 ຮ້ານວາງສະແດງ ຂາຍສິນຄ້າ ຫວຽດນາມ ໄດ້ດຶງດູດຜູ້ບໍລິໂພກ ຝລັ່ງ ເປັນຈຳນວນຫລວງຫລາຍ. ພາບ:Anh Tuấn/VOV-Paris |
ຢູ່ “ສັດປະດາ ສິນຄ້າ ຫວຽດນາມ” ໂດຍຫ້ອງການການຄ້າ, ກຸ່ມບໍລິສັດ Carrefour ແລະ ບໍລິສັດ T&T food ສົມທົບກັນຈັດຕັ້ງຢູ່ ຝລັ່ງ ຫວ່າງແລ້ວນີ້, ມີສິນຄ້ານັບຮ້ອຍປະເພດຂອງວິສາຫະກິດ ຫວຽດນາມ ກວ່າ 10 ແຫ່ງທີ່ເຂົ້າຮ່ວມນັ້ນ ໄດ້ນຳມາເຊິ່ງຄວາມສົນໃຈ ແລະ ນິຍົມຊົມຊອບຂອງຜູ້ບໍລິໂພກ ຝລັ່ງ. ພິເສດ ແມ່ນບັນດາຜະລິດຕະພັນໝາກໄມ້, ຜະລິດຕະພັນກະເສດທີ່ພົ້ນເດັ່ນຂອງ ຫວຽດນາມ ຄື: ໝາກມັງກອນ, ໝາກມ່ວງ, ສົ້ມໂອ, ພິກໄທ, ກາເຟ… ເອື້ອຍ Coralie Bellérophon, ລູກຄ້າຊາວ ຝລັ່ງ ແບ່ງປັນວ່າ:
“ຮ້ານວາງຂາຍສິນຄ້າຂອງຫວຽດນາມ ຢູ່ທີ່ນີ້ແມ່ນມີຫລາຍແບບໃຫ້ເລືອກ. ດ້ວຍບັນດາຜະລິດຕະພັນ: ເຂົ້າປຸ້ນ, ເຫັດ, ເຄື່ອງເທດ... ໄດ້ຊ່ວຍໃຫ້ບັນດາແມ່ຄົວສາມາດປຸງແຕ່ງໄດ້ຫລາຍເຍື່ອງອາຫານທີ່ມີລົດຊາດ ຫວຽດນາມ ດ້ວຍວັດຖຸດິບທີ່ເປັນເອກະລັກສະເພາະ”.
“ສັບປະດາສິນຄ້າ ຫວຽດນາມ” ບໍ່ພຽງແຕ່ແມ່ນໂອກາດເພື່ອແນະນຳ ແລະ ໂຄສະນາບັນດາຜະລິດຕະພັນ ຫວຽດນາມ ຢູ່ ຕະຫລາດ ຝລັ່ງ ເວົ້າສະເພາະ, ເອີລົບ ເວົ້າລວມ ຫາກຍັງແມ່ນໂອກາດເພື່ອເປີດກວ້າງ ແລະ ແຊກຊຶມເຂົ້າບັນດາຕະຫລາດອື່ນອີກດ້ວຍ. ອ້າຍ Triki Ilyes, ມາຈາກ Tunissi ແລະ ແມ່ນຜູ້ມາງານຕະຫລາດນັດໃຫ້ຮູ້ວ່າ:
“ຂ້າພະເຈົ້າ ຫາກໍ່ຊິມໝາກໄມ້ອົບແຫ້ງຂອງ ຫວຽດນາມ, ຮູ້ສຶກວ່າແຊບຫລາຍ, ບໍ່ຫວານປານໃດ ແລະ ຍັງຄົງຮັກສາໄດ້ກິ່ນຫອມທີ່ເປັນທຳມະຊາດຂອງໝາກໄມ້. ຂ້າພະເຈົ້າ ມັກຫລາຍ ແລະ ຫວັງວ່າ ບັນດາຜະລິດຕະພັນຄືແນວນີ້ ຈະບໍ່ພຽງແຕ່ໄດ້ນຳໄປຂາຍຢູ່ ເອີລົບ ເທົ່ານັ້ນ ຫາກທັງ ອາຟຼິກາ ອີກດ້ວຍ”.
ໄລຍະຜ່ານມາ, ເລື່ອງເພີ່ມທະວີບັນດາການເຄື່ອນໄຫວໂຄສະນາສິນຄ້າ ຫວຽດນາມ ຜ່ານເຫດການຕ່າງໆຄື “ສັບປະດາສິນຄ້າ ຫວຽດນາມ” ໄດ້ຊ່ວຍໃຫ້ຜູ້ບໍລິໂພກຢູ່ບັນດາປະເທດປະຈຳຖິ່ນ ມີກາລະໂອກາດໄດ້ສຳຜັດກັບບັນດາຜະລິດຕະພັນຂອງຫວຽດນາມ, ມີສິນຄ້າໃຫ້ເລືອກຕື່ມອີກ ແລະ ຊ່ວຍເຄື່ອງໝາຍການຄ້າ ຫວຽດນາມ ສ້າງໄດ້ຈຸດຢືນ. ທ່ານ ດິງຕວານທັງ, ເອກອັກຄະລັດຖະທູດ ຫວຽດນາມ ປະຈຳ ຝລັ່ງ ຢືນຢັນວ່າ:
“ຊຸມປີຜ່ານມາ, ບັນດາວິສາຫະກິດ ຫວຽດນາມ ໄດ້ເຂົ້າຮ່ວມງານຕະຫລາດນັດເປັນຫລາຍຄັ້ງ. ຜ່ານນັ້ນ ພວກເຮົາກໍ່ສ້າງໄດ້ເຄື່ອງໝາຍການຄ້າ ຫວຽດນາມ ທີ່ມີຊື່ສຽງໃນບັນດາຄູ່ຮ່ວມມືສາກົນ, ຕະຫລາດ ຝລັ່ງ, ເອີລົບ ແລະ ບັນດາຕະຫລາດໃກ້ຄຽງ”.
 ບັນດາຜູ້ແທນຊິມຜະລິດຕະພັນໝາກພິກໄທຂອງຫວຽດນາມ.ພາບ: Anh Tuấn/VOV-Paris |
ເພື່ອແກ້ງແຍ່ງກັບບັນດາຜະລິດຕະພັນຢູ່ຕະຫລາດຕ່າງປະເທດ, ບັນດາວິສາຫະກິດ ຫວຽດນາມ ເອງ ຕ້ອງໄດ້ຍົກສູງຄຸນນະພາບຜະລິດຕະພັນຢ່າງບໍ່ຢຸດຢັ້ງ. ຍ້ອນເຫດນັ້ນ ມີລູກຄ້າຫລາຍຄົນ ແລະ ຄູ່ຮ່ວມມືຫລາຍອົງການ ມີຄວາມສົນໃຈ, ປາດຖະຫນາດຢາກຮ່ວມມືກັບຫວຽດນາມ. ທີ່ງານຕະຫລາດນັດສາກົນກ່ຽວກັບອາຫານເຄື່ອງດື່ມ Worldfood Moscow ທີ່ຈັດຂຶ້ນຫວ່າງແລ້ວນີ້, ທ່ານ ເຈືອງກວັກບ໋າວ ຜູ້ອຳນວຍການຝ່າຍ Marketting ກຸ່ມບໍລິສັດ TH ໃຫ້ຮູ້ວ່າ:
“ບັນດາລູກຄ້າແມ່ນຄູ່ຮ່ວມມື, ເຂົາເຈົ້າຢາກກາຍເປັນນັກສະຫນອງໃຫ້ແກ່ກຸ່ມບໍລິສັດ TH. ມີລູກຄ້າຈຳນວນຫນຶ່ງຢາກກາຍເປັນນັກຈຳຫນ່າຍໃຫ້ແກ່ກຸ່ມບໍລິສັດ TH. ເຂົາເຈົ້າມີຄວາມສົນໃຈເຖິງບັນດາຜະລິດຕະພັນທີ່ເປັນເອກະລັກສະເພາະຂອງກຸ່ມບໍລິສັດ ພິເສດແມ່ນບັນດາຜະລິດຕະພັນຊື່ງໄດ້ຮັບການຜະລິດຈາກສະໝູນໄພ ແລະ ບັນດາປະເພດຊາ ຂອງ ອາຊີ”.
ທ່ານ ຫງວຽນແມ້ງຮຸ່ງ, ຜູ້ອຳນວຍການໃຫຍ່ ກຸ່ມບໍລິສັດ NASFOODS ແບ່ງປັນວ່າ ແທນທີ່ນຳຜະລິດຕະພັນທີ່ຍັງບໍ່ທັນຜ່ານການປຸງແຕ່ງ, ປຸງແຕ່ງປະລິມານຕ່ຳມາໃນງານຕະຫລາດນັດຄືກ່ອນນີ້ ບັນດາວິສາຫະກິດ ຫວຽດນາມ ນັບມື້ນັບເອົາໃຈໃສ່ເຖິງຄຸນນະພາບຜະລິດຕະພັນຕະຫລອດຮອດຮູບແບບ ການຫຸ້ມຫໍ່ ການໂຄສະນາເຄື່ອງໝາຍການຄ້າ.
“ກ່ອນນີ້ ພວກຂ້າພະເຈົ້າເຂົ້າຮ່ວມສ່ວນຫລາຍແມ່ນສິນຄ້າ ແລະ ການບໍລິການສະຫນອງໃຫ້ແກ່ວິສາຫະກິດ ແຕ່ປະຈຸບັນ ແມ່ນສຸມໃສ່ບັນດາຜະລິດຕະພັນໃຊ້ສອຍ, ຜະລິດຕະພັນອົບແຫ້ງ, ຜະລິດຕະພັນຈາກເມັດ. ລັດເຊຍ ແມ່ນຕະຫລາດໃຫຍ່, ປີນີ້ NASFOODS ເລີ່ມຕົ້ນແຊກຊຶມເຂົ້າຕະຫລາດ ລັດເຊຍ ຢ່າງເປັນທາງການ ແລະ ພວກຂ້າພະເຈົ້າຫວັງວ່າ ໃນໄລຍະຈະມາເຖິງ ຈະມີໂຮງງານແຫ່ງຫນຶ່ງຢູ່ທີ່ນີ້”.
ດ້ວຍເນື້ອໃນອຸທີ່່ດົມສົມບູນ, ຮູບແບບງາມຕາ, ວິທີການເຂົ້າເຖິງຢ່າງມີຫົວຄິດປະດິດສ້າງ ແລະ ປ່ຽນໃຫມ່ຕາມທິດເພີ່ມທະວີມູນຄ່າເພີ່ມ, ບັນດາວິສາຫະກິດ ຫວຽດນາມ ພວມສະຫນອງບັນດາຜະລິດຕະພັນ ຫວຽດນາມ ຕາມທິດນັບມື້ນັບສອດຄ່ອງກັບທ່າອ່ຽງຕະຫລາດ ແລະ ຄວາມນິຍົມຂອງລູກຄ້າຢູ່ຫລາຍປະເທດ, ພາກພື້ນກວ່າ.