(vovworld)- ການມີຫນ້າຂອງບັນດາວິສາຫະກິດມີເງິນລົງທຶນຕ່າງປະເທດ(ຫລື FDI) ໄດ້ມີບົດບາດສຳຄັນໃນການພັດທະນາເສດຖະກິດຂອງຫວຽດນາມ. ໃນ ໄລຍະ 25 ປີຜ່ານມາ, ການລົງທຶນຂອງຕ່າງປະເທດໄດ້ກາຍເປັນແຫລ່ງທຶນເພີ່ມເຕີມທີ່ສຳຄັນໃຫ້ແກ່ຍອດຈຳນວນເງິນລົງທຶນແກ່ສັງຄົມ, ປະກອບສ່ວນບໍ່ແມ່ນຫນ້ອຍເຂົ້າໃນການປຸກລຸກແຫລ່ງກຳລັງລົງທຶນ ກໍຄືຊຸກຍູ້ການຫັນປ່ຽນໂຄງປະກອບເສດຖະກິດ ຫວຽດນາມ.
ພາບປະກອບ:internet
|
ຕາມກະຊວງແຜນການ ແລະ ການລົງທຶນຫວຽດນາມແລ້ວ, ໃນໄລຍະ 25 ປີຜ່ານມາ, ນັບແຕ່ເມື່ອ ຫວຽດນາມ ເປີດປະຕູດຶງດູດການລົງທຶນຕ່າງປະເທດມາຮອດປະຈຸບັນ, ມີກວ່າ 14.550 ໂຄງການຍັງມີຜົນສັກສິດຢູ່, ດ້ວຍຍອດຈຳນວນທຶນຈົດທະບຽນບັນລຸເກືອບ 211 ຕື້ USD, ທຶນປະຕິບັດແມ່ນ 97,63 ຕື້ USD, ການເຄື່ອນໄຫວນີ້ໄດ້ກາຍເປັນແຫລ່ງທຶນເພີ່ມເຕີມທີ່ສຳຄັນໃຫ້ແກ່ຍອດຈຳນວນເງິນລົງທຶນສັງຄົມ, ຊຸກຍູ້ການຫັນປ່ຽນໂຄງປະກອບເສດຖະກິດ. ການລົງທຶນໂດຍກົງຂອງຕ່າງປະເທດກໍໄດ້ຮັບການຕີລາຄາວ່າແມ່ນພາກສ່ວນພັດທະນາຢ່າງຂະຫຍັນຂັນເຄື່ອນກວ່າໝູ່ ດ້ວຍລະດັບການເຕີບໂຕ GDP ສູງກວ່າລະດັບການເຕີບໂຕຂອງທັງປະເທດ. ສະເພາະປີ 2012, ພາກສ່ວນນີ້ໄດ້ປະກອບຈຳນວນເງິນປະມານ 3,7 ຕື້ USD ໃຫ້ແກ່ງົບປະມານ, ກວມ 11,9% ຍອດລາຍຮັບງົບປະມານ. ຄຽງຄູ່ກັນນັ້ນ, ການມີຫນ້າຂອງບັນດາວິສາຫະກິດທີ່ມີເງິນລົງທຶນຕ່າງປະເທດໄດ້ສ້າງວຽກເຮັດງານທຳໂດຍົງໃຫ້ແກ່ຄົນງານກວ່າ 2 ລ້ານຄົນ ແລະ ໂດຍທາງອ້ອມແມ່ນປະມານ 3-4 ລ້ານຄົນ, ສົ່ງຜົນກະທົບຢ່າງແຮງເຖິງການຫັນປ່ຽນໂຄງປະກອບແຮງງານຕາມທິດຫັນເປັນອຸດສາຫະກຳ ແລະ ທັນສະໄຫມຂອງຫວຽດນາມ. ພິເສດ ແຫລ່ງທຶນ FDI ມີທີ່ຕັ້ງສຳຄັນໃນຍອດວົງເງິນສົ່ງອອກຂອງທັງປະເທດ. ໄລ່ມາຮອດປີ 2012, ພາກສ່ວນເສດຖະກິດດັ່ງກ່າວກວມ 64% ຍອດວົງເງິນສົ່ງອອກຂອງທັງປະເທດ. ທີ່ກອງປະຊຸມສະຫລຸບ 25 ປີແຫ່ງການລົງທຶນໂດຍກົງຂອງຕ່າງປະເທດຢູ່ ຫວຽດນາມ ຊື່ງດຳເນີນໃນວັນທີ 27/3 ຢູ່ ຮ່າໂນ້ຍ, ທ່ານລັດຖະມົນຕີກະຊວງແຜນການ ແລະ ການລົງທຶນ ຫວຽດນາມ ບູ່ຍກວາງວີງ ຊີ້ແຈງວ່າ:
“ບົດບາດຂອງການລົງທຶນຕ່າງປະເທດສຳລັບ ຫວຽດນາມ ແມ່ນສຳຄັນທີ່ສຸດ. ພວກເຮົາບໍ່ພຽງແຕ່ໄດ້ຮັບແຫລ່ງເງິນລົງທຶນ, ສ້າງວຽກເຮັດງານທຳໃຫ້ແກ່ຄົນງານເພີ່ມການສົ່ງອອກ ແລະ ເພີ່ມລາຍຮັບ, ລາຍຈ່າຍງົບປະມານຕື່ມອີກເທົ່ານັ້ນ ຫາກພວກເຮົາຍັງຮຳ່ຮຽນເອົາບົດຮຽນຫລາຍຢ່າງໃນວຽກງານຄຸ້ມຄອງ, ບໍລິຫານວິສາຫະກິດ ແລະ ຖ່າຍທອດເຕັກໂນໂລຊີ. ອາດເວົ້າໄດ້ວ່າ ການລົງທຶນຕ່າງປະເທດໄດ້ປະກອບສ່ວນປະຕິບັດຈຸດໝາຍຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມໃນຕະຫລອດ 25 ປີຜ່ານມາ.”
ໃນຊຸມປີຜ່ານມາ, ການລົງທຶນຕ່າງປະເທດ FDI ໄດ້ນຳມາເຊິ່ງການປ່ຽນແປງຫລາຍຢ່າງ, ພິເສດບັນດາເຂດເສດຖະກິດຈຸດສຸມຂອງຫວຽດນາມ ຍາມໃດກໍເສີມຂະຫຍາຍປະສິດທິຜົນກະແສເງິນລົງທຶນ. ໃນນັ້ນບັນດາແຂວງ, ນະຄອນພວມແມ່ນຈຸດເດັ່ນໃນການດຶງດູດບັນດານັກລົງທຶນຕ່າງປະເທດໃນໄລຍະຜ່ານມາຄື: ຫາຍຟ່ອງ, ທາຍງວຽນ, ຫວີງຟຸກ, ຫາຍເຢືອງ.. ໃນປີ 2012, ນະຄອນຫາຍຟ່ອງ ດຶງດູດທຶນ FDI ໄດ້ກວ່າ 1,23 ຕື້ USD, ຢືນອັນດັບສອງຂອງທັງປະເທດກ່ຽວກັບການດຶງດູດເງິນລົງທຶນໂດຍກົງຂອງຕ່າງປະເທດ. ບັນດາໂຄງການທີ່ໄດ້ຮັບຫນັງສືອະນຸຍາດໃຫມ່ສ່ວນຫລາຍແມ່ນນອນໃນຂົງເຂດຜະລິດອຸດສາຫະກຳ, ໃນນັ້ນ ມີບາງກຸ່ມບໍລິສັດຊັ້ນນຳຂອງຍີ່ປຸ່ນຄື: ໂຮງງານຜະລິດລົດໂອໂຕ Bridgestone ດ້ວຍຍອດຈຳນວນທຶນເກືອບ 575 ລ້ານ USD, ໂຄງການຜະລິດການຢາຂອງກຸ່ມບໍລິສັດ Nipro Pharma Corporation, ໂຄງການຜະລິດຈັກອັດເອກະສານ, ມືກເຄື່ອງພິມຂອງກຸ່ມບໍລິສັດ Fuji Xerox.. ນີ້ແມ່ນບັນດາໂຄງການເຕັກໂນໂລຊີສູງ ບໍ່ກໍ່ມົນລະພິດສິ່ງແວດລ້ອມ ແລະ ໄລຍະເວລາຜັນຂະຫຍາຍກໍວ່ອງໄວ. ສິ່ງດັ່ງກ່າວສະແດງໃຫ້ເຫັນວ່າ ໃນສະພາບເສດຖະກິດທົ່ວໂລກປະສົບກັບຄວາມຫຍຸ້ງຍາກ, ບັນດານັກລົງທຶນສາກົນຍັງມີຄວາມເຊື່ອໝັ້ນຕໍ່ສະພາບແວດລ້ອມແຫ່ງການລົງທຶນ ແລະ ສືບຕໍ່ໝັ້ນໝາຍຈະລົງທຶນຢ່າງຍາວນານຢູ່ຫວຽດນາມ. ທ່ານ Kyoshiro Ichikawa ຜູ້ອຳນວຍການບໍລິສັດ IBC ຫວຽດນາມ ຈຳກັດ ຖືວ່າ:
“ມີ 3 ປັດໃຈທີ່ສ້າງຄວາມດູດດື່ມ. ນັ້ນແມ່ນແຫລ່ງຊັບພະຍາກອນມະນຸດ. ຢູ່ ຫວຽດນາມ ມີຄົນງານທີ່ມີຄວາມຊຳນານງານຫລາຍຄົນ ພ້ອມດ້ວຍຄົນງານຫນຸ່ມແຫນ້ນເປັນຈຳນຫວນຫລວງຫລາຍ. ນັ້ນແມ່ນບັນດາປັດໄຈຊຶ່ງຍາມໃດວິສາຫະກິດ ຍີ່ປຸ່ນກໍສົນໃຈ. ປັດໄຈທີສອງ ແມ່ນຫວຽດນາມມີສະຖຽນລະພາບທາງດ້ານການເມືອງ. ທີສາມ, ຫວຽດນາມ ມີທີ່ຕັ້ງພູມສາດການເມືອງຢູ່ໃຈກາງຂອງພາກພື້ນອາຊຽນ.”
ໂຮງງານຜະລິດຊີມັງ ງີເຊີນ - ຢູ່ແຂວງ ແທນຮວາ, ໂຄງການລົງທຶນໂດຍກົງຂອງຕ່າງປະເທດ
ພາບ:internet
|
ຄຽງຄູ່ກັນນັ້ນ, ຍັງມີຫລາຍປັດໄຈປະກອບສ່ວນບໍ່ແມ່ນຫນ້ອຍເຂົ້າໃນການດຶງດູດແຫລ່ງທຶນ FDI ຢູ່ບັນດາທ້ອງຖິ່ນ. ທ່ານ ເຢືອງແອງດ່ຽນ, ປະທານຄະນະກຳມະການປະຊາຊົນນະຄອນ ຫາຍຟ່ອງ ໄດ້ແບ່ງປັນບົດຮຽນວ່າ:
“ພວກຂ້າພະເຈົ້າຖືວ່າກຳລັງແຮງພາຍໃນຕັດສິນກຳລັງແຮງພາຍນອກ, ສະນັ້ນ ທາງນະຄອນໄດ້ວາງແຜນຍຸດທະສາດຢ່າງຈະແຈ້ງ. ພວກຂ້າພະເຈົ້າມີຖັນແຖວພະນັກງານ ທີ່ມີຄວາມຮູ້ໃນການບໍລິຫານເສດຖະກິດ ແລະ ສາມາດນຳໃຊ້ພາສາອັງກິດໄດ້ດີ. ພວກຂ້າພະເຈົ້າກໍສຸມໃສ່ປະຕິຮູບດ້ານການບໍລິຫານຢ່າງສູງ ແລະ ມີຄວາມເອົາໃຈໃສ່ເປັນພິເສດເຖິງການກະກຽມພື້ນຖານໂຄງລ່າງ ກໍຄືບຸກເບີກຫນ້າພຽງເພື່ອດຶງດູດບັນດານັກລົງທຶນ. ພວກຂ້າພະເຈົ້າກໍສຸມໃສ່ດຶງດູດບັນດານັກລົງທຶນໃຫຍ່ເຂົ້າມາລົງທຶນ.”
ອາດຈະເວົ້າໄດ້ວ່າ, ໃນຕະຫລອດ 25 ປີດຶງດູູດການລົງທຶນຕ່າງປະເທດເຂົ້າຫວຽດນາມ. FDI ໄດ້ຮັບການນຳໃຊ້ຢ່າງມີປະສິດທິຜົນ, ຊ່ວຍປັບປຸງໂສມຫນ້າເສດຖະກິດຫວຽດນາມບົນເສັ້ນທາງເຊື່ອມໂຍງເຂົ້າກັບເສດຖະກິດໂລກ. ເຖິງຢ່າງໃດກໍຕາມ, ຄຽງຄູ່ກັນນັ້ນ ຍັງມີຂໍ້ຈຳກັດຊື່ງ ຫວຽດນາມ ຕ້ອງແກ້ໄຂເພື່ອເສີມຂະຫຍາຍກຳແຮງພາຍໃນຢ່າງສຸດຂີດ ແລະ ສ້າງຄວາມໄວ້ເນື້ອເຊື່ອໃຈໃຫ້ແກ່ບັນດານັກລົງທຶນຕ່າງປະເທດ. ກ່າວຄຳເຫັນຊີ້ນຳກອງປະຊຸມສະຫລຸບ 25 ປີແຫ່ງການດຶງດູດການລົງທຶນໂດຍກົງຂອງຕ່າງປະເທດ ຢູ່ ຫວຽດນາມ, ທ່ານນາຍົກລັດຖະມົນຕີ ຫງວຽນເຕີຢູງ ຊີ້ແຈງວ່າ:
“ຂ້າພະເຈົ້າຢາກເນັ້ນຫນັກວ່າ: ຕ້ອງສືບຕໍ່ຍູ້ແຮງການປະຕິຮູບບໍລິຫານ ຊື່ງກ່ອນອື່ນໝົດແມ່ນລະບຽບການບໍລິຫານ. ພິເສດຕ້ອງຮີບເຮັ່ງສ້າງບັນດາເອກະສານນິຕິກຳໃຫ້ສົມບູນແບບ, ກົນໄກນະໂຍບາຍກ່ຽວກັບການລົງທຶນຕາມທິດສະດວກກວ່າ ແລະ ມີລັກສະນະແກ້ງແຍ້ງສູງກວ່າເມື່ອທຽບໃສ່ບັນດາປະເທດໃນພາກພື້ນ. ປະຕິຮູບລະບຽບການບໍລິຫານ, ປະຕິຮູບນະໂຍບາຍແນໃສ່ສ້າງຄວາມສະດວກ ເພື່ອດຶງດູດການລົງທຶນຕ່າງປະເທດກໍຄືການລົງທຶນພາຍໃນປະເທດ”
ໃນໄລຍະ 25 ປີແຫ່ງການດຶງດູດເງິນລົງທຶນໂດຍກົງຂອງຕ່າງປະເທດເຂົ້າຫວຽດນາມ ບັນລຸໄດ້ຜົນງານຫລາຍຢ່າງ, ປະກອບສ່ວນດີພໍສົມຄວນໃຫ້ແກ່ພື້ນຖານເສດຖະກິດຂອງປະເທດຊາດ. ປີ 2013 ໄດ້ຮັບຖືວ່າຈະແມ່ນປີປະສົບກັບຄວາມຫຍຸ້ງຍາກສຳລັບພື້ນຖານເສດຖະກິດຂອງຫລາຍປະເທດໃນໂລກ, ເຖິງຢ່າງໃດກໍຕາມ ດ້ວຍບັນດາຄວາມສາມາດບົ່ມຊ້ອນພັດທະນາຂອງຕົນ, ຫວຽດນາມ ຍັງຄົງແມ່ນສະພາບແວດລ້ອມແຫ່ງການລົງທຶນອັນດູດດື່ມ ແລະ ໜ້າໄວ້ເນື້ອເຊື່ອໃຈສຳລັບບັນດານັກລົງທຶນຕ່າງປະເທດຄືດັ່ງຄຳຢືນຢັນຂອງທ່ານນາຍົກລັດຖະມົນຕີ ຫງວຽນເຕີນຢູງ ທີ່ວ່າ: ຫວຽດນາມ ໝັ້ນໝາຍຈະພ້ອມກັບບັນດານັກລົງທຶນຕ່າງປະເທດຮ່ວມແຮງຮ່ວມໃຈຜ່ານຜ່າສິ່ງທ້າທາຍ, ຄວາມຫຍຸ້ງຍາກເພື່ອພ້ອມກັນແບ່ງປັນຜົນປະໂຫຍດ ແລະ ພ້ອມກັນປະສົບຜົນສຳເລັດ./.