រោងចក្រថាមពលនុយក្លេអ៊ែរ Zaporizhzhia ភាគខាងត្បូងអ៊ុយក្រែន។ រូបថត៖ Reuters

យោងតាមសេចក្តីប្រកាសព័ត៌មានរបស់រដ្ឋាភិបាលអង់គ្លេស និងរដ្ឋាភិបាលអាល្លឺម៉ង់ ក្រៅពីខ្លឹមសារដែលសង្កត់ធ្ងន់លើសារៈសំខាន់នៃការធានាសុវត្ថិភាព និងសន្តិសុខសម្រាប់រោងចក្រនុយក្លេអ៊ែរនៅអ៊ុយក្រែននោះ នាយករដ្ឋមន្ត្រីអង់គ្លេសលោក Boris Johnson ប្រធានាធិបតីអាមេរិក លោក Joe Biden ប្រធានាធិបតីបារាំងលោក Emmanuel Macron និងអធិការបតីអាល្លឺម៉ង់លោក Olaf Scholz ក៏បានអំពាវនាវឲ្យអ្នកឃ្លាំមើលឯករាជ្យមកពីទីភ្នាក់ងារថាមពលបរមាណូអន្តរជាតិ (IAEA) ធ្វើដំណើរទស្សនកិច្ចរយៈពេលខ្លីទៅកាន់រោងចក្រថាមពលនុយក្លេអ៊ែរ Zaporizhzhia ដែលជារោងចក្រថាមពលនុយក្លេអ៊ែរដ៏ធំបំផុតនៅអឺរ៉ុប។ រោងចក្រនេះស្ថិតនៅក្រោមការគ្រប់គ្រងរបស់កងកម្លាំងរុស្ស៊ីតាំងពីខែមីនាឆ្នាំ២០២២។ នាប៉ុន្មានថ្ងៃថ្មីៗនេះ តំបន់នៅជុំវិញរងចក្រទទួលរងការវាយប្រហារយោធាជាច្រើនលើក។ បច្ចុប្បន្ននេះ រុស្ស៊ី និងអ៊ុយក្រែនកំពុងចោទប្រកាន់គ្នាទៅវិញទៅមកពីការបាញ់ផ្លោងលើរោងចក្រ Zaporizhzhia៕