កាសែតគុយវ៉ែតបានរាយការណ៍អំពីមហាសន្និបាតលើកទី ១៣ របស់បក្សកុម្មុយនិស្តវៀតណាម (រូបថត៖ TTXVN)

ទំព័រកាសែត Times of India របស់ឥណ្ឌា នៅថ្ងៃទី ២៦ ខែមករា បានរាយការណ៍អំពីមហាសន្និបាតលើកទី ១៣ របស់បក្សកុម្មុយនិស្តវៀតណាម ដែលបានប្រព្រឹត្តទៅចាប់ពីថ្ងៃទី ២៥ ខែមករាដល់ថ្ងៃទី ២ ខែកុម្ភៈ ក្នុងនោះផ្តោតការយកចិត្តទុកដាក់ពិសេសទៅលើសន្ទរកថារបស់លោកនាយករដ្ឋមន្រ្តី Nguyen Xuan Phuc នៅក្នុងសម័យបើកមហាសន្និបាត។ កាសែតនេះបានបញ្ជាក់ថា មហាសន្និបាតលើកទី ១៣  របស់បក្សកុម្មុយនិស្តវៀតណាមបានប្រារព្ធឡើងនៅពេលដែលតំបន់និងអន្តរជាតិមានការវិវឌ្ឍន៍យ៉ាងស្មុគស្មាញជាច្រើន រួមជាមួយបញ្ហាប្រឈមជាសកល ដូចជាការប្រែប្រួលអាកាសធាតុ គ្រោះមហន្តរាយធម្មជាតិនិងជំងឺរាតត្បាត។

ទំព័រកាសែត Times of India បានគូសបញ្ជាក់អំពីវឌ្ឍនភាពសេដ្ឋកិច្ចគួរឱ្យកត់សម្គាល់ក្នុងរយៈពេល ១៥ ឆ្នាំកន្លងមក ហើយវៀតណាមត្រូវបានគេចាត់ទុកថាជាទិសដៅវិនិយោគនិងជាមជ្ឈមណ្ឌលផលិតកម្មក្នុងទសវត្សខាងមុខ។ Times of India សន្និដ្ឋានថា៖ នេះជាមូលហេតុដែលសហគមន៍អន្តរជាតិត្រូវការគាំទ្រវៀតណាមនាពេលបច្ចុប្បន្ន ខណៈដែលប្រទេសនេះ កំពុងស្វែងរកទិសដៅគោលនយោបាយក្នុងរយៈពេល ២៥ ឆ្នាំខាងមុខ។

កាសែត Times Kuwait  (Timeskuwait.com) នៅថ្ងៃទី ២៧ ខែមករា បានចុះផ្សាយអត្ថបទមួយស្តីពីវៀតណាមរៀបចំមហាសន្និបាតបក្សកុម្មុយនីស្តវៀតណាម។ អត្ថបទក៏បានបញ្ជាក់ថា មហាសន្និបាតបក្សលើកទី ១៣ គឺជាព្រឹត្តិការណ៍នយោបាយសំខាន់បំផុតមួយរបស់វៀតណាមក្នុងឆ្នាំ ២០២១។ ជាមួយលទ្ធផលនិងសមិទ្ធិផលដែលសម្រេចបាននៅឆ្នាំ ២០២០ ជាពិសេសក្នុងរយៈពេល ៥ ឆ្នាំកន្លងមក វៀតណាមបានគូសសញ្ញាសម្គាល់តាមរយៈជោគជ័យលេចធ្លោ ថ្វីត្បិតតែស្ថិតក្នុងស្ថានភាពលំបាកក៏ដោយ។ កាសែត The Times Kuwait បានអះអាងថា សម្លេងរបស់វៀតណាមកំពុងកើនឡើងកាន់តែខ្លាំងឡើងៗ ដែលត្រូវបានបញ្ជាក់នៅក្នុងបញ្ហាតំបន់និងអន្តរជាតិក៏ដូចជាសមត្ថភាពដឹកនាំនៅឯបណ្តាកិច្ចប្រជុំ វេទិកា អង្គការក្នុងតំបន់និងអន្តរជាតិ៕