຢູ່ທະເລຕາເວັນອອກ ຕ້ອງໄດ້ຮັບການແກ້ໄຂໂດຍສັນຕິວິທີ, ເໝາະສົມກັບກົດໝາຍສາກົນ, ໃນນັ້ນມີ UNCLOS…