ເຂົ້າໜົມແປ້ງມັນແມ່ນເຂົ້າໜົມຊະນິດທີ່ເຮັດດ້ວຍແປ້ງມັນ, ເມື່ອໜຶ້ງສຸກ, ຊັ້ນນອກທີ່ເຮັດດ້ວຍແປ້ງມັນແມ່ນໃສທີ່ສຸດ, ເຮັດໃຫ້ຜູ້ບໍລິໂພກສາມາດເຫັນໄສ້ຂອງເຂົ້າໜົມ. ໄສ້ຂອງເຂົ້າໜົມແປ້ງມັນ ກໍເຄີຍປຸງແຕ່ງດ້ວຍກຸ້ງພ້ອມກັບຊີ້ນໝູ ແລະ ເກືອ. ເຂົ້າໜົມແປ້ງມັນຖືກຫໍ່ດ້ວຍໃບຕອງກ້ວຍຫຼືບໍ່ຫໍໍ່ກໍໄດ້, ແລ້ວກໍໜຶ້ງໃຫ້ສຸກ. ນີ້ແມ່ນເຍື່ອງອາຫານມີຢູ່ທົ່ວໄປໃນບັນດາແຂວງຕອນເໜືອຂອງພາກກາງຫວຽດນາມ, ພິເສດແມ່ນນະຄອນເຫ້ວ. ປະຈຸບັນ, ອາຫານເຍື່ອງນີ້ໄດ້ປະກົດມີຢູ່ທຸກແຫ່ງໃນທົ່ວປະເທດຍ້ອນຄວາມແຊບຂອງມັນ ແລະ ແທດເໝາະກັບຄວາມນິຍົມຂອງຫຼາຍໆຄົນ. ຢູ່ຮ່າໂນ້ຍ, ຮ້ານຂາຍເຂົ້າໜົມແປ້ງມັນຂອງນາງ ແທງ, ເຖິງວ່າພຽງແຕ່ແມ່ນຮ້ານຂາຍບົນທາງຍ່າງກໍຕາມ, ແຕ່ມີຜູ້ຄົນມາກິນຢ່າງຫຼວງຫຼາຍ.
ເຍື່ອງອາຫານເຂົ້າໜົມແປ້ງມັນ |
ແຕ່ 5 ປີມານີ້, ຮອດເວລາປະມານ 3 ໂມງເຄິ່ງໃນແຕ່ລະວັນ, ນາງແທງກໍເລີ່ມກະກຽມຂາຍເຂົ້າໜົມ. ນາງຂາຍບົນທາງຍ່າງໃນຖະໜົນ ຫຼີເທື່ອງກຽດ, ຮ່າໂນ້ຍ, ຮ້ານຂອງນາງ ພຽງແຕ່ແມ່ນລົດເຂັນ 3 ລໍ້ຄັນໜຶ່ງພ້ອມດ້ວຍໂຕະນ້ອຍໜ່ວຍໜຶ່ງຍາວປະມານ 1 ແມັດ. ນອກຈາກວັດຖຸດິບບາງຢ່າງທີ່ວາງເທິງໜ້າໂຕະ, ມີເຕົາແກັສນ້ອຍຖືກວາງກ້ອງໂຕະ. ຂ້າງເຕົາແກັສ ແມ່ນໝໍ້ເຂົ້າໜົມແປ້ງມັນພວມສຸກຮ້ອນ. ນາງແທງເປີດເຜີຍວ່າ :
“ ຂ້າພະເຈົ້າກິນເຂົ້າໜົມແປ້ງມັນຄັ້ງທຳອິດແມ່ນຄາວຂ້າພະເຈົ້າມີອາຍຸ 15 ປີ, ເມື່ອໄດ້ກິນເທື່ອທຳອິດ, ຂ້າພະເຈົ້າຕິດເລີຍ, ດັ່ງນັ້ນເມື່ອມີແຜນເປີດຮ້ານອາຫານ, ຂ້າພະເຈົ້າຄິດເລີຍເຖິງເຂົ້າໜົມແປ້ງມັນ. ເມື່ອຫໍ່ເຂົ້າໜົມ ກໍຕ້ອງມີຄວາມຄ່ອງແຄ້ວ, ຕ້ອງຮີດແປ້ງໃຫ້ບາງໆ ແລະ ສະໝ່ຳສະເໝີ, ຈຶ່ງເຮັດໃຫ້ເຂົ້າໜົມງາມຕາ. ເຂົ້າໜົມຊະນິດນີ້ ມີຄວາມດູດດື່ມຢູ່ບ່ອນວ່າ ເມື່ອໜຶ້ງໃຫ້ສຸກ, ກໍສາມາດເຫັນໄດ້ໄສ້ຂອງມັນ, ເພາະສະນັ້ນ, ຂັ້ນຕອນປຸງແຕ່ງໄສ້ຂອງມັນ ກໍຕ້ອງເຮັດຢ່າງລະອຽດ, ເປັນຕົ້ນແມ່ນການປຸງແຕ່ງກຸ້ງ, ຕ້ອງເລືອກເອົາກຸ້ງສົດ, ທຸກໂຕຕ້ອງສະເໝີກັນ, ເມື່ອຂົ້ວກຸ້ງ ກໍຕ້ອງຂົ້ວໃຫ້ຂຶ້ນສີແດງ ຈຶ່ງຈະເຫັນງາມຕາ”
ຊັ້ນນອກຂອງເຂົ້າໜົມແມ່ນຕ້ອງເຮັດດ້ວຍແປ້ງມັນ, ດັ່ງນັ້ນເມື່ອໜຶ້ງໃຫ້ສຸກ ຈຶ່ງໃສ. ເມື່ອຄົນແປ້ງ ແມ່ນຕ້ອງໃຊ້ນ້ຳຮ້ອນຈຶ່ງສາມາດປັ້ນເຂົ້າໜົມໄດ້. ນາງແທງໃຫ້ຮູ້ວ່າ :
“ ເມື່ອປັ້ນເຂົ້າໜົມແລ້ວ, ເຂົາເຈົ້າມັກຫໍ່ດ້ວຍໃບຕອງກ້ວຍ. ແຕ່ຂ້າພະເຈົ້າບໍ່ມັກຫໍ່ດ້ວຍໃບຕອງກ້ວຍ ເພາະເມື່ອຫໍ່ແລ້ວ ແມ່ນບໍ່ເຫັນໄສ້ຂອງມັນໄດ້. ”
ແຕ່ລະເທື່ອ, ເມື່ອມີແຂກມາກິນ, ນາງແທງ ຈຶ່ງຄີບເອົາເຂົ້າໜົມໃສ່ຖ້ວຍ, ທຳມະດາແລ້ວ, ແຕ່ລະຖ້ວຍມີເຂົ້າໜົມ 5 ອັນໃຫຍ່ຊ່ຳ 3 ນິ້ວມື , ແຕ່ລະອັນຖືກຕັດເຄິ່ງ, ແລ້ວກໍຕ້ອງເພີ່ມຜັກຫອມ ແລະ ນ້ຳແຈວຖືກປຸງແຕ່ງດ້ວຍນ້ຳປາ, ນ້ຳສົ້ມ, ນ້ຳຕານ, ໝາກເຜັດ ແລະ ຖົ່ວດິນຂົ້ວ. ນາງ ບິກ , ຜູ້ເຄີຍມາກິນເຂົ້າໜົມແປ້ງມັນຢູ່ຮ້ານນາງແທງໃຫ້ຮູ້ວ່າ :
“ ຢູ່ບັນດາຮ້ານຂາຍເຂົ້າໜົມແປ້ງມັນທົ່ວໄປ, ເຈົ້າຂອງຮ້ານມັກປຸ່ງແຕ່ງນ້ຳຈ້ຳເຜັດຫຼາຍ ຕາມລົດຊາດອາຫານພາກກາງ. ຍ້ອນເຮົາບໍ່ມັກກິນເຜັດຫຼາຍ, ດັ່ງນັ້ນ ມັກກິນເຂົ້າໜົມຢູ່ຮ້ານນີ້ທີ່ສຸດ ເພາະນ້ຳຈ້ຳ ຖືກປຸງແຕ່ງແຊບຫຼາຍ. ເຮົາມັກທີ່ສຸດ ແມ່ນນ້ຳຈ້ຳມີຖົ່ວດິນຂົ້ວ ແລະ ຕຳໃຫ້ແຫຼກ ”
ເຖິງວ່າອາກາດຮ້ອນເອົ້າກໍຕາມ, ແຕ່ມື້ໃດກໍເຊັ່ນດຽວກັນ, ນາງແທງກໍສາມາດຂາຍເຂົ້າໜົມແປ້ງມັນໄດ້ປະມານ 200 ອັນ. ໃນຊຸມມື້ໜາວເຢັນ, ເຂົ້າໜົມແປ້ງມັນກໍໄດ້ຂາຍດີ, ຂາຍຫຼາຍທົບ 2 ເທົ່າ. ເຂົ້າໜົມແປ້ງມັນຢູ່ແຕ່ລະເຂດກໍແຕກຕ່າງກັນ, ແຕ່ຖ້າຫາກພວກເພື່ອນມີໂອກາດມາຢາມຮ່າໂນ້ຍ ຢາລືມແວ່ຮ້ານນາງແທງ ຊິມລົດຊາດພິເສດຂອງເຂົ້າໜົມແປ້ງມັນແດ່ເດີ້.
_________________________
ທ່ານຜູ້ຟັງທີ່ເຄົາລົບ!
ຖ້າຫາກພວກເພື່ອນຢາກປຸງແຕ່ງເຂົ້າໜົມແປ້ງມັນນັ້ນ, ພວກທ່ານຕ້ອງກະກຽມວັດຖຸດິບດັ່ງນີ້ :
- ແປ້ງມັນ : 400 ກະຣາມ
- ຊີ້ນໝູ 3 ຊັ້ນ : 100 ກະຣາມ ພ້ອມກັບເກືອ, ໝາກພີກໄທ, ໝາກເຜັດ, ນ້ຳປາ, ກຸ້ງສົດ, ເຫັດສະນຸ່ນ, ຜັກຫອມບົ່ວ, ຜັກຫອມປ້ອມ, ນ້ຳສົ້ມ…
ວິທີເຮັດໄສ້ເຂົ້າໜົມ : ຕ້ອງເລືອກເອົາກຸ້ງສົດຢູ່ຕາມແມ່ນ້ຳ ໃຫຍ່່ຊ່ຳນິ້ວມື. ເອົາຊີ້ນໝູ 3 ຊັ້ນຟັກກັບເຫັດສະນຸ່ນໃຫ້ມຸ່ນ ແລ້ວກໍເອືອບກັບເກືອ, ໝາກພີກໄທ, ນ້ຳປາ, ຜັກຫອມບົ່ວ. ຫົວຜັກບົ່ວແຫ້ງຕ້ອງຊອຍໃຫ້ບາງ, ແລ້ວກໍນຳໄປຂົ້ວເຄິ່ງໜຶ່ງ, ສ່ວນເຄິ່ງໜຶ່ງຕ້ອງຟັກໃຫ້ມຸ່ນເພື່ອຂົ້ວເຮັດໄສ້. ຕໍ່ຈາກນັ້ນ ຕ້ອງເອົາທັງໝົດໄປຂົ້ວ, ເມື່ອເຫັນເກືອບສຸກແລ້ວ ກໍເອົາກຸ້ງໃສ່ , ເມື່ອເຫັນກຸ້ງມີສີແດງ ກໍມອດໄຟ. ພວກເຮົາໄດ້ສຳເລັດການເຮັດໄສ້ຂອງເຂົ້າໜົມແລ້ວ.
ສຳລັບການເຮັດຊັ້ນນອກຂອງເຂົ້າໜົມ, ພວກເຮົາເອົາແປ້ງມັນໃສ່ໝໍ້, ແລ້ວກໍເອົາເກືອໃສ່ເຄິ່ງບວງ . ຫຼັງຈາກນັ້ນ ຖອກນ້ຳຮ້ອນໃສ່ ແລະ ຄົນໃຫ້ສະໝ່ຳສະເໝີ. ແລ້ວກໍເອົາແປ້ງເທື່ອລະໜ້ອຍໃສ່ຝາມື ເພື່ອຍັດໄສ້ໃສ່, ໃຊ້ນິ້ວມືປັ້ນເປັນຮູບໝາກຖົ່ວແປບ. ພາຍຫຼັງທີ່ປັ້ນຮຽບຮ້ອຍແລ້ວ, ພວກເຮົານຳໄປໜຶ້ງໃຫ້ສຸກ. ສຸດທ້າຍພວກເຮົາເຮັດນ້ຳແຈ່ວ ດ້ວຍນ້ຳປາ, ນ້ຳສົ້ມ, ນ້ຳຕານ, ໝາກເຜັດ ແລະ ຫົວຜັກທຽມ. ແລ້ວກໍເປັນອັນສຳເລັດສຳລັບເຂົ້າໜົມແປ້ງມັນ. ຫວັງວ່າພວກເພື່ອນຈະເຮັດກິນແຊບ.