(vovworld) - ໂດຍແມ່ນປະເທດມີພົນລະເມືອງຫນຸ່ມ, ການໝູນໃຊ້ເຕັກໂນໂລຊີຢ່າງວ່ອງໄວ, ຫວຽດນາມ ໄດ້ຮັບການຕີລາຄາວ່າ ແມ່ນຫນຶ່ງໃນບັນດາປະເທດມີຄວາມສາມາດບົ່ມຊ້ອນກ່ຽວກັບການພັດທະນາເຕັກໂນໂລຊີຊອບແວ. ຄຽງຄູ່ກັບການຍູ້ແຮງການຜະລິດຊອບແວ, ມີວິສາຫະກິດຫລາຍແຫ່ງໄດ້ ແລະ ພວມສ້າງຍຸດທະສາດເພື່ອກ້າວໄປເຖິງການເຊື່ອມໂຍງກັບທົ່ວໂລກ ຜ່ານການສ້າງບັນດາຜະລິດຕະພັນມີມູນຄ່າສູງດ້ວຍເຄື່ອງໝາຍການຄ້າ Made in Vietnam. ໃນລາຍການເສດຖະກິດພາກນີ້, ນັກຂ່າວໂຕຕວນມີບົດຂຽນທີ່ພາດຫົວຂໍ້ວ່າ: “ຄວາມສາມາດບົ່ມຊ້ອນໃນການສົ່ງອອກຊອບແວຢູ່ ຫວຽດນາມ”.
ຫວຽດນາມ ແມ່ນປະເທດມີຄວາມສາມາດບົ່ມຊ້ອນກ່ຽວກັບການພັດທະນາເຕັກໂນໂລຊີຊອບແວ
ພາບ:internet
|
ປີ 2012, ເຖິງວ່າເສດຖະກິດທົ່ວໂລກເວົ້າລວມ ແລະ ຫວຽດນາມ ເວົ້າສະເພາະ ຍັງຄົງປະສົບກັບຄວາມຫຍຸ້ງຍາກຫລາຍຢ່າງ, ໃນຂະນະນັ້ນ ຂົງເຂດສົ່ງອອກມີທ່າອ່ຽງຖືກຊັກຊ້າລົງ, ຂະແຫນງອຸດສາຫະກຳຊອບແວຍັງຄົງບັນລຸລະດັບຈະເລີນເຕີບໂຕເກືອບ 30% ຊ້ຳບໍ່ໜຳ ມີວິສາຫະກິດຈຳນວນຫນຶ່ງ ຍັງບັນລຸການເຕີບໂຕກວ່າ 100%. ກຸ່ມບໍລິສັດ FPT ຊື່ງແມ່ນຫນຶ່ງໃນບັນດາວິສາຫະກິດສົ່ງອອກຊອບແວຕົ້ນຕໍ ຂອງຫວຽດນາມ, ໃນ 6 ເດືອນຕົ້ນປີ 2012 ຍັງຄົງບັນລຸລະດັບການເຕີບໂຕ 30% ເມື່ອທຽບໃສ່ໄລຍະດຽວກັນຂອງປີກາຍ. ຕະຫລາດ ຍີ່ປຸ່ນ ແລະ ອາເມລິກາ ສືບຕໍ່ແມ່ນຕະຫລາດເດີມໃຫຍ່ສຸດກ່ຽວກັບການສົ່ງອອກຊອບແວ ຂອງຫວຽດນາມ. ຕາມການສັງເກດຂອງສະຫະສະມາຄົມຊອບແວ ແລະ ບໍລິການເຕັກໂນໂລຊີຂໍ້ມູນຂ່າວສານ ຫວຽດນາມ (VINASA) ແລ້ວ, ກາລະໂອກາດສຳລັບຕະຫລາດສົ່ງອອກຊອບແວຂອງ ຫວຽດນາມ ພວມເປີດກ້ວາງ. ຕົວຢ່າງຄື: ຕະຫລາດຍີ່ປຸ່ນ ແຕ່ລະປີມີຄວາມຕ້ອງການຜະລິດຊອບແວຕົກເປັນມູນຄ່າປະມານ 10 ຕື້ USD, ແຕ່ປີກາຍ FPT ພຽງຕອບສະຫນອງປະມານ 35 ລ້ານ USD. ໃນ 6 ເດືອນຕົ້ນປີນີ້, FPT ກໍຄືວິສາຫະກິດຜະລິດຊອບແວຫລາຍແຫ່ງກໍໄດ້ຮັບສັນຍາຫລາຍສະບັບມີມູນຄ່ານັບສີບລ້ານ USD ຈາກບັນດາລູກຄ້າຈາກຕ່າງປະເທດ. ເຖິງຢ່າງໃດກໍຕາມ ຖ້າຫາກພຽງແຕ່ຜະລິດເທົ່ານັ້ນ, ມູນຄ່າເພີ່ມໃນສັນຍາການຄ້າຈະບໍ່ສູງ. ນີ້ກໍແມ່ນສາຍເຫດທີ່ວິສາຫະກິດຊອບແວ ຫວຽດນາມ ຫລາຍແຫ່ງ ໄດ້ເລີ່ມຕົ້ນການຄົ້ນຄວ້າ, ອອກແບບຜະລິດຕະພັນຊອບແວເພື່ອເພີ່ມມູນຄ່າ. ບໍລິສັດ Global Cyber Soft ໃນໄລຍະຫາກໍ່ໄດ້ຮັບການສ້າງຕັ້ງຂຶ້ນ ພຽງແຕ່ເອົາໃຈໃສ່ເຖິງການຜະລິດຊິ້ນສ່ວນຊອບແວ ແຕ່ເມື່ອປະຕິບັດການສົ່ງອອກຜະລິດຕະພັນຊອບແວມາຮອດປະຈຸບັນ, ວິສາຫະກິດນີ້ບັນລຸໄດ້ໝາກຜົນດີພໍສົມຄວນ. ພົ້ນເດັ່ນ ຜະລິດຕະພັນຊອບແວຄຸ້ມຄອງລະບົບຂາຍຍ່ອຍດ້ວຍເຄື່ອງໝາຍການຄ້າ Made in Vietnam ຂອງບໍລິສັດ ໄດ້ຮັບການໝູນໃຊ້ຈາກບັນດາບໍລິສັດຂາຍຍ່ອຍທີ່ມີຊື່ສຽງໃນໂລກ. ທ່ານ ໂງວັນຕວ່ານ, ຜູ້ອຳນວຍການໃຫຍ່ບໍລິສັດ Global Cyber Soft ໃຫ້ຮູ້ວ່າ:
“ຈຸດທີ່ແຕກຕ່າງກັນຂອງບໍລິສັດນັ້ນແມ່ນບໍລິສັດໄດ້ເຂ້ົາຮ່ວມວິວັດທະນາການຜະລິດຊອບແວ ຊ້ຳບໍ່ໜຳ ສຳລັບລູກຄ້າ ບັນດາຜູ້ຊ່ຽວຊານຂອງບໍລິສັດເຂົ້າຮ່ວມການປຶກສາບັນດາມາດຕະການເພື່ອສະເຫນີຄຳນິຍາມກ່ຽວກັບການອອກແບບຜະລິດຕະພັນ. ນັ້ນແມ່ນຄວາມມານະພະຍາຍາມຂອງບໍລິສັດເພື່ອເພີ່ມມູນຄ່າເພີ່ມ.”
ຖ້າຫາກບໍລິສັດ Global Cyber Soft ເລືອກເຟັ້ນຮູບການຂາຍຍ່ອຍເປັນເປົ້າໝາຍຕົ້ນຕໍໃຫ້ແກ່ບັນດາຜະລິດຕະພັນຂອງຕົນ, ບໍລິສັດ TMA ໄດ້ກຳນົດທິດພັດທະນາບັນດາຜະລິດຕະພັນຊອບແວກ່ຽວກັບໂທລະສັບມືຖື, ອາຍປາດ ບັນດາອຸປະກອນເອເລັກໂຕນິກທີ່ທັນສະໄຫມ ແລະ ຊອບແວຄຸ້ມຄອງໃນຂົງເຂດໂທລະຄົມ. ທ່ານ ເຈີນຮົ່ງ, ຜູ້ອຳນວຍການທຸລະກິດຂອງບໍລິສັດ TMA ໃຫ້ຮູ້ວ່າ:
“ໃນ 3 ປີຜ່ານມາ ບໍລິສັດ TMA ໄດ້ລົງທຶນຢ່າງແຮງເພື່ອຜະລິດບັນດາຜະລິດຕະພັນສະເພາະຂອງຕົນ ແລະ ບັນລຸບາງໝາກຜົນດີພໍສົມຄວນ. ຜະລິດຕະພັນຈຳນວນຫນຶ່ງຂອງບໍລິສັດໄດ້ນຳໄປຂາຍຢູ່ຕະຫລາດໃຫຍ່ບາງແຫ່ງຄື: ຊອບແວຮັບໃຊ້ການຄຸ້ມຄອງໂທລະຄົມ. ຊອບແວປະເພດນີ້ ພວກຂ້າພະເຈົ້າໄດ້ລົງທຶນໃນໄລຍະກວ່າ 2 ປີມານີ້. ໃນທ້າຍປີ 2011, ລູກຄ້າເອີລົບ ແລະ ອົດສະຕາລີ ຈຳນວນຫນຶ່ງ ໄດ້ນຳໃຊ້ທົດລອງ ແລະ ປະຈຸບັນ ພວມຜັນຂະຫຍາຍນຳໃຊ້ຕົວຈິງ.”
ພິທີລົງມືກໍ່ສ້າງກິດຈະກຳຜະລິດຊອບແວ ລ້າງຮ່ວາຫລາກ
ພາບ:internet |
ດ້ວຍທິດທາງນັ້ນ, ຜະລິດຕະພັນຊອບແວຫລາຍປະເພດມີເຄື່ອງໝາຍການຄ້າ Made in Vietnam ໄດ້ຮັບການນຳໃຊ້ຈາກຄູ່ຮ່ວມມືຕ່າງປະເທດ. ບໍລິສັດຊອບແວ Bkav ກໍໄດ້ຮັບການຕີລາຄາວ່າແມ່ນຫນຶ່ງໃນບັນດາວິສາຫະກິດດຳເນີນທຸລະກິດເປັນຢ່າງດີຢູ່ຕະຫລາດພາຍໃນປະເທດ. ເຖິງຢ່າງໃດກໍຕາມ, ຕໍ່ຫນ້າກາລະໂອກາດພັດທະນາ, ບໍລິສັດດັ່ງກ່າວ ຕັດສິນໃຈສົ່ງຜະລິດຕະພັນຂອງຕົນໄປຂາຍຢູ່ທົ່ວໂລກ. ທ່ານ ຫງວຽນມີນດຶກ, ຜູ້ອຳນວຍການບໍລິສັດ Bkav ໃຫ້ຮູ້ວ່າ:
“ຈຸດພິເສດສະເພາະຂອງຂະແຫນງຊອບແວ ມີຄວາມສະດວກຫລາຍກວ່າເມື່ອທຽບກັບຂະແຫນງອື່ນ, ນັ້ນແມ່ນ ຖ້າຫາກພວກຂ້າພະເຈົ້າຢາກເຂົ້າຕະຫລາດໃດຫນຶ່ງ, ພວກຂ້າພະເຈົ້າບໍ່ຈຳເປັນໄປເຖິງປະເທດນັ້ນເພື່ອແລກປ່ຽນກັບລູກຄ້າ ຫລືໂຄສະນາ ພວກຂ້າພະເຈົ້າສາມາດແລກປ່ຽນກັບລູກຄ້າ ແລະ ໂຄສະນາຜ່ານເຄືອຂ່າຍ ອິນເຕີແນັດ ຫລື ຜ່ານລະບົບໂຄສະນາທີ່ແຕກຕ່າງກັນ. ຄາດວ່າ ພວກຂ້າພະເຈົ້າຈະສຸມໃສ່ໂຄສະນາຢູ່ຕະຫລາດ ອາເມລິກາເສຍກ່ອນ, ເພາະວ່າຄວາມຕ້ອງການນຳໃຊ້ຊອບແວຢູ່ປະເທດນີ້ແມ່ນສູງພໍສົມຄວນ.”
ໂດຍກຳນົດວ່າ ນີ້ແມ່ນຂະແຫນງມີແງ່ຫວັງພັດທະນາ, ໃນຍຸດທະສາດພັດທະນາເສດຖະກິດສັງຄົມຂອງປະເທດຊາດ, ລັດຖະບານ ໄດ້ປະກາດໃຊ້ຫລາຍແຜນນະໂຍບາຍບຸລິມະສິດເພື່ອຊຸກຍູ້ອຸດສາຫະກຳຊອບແວພັດທະນາ. ປະຈຸບັນ ຢູ່ ຫວຽດນາມ ໄດ້ສ້າງຕັ້ງສູນຊອບແວໃຫຍ່ 2 ແຫ່ງ, ນັ້ນແມ່ນສູນຊອບແວຂອງກຸ່ມບໍລິສັດ FPT ຕັ້ງຢູ່ເຂດອຸດສາຫະກຳເຕັກໂນໂລຍີສູງ ລາ້ງຮ່ວາຫລາກ, ຮ່າໂນ້ຍ ແລະ ສູນຊອບແວກວາງຈູງ ຢູ່ ນະຄອນ ໂຮ່ຈິມິນ. ນີ້ແມ່ນບັນດາປະຖົມປັດໃຈສຳຄັນເພ່ືອໃຫ້ອຸດສາຫະກຳຊອບແວເສີມຂະຫຍາຍໝົດກຳລັງຄວາມສາມາດ, ປະກອບສ່ວນຢ່າງມີປະສິດທິຜົນເຂົ້າໃນພື້ນຖານເສດຖະກິດຂອງປະເທດຊາດ.