(vovworld) - ໃນຊຸມປີຜ່ານມາ, ອາຊີບລ້ຽງປາຈາ ຢູ່ ເຂດທົ່ງພຽງແມ່ນ້ຳຂອງ ໄດ້ສ້າງລາຍຮັບ ແລະ ແກ້ໄຂວຽກເຮັດງານທຳໃຫ້ແກ່ຄົນງາມນັບລ້ານຄົນ. ຄຽງຄູ່ກັນນັ້ນ ຜະລິດຕະພັນປາຈາສົ່ງອອກຂອງ ຫວຽດນາມໄດ້ຮັບຄວາມນິຍົມຈາກໂລກ, ອັນໄດ້ປະກອບສ່ວນເຂົ້າໃນພື້ນຖານເສດຖະກິດຂອງຊາດ ດ້ວຍວົງເງິນສົ່ງອອກໃນປີ 2011 ຂຶ້ນເຖິງ 1,8 ຕື້ ໂດລາສະຫະລັດ. ເຖິງຢ່າງໃດກໍຕາມ, ຄຽງຄູ່ກັບບັນດາຜົນງານດັ່ງກ່າວ, ອາຊີບລ້ຽງປາຈາ ພວມປະເຊີນຫນ້າກັບຄວາມຫຍຸ້ງຍາກ ສິ່ງທ້າທາຍ ຕໍ່ຫນ້າຄວາມຮຽກຮ້ອງພັດທະນາແບບຍືນຍົງ. ເພາະສະນັ້ນ ກະຊວງກະສິກຳ ແລະ ພັດທະນາຊົນນະບົດ ຫວຽດນາມ ໄດ້ຕົກລົງສ້າງຕັ້ງສະຫະສະມາຄົມປາຈາ ຫວຽດນາມ ໃນເດືອນ 1/2013.
ປາຈາຢູ່ເຂດທົ່ງພຽງແມ່ນ້ຳຂອງທາງພາກໃຕ້ ຫວຽນາມ
ພາບ:internet
|
ປີ 2012 ຜ່ານມາໄດ້ຮັບຖືວ່າແມ່ນປີທີ່ຫຍຸ້ງຍາກສຳລັບຂະແຫນງຜະລິດປາຈາ ຫວຽດນາມ. ຕາມຕົວເລກຂອງກະຊວງກະສິກຳ ແລະ ພັດທະນາຊົນນະບົດ ແລ້ວ, ຍັງປີ 2012 ວິສາຫະກິດສົ່ງອອກມີພຽງ 160 ແຫ່ງເທົ່ານັ້ນ, ຫລຸດລົງ 30% ເມື່ອທຽບໃສ່ 230 ວິສາຫະກິດຂອງປີ 2011. ເຖິງຢ່າງໃດກໍຕາມ, ມີ 20% ຈຳນວນວິສາຫະກິດຍັງຄົງຮັກສາລະດັບການສົ່ງອອກເປັນປົກກະຕິ, ສ່ວນຍັງເຫຼືອແມ່ນວິສາຫະກິດຜະລິດ ແລະ ສົ່ງອອກຢ່າງຊັກຊ້າ. ສະນັ້ນ, ການສ້າງຕັ້ງສະຫະມາຄົມປາຈາ ຫວຽດນາມ ໃນເດືອນ 1/2013 ມີຄວາມໝາຍສຳຄັນຍິ່ງສຳລັບການພັດທະນາຂອງຂະແຫນງລ້ຽງປາຈາ, ການເຕີບໂຕໃນເຂດເວົ້າສະເພາະ ແລະ ຫວຽດນາມເວົ້າລວມ. ການສ້າງຕັ້ງສະຫະສະມາຄົມປາຈາ ຈະປະກອບສ່ວນກຳນົດທິດທາງ ແລະ ຊ່ວຍອາຊີບລ້ຽງປາຈາ ໃຫ້ພັດທະນາເປັນປົກກະຕິ ແລະ ໝັ້ນຄົງ. ດ້ານອື່ນ ສະຫະສະມາຄົມ ຍັງປະກອບສ່ວນແກ້ໄຂຄວາມຫຍຸ້ງຍາກໃນການເຄື່ອນໄຫວລ້ຽງປູກ, ປຸງແຕ່ງ, ສົ່ງອອກ ແລະ ຈຳຫນ່າຍ ປາຈາໃນໄລຍະຜ່ານມາ. ຜ່ານນັ້ນ ຊ່ວຍອາຊີບລ້ຽງ, ປຸງແຕ່ງ ແລະ ຈຳຫນ່າຍ ປາຈາ ຂອງ ຫວຽດນາມ ພັດທະນາເປັນປົກກະຕິ, ໝັ້ນຄົງ ຕິດພັນກັບການປົກປັກຮັກສາສິ່ງແວດລ້ອມ. ທ່ານ ຫງວຽນງອກຫ໋າຍ, ຫົວຫນ້າສະຫະກອນລ້ຽງປາຈາ ເມືອງ ໂອມົນ, ນະຄອນ ເກີນເທີ ຖືວ່າ:
“ໂດຍແມ່ນຜູ້ລ້ຽງປາຈາ, ໃນຊຸມປີຜ່ານມາ ຂ້າພະເຈົ້າເອງກໍປະສົບກັບຄວາມຫຍຸ້ງຍາກຫລາຍຢ່າງ. ເມື່ອໄດ້ຮັບຂ່າວວ່າ ສະຫະສະມາຄົມປາຈາ ຫວຽດນາມ ໄດ້ຮັບການສ້າງຕັ້ງຂຶ້ນ ຂ້າພະເຈົ້າດີໃຈຫລາຍ ແລະ ປາດຖະຫນາວ່າ ສະຫະສະມາຄົມຈະປະກອບສ່ວນຊ່ວຍຜູ້ລ້ຽງປາຈາ ຈຳຫນ່າຍຜະລິດຕະພັນໄດ້ ແລະ ຫລີກລ້ຽງສະພາບຫລຸບທຶນ.”
ປະຈຸບັນ ປາຈາ ຫວຽດນາມ ໄດ້ສົ່ງໄປຂາຍຢູ່ຫລາຍປະເທດ, ຫລາຍທະວີບ. ຂະແຫນງຜະລິດປາຈາສົ່ງອອກ ພວມມີກາລະໂອກາດພັດທະນາ ແຕ່ໃນໄລຍະຜ່ານມາ, ສິ່ງທ້າທາຍສຳຫຼັບຂະແຫນງສິນຄ້ານີ້ ຍັງຄົງຫຼາຍຢູ່. ເປັນຕົ້ນໃນສະພາບຄວາມສາມາດແກ້ງແຍ້ງຂອງສິນໃນນ້ຳ ຫວຽດນາມ ຍັງອ່ອນດອ້ຍ, ລະດັບຄວາມຮູ້ການຄຸ້ມຄອງຍັງຈຳກັດຢູ່, ຄວາມຮຽກຮ້ອງຕ້ອງການກ່ຽວກັບຄຸນນະພາບ, ຫລັກອະນາໄມດ້ານສະບຽງອາຫານຂອງບັນດາບໍລິສັດນຳເຂົ້າມີການປ່ຽນແປງເປັນປະຈຳ ແລະ ນັບມື້ນັບຕ້ອງການຄຸນນະພາບສູງ. ນອກນັ້ນ ປາຈາ ຂອງຫວຽດນາມ ຍັງຕົກຢູ່ໃນກໍລະນີຮ້ອງຟ້ອງຂາຍບຸບລາຄາ ພ້ອມກັບບັນດາຮົ້ວກີດຂວາງດ້ານການຄ້ານັ້ນ, ໄດ້ສົ່ງຜົນສະທ້ອນຢ່າງໃຫຍ່ຫລວງເຖິງຄວາມສາມາດແກ້ງແຍ້ງຂອງບັນດາວິສາຫະກິດພາຍໃນປະເທດ. ທ່ານ ເຈີນວັນຮຸ່ງ, ປະທານສະພາບໍລິຫານ, ຜູ້ອຳນວຍການໃຫຍ່ບໍລິສັດຮຸ່ງປາ ຈຳກັດ ແຂວງ ດົ່ງທາບ ສະເຫນີວ່າ:
“ນີ້ແມ່ນສິ່ງທີ່ພວກຂ້າພະເຈົ້າປາດຖະຫນາມາແຕ່ດົນນານແລ້ວ. ຂ້າພະເຈົ້າ ຫວັງວ່າ ການນຳສະຫະສະມາຄົມແມ່ນຜູ້ທີ່ມີປະສົບການ ແລະ ເຄີຍເຮັດວຽກໃນຂະແຫນງການກ່ຽວຂ້ອງ ແລະ ມີເງື່ອນໄຂສຳພັດກັບໂລກນັບມື້ນັບຮູ້ຈັກ ແລະ ນຳໃຊ້ປາຈາ ຂອງຫວຽດນາມ.”
ການປຸງແຕ່ງປາຈາ ເພື່ອສົ່ງອອກ
ພາບ:internet
|
ແຜນຮ່າງພັດທະນາການຜະລິດ ແລະ ຈຳຫນ່າຍປາຈາ ຢູ່ ເຂດທົ່ງພຽງແມ່ນ້ຳຂອງ ຮອດປີ 2020 ໄດ້ກຳນົດວ່າ ປາຈາ ແມ່ນຫນຶ່ງໃນບັນດາປະເພດສິນຄ້າສົ່ງອອກຕົ້ນຕໍຂອງຫວຽດນາມ. ສະນັ້ນ ພ້ອມກັບການສ້າງຕັ້ງຄະນະຊີ້ນຳບໍລິຫານຂອງລັດຖະບານ, ເລື່ອງສ້າງຕັ້ງສະຫະສະມາຄົມປາຈາ ເພື່ອຄຸ້ມຄອງຂະແຫນງຜະລິດປາຈາຢ່າງຮອບດ້ານ ແລະ ພັດທະນາແບບຍືນຍົງ ນັ້ນ ແມ່ນສິ່ງຈຳເປັນທີ່ສຸດ. ຄຽງຄູ່ກັນນັນ ການສ້າງຕັ້ງສະຫະສະມາຄົມດັ່ງກ່າວ ໝາຍຄວາມວ່າ ເພື່ອພັດທະນາເສດຖະກິດ ສັງຄົມຂອງບັນດາແຂວງ, ແກ້ໄຂວຽກງານງານທຳໃຫ້ຄົນງານ, ປະກອບສ່ວນເຮັດໃຫ້ເສດຖະກິດສັງຄົມເຕີບໂຕ ແລະ ພິເສດແມ່ນຍົກສູງພາບພົດປາຈາ ຫວຽດນາມ ໃນຕະຫລາດສາກົນ. ທ່ານ ເວືອງບີ່ງແທ້ນ, ປະທານຄະນະກຳມະການປະຊາຊົນແຂວງ ອານຢາງ ຖືວ່າ: ຄວນມີຂໍ້ກຳນົດປາຈາ ແມ່ນຜະລິດຕະພັນດຳເນີນທຸລະກິດທີ່ມີເງື່ອນໄຂໂດຍໄວ, ພ້ອມທັງສ້າງນະໂຍບາຍອຸດຫນູນອັດຕາດອກເບ້ຍ 0% ນັບແຕ່ 6 ເດືອນຮອດຫນຶ່ງປີໃຫ້ແກ່ຂະແຫນງປາຊາ.
“ບັນຫາຕົ້ນຕໍ ນັ້ນແມ່ນ ສະຫະສະມາຄົມຄວນຈັດຕັ້ງການຜະລິດຄືນໃຫມ່ ເພື່ອເຮັດແນວໃດຕິດພັນກັບຕະຫລາດຢ່າງແຫນ້ນແຟ້ນ, ປັບປຸງຕະຫລາດຄືນໃຫມ່, ນັບແຕ່ການວາງແຜນກຳນົດຕະຫລອດຮອດການລ້ຽງ, ປຸງແຕ່ງ. ຂ້າພະເຈົ້າປາດຖະຫນາວ່າ ກະຊວງກະສິກຳ, ສະຫະສະມາຄົມປາຈາ ແລະ 8 ແຂວງໃນເຂດປະສານສົມທົບກັນຢ່າງແຫນ້ນແຟ້ນເພື່ອພັດທະນາປາຈາ ຫວຽດນາມ.”
ໃນໄລຍະມໍ່ໆມານີ້ ປະເທດສະວິດ ແລະ ດານມາກ ໄດ້ນຳປາຈາ ເຂົ້າບັນຊີລາຍຊື່ຂຽວ, ຮັບຮູ້ປາຈາ ຫວຽດນາມ ໄດ້ຮັບການລ້ຽງບົນພື້ນຖານພັດທະນາແບບຍືນຍົງ, ສອດຄອ່ງກັບມາດຕະຖານສາກົນ. ກາງເດືອນ 8/2012, ກະຂວງການຄ້າ ອາເມລິກາ ໄດ້ຍົກເວັ້ນການຈັດວາງພາສີຕ້ານການຂາຍບຸບລາຄາປາຈາ ຂອງຫວຽດນາມ. ສະນັ້ນ ການສ້າງຕັ້ງສະຫະສະມາຄົມປາຈາ ຫວຽດນາມ ຈະເປັນພື້ນຖານ, ແມ່ນກຳລັງຫນູນເພື່ອໃຫ້ປາຈາ ຫວຽດນາມ ນັບມື້ນັບພັດທະນາແບບຍືນຍົງ ແລະ ອອກສູ່ຕະຫລາດໂລກ.