ໃນປຶ້ມແນະນຳກ່ຽວກັບອາຫານຫວຽດນາມນັ້ນ, ມີເຍື່ອງອາຫານນັບຮ້ອຍເຍື່ອງທີ່ແຕກຕ່າງກັນ. ອາຫານແຕ່ລະເຍື່ອງ ກໍລ້ວນແຕ່ສ້າງຄວາມປະທັບໃຈໃຫ້ແກ່ແຂກຄົນທັງຫຼາຍ. ໃນນັ້ນ, ເຍື່ອງອາຫານເຂົ້າປຸ້ນເຕົາຮູ້ຈືນຈ້ຳກະປິ ກໍເປັນອາຫານເຍື່ອງໜຶ່ງໄດ້ຮັບຄວາມນິຍົມຂອງຊາວຮ່າໂນ້ຍ.
ເມື່ອໄປຮອດທາງຮ່ອມ ເຟິດໂລກ, ບັນດາເພື່ອນຕ້ອງຍ່າງເລິກເຂົ້າປະມານ 30 ແມດ, ພວກເພື່ອນຈະເຫັນຮ້ານເຂົ້າປຸ້ນເຕົາຮູ້ຈືນຈ້ຳກັບນ້ຳແຈວເຮັດດ້ວຍກະປິ ຈຸງເຮືອງ ຂອງນາງ ເຈີນທິເຮືອງ. ຮ້ານນີ້ມີເນື້ອທີ່ປະມານ 20 ຕາແມດ, ສາມາດວາງໂຕະຕັງ່ໄດ້ພຽງ 7 ຊຸດເທົ່ານັ້ນ.
ເຍື່ອງອາຫານເຂົ້າປຸ້ນເຕົາຮູ້ຈືນຈ້ຳກັບນ້ຳແຈວເຮັດດ້ວຍ ກະປິ ແມ່ນມີຂາຍໃນທຸກເວລາໃນປີ. ລາຄາເຂົ້າປຸ້ນເຕົາຮູ້ຈືນຈ້ຳກະປິແຕ່ລະຊຸດແມ່ນ 20.000 ດົງ. ນາງ ເຈີນທິເຮືອງ ເຈົ້າຂອງຮ້ານໃຫ້ຮູ້ວ່າ : ເພື່ອປຸງແຕ່ງ ເຍື່ອງອາຫານນີ້ໃຫ້ແຊບ, ນາງພ້ອມກັບຄົນຮັບໃຊ້ຕ້ອງຕື່ນນອນແຕ່ 4-5 ໂມງເຊົ້າເພື່ອກະກຽມ. ຈຸດເວລາທີ່ແຂກມາກິນຫຼາຍກວ່າໝູ່ແມ່ນ ຍາມຕອນທຽງ ແລະ ຕອນແລງ. ຮ້ານຂອງນາງ ເຮືອງ ມີຊື່ສຽງແມ່ນຮ້ານທີ່ມີເຂົ້າປຸ້ນແຊບກ່ວາໝູ່ໃນບໍລິເວນນີ້. ນາງ ເຈີນທິເຮືອງ ເປີດເຜີຍວ່າ :
“ ເຄັດລັບທີ່ສືບທອດກັນໃນຄອບຄົວຂອງຕົນ, ນັ້ນແມ່ນຕ້ອງເລືອກເອົາກະປິສົດ, ສະເພາະເຕົາຮູ້, ເຮົາຕ້ອງເລືອກເອົາຖົ່ວເຫຼືອງຊະນິດດີກວ່າໝູ່ເພື່ອເຮັດເຕົາຮູ້, ເມື່ອຈືນຈະກອບ ແລະ ຫອມດີ, ແຕ່ຍັງຄົງສາມາດຮັກສາໄດ້ໄສ້ຂອງມັນ. ສຳລັບເຂົ້າປຸ້ນ, ເຮົາຕ້ອງສັ່ງຊື້ເຂົ້າປຸ້ນຈາກໝູ້ບ້ານຜະລິດເຂົ້າປຸ້ນ ຟູ້ໂດ ທີ່ມີຊື່ສຽງ. ”
ນອກຈາກນັ້ນ, ເຄັດລັບທີ່ສຳຄັນກວ່າໝູ່ ເພື່ອສາມາດປຸງແຕ່ງເຍື່ອງອາຫານເຂົ້າປຸ້ນເຕົາຮູ້ຈືນຈ້ຳ ນ້ຳແຈວເຮັດດ້ວຍ ກະປິໃຫ້ແຊບນັ້ນ, ແມ່ນຂອດປຸງແຕ່ງນ້ຳແຈວດ້ວຍກະປິ, ຕ້ອງເລືອກຊື້ເອົາກະປິສົດແນວດີ, ແລ້ວໃສ່ນ້ຳຕານ, ໝາກເຜັດ, ໝາກນາວໃຫ້ພໍກິນ. ຍ້ອນເຫດນີ້ເອງ, ຍາມໃດນາງເຮືອງກໍຕ້ອງລົງມືປຸງແຕ່ງນ້ຳແຈວຊະນິດພິເສດນີ້. ລຸງຕ້ຽນ ແຂກເຄີຍມາກິນ ເຂົ້າປຸ້ນເຕົາຮູ້ຈືນຈ້ຳ ນ້ຳແຈວເຮັດດ້ວຍ ກະປິ ຢູ່ຮ້ານຂອງນາງເຮືອງ ໃຫ້ຮູ້ວ່າ :
“ ຂ້າພະເຈົ້າໄດ້ກິນ ເຂົ້າປຸ້ນເຕົາຮູ້ຈືນຈ້ຳກະປິຢູ່ຫຼາຍບ່ອນແລ້ວ, ແຕ່ຂ້າພະເຈົ້າເຫັນວ່າ ຢູ່ຮ້ານນີ້ ແຊບຫຼາຍ, ສຳຄັນກວ່າໝູ່ ແມ່ນການປຸງນ້ຳແຈວດ້ວຍກະປິ. ຂ້າພະເຈົ້າຮູ້ສຶກວ່າ ກະປິຂອງຮ້ານນີ້ ແມ່ນຊະນິດພິເສດ ໄດ້ຮັບການເລືອກຊື້ຢ່າງລະອຽດທີ່ສຸດ. ການປຸງນ້ຳແຈວ ແຊບຫຼາຍ, ສ່ວນເຕົາຮູ້ກໍຫອມ ແລະ ຈືນກອບດີ, ນັບທັງເຂົ້າປຸ້ນ ກໍແຊບຫຼາຍ ”
ເຂົ້າປຸ້ນເຕົາຮູ້ຈືນຈ້ຳກະປິ ແມ່ນເຍື່ອງອາຫານພື້ນເມືອງ , ສຳລັບການປຸງແຕ່ງແມ່ນງ່າຍດາຍ, ມີພຽງແຕ່ເຂົ້າປຸ້ນຈານໜຶ່ງ, ເຕົາຮູ້ຈືນຈານໜຶ່ງ ພ້ອມກັບນ້ຳແຈວປຸງແຕ່ງດ້ວຍກະປິ ແລະ ຜັກຫອມຫໍ່, ຜັກອີ່ຕູ່, ຜັກເຕ້ຍໂຕ ແລະ ກິງເຢີ້ຍ ກໍພໍແລ້ວ. ແຕ່ໃນປະຈຸບັນ ຕາມຄວາມນິຍົມຂອງຜູ້ບໍລິໂພກນັ້ນ, ນາງເຮືອງກໍມີຂອງກິນຕື່ມອີກບາງຢ່າງເພື່ອກິນນຳເຂົ້າປຸ້ນ ເຊັ່ນ : ໝູຢໍເຂົ້າເໝົາ, ຊີ້ນຂາໝູ, ເຄື່ອງໃນໝູ…ເພື່ອໃຫ້ເຍື່ອງອາຫານນີ້ເພີ່ມຄວາມອຸດົມສົມບູນຂຶ້ນ. ປ້າຖີວ ແຂກມາກິນປະຈຳຢູ່ຮ້ານເຂົ້າປຸ້ນເຕົາຮູ້ຈືນຈ້ຳກັບກະປິ ຈຸງເຮືອງ ໃຫ້ຮູ້ວ່າ :
“ ແຕ່ລະມື້, ຂ້າພະເຈົ້າເຄີຍມາກິນເຂົ້າປຸ້ນຢູ່ຮ້ານຂອງນາງເຮືອງ, ຂ້າພະເຈົ້າ ມັກສັ່ງຕື່ມຊີ້ນຂາໝູ ແລະ ໝູຢໍເຂົ້າເໝົາເພື່ອເພີ່ມຄວາມແຊບໃຫ້ເຍື່ອງອາຫານນີ້. ລາຄາຢູ່ຮ້ານນີ້ ກໍເໝາະສົມ. ບາງເທື່ອ ຂ້າພະເຈົ້າ ກໍໄດ້ຊວນໝູ່ມາກິນນຳ ”
ເບິ່ງຄືວ່າ ສຳລັບບາງຄົນ, ເຍື່ອງອາຫານເຂົ້າປຸ້ນເຕົາຮູ້ຈືນຈ້ຳກະປິ ແມ່ນບໍ່ມັກກິນຍ້ອນບໍ່ເຄີຍກິນກະປິ, ແຕ່ຖ້າຫາກລອງກິນເບິ່ງເທື່ອໜຶ່ງ, ແນ່ນອນວ່າ ຍາກຈະລືມໄດ້.
----------------------------------
ທ່ານຜູ້ຟັງທີ່ເຄົາລົບ !
ເພື່ອປຸງແຕ່ງເຍື່ອງອາຫານເຂົ້າປຸ້ນເຕົາຮູ້ຈືນຈ້ຳກະປິໃຫ້ 4 ຄົນກິນ, ພວກເພື່ອນກະກຽມວັດຖຸດິບດັ່ງນີ້ :
- ເຕົາຮູ້ຂາວ: 4 ຕອນ.
- ຊີ້ນຂາໝູ, 3 ຊັ້ນ : 0,4 kg
- ໝູຢໍເຂົ້າເໝົາ :0,2 kg
- ເຂົ້າປຸ້ນ : 0,5 kg
- ຜັກຫອມຫໍ່, ຜັກບົວລະພາ, ຜັກອີ່ຕູ່, ຜັກເຕ້ຍໂຕ ແລະ ກິງເຢີ້ຍ
ການປຸງແຕ່ງນ້ຳແຈວ :
- ກະປິສົດ : 2 ບ່ວງ
- ນ້ຳຕານ : 1 ບ່ວງ
- ໝາກນາວ : 1 ໜ່ວຍ
- ຫົວຜັກຫອມບົວແຫ້ງ: ຫົວໜຶ່ງ
- ໝາກເຜັດ : 2-3 ໜ່ວຍ ພ້ອມກັບເຫຼົ້າຂາວ, ນ້ຳມັນພືດເລກໜ້ອຍ.
ຂອດການປຸງແຕ່ງ :
ທຳອິດແມ່ນການຈືນເຕົາຮູ້, ພວກເພື່ອນຄວນຕັດເຕົາຮູ້ເປັນຕອນນ້ອຍ, ແລ້ວ ນຳເອົາໄປຈືນດ້ວຍນຳມັນພືດ. ເວລາຈີນ, ພວກເພື່ອນຄວນປັບໄຟຄ່ອຍໆເພື່ອໃຫ້ເຕົາຮູ້ກອບ ແລະ ສຸກເຫຼືອງ. ສຳລັບຊີ້ນຂາໝູ, 3 ຊັ້ນ ຕ້ອງຕົ້ມໃຫ້ສຸກ, ແລ້ວກໍຕັດຊອຍເປັນຕອນບ່າງໆ. ສຳລັບໝູຢໍກໍຕັດເປັນຕອນນ້ອຍເຊັ່ນດຽວກັນ. ສ່ວນຜັກຫອມກໍຕ້ອງລ້າງໃຫ້ສະອາດ, ແລ້ວເອົາໃສ່ຈານ. ສຸດທ້າຍແມ່ນຂອດການປຸງນ້ຳແຈວ. ພວກເພື່ອນເອົາກະປິໃສ່ຖ້ວຍນ້ອຍ, ແລ້ວກໍໃສ່ນ້ຳຕານ, ໝາກນາວ, ໝາກເຜັດ. ກ່ອນທີ່ກິນ ກໍຕ້ອງຕົ້ມໃຫ້ຮ້ອນຕື່ມ. ຫວັງວ່າພວກເພື່ອນຈະກິນແຊບ.