ດັ່ງທີ່ບັນດາທ່ານໄດ້ຮູ້ແລ້ວວ່າ ແບ້ງກ້ວນ ແມ່ນອາຫານເຍື່ອງໜຶ່ງທີ່ຊາວຫວຽດນາມເຄີຍກິນໃນຍາມເຊົ້າ. ເມື່ອໄດ້ກິນ ແບ້ງກ້ວນພ້ອມກັບໝູຢໍ ຈຳ້ກັບນຳ້ປາໂດຍໃສ່ໝາກເຜັດ, ນ້ຳໝາກນາວ ແລະ ມີເຄື່ອງຫອມແມງດາ, ຈະສ້າງຄວາມປະທັບໃຈໃຫ້ຜູ້ບໍລິໂພກ.
ເວລາ8ໂມງຕອນເຊົ້າຂອງວັນອາທິດ,ຮ້ານນ້ອຍໆຂາຍ ແບ້ງກ້ວນແທງຈີຂອງນາງຮ່ວາຊຶ່ງຕັ້ງຢູ່ຕະຫຼາດຈ້າຍກັງໄດ້ມີແຂກມານັ່ງກິນເຕັມ. ຮ້ານຂາຍ ແບ້ງກ້ວນນີ້ ມີໂຕະຕັ່ງພຽງ 4 ຊຸດເພື່ອຮັບໃຊ້ແຂກເທົ່ານັ້ນ. ເມື່ອແຂກຊຸດນີ້ ມາກິນແລ້ວ ກັບເມືອ, ແຂກຄົນອື່ນໆກໍມາໃໝ່ຢ່າງຕໍ່ເນື່ອງ. ຮ້ານນ້ອຍໆຂາຍ ແບ້ງກ້ວນແທງຈີຂອງນາງຮ່ວາ ແມ່ນຮ້ານທີ່ລຽບງາຍທີ່ສຸດ, ຢູ່ເທິ່ງປະຕູໃຫຍ່ໜ້າບ້ານ ແມ່ນແຜ່ນປ້າຍດ້ວຍແຖວຕົວໜັງສື “ແບ້ງກ້ວນແທງຈີ”ຊຶ່ງເປັນການບອກເຕືອນວ່າ ຢູ່ຮ້ານນີ້ມີ ແບ້ງກ້ວນຂາຍ. ນາງ ຮ່ວາປີນີ້ມີອາຍຸກວ່າ 40 ປີແລ້ວ, ນາງໄດ້ປະກອບອາຊີບຂາຍ ແບ້ງກ້ວນຢູ່ຕະຫຼາດແຫ່ງນີ້ໄດ້ເກືອບ 10 ປີແລ້ວ. ແຕ່ລະມື້, ນາງພ້ອມກັບຜົວຂາຍ ແບ້ງກ້ວນ ຮັບໃຊ້ແຂກ, ໃນມື້ພັກ, ກໍມີລູກ 2 ຄົນມາຊ່ວຍພໍ່ແມ່ຮັບໃຊ້ແຂກ.
ມືໃສ່ສົບມືດ້ວຍຢ່າງນີລອນ, ນາງຮ່ວາເອົາແຜ່ນແບ້ງກ້ວນບ່າງໆ ໃຫຍ່ຊຳ່ຝາມື ຕັດໃສ່ຈານ, ແລ້ວເອົາ ຂົ້ວຫົວຜັກຫອມບົວແຫ້ງໃສ່ຕື່ມ ພ້ອມດ້ວຍຜັກຫອມຕື່ມອີກ. ມີແຂກຫຼາຍຄົນ ກໍມັກເອົາຂົ້ວຫົວຜັກຫອມບົວແຫ້ງໃສ່ນຳ້ຈິ້ມພ້ອມດ້ວຍໝູຢໍຕື່ມອີກ. ແຕ່ລະມື້, ໃນເວລາ 6 ໂມງເຊົ້າ, ນາງຮ່ວາເລີ່ມເປີດປະຕູຮ້ານເພື່ອ ຂາຍແບ້ງກ້ວນຮັບໃຊ້ແຂກ, ແຕ່ຮອດ 9 ໂມງ, ຮ້ານຂອງນາງໄດ້ຂາຍ ແບ້ງກ້ວນເກືອບໝົດ. ນາງຮ່ວາ ແມ່ນຊາວບ້ານແທງຈີ ເມືອງ ຮ່ວາງມາຍ, ຮ່າໂນ້ຍ. ເພື່ອມີ ແບ້ງກ້ວນຂາຍໃນຍາມເຊົ້າແຕ່ລະມື້, ນາງພ້ອມດ້ວຍຄອບຄົວຕ້ອງກະກຽມແຕ່ຕອນຄຳ່ຂອງມື້ກ່ອນ. ອ້າຍລອງ ຜູ້ເປັນຜົວຂອງນາງຮ່ວາໃຫ້ຮູ້ວ່າ:
“ຕ້ອງເລືອກເອົາເຂົ້າສານຊະນິດເມື່ອຫຸ້ງເຂົ້າຕ້ອງແຫ້ງ, ບໍ່ຄວນເລືອກເອົາຊະນິດໜຽວເດີ. ກ່ອນທີ່ຈະບົດເຂົ້າສານ, ຕ້ອງໝ່າເຂົ້າປະມານ 3 ຊົວໂມງ, ແລ້ວປະໃຫ້ແຫ້ງ, ຕໍ່ຈາກນັ້ນ ຈຶ່ງນຳໄປບົດ. ເມື່ອບົດແລ້ວ, ກໍຕ້ອງຕື່ມແປງ້ມັນອີກໜ້ອຍໜຶ່ງ ຈຶ່ງຈະພາໃຫ້ ແບ້ງກ້ວນ ຂາວ ແລະ ໜຽວກວ່າ. ”
ແບ້ງກ້ວນທີ່ຫາກໍຖືກໜຶ້ງ, ຕ້ອງວາງເທິ່ງໃບຕອງກ້ວຍ, ແລ້ວເອົາ ຂົ້ວຫົວຜັກຫອມບົວແຫ້ງໃສ່ເທິ່ງ ເພື່ອເຮັດໃຫ້ ແບ້ງກ້ວນມີກິນຫອມ. ມື້ໃດກໍເຊັ່ນດຽວກັນ, ຮ້ານຂາຍ ແບ້ງກ້ວນແທງຈີຂອງນາງຮ່ວາ ກໍສາມາດຂາຍ ແບ້ງກ້ວນ ໄດ້ 50 ໂລ. ນອກຈາກຂາຍຢູ່ເຮືອນແລ້ວ, ນາງຮ່ວາຍັງຂາຍສົ່ງໃຫ້ບັນດາພັດທະຄານ ແລະ ໂຮງແຮມອີກດ້ວຍ. ນາງຮ່ວາ ເວົ້າວ່າ :
“ອາຊີບຂາຍ ແບ້ງກ້ວນ ຂອງຂ້າພະເຈົ້າ ແມ່ນສືບທອດມາໃນວົງຕະກູນ. ຮອດລຸ່ນນາງຮ່ວາ ແມ່ນຄົນລຸ່ນທີ 4 ແລ້ວ. ອາຊີບຂາຍ ແບ້ງກ້ວນ ກໍສາມາດນຳມາເຊິ່ງລາຍຮັບໃຫ້ທຸກໆຄົນໃນຄອບຄົວ. ເຖິງວ່າ ລາຍຮັບບໍ່ສູງ, ແຕ່ກໍໄດ້ຮັບເປັນປົກກະຕິ”
ແຕ່ລະເດືອນ, ລາຍຮັບຈາກການຂາຍ ແບ້ງກ້ວນຂອງຄອບຄົວນາງແມ່ນ 20 ລ້ານດົງ ເທົ່າກັບ 8 ລ້ານກີບ. ສ່ວນລຸງ ຈູຕ້ຽນແຮງ ທັງແມ່ນຜູ້ຢູ່ບ້ານໃກ້ຄຽງ, ທັງແມ່ນແຂກມາກິນປະຈຳໃຫ້ຮູ້ວ່າ :
“ຕອນເຊົ້າໄດ້ກິນ ແບ້ງກ້ວນແທງຈີຢູ່ຮ້ານນີ້ແມ່ນແຊບຫຼາຍ. ຕາມຂ້າພະເຈົ້າແລ້ວ, ແບ້ງກ້ວນຈະແຊບຫຼືບໍ່ ແມ່ນຂຶ້ນກັບນຳ້ຈິ້ມ, ຕ້ອງເອົາ ຂົ້ວຫົວຜັກຫອມບົວແຫ້ງໃສ່ນຳ້ຈິ້ມ ກໍແຊບຫຼາຍ”
ສ່ວນນາງ ຢາງ ແຂກເຄີຍມາກິນ ແບ້ງກ້ວນຢູ່ຮ້ານນາງຮ່ວາເປີດເຜີຍວ່າ :
“ຂ້າພະເຈົ້າເຫັນວ່າ ແບ້ງກ້ວນຢູ່ຮ້ານນີ້ ແຊບກວ່າເມື່ອທຽບໃສ່ຮ້ານອື່ນ, ພິເສດຢູ່ຮ້ານນີ້, ມີແມງດາປີ້ງທັງໂຕ ໃສ່ນຳ້ຈິ້ມ, ດັ່ງນັ້ນ ກໍຫອມກວ່ານຳ້ຈິ້ມຂອງຮ້ານອື່ນໆທີ່ໃສ່ຫົວນ້ຳຫອມ”
----------------------------------
ທ່ານຜູ້ຟັງທີ່ເຄົາລົບ ! ຖ້າທ່ານຢາກປຸງແຕ່ງ ແບ້ງກ້ວນ ໃຫ້ 4 ຄົນກິນນັ້ນ, ກໍຄວນກະກຽມວັດຖຸດິບດັ່ງນີ້:
- ແປ້ງເຂົ້າສານ 0, 2 ໂລ
- ເຄື່ອງຫອມລວມມີ : ນຳ້ປາ, ຂົ້ວຫົວຜັກຫອມບົວແຫ້ງ, ນຳ້ສົ້ມ, ້ໝາກນາວ, ໝາກເຜັດ.
ການປຸງແຕ່ງ: ເອົາແປ້ງເຂົ້າສານ, ພ້ອມດ້ວຍແປ້ງມັນໜ້ອຍໜຶ່ງໃສ່ຖ້ວຍໃຫຍ່, ແລ້ວກໍຖອກນຳ້ໃສ່ຈົນໜຽວ. ປະໄວ້ປະມານ 5 ນາທີ, ແລ້ວກໍເອົານຳ້ມັນພືດໃສ່ໜ້ອຍໜຶ່ງ, ແລ້ວກໍໃຊ້ຈອງຕັກເອົາໃສ່ໝໍ້ເພື່ອໜຶ້ງ. ເມື່ອ ແບ້ງກ້ວນ ສຸກແລ້ວ, ກໍໃຊ້ໄມ້ຖູ່ເອົາຂຶ້ນໃສ່ຈານ. ສຸດທ້າຍບັນດາທ່ານຕ້ອງແຕ່ງນຳ້ຈິ້ມ ດ້ວຍນຳ້ປາ, ນຳ້ຕານ, ໝາກເຜັດ, ໝາກນາວ, ຖ້າມີປີ້ງແມງດາໃສ່ຕື່ມກໍຍິ່ງຫອມ. ຫວັງວ່າ ພວກທ່ານຈະກິນແຊບ.