(vovworld) - ເຂດອຸດສາຫະກຳ ຫວຽດນາມ - ສິງກະໂປ (VSIP) ໄດ້ຮັບການສ້າງຕັ້ງຢ່າງເປັນທາງການເມື່ອເດືອນ 02/1996 ໂດຍອີງໃສ່ແນວຄວາມຄິດຂອງອະດີດນາຍົກລັດຖະມົນຕີ ຫວໍວັນກຽດ ແລະ ອະດີດນາຍົກລັດຖະມົນຕີ ສິງກະໂປ Goh Chok Tong. ຜ່ານໄລຍະເກືອບ 20 ປີແຫ່ງການສ້າງຕັ້ງ ແລະ ພັດທະນາ, VSIP ແມ່ນຫນຶ່ງໃນບັນດາເຂດອຸດສາຫະກຳເຄື່ອນໄຫວປະສິດທິຜົນຢູ່ ຫວຽດນາມ ແລະ ກາຍເປັນສັນຍາລັກແຫ່ງການຮ່ວມມືລົງທຶນສຳເລັດຜົນ ລະຫວ່າງ ຫວຽດນາມ ແລະ ສິງກະໂປ.
ເຂດອຸດສາຫະກຳ ຫວຽດນາມ - ສິງກະໂປ (VSIP)
ພາບ:TTXVN
|
ເຂດອຸດສາຫະກຳ ຫວຽດນາມ - ສິງກະໂປ (VSIP) ນອນໃນເຂດສາມຫລ່ຽມເສດຖະກິດຈຸດສຸມທາງພາກໃຕ້ຫວຽດນາມ (ຊຶ່ງລວມມີ ນະຄອນໂຮ່ຈິມິນ, ບ່າເຣ້ຍ ຫວູງເຕົາ ແລະ ບິ່ງເຢືອງ). ນີ້ແມ່ນ ເຂດອຸດສາຫະກຳມີທີ່ຕັ້ງສະດວກ, ຫ່າງຈາກນະຄອນໂຮ່ຈິມິນພຽງ 17 ກິໂລແມດ, ມໍ່ກັບທ່າກຳປັ່ນທະເລ ແລະ ສະຫນາມບິນສາກົນ, ສະນັ້ນ ໄດ້ຊ່ວຍໃຫ້ບັນດານັກລົງທຶນສຳພັດກັບພື້ນຖານໂຄງລ່າງພັດທະນາຂອງນະຄອນ ພ້ອມກັບບັນດາບໍລິການອື່ນຢ່າງສະດວກ. ດ້ວຍເນື້ອທີ່ວາງແຜນກຳນົດໃນເບື້ອງຕົ້ນແມ່ນ 500 ເຮັກຕາ ຢູ່ ເທດສະບານ ທ້ວນອານ ແຂວງ ບິ່ງເຢືອງ, ຫລັງຈາກນັ້ນເຂດອຸດສາຫະກຳແຫ່ງນີ້ໄດ້ຮັບການເປີດກວ້າງຕື່ມອີກເກືອບ 500 ເຮັກຕາຢູ່ບິ່ງເຢືອງ. ໄລຍະທຳອິດແຫ່ງການສ້າງຕັ້ງ, ເຂດອຸດສາຫະກຳ ຫວຽດນາມ - ສິງກະໂປ ປະສົບຄວາມຫຍຸ້ງຍາກຫລາຍຢ່າງ ຍ້ອນພື້ນຖານເສດຖະກິດ ຫວຽດນາມ ພວມຢູ່ໃນໄລຍະຕົ້ນແຫ່ງການເປີດປະຕູ, ສະນັ້ນ ເລື່ອງດຶງດູດການລົງທຶນຈາກຕ່າງປະເທດຍັງຈຳກັດນັບທັງປະລິມານແລະ ຄຸນນະພາບ, ຂະແຫນງອາຊີບ, ຂົງເຂດລົງທຶນ. ແຕ່ຍ້ອນໄດ້ຮັບການຫນູນຊ່ວຍຈາກລັດຖະບານ ຫວຽດນາມ ແລະ ສິງກະໂປ, ບໍລິສັດຮ່ວມທຸລະກິດລົງທຶນກໍ່ສ້າງເຂດອຸດສາຫະກຳລະຫວ່າງບັນດາຄູ່ຮ່ວມມືພາຍໃນ ແລະ ຕ່າງປະເທດໄດ້ຮັບການສ້າງຕັ້ງຂຶ້ນ. ນີ້ແມ່ນບັນດາກຸ່ມບໍລິສັດທີ່ມີອິດທິພົນຊື່ສຽງ, ມີບົດຮຽນໃນຂົງເຂດກໍ່ສ້າງພື້ນຖານໂຄງລ່າງ ແລະ ອະສັງຫາລິມະຊັບ ຊື່ງລວມມີ: ບໍລິສັດໃຫຍ່ລົງທຶນ ແລະ ພັດທະນາ Becamex (ບິ່ງເຢືອງ) ແລະ ບັນດາບໍລິສັດໂດຍແມ່ນກຸ່ມບໍລິສັດ Sembcorp Development (ສິງກະໂປ) ນຳຫນ້າ. ໃນຈຸດເວລານັ້ນ, ແຂວງ ບິ່ງເຢືອງໄດ້ກຳນົດວ່າ ການກໍ່ສ້າງ ແລະ ພັດທະນາ ເຂດອຸດສາຫະກຳ ຫວຽດນາມ - ສິງກະໂປ ແມ່ນກາລະໂອກາດສຳຄັນເພື່ອສ້າງພື້ນຖານໃຫ້ແກ່ການພັດທະນາເສດຖະກິດສັງຄົມ, ຫັນປ່ຽນອົງປະກອບເສດຖະກິດ, ຍູ້ແຮງການດຶງດູດລົງທຶນໃຫ້ແກ່ແຂວງ ບິ່ງເຢືອງ. ນອກນັ້ນ ແຂວງ ບິ່ງເຢືອງກໍຖືວ່າ ນີ້ແມ່ນເງື່ອນໄຂເພື່ອໃຫ້ຄູ່ຮ່ວມມືຝ່າຍ ຫວຽດນາມ ມີເງື່ອນໄຂສຳພັດກັບເຕັກໂນໂລຊີ ແລະ ບົດຮຽນໃນການກໍ່ສ້າງ, ຄຸ້ມຄອງ, maketing, ດຶງດູດການລົງທຶນໃນລະດັບສາກົນຈາກບັນດາຄູ່ຮ່ວມມື ສິງກະໂປ. ທ່ານ ບູ່ຍມີນຈີ, ຮອງຫົວຫນ້າຄະນະຄຸ້ມຄອງບັນດາເຂດອຸດສາຫະກຳ ແຂວງ ບິ່ງເຢືອງ ໃຫ້ຮູ້ວ່າ:
“ບັນດານັກຄຸ້ມຄອງຂອງ ສິງກະໂປ ໄດ້ສົມທົບກັບ ຫວຽດນາມ ສະນັ້ນ ມາດຕະຖານການວາງແຜນກຳນົດຂອງ ເຂດອຸດສາຫະກຳ ຫວຽດນາມ - ສິງກະໂປ ແມ່ນທັນສະໄຫມກວ່າໝູ່ໃນທົ່ວປະເທດ. ທີສອງ ຄະນະຄຸ້ມຄອງເຂດອຸດສາຫະກຳຕັ້ງຢູ່ເຂດອຸດສາຫະກຳ, ສະນັ້ນ ການແກ້ໄຂບັນດາລະບຽບການບໍລິຫານແມ່ນວ່ອງໄວ.”
ມາຮອດປະຈຸບັນ, ເຂດອຸດສາຫະກຳ ຫວຽດນາມ - ສິງກະໂປ (VSIP) ໄດ້ດຶງດູດ 356 ໂຄງການທີ່ມີເງິນລົງທຶນຂອງຕ່າງປະເທດ (FDI) ດ້ວຍຍອດຈຳນວນທຶນ 3,7 ຕື້ USD ແລະ 16 ໂຄງການພາຍໃນປະເທດລົງທຶນເຂົ້າເຂດນີ້ດ້ວຍຍອດຈຳນວນທຶນຈົດທະບຽນເກືອບ 2000 ຕື້ດົ່ງ. ຍອດລາຍຮັບທີ່ເຂດອຸດສາຫະກຳດັ່ງກ່າວບັນລຸໄດ້ກວ່າ 16 ຕື້ USD, ມອບເຂົ້າງົບປະມານແຫ່ງລັດເກືອບ 370 ລ້ານ USD ແລະ ສ້າງວຽກເຮັດງານທຳໃຫ້ແກ່ຄົນງານ 102.000 ຄົນ. ສະເພາະປີນີ້, ໄລ່ໝົດເດືອນ 8, ເຂດອຸດສາຫະກຳ ຫວຽດນາມ - ສິງກະໂປ (VSIP) ດຶງດູດເງິນລົງທຶນຂອງຕ່າງປະເທດໄດ້ 600 ລ້ານ USD. ການເຄື່ອນໄຫວຂອງບັນດາວິສາຫະກິດສ້າງລາຍຮັບກວ່າ 2,5 ຕື້ USD, ແກ້ໄຂວຽກເຮັດງານທຳໃຫ້ແກ່ຄົນງາມຕື່ມອີກ 4000 ຄົນ. ທ່ານ Hoshino Toshiyuki ຜູ້ອຳນວຍການໃຫຍ່ບໍລິສັດ BECAMEX TOKYU ຈຳກັດ ໃຫ້ຮູ້ວ່າ:
“ພວກຂ້າພະເຈົ້າໄດ້ຮັບການຫນູນຊ່ວຍຫລາຍຢ່າງຈາກຄະນະກຳມະການປະຊາຊົນແຂວງ ບິ່ງເຢືອງ. ນັບແຕ່ເມື່ອພວກຂ້າພະເຈົ້າລົງທຶນເຂົ້າແຫ່ງນີ້, ລະບຽບການຕ່າງໆລ້ວນແຕ່ໄດ້ຮັບການຊ່ວຍເຫລືອຈາກຂະແຫນງການກ່ຽວຂ້ອງ. ເມື່ອພວກຂ້າພະເຈົ້າຜັນຂະຫຍາຍແຜນຮ່າງໃຫມ່ຈຳນວນຫນຶ່ງກໍໄດ້ຮັບຄວາມເອົາໃຈໃສ່ຊ່ວຍເຫລືອຈາກຄະນະກຳມະການປະຊາຊົນແຂວງ ແລະ ກຸ່ມບໍລິສັດ BECAMEX TOKYU. ນັ້ນແມ່ນສິ່ງສະດວກຂອງພວກຂ້າພະເຈົ້າ.”
ທ່ານນາຍົກລັດຖະມົນຕີ ຫວຽດນາມ Nguyen Tan Dung ແລະ ທ່ານນາຍົກລັດຖະມົນຕີ ສິງກະໂປ ຫລີຊຽນຫລົງ
ພາບ: internet
|
ຜ່ານວິວັດທະນາການແຫ່ງການພັດທະນາ, ເຂດອຸດສາຫະກຳ ຫວຽດນາມ - ສິງກະໂປ (VSIP) ກໍໄດ້ຮັບຖືວ່າ ແມ່ນແບບຢ່າງໃນການຮັບປະກັນສິ່ງແວດລ້ອມ. ລະບົບບຳບັດນ້ຳສິ່ງເສດເຫລືອ ຢູ່ທີ່ນີ້ແມ່ນທັນສະໄຫມ, ບໍ່ໃຫ້ເກີດສະພາບປ່ອຍສິ່ງເສດເຫລືອອອກສູ່ສິ່ງແວດລ້ອມໂດຍກົງ. ໃນສະພາບເສດຖະກິດປະສົບກັບຄວາມຫຍຸ້ງຍາກ, ແຕ່ບັນດາວິສາຫະກິດຢູ່ທີ່ນີ້ຍັງຄົງເຄື່ອນໄຫວຢ່າງມີປະສິດທິຜົນ, ຮັບປະກັນວຽກເຮັດງານທຳ, ສະນັ້ນ ຊີວິດທາງດ້ານວັດຖຸ ແລະ ຈິດໃຈຂອງກຳມະກອນນັບມື້ນັບໄດ້ຮັບການຍົກສູງຂຶ້ນ. ທ່ານ ຫງວຽນແທ່ນຈູງ, ຫົວຫນ້າຫ້ອງການຮ່ວມມືລົງທຶນ, ຄະນະຄຸ້ມຄອງເຂດ ເຂດອຸດສາຫະກຳ ຫວຽດນາມ - ສິງກະໂປ (VSIP) ໃຫ້ຮູ້ວ່າ:
“ ຍາມໃດຄະນະຄຸ້ມຄອງກໍຮັບຟັງຄວາມຫຍຸ້ງຍາກຂອງວິສາຫະກິດ ແລະ ພົບປະກັບເຂົາເຈົ້າເປັນປະຈຳ. ຈາກນັ້ນ ຈຶ່ງກຳໄດ້ສະພາບຄວາມຫຍຸ້ງຍາກຂອງເຂົາເຈົ້າເພື່ອມີມາດຕະການແກ້ໄຂຢ່າງທັນການ. ຕົວຢ່າງຄື: ຫວ່າງແລ້ວນີ້ປະຕິບັດມະຕິເລກທີ 13 ຂອງລັດຖະບານ ແລະ ມະຕິຕົກລົງເລກທີ 29 ຂອງສະພາແຫ່ງຊາດ, ພວກຂ້າພະເຈົ້າກໍສົມທົບກັບບັນດາອົງການພາສີ, ສ່ວຍສາອາກອນ, ທະນາຄານແຫ່ງລັດ ເຊີນບັນດາວິສາຫະກິດມາເຜີຍແຜ່ຂໍ້ກຳນົດ ແລະ ນະໂຍບາຍບຸລິມະສິດເພື່ອສ້າງເງື່ອນໄຂສະດວກໃຫ້ເຂົາເຈົ້າໃນການໝູນໃຊ້.”
ມາຮອດປະຈຸບັນ, ເຂດອຸດສາຫະກຳ ຫວຽດນາມ - ສິງກະໂປ ກາຍເປັນຫນຶ່ງໃນບັນດາຮູບແບບການເຄື່ອນໄຫວສຳເລັດຜົນຢູ່ ຫວຽດນາມ, ປະກອບສ່ວນສ້າງພື້ນຖານເສດຖະກິດຂອງປະເທດຊາດໃຫ້ນັບມື້ນັບພັດທະນາ ໃນວິວັດທະນາການເຊື່ອມໂຍງເຂົ້າກັບເສດຖະກິດທົ່ວໂລກ ແລະ ແມ່ນສັນຍາລັກແຫ່ງນ້ຳໃຈມິດຕະພາບ, ການຮ່ວມມືດ້ານເສດຖະກິດທີ່ມີປະສິດທິຜົນລະຫວ່າງສອງປະເທດ ຫວຽດນາມ - ສິງກະໂປ.
ໂຕຕວນ