(vovworld) - ທ້າຍປີ 2012 ເປັນຂີດໝາຍ 25 ປີທີ່ຫວຽດນາມ ປະກາດໃຊ້ກົດໝາຍວ່າດ້ວຍການລົງທຶນຂອງຕ່າງປະເທດ. ນີ້ແມ່ນຈຸດເວລາທີ່ມີຄວາມໝາຍເພື່ອໃຫ້ ຫວຽດນາມ ທົບທວນຄືນສະພາບການດຶງດູດການລົງທຶນໂດຍກົງຂອງຕ່າງປະເທດ (FDI) ພ້ອມທັງວາງອອກບັນດາມາດຕະການເພື່ອປັບປຸງສະພາບແວດລ້ອມແຫ່ງການລົງທຶນໃຫ້ສອດຄ່ອງກັບສະພາບການໃຫມ່.
ໃນຊຸມປີມໍ່ໆມານີ້, ຍ້ອນຜົນສະທ້ອນຈາກວິກິດການເສດຖະກິດທົ່ວໂລກ, ການລົງທຶນຂອງຕ່າງປະເທດເຂົ້າ ຫວຽດນາມ ຖືກຫລຸດລົງ. ປີ 2009, ເງິນລົງທຶນໂດຍກົງຂອງຕ່າງປະເທດເຂົ້າຫວຽດນາມບັນລຸພຽງ 23 ຕື້ USD, ເທົ່າກັບ 30 % ເມື່ອທຽບໃສ່ປີກ່ອນ. ແລະ ໃນຊຸມປີຕໍ່ໄປຈະມີທ່າອ່ຽງຫລຸດລົງ. ໃນ 10 ເດືອນຕົ້ນປີນີ້, ທຶນ FDI ເຂົ້າຫວຽດນາມ ບັນລຸພຽງ 10,5 ຕື້ USD, ຊື່ງລວມມີທຶນສະຫນອງໃຫມ່ ແລະ ທຶນເພີ່ມ, ຫລຸດລົງເກືອບ 25% ເມື່ອທຽບໃສ່ໄລຍະດຽວກັນຂອງປີກາຍ. ຄຽງຄູ່ສາຍເຫດພາວະວິໄສ, ຍັງມີມີສາຍເຫດອື່ນອີກທີ່ເຮັດໃຫ້ກະແສເງິນ FDI ຢູ່ ຫວຽດນາມ ຖືກຫລຸດລົງ ນັ້ນແມ່ນບັນດາໂຄງການລົງທຶນບໍ່ເປັນຮູບປະທຳ, ຫລາຍໂຄງການລົງທຶນອະສັງຫາລິມະຊັບທີ່ມີຂອບຂະຫນາດໃຫຍ່ຖືກຫລຸດລົງຢ່າງແຮງ. ດ້ານອື່ນ ພາຍຫລັງໄລຍະແຫ່ງການຜັນຂະຫຍາຍ, ຫວຽດນາມ ກໍມີແຜນນະໂຍບາຍຍົກສູງຄຸນນະພາບກະແສທຶນ FDI, ເລືອກເຟັ້ນບັນດາໂຄງການມີປະສິດທິຜົນ, ຫລຸດຜ່ອນບັນດາໂຄງການກໍ່ມົນລະພິດເຖິງສິ່ງແວດລ້ອມ. ພິເສດ,ໃນຊຸມປີມໍ່ໆມານີ້, ຫວຽດນາມ ຖືເປັນສຳຄັນການດຶງດູດບັນດາໂຄງການຂອງກຸ່ມບໍລິສັດນາໆຊາດ, ໂຄງການຖ່າຍທອດເຕັກໂນໂລຊີສູງ, ການຄຸ້ມຄອງກ້າວຫນ້າ, ແຮງງານທີ່ມີຄຸນນະພາບສູງ, ເປັນຕົ້ນບັນດານັກລົງທຶນຈາກ ອາເມລິກາ, ຍີ່ປຸ່ນ, ສເກົາຫລີ, ອີຢູ... ແມ່ນບັນດາຄູ່ຮ່ວມມືມີຄວາມສາມາດບົ່ມຊ້ອນ ແລະ ມີລະດັບຄວາມຮູ້ດ້ານເຕັກໂນໂລຊີສູງ. ພ້ອມກັບວິວັດການດັ່ງກ່າວ, ບັນດາບໍລິສັດນາໆຊາດຍັງມີບໍລິສັດລູກຫລາຍແຫ່ງ, ຜະລິດຊິ້ນສ່ວນສຳຮອງ. ນີ້ແມ່ນບັນດາປັດໄຈສ້າງເປັນສິນຄ້າທີ່ເຂົ້າຮ່ວມລະບົບມູນຄ່າທົ່ວໂລກ, ຊຶ່ງແມ່ນຈຸດໝາຍທີ່ ຫວຽດນາມ ປາດຖະຫນາ. ປະຈຸບັນ ຢູ່ ຫວຽດນາມ ມີບັນດາໂຄງການລົງທຶນຂອງກຸ່ມບໍລິສັດນາໆຊາດ, ໃນນັ້ນ ມີບໍລິສັດນອນໃນບັນຊີລາຍຊື່ 500 ບໍລິສັດຊັ້ນນຳຂອງໂລກ. ບັນດາກຸ່ມບໍລິສັດ, ບໍລິສັດດັ່ງກ່າວພວມລົງທຶນ 214 ໂຄງການ ດ້ວຍຍອດທຶນຈົດທະບຽນແມ່ນ 11,9 ຕື້USD, ໃນນັ້ນ ທຶນປະຕິບັດປະມານ 8,59 ຕື້USD. ປະຈຸບັນ ແຫລ່ງທຶນຂອງບັນດາກຸ່ມບໍລິສັດດັ່ງກ່າວກວມ 20% ຍອດຈຳນວນທຶນ FDI ເຂົ້າຫວຽດນາມ. ບັນດາຕົວເລກດັ່ງກ່າວສະແດງໃຫ້ເຫັນຈຸດໝາຍ ແລະ ບາດກ້າວຫັນປ່ຽນສຳຄັນໃນໂຄງປະກອບດຶງດູດແຫລ່ງທຶນ FDI ຢູ່ ຫວຽດນາມ. ທ່ານ ຟານຫືວທັງ ຜູ້ຊ່ຽວຊານດ້ານເສດຖະກິດ, ສັງກັດກະຊວງແຜນການ ແລະ ການລົງທຶນ ໃຫ້ຮູ້ວ່າ:
“ນັບແຕ່ເມື່ອເປີດປະຕູ ແລະ ດຶງດູດການລົງທຶນຂອງຕ່າງປະເທດ, ຈຸດໝາຍຂອງ ຫວຽດນາມ ແມ່ນສຸມໃສ່ບັນດາເປົ້າໝາຍທີ່ມີຄວາມສາມາດບົ່ມຊ້ອນ,ມີກຳລັງຄວາມສາມາດດ້ານການເງິນ, ເຕັກໂນໂລຊີ ແລະ ຕະຫລາດ, ຊ່ວຍຫວຽດນາມ ທັງສຳພັດກັບແຫລ່ງທຶນສາກົນ, ທັງຮັບເອົາເຕັກໂນໂລຊີໃຫມ່ໃນພາລະກິດພັດທະນາປະເທດຊາດ. ນີ້ກໍແມ່ນທ່າອ່ຽງໃນຕະຫລອດ 25 ປີຜ່ານມາ ແລະ ຍິ່ງດຶງດູດທຶນ FDI ຍິ່ງເຫັນໄດ້ວ່າ ຈຸດໝາຍດັ່ງກ່າວແມ່ນຖືກຕ້ອງ.”
ພາບປະກອບ:internet
|
ເຖິງຢ່າງໃດກໍຕາມ, ຈຳນວນບັນດາກຸ່ມບໍລິສັດແຫ່ງຊາດລົງທຶນເຂົ້າ ຫວຽດນາມ ບໍ່ທັນຫລາຍ ແລະ ອັດຕາບັນດາໂຄງການໃຫຍ່ທີ່ຕິດພັນກັບການຖ່າຍທອດເຕັກໂນໂລຊີຍັງຢູ່ໃນລະດັບຕ່ຳ. ອະທິບາຍກ່ຽວກັບປະກົດການນີ້, ຜູ້ຊ່ຽວຊານດ້ານເສດຖະກິດຫລາຍທ່ານຖືວ່າ: ຄຽງຄູ່ກັບບັນດາຄວາມຫຍຸ້ງຍາກລວມຂອງພື້ນຖານເສດຖະກິດ, ຫວຽດນາມ ຍັງສຶບຕໍ່ປັບປຸງສະພາບແວດລ້ອມແຫ່ງການລົງທຶນ, ປະຕິບັດການປັບປຸງນະໂຍບາຍກ່ຽວຂ້ອງຢ່າງຄົບຊຸດ, ສ້າງກົນໄກໂປ່ງໃສ, ສ້າງກອບກົດໝາຍຈະແຈ້ງ, ປົກກະຕິ ແລະ ຍາວນານ. ທະນາຍຄວາມ ຟານຮົ່ງແບກ ຖືວ່າ:
“ບັນດານັກລົງທຶນເມື່ອມາລົງທຶນຈຳເປັນຕ້ອງສຳເລັດທຸກລະບຽບການດ້ານກົດໝາຍ. ນັ້ນກໍແມ່ນກົນໄກຮັບປະກັນໃຫ້ແກ່ແຫລ່ງທຶນຂອງເຂົາເຈົ້າມີຄວາມປອດໄພໃນລະບົບກົດໝາຍທີ່ຄົບຊຸດ.”
ໃນຊຸມປີມໍ່ໆມານີ້, ຫວຽດນາມ ມີຄວາມເອົາໃຈໃສ່ດຶງດູດບັນດາໂຄງການເຕັກໂນໂລຊີສູງເຂົ້າຂົງເຂດສຳຄັນຂອງພື້ນຖານເສດຖະກິດ ຫວຽດນາມ ຄື: ອຸດສາຫະກຳນ້ຳມັນອາຍແກສ, ຜະລິດລົດໂອໂຕ, ພັດທະນາພື້ນຖານໂຄງລ່າງ, ເຕັກໂນໂລຊີຂຽວ..ພິເສດ ໃນ 10 ປີມານີ້, ໄດ້ປະກົດມີຫລາຍໂຄງການລົງທຶນເຕັກໂນໂລຊີສູງຈາກບັນດາກຸ່ມບໍລິສັດເສດຖະກິດຊັ້ນນຳຂອງໂລກຄື: ຜະລິດ, ຕິດຕັ້ງ chipset, ຊິ້ນສ່ວນເອເລັກໂຕນິກຂອງອາເມລິກາ, ຜະລິດກົນຈັກຂອງຍີ່ປຸນ, ບັນດາໂຄງການເອເລັກໂຕນິກໂທລະຄົມມະນາຄົມຂອງ ສເກົາຫລີ.
ຫວຽດນາມ ພວມປັບປຸງສະພາບແວດລ້ອມເພື່ອດຶງດູດໂຄງການFDI
ພາບປະກອບ: internet
|
ເພື່ອໃຫ້ແຫລ່ງທຶນ FDI ເສີມຂະຫຍາຍຢ່າງມີປະສິດທິຜົນ, ທ່ານນາຍົກລັດຖະມົນຕີໄດ້ອະນຸມັດແຜນຮ່າງຍົກສູງປະສິດທິຜົນວຽກງານຄຸ້ມຄອງແຫລ່ງທຶນ FDI ເຂົ້າ ຫວຽດນາມ. ຈຸດໝາຍຂອງແຜນຮ່າງແມ່ນປັບປຸງສະພາບແວດລ້ອມແຫ່ງການລົງທຶນ, ຕາມທິດສົ່ງເສີມເສດຖະກິດທີ່ມີເງິນລົງທຶນຂອງຕ່າງປະເທດໃຫ້ພັດທະນາຕາມແຜນກຳນົດ. ການດຶງດູດເງິນລົງທຶນຕ້ອງສອດຄ່ອງກັບການວາງແຜນກຳນົດເຂດ, ທ້ອງຖິ່ນ ແລະ ພ້ອມກັນນັ້ນແກ້ໄຂບັນຫາແບ່ງຂັ້ນໃນການຄຸ້ມຄອງການລົງທຶນເປັນຢ່າງດີ. ແຜນຮ່າງກໍເນັ້ນຫນັກວ່າຄວນມີກົນໄກໃຫມ່ເພື່ອແກ້ໄຂບັນດາບັນຫາປະກົດໃໝ່ຢ່າງທັນການດ ແນໃສ່ແກ້ໄຂຄວາມຫຍຸ້ງຍາກ, ເພື່ອດຶງດູດບັນດາໂຄງການລົງທຶນໂດຍກົງໃຫ້ຫຼາຍກວ່າອີກ, ເປັນຕົ້ນແມ່ນບັນດາໂຄງການເຕັກໂນໂລຊີສູງ. ສິ່ງດັ່ງກ່າວກໍຊ່ວຍ ຫວຽດນາມ ຮັກສາເສດຖະກິດມະຫາພາກໃຫ້ເປັນປົກກະຕິກວ່າ.