(vovworld)- ວິກິດການເສດຖະກິດທົ່ວໂລກໄດ້ກໍ່ໃຫ້ເກີດສິ່ງທ້າທາຍຫລາຍຢ່າງຊຶ່ງວິສາຫະກິດ ຫວຽດນາມ ພວມຕ້ອງປະເຊີນຫນ້າ. ແຕ່ເຖິງຢ່າງໃດກໍຕາມ, ນີ້ກໍໄດ້ຮັບຖືວ່າ: ແມ່ນກາລະໂອກາດເພື່ອໃຫ້ວິສາຫະກິດ ຫວຽດນາມ ຕີລາຄາຕົວເອງ ແລະ ປັບປຸງບໍລິສັດຜ່ານວິກິດການສ້າງໂຄງປະກອບວິສາຫະກິດຄືນໃຫມ່.
ຕາມການຄາດຄະເນຂອງອົງການສາກົນຫລາຍແຫ່ງກໍຄືບັນດາຜູ້ຊ່ຽວຊານເສດຖະກິດກ່ຽວກັບສະພາບການດຳເນີນທຸລະກິດຂອງວິສາຫະກິດໃນຊຸມເດືອນທ້າຍປີ 2012 ແລະ ປີ 2013 ແມ່ນເຕີບໂຕຢ່າງຊັກຊ້າ, ສະພາບເສດຖະກິດ ຫວຽດນາມ ກໍຄືໂລກຍັງຄົງຜັນແປໄປບໍ່ສະດວກ. ປະຈຸບັນ, ຢູ່ ຫວຽດນາມ ມີຈຳນວນວິສາຫະກິດປະກາດລົ້ມລະລາຍ ຫລື ຢຸດຕິການເຄື່ອນໄຫວດຳເນີນທຸລະກິດແມ່ນເພີ່ມຂຶ້ນຢ່າງແຮງ, ສະເພາະ ຮອດທ້າຍເດືອນ 7/2012 ມີ ວິສາຫະກິດ 30.000 ແຫ່ງຕົກເຂົ້າສູ່ສະພາບຄືດັ່ງກ່າວ. ເພາະສະນັ້ນ ຕາມບັນດາຊ່ຽວຊານເສດຖະກິດແລ້ວ, ວິສາຫະກິດ ຫວຽດນາມ ຄວນຍູ້ແຮງວິວັດການສ້າງໂຄງປະກອບພື້ນຖານເສດຖະກິດຄືນໃຫມ່ ເພາະວ່າ ວິສາຫະກິດແຫ່ງໃດຜ່ານຜ່າໄດ້ ຈະມີກາລະໂອກາດເພື່ອພັດທະນາ. ທ່ານ Pham Ngoc Hung ຮອງປະທານສະຫະສະມາຄົມວິສາຫະກິດ ນະຄອນ ໂຮ່ຈິມິນ ຖືວ່າ:
“ໃນໄລຍະວິກິດການນີ້ ຄວນກຳນົດທິດໃຫ້ແກ່ວິສາຫະກິດຊອກຫາເສັ້ນທາງເດີນແກ່ຕົນເອງ. ເພາະວ່າ ວິກິດການທັງແມ່ນປັດໄຈອັນຕະລາຍ ແຕ່ກໍມີກາລະໂອກາດ. ສະນັ້ນ, ຄວນຊອກຫາບັນດາປັດໄຈກາລະໂອກາດໃນວິກິດການເພື່ອສ້າງຍຸດທະສາດໃຫ້ແກ່ບັນດາບໍລິສັດແມ່ນສິ່ງສຳຄັນຍິ່ງ.”
ພາບປະກອບ:tinmoi.com
|
ຕາມບັນດາຜູ້ຊ່ຽວຊານເສດຖະກິດແລ້ວ, ເລື່ອງສ້າງໂຄງປະກອບ ວິສາຫະກິດຄືນໃຫມ່ຕ້ອງມີວິວັດທະນາການ. ໃນນັ້ນ, ກ່ອນອື່ນໝົດຄວນຜ່ານຜ່າປັດໃຈອ່ອນດອ້ຍໃນການຄັດເລືອກ ແລະ ກໍ່ສ້າງ, ບຳລຸງຊັບພະຍາກອນມະນຸດ, ຫລີກລ້ຽງການເຮັດແບບເປັນຮູບການ, ເຮັດໃຫ້ກົງຈັກກະທັດລັດ. ນອກນັ້ນ ເພື່ອສ້າງໂຄງປະກອບວິສາຫະກິດຄືນໃຫມ່ຄວນສ້າງຍຸດທະສາດ ແລະ ຄຸ້ມຄອງຍຸດທະສາດໃຫ້ເປັນຢ່າງດີ. ເຖິງຢ່າງໃດກໍຕາມ, ຄວາມກົດດັນໃຫຍ່ສຸດຕໍ່ການສ້າງໂຄງປະກອບວິສາຫະກິດປະຈຸບັນແມ່ນສະພາບເສດຖະກິດຊຸດໂຊມ ແລະ ວິກິດການການເງິນ, ເຮັດໃຫ້ວິສາຫະກິດຕ້ອງປະເຊີນຫນ້າກັບຄວາມຕ້ອງການໃຊ້ສອຍຖືກຊຸດໂຊມຢ່າງແຮງ. ເລື່ອງກຳນົດຍຸດທະສາດເຄື່ອນໄຫວບໍ່ພຽງແຕ່ແມ່ນຈຸດເລີ່ມຕົ້ນເທົ່ານັ້ນ ຫາກຍັງແມ່ນຈຸດຕົ້ນຕໍຂອງວິວັດທະນາການສ້າງໂຄງປະກອບວິສາຫະກິດຄືນໃຫມ່ອີກດ້ວຍ. ເມື່ອແບ່ງປັນບົດຮຽນໃນການສ້າງໂຄງປະກອບວິສາຫະກິດຄືນໃຫມ່ຈາກບັນດາປະເທດໃນໂລກ, ສາສະດາຈານ Douglas Coulter ສັງກັດມະຫາວິທະຍາໄລ Harvard ແຫ່ງສະຫະລັດອາເມລິກາ ໃຫ້ຮູ້ວ່າ: ແຜນການ ສ້າງໂຄງປະກອບວິສາຫະກິດຄືນໃຫມ່ ຕ້ອງແມ່ນການປະຕິຮູບວິສາຫະກິດຮອບດ້ານຈາກຂັ້ນຕອນ, ເຕັກໂນໂລຊີ, ການເງິນ ແລະ ບຸກຄະລາກອນ.
“ຕາມຂ້າພະເຈົ້າແລ້ວ, ມີ 6 ບາດກ້າວກຳນົດທິດ ສ້າງໂຄງປະກອບວິສາຫະກິດຄືນໃຫມ່, ນັ້ນແມ່ນ: ຕ້ອງມີການຕົກລົງສ້າງໂຄງປະກອບວິສາຫະກິດຄືນໃຫມ່, ທີສອງ ກຳນົດເປົ້າໝາຍຄວນສ້າງໂຄງປະກອບວິສາຫະກິດຄືນໃຫມ່, ທີສາມ ສ້າງ ໂຄງປະກອບສັງລວມອີງໃສ່ບັນດາຄຸນຄ່າແຫລ່ງກຳລັງ; ທີ 4, ກຳນົດລະດັບສິດອຳນາດຂອງຜູ້ອອກຂໍ້ຕົກລົງ. ທີ 5, ດັດປັບບັນດາພາກສ່ວນໃນໂຄງຮ່າງການຈັດຕັ້ງທີ່ມີສ່ວນກ່ຽວຂ້ອງເຖິງເລື່ອງອອກຂໍ້ຕົກລົງຢ່າງເໝາະສົມ. ສຸດທ້າຍແມ່ນຫນູນຊ່ວຍການຄຸ້ມຄອງ, ເສີມຂະຫຍາຍຄວາມຊຳນານງານ ແລະ ການກະທຳທີ່ຈຳເປັນເພື່ອວາງອອກ ແລະ ປະຕິບັດຂໍ້ຕົກລົງຢ່າງວອ່ງໄວ, ຖືກຕ້ອງ.”
ປະຈຸບັນ, ມີວິສາຫະກິດຫລາຍແຫ່ງຊອກຫາບັນດາມາດຕະການກູ້ຢືມທຶນໃນໄລຍະສັ້ນເພື່ອແກ້ໄຂຄວາມຫຍຸ້ງຍາກດ້ານທຶນຮອນໃນໄລຍະຕົ້ນ ແຕ່ບໍ່ຄິດໄລ່ໄດ້ບັນດາແຜນການສຳລັບໄລຍະກາງ ແລະ ຍາວ. ຕາມການສະຖິຕິຂອງສະຫະສະມາຄົມວິສາຫະກິດຂະຫນາດກາງ ແລະ ນ້ອຍແລ້ວ, ປະຈຸບັນ ທັງປະເທດມີ 75% ຈຳນວນວິສາຫະກິດຂະຫນາດກາງ ແລະ ນ້ອຍ ພວມຕົກເຂົ້າສູ່ສະພາບການດັ່ງກ່າວ. ລັດຖະບານ ຫວຽດນາມ ພວມຊີ້ນຳບັນດາທະນາຄານການຄ້າ ສ້າງກົນໄກສະດວກກວ່າເພື່ອໃຫ້ວິສາຫະກິດສາມາດໄດ້ກູ້ຢືມທຶນເພື່ອສ້າງໂຄງປະກອບວິສາຫະກິດຄືນໃຫມ່ຢ່າງງ່າຍດາຍກວ່າ. ທ່ານ Pham Hong Hai ຮອງຜູ້ອຳນວຍການໃຫຍ່ທະນາຄານ ຮົ່າກົງ ແລະ ຊຽງໄຮ່ ປະເທດຈີນ ປະຈຳ ຫວຽດນາມ ຖືວ່າ: ເພື່ອກູ້ຢືມທຶນຢ່າງງ່າຍດາຍກວ່າ, ບັນດາວິສາຫະກິດຄວນມີການຮັບປະກັນກ່ຽວກັບແຜນການດຳເນີນທຸລະກິດພ້ອມກັບການພິສູດຄວາມຈະແຈ້ງດ້ານການເງິນ.
“ສຳລັບວິສາຫະກິດ ນີ້ແມ່ນກາລະໂອກາດດີເພື່ອປະຕິຮູບຕົນເອງ, ບໍ່ອາດລໍຖ້າການຊ່ວຍເຫຼືອຈາກລັດຖະບານ. ສະພາບປະຈຸບັນ ມີວິສາຫະກິດຫລາຍແຫ່ງຍັງຕິດຫນິ້ທະນາຄານ ແລະ ວິສາຫະກິດຄວນພິຈາລະນາບ້ວງຫນິ້ດັ່ງກ່າວມີຄວາມຈຳເປັນຢ່າງແທ້ຈິງຫລືບໍ່, ຄວນສຸມໃສ່ເຂົ້າໃນຂະແຫນງທີ່ຕົນເອງມີທ່າແຮງຫລືຍັງຄົງສືບຕໍ່ລົງທຶນແບບກະຈັດກະຈາຍ, ສືບຕໍ່ລົງທຶນເຂົ້າຂົງເຂດອະສັງຫາລິມະຊັບ, ຫລັກຊັບນັ້ນບໍ່ແມ່ນຂະແຫນງຕົ້ນຕໍ. ສ່ວນທະນາຄານເອງກໍຢາກຫນູນຊ່ວຍບັນດາວິສາຫະກິດເພື່ອພ້ອມກັນຜ່ານຜ່າຄວາມຫຍຸ້ງຍາກປະຈຸບັນ ແຕ່ທະນາຄານກໍມີຄວາມມຸ່ງຫວັງຈາກ ວິສາຫະກິດນັ້ນແມ່ນຄວາມກະຈ່າງແຈ້ງດ້ານການເງິນ.”
ສ້າງໂຄງປະກອບວິສາຫະກິດຄືນໃຫມ່ແມ່ນວິວັດການທີ່ຈຳເປັນ
ສຳລັບວິສາຫະກິດປະຈຸບັນ
ພາບ: internet
|
ສ້າງໂຄງປະກອບວິສາຫະກິດຄືນໃຫມ່ແມ່ນວິວັດການທີ່ຈຳເປັນສຳລັບວິສາຫະກິດ ເຖິງຢ່າງໃດກໍຕາມ ຈະບໍ່ມີຮູບການລວມໃດທີ່ມີຕໍ່ວິສາຫະກິດທັງໝົດ. ອີງໃສ່ຮູບແບບການຜະລິດ, ປະເພດສິນຄ້າ, ສະພາບແວດລ້ອມແຫ່ງການດຳເນີນທຸລະກິດ ກໍຄືລັກສະນະພິເສດຊຶ່ງວິສາຫະກິດຈະເຫັນໄດ້ພາກສ່ວນໃດຄວນ ສ້າງໂຄງປະກອບວິສາຫະກິດຄືນໃຫມ່ ແລະ ຈຸດໝາຍຕ້ອງປ່ຽນໃຫມ່. ນັ້ນອາດຈະແມ່ນບັນຫາກ່ຽວຂ້ອງເຖິງດ້ານການເງິນ, ຫລືບຸກຄະລາກອນ, ໂຄງຮ່າງການຈັດຕັ້ງ. ຖ້າຫາກເຫັນໄດ້ສະພາບຕົວຈິງເພື່ອກຳນົດທິດຍາວນານ ຈະຊ່ວຍວິສາຫະກິດຄົງຕົວ ແລະ ພັດທະນາໄດ້.