អនុរដ្ឋមន្ត្រីលោក Ta Quang Dong អញ្ជើញប្រគល់ប័ណ្ណសរសើរពីរដ្ឋមន្ត្រីក្រសួងវប្បធម៌ កីឡា និងទេសចរណ៍ ជូនស្ថានទូតវៀតណាមប្រចាំនៅកម្ពុជា ព្រមទាំងមេដាយ “ដើម្បីបុព្វហេតុវប្បធម៌ កីឡា និងទេសចរណ៍” ជូនលោកឯកអគ្គរដ្ឋទូត Nguyen Huy Tang (រូបថត៖ VOV) |
ក្នុងក្របខ័ណ្ឌនៃ “សប្តាហ៍វប្បធម៌វៀតណាមនៅកម្ពុជា” ឆ្នាំ ២០២៤ នារសៀលថ្ងៃទី ២២ ឧសភា អនុរដ្ឋមន្ត្រីក្រសួងវប្បធម៌ កីឡា និងទេសចរណ៍ វៀតណាមលោក Ta Quang Dong បានអញ្ជើញប្រគល់ជូនប័ណ្ណសរសើរ និងមេដាយអនុស្សាវរីយ៍របស់ក្រសួងដល់សមូហភាព និងកម្មាភិបាលនៃស្ថានទូតវៀតណាមប្រចាំនៅកម្ពុជា ដែលមានស្នាដៃឆ្នើមក្នុងការលើកកម្ពស់កិច្ចសហប្រតិបត្តិការវប្បធម៌ កីឡា និងទេសចរណ៍រវាងប្រទេសទាំងពីរវៀតណាម-កម្ពុជានាពេលថ្មីៗនេះ។
វាយតម្លៃខ្ពស់ចំពោះតួនាទី និងការរួមចំណែករបស់ស្ថានទូតវៀតណាមប្រចាំនៅកម្ពុជាក្នុងការជំរុញការផ្លាស់ប្តូរវប្បធម៌ និងប្រជាជនរវាងប្រទេសទាំងពីរ អនុរដ្ឋមន្ត្រី លោក Ta Quang Dong បានសង្កត់ធ្ងន់ថា កិច្ចសហប្រតិបត្តិការលើវិស័យវប្បធម៌ កីឡា និងទេសចរណ៍បន្តជាអាទិភាពក្នុងទិសដៅសហប្រតិបត្តិការនាពេលខាងមុខ រវាងប្រទេសវៀតណាម និងកម្ពុជា។ ជាពិសេស ការតភ្ជាប់វិស័យទេសចរណ៍ និងគោលដៅទេសចរណ៍លេចធ្លោនៃប្រទេសទាំងពីរ ក្នុងស្មារតី “ដំណើរមួយ ទីមកដល់ពីរ” ដែលត្រូវបានថ្នាក់ដឹកនាំជាន់ខ្ពស់នៃភាគីទាំងពីរបានឯកភាពគ្នានោះគឺចាំបាច់ត្រូវជំរុញនាពេលខាងមុខ៖”យើងព្យាយាមភ្ជាប់ជើងហោះហើរ Van Don ជាមួយខេត្តសៀមរាប ដើម្បីតភ្ជាប់តំបន់បេតិកភណ្ឌពិភពលោកទាំងពីរជាមួយគ្នា ដើម្បីឱ្យភ្ញៀវទេសចរណ៍ដែលមកគោលដៅតែមួយអាចទៅទស្សនាគោលដៅទាំងពីរបាន។ ខាងមិត្តកម្ពុជាក៏ចង់ដាក់ពង្រាយផ្លូវ Phu Quoc-Siem Reap ដែរ។ ទីតាំងពីរនេះក៏ជាកន្លែងអាចជំរុញការផ្លាស់ប្តូរទេសចរណ៍រវាងភាគីទាំងពីរ។ ខ្ញុំសង្ឃឹមថា យើងអាចធ្វើកិច្ចការទាំងនេះបានល្អ ដើម្បីឲ្យវិស័យទេសចរណ៍រវាងប្រទេសទាំងពីរមានការអភិវឌ្ឍកាន់តែខ្លាំងខ្លា”។
សប្តាហ៍វប្បធម៌វៀតណាមនៅកម្ពុជាឆ្នាំ ២០២៤ ប្រព្រឹត្តិទៅចាប់ពីថ្ងៃទី ២០ ដល់ថ្ងៃទី ២៥ ឧសភា ដោយមានការសម្តែងសិល្បៈវៀតណាមដែលធ្វើឡើងនៅរាជធានីភ្នំពេញ និងខេត្តបន្ទាយមានជ័យ ភាគពាយព្យនៃប្រទេសកម្ពុជា៕