ທ່ານ ຮອງນາຍົກລັດຖະມົນຕີຫງວຽນຊວນຟຸ໋ກ ຕ້ອນຮັບ ທ່ານລັດຖະມົນຕີ
ກະຊວງແຜນການ ແລະ ການລົງທຶນ ລາວ ສົມດີ ດວງດີ
(ພາບ: phuonghoa/TTXVN)
(vovworld) – ຕອນບ່າຍວັນທີ 10/9, ທີ່ການຕ້ອນຮັບຄະນະຜູ້ແທນກະຊວງແຜນການ ແລະ ການລົງທຶນແຫ່ງ ສປປ ລາວ ໂດຍທ່ານລັດຖະມົນຕີ ສົມດີ ດວງດີ ນຳໜ້າ ພວມຢ້ຽມຢາມ ແລະ ເຮັດວຽກຢູ່ ຫວຽດນາມ, ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ຕີລາຄາສູງໝາກຜົນການເຮັດວຽກລະຫວ່າງກະຊວງແຜນການ ແລະ ການລົງທຶນ 2 ປະເທດ, ພິເສດແມ່ນການແລກປ່ຽນບົດຮຽນກ່ຽວກັບການດຶງດູດ, ຄຸ້ມຄອງແຫຼ່ງທຶນໜູນຊ່ວຍພັດທະນາທາງການ (ODA) ແລະ ບັນຫາປະສານສົມທົບຍຸດທະສາດພັດທະນາເສດຖະກິດ - ສັງຄົມ ເພື່ອແນໃສ່ຊຸກຍູ້ການພັດທະນາເສດຖະກິດຕາມທິດໝັ້ນຄົງໃນເງື່ອນໄຂພິເສດສະເພາະຂອງແຕ່ລະປະເທດ. ທ່ານຮອງນາຍົກລັດຖະມົນຕີ ຫງວຽນຊວນຟຸ໋ກ ປາດຖະໜາວ່າ: ໃນໄລຍະຈະມາເຖິງ, 2 ຝ່າຍສືບຕໍ່ຮ່ວມມືຢ່າງແໜ້ນແຟ້ນກ່ວາອີກ ເພື່ອນຳໃຊ້ແຫຼ່ງທຶນ ODA ບັນລຸໄດ້ປະສິດທິຜົນສູງ, ປະກອບສ່ວນຊຸກຍູ້ການພັດທະນາເສດຖະກິດ - ສັງຄົມ.
ສ່ວນທ່ານລັດຖະມົນຕີກະຊວງແຜນການ ແລະ ການລົງທຶນ ສົມດີ ດວງດີ ຢືນຢັນວ່າ: ໃນໄລຍະຜ່ານມາ, ກະຊວງແຜນການ ແລະ ການລົງທຶນ 2 ປະເທດມີບັນດາການເຄື່ອນໄຫວຊຸກຍູ້, ເພີ່ມທະວີການຮ່ວມມືເປັນປະຈຳ, ຮອບດ້ານ, ມີປະສິດທິຜົນໃນຂົງເຂດນຳໃຊ້ແຫຼ່ງທຶນຊ່ວຍເຫຼືອຂອງລັດຖະບານ ຫວຽດນາມ ທີ່ສະຫງວນໃຫ້ລັດຖະບານ ລາວ ໃນແຕ່ລະປີ ແລະ ບັນດາໂຄງການການລົງທຶນໂດຍກົງຂອງ ຫວຽດນາມ ເຂົ້າ ລາວ.