ບັນໂຈຍ, ບັນໄຈ ແມ່ນເຂົ້າໜົມຊະນິດໜຶ່ງ ທີ່ປຸງແຕ່ງຈາກເຂົ້າສານຊຶ່ງໄດ້ຮັບຄວາມນິຍົມບໍລິໂພກຈາກຊາວຫວຽດນາມທັງຫຼາຍ, ພິເສດແມ່ນຊາວພາກເໜືອ. ຍ້ອນແມ່ນເຂົ້າໜົມຊະນິດທີ່ສາມາດປຸງແຕ່ງຢ່າງງ່າຍດາຍ, ກິນແທດເໝາະກັບທຸກໆລະດູການໃນປີ, ດັ່ງນັ້ນ, ບັນໂຈຍ, ບັນໄຈຖືກຂາຍຢູ່ທົ່ວທຸກແຫ່ງ. ວັດຖຸດິບເພື່ອປຸງແຕ່ງ ເຂົ້າໜົມຊະນິດນີ້ ລວມມີແປ້ງເຂົ້າໜຽວ ແລະ ເຂົ້າຈ້າວ, ນ້ຳຕານ, ນ້ຳດອກໝາກກ້ຽງໃຫຍ່, ໝາກພ້າວ, ງາ…ສະເພາະ ບັນໄຈນັ້ນ, ແມ່ນຕ້ອງມີຖົ່ວຂຽວ, ແປ້ງມັນຕື່ມອີກ.
ບັນໂຈຍ, ບັນໄຈ ແມ່ນເຂົ້າໜົມຊະນິດໜຶ່ງ ທີ່ປຸງແຕ່ງຈາກເຂົ້າສານຊຶ່ງໄດ້ຮັບຄວາມນິຍົມບໍລິໂພກຈາກຊາວ ຫວຽດນາມທັງຫຼາຍ |
ບັນໂຈຍ, ບັນໄຈ ໂດຍນາງແຫ້ງຫາບເລາະຂາຍນັ້ນ ໄດ້ກາຍເປັນສິ່ງທີ່ລຶ້ງເຄີຍກັບປະຊາຊົນໃນ ຄຸ້ມຖະໜົນເກົ່າຮ່າໂນ້ຍມາເປັນເວລາເກືອບ 10 ປີມານີ້. ນາງເຄີຍຫາບໄປເລາະຂາຍແຕ່ 7ໂມງເຄິ່ງຕອນເຊົ້າ ຫາ 11 ໂມງຕອນທ່ຽງ, ມີບາງມື້, ມີແຂກກິນຫຼາຍ, ນາງແຫ້ງຕ້ອງຂາຍຮອດ 7-8 ໂມງຕອນຄ່ຳ. ນາງເຄີຍຫາບໄປເລາະຂາຍຢູ່ຕາມຖະໜົນຮ່າງບົງ, ຮ່າງກາຍ, ເກົາໂກ້, ຮ່າງມ້ຳ, ຮ່າງບາກ, ຮ່າງໂບ່….ສຳລັບ ບັນໂຈຍ ແມ່ນເອົາໃສ່ຈານນ້ອຍຊ່ຳຝາມື, ສ່ວນ ບັນໄຈ ແມ່ນເອົາໃສ່ຖ້ວຍນ້ອຍ. ບັນໂຈຍ ແຕ່ລະຈານມີເຖິງກວ່າ 10 ກ້ອນນ້ອຍ ຊ່ຳໄຂ່ນົກກະທາ, ສ່ວນບັນໄຈແຕ່ລະຖ້ວຍ ລວມມີ 3 ກ້ອນຊຶ່ງໃຫຍ່ກວ່າ ບັນໂຈຍເລກນ້ອຍ, ໃສ້ຂອງມັນຖືກເຮັດດ້ວຍຖົ່ວຂຽວທີ່ຫອມພິເສດພ້ອມດ້ວຍນ້ຳຫວານແຊບທີ່ສຸດ, ໄດ້ປຸງແຕ່ງຈາກແປ້ງມັນ ມີກິນຫອມຂອງດອກໝາກກ້ຽງໃຫຍ່. ການປຸງແຕ່ງ ບັນໂຈຍ, ບັນໄຈ ແມ່ນບໍ່ຍາກ, ແຕ່ຂັ້ນຕອນເຮັດຊັ້ນນອກຂອງມັນແມ່ນຕ້ອງມີເຄັດລັບສະເພາະ. ນາງແຫ້ງເປີດເຜີຍວ່າ :
“ ຖ້າຫາກເຮັດ ບັນໂຈຍ, ບັນໄຈດ້ວຍແປ້ງເຂົ້າໜຽວທັງໝົດນັ້ນ, ມັນຈະເລະເກີນໄປ, ດັ່ງນັ້ນຕ້ອງປົນໃສ່ແປ້ງເຂົ້າຈ້າວໜ້ອຍໜຶ່ງດ້ວຍອັດຕາສ່ວນ 9/1. ປະຈຸບັນ, ແປ້ງເຂົ້າກໍມີຂາຍຢູ່ຕາມຮ້ານຄ້າທົ່ວໄປ, ແຕ່ສຳລັບພວກຂ້າພະເຈົ້າແມ່ນເຮັດເອງ ຕ້ອງໝ່າເຂົ້າຢ່າງໜ້ອຍ 3 ຊົ່ວໂມງ, ແລ້ວກໍນຳໄປບົດ, ເຮັດເຊັ່ນນັ້ນ, ບັນໂຈຍ, ບັນໄຈ ຈະອ່ອນ ແລະ ແຊບກວ່າ ”
ສຳລັບການເຮັດໄສ້ຂອງ ບັນໂຈຍ ນັ້ນ ແມ່ນງ່າຍດາຍທີ່ສຸດ, ພຽງແຕ່ແມ່ນນ້ຳຕານເປັນກ້ອນນ້ອຍ ເຮັດຈາກອ້ອຍເທົ່ານັ້ນ. ນ້ຳຕານຊະນິດນີ້ ມີຂາຍຢູ່ຕະຫຼາດທົ່ວໄປ. ສຳລັບ ບັນໄຈ ນັ້ນ, ໄສ້ຂອງມັນເຮັດດ້ວຍຖົ່ວຂຽວ ແລະ ນ້ຳຕານ. ສ່ວນຂັ້ນຕອນເຮັດນ້ຳຂອງບັນໄຈແມ່ນຍາກທີ່ສຸດ. ນາງແຫ້ງໃຫ້ຮູ້ກ່ຽວກັບເຄັດລັບເຮັດນ້ຳຂອງບັນໄຈ ວ່າ :
“ ເອົາແປ້ງມັນປະສົມກັບນ້ຳ ແລະ ນ້ຳຕາມໃຫ້ລະລາຍໄປ. ກ່ຽວກັບປະລິມານແປ້ງມັນ ແມ່ນຕ້ອງຂຶ້ນກັບຜູ້ບໍລິໂພກແຕ່ລະຄົນ. ແລ້ວກໍນຳໄປຕົ້ມ, ປັບໄຟຄ່ອຍໆແລະ ຄົ້ນຈົນແຂ້ນ, ເອົານ້ຳດອກໝາກກ້ຽງໃຫຍ່ຕື່ມໃສ່ໃຫ້ຫອມອີກ”
ບັນໂຈຍ, ບັນໄຈຂອງນາງແຫ້ງ ແມ່ນໄດ້ຮັບຄວາມນິຍົມບໍລິໂພກຈາກຫຼາຍຄົນຢູ່ ຄຸ້ມຖະໜົນເກົ່າຮ່າໂນ້ຍ. ເພື່ອນ ບີງ, ຜູ້ມັກກິນ ບັນໂຈຍ, ບັນໄຈ ໃນຍາມເຊົ້າ ໃຫ້ຮູ້ວ່າ :
“ ເຮົາກິນ ບັນໂຈຍຈານໜຶ່ງພ້ອມກັບ ບັນໄຈຖ້ວຍໜຶ່ງ ແມ່ນຈ່າຍເງິນລວມທັງໝົດ 13.000 ດົງເທົ່ານັ້ນ. ໃນຍາມຮ້ອນ, ເຮົາບໍ່ມັກກິນເຝີ, ເຂົ້າປຸ້ນເພາະນ້ຳເຫື່ອອອກຫຼາຍ. ກິນ ບັນໂຈຍ, ບັນໄຈ ມີແປ້ງມັນ ກໍຊ່ວຍແກ້ຄວາມຮ້ອນໄດ້ດີທີ່ສຸດ ”
----------------------------------
ທ່ານຜູ້ຟັງທີ່ເຄົາລົບ !
ເພື່ອປຸງແຕ່ງເຍື່ອງອາຫານບັນໂຈຍ, ບັນໄຈ, ພວກເພື່ອນກະກຽມວັດຖຸດິບດັ່ງນີ້ :
- ແປ້ງເຂົ້າໜຽວ: 500 g.
- ແປ້ງເຂົ້າຈ້າວ: 50 g
- ຖົ່ວຂຽວໄດ້ລອກເປືອກ : 100 g.
- ນ້ຳຕານ : 150 g
- ນ້ຳຕານເປັນກ້ອນ: 100 g ພ້ອມກັບງາຂົ້ວ, ແປ້ງມັນ, ນ້ຳດອກໝາກກ້ຽງໃຫຍ່
ທຳອິດ, ບັນດາເພື່ອນຕ້ອງເອົາແປ້ງເຂົ້າໜຽວປົນກັບແປ້ງເຂົ້າຈ້າວໃສ່ໝໍ້, ຫຼັງຈາກນັ້ນ ຄ່ອຍຖອກນ້ຳໃສ່ເທື່ອລະໜ໊ອຍ, ແລ້ວກໍຄົນແປ້ງຢ່າງສະເໝີ, ບໍ່ປະໃຫ້ຖືກເປື່ອຍເກີນໄປ. ສຳລັບແປ້ງນີ້ ແມ່ນເພື່ອເຮັດທັງບັນໂຈຍ ແລະ ບັນໄຈ.
ຂັ້ນຕອນເຮັດໄສ້ບັນໄຈ : ຖົ່ວຂຽວຕ້ອງເຊິໃຫ້ສະອາດ, ຫຼັງຈາກນັ້ນເອົາໄປຫຸ້ງ ຄືກັບຫຸ້ງເຂົ້າ. ເມື່ອຖົ່ວຂຽວສຸກແລ້ວ , ກໍຕັກເອົາໜ້ອຍໜຶ່ງໃສ່ຖ້ວຍ ເພື່ອເຮັດນ້ຳບັນໄຈ. ສ່ວນທີ່ຍັງເຫຼືອ ແມ່ນໃຊ້ບ່ວງຫງ່ຽນຈົນແຫຼກ. ຫຼັງຈາກນັ້ນ ເອົານ້ຳຕານຕື່ມໃສ່ ແລະ ຕົ້ມຈົນແຂ້ນ.
ວິທີເຮັດບັນໄຈ: ເອົາໄສ້ຖົ່ວຂຽວ ປັ້ນເປັນກ້ອນນ້ອຍໆ, ແລ້ວກໍຍັດໃສ່ແປ້ງ. ເຮັດແນວໃດເພື່ອໃຫ້ແປ້ງຊັ້ນນອກປົກຫຸ້ມໄສ້ທາງໃນ. ຫຼັງຈາກນັ້ນ, ເອົາໄປຕົ້ມຈົນຟູຂຶ້ນ ແລະ ມີສີຂຽວຂຸ້ນຈຶ່ງສຸກ. ສຸດທ້າຍ ກໍຕັກຂຶ້ນ, ເອົາແຊນ້ຳເຢັນໄວ້ປະມານ 5 ນາທີ ຈຶ່ງເອົາໃສ່ຖ້ວຍ.
ຂັ້ນຕອນເຮັດນ້ຳຂອງປັນໄຈ :
ເອົາແປ້ງມັນ 2 ບ່ວງ, ນ້ຳຕານ 1 ບວງໃສ່ໝໍ້ນ້ອຍ, ແລ້ວຄົນໃຫ້ລະລາຍ, ປັບໄຟຄ່ອຍໆ ແລະ ຕົ້ມຈົນສຸກ, ແລ້ວກໍເອົານ້ຳດອກໝາກກ້ຽງໃຫຍ່ໃສ່ຕື່ມໃຫ້ຫອມ. ສຸດທ້າຍກໍຕັກເອົານ້ຳໃນໝໍ້ນີ້ ຖອກໃສ່ຖ້ວຍບັນໄຈກໍຖືວ່າສຳເລັດ.
ວິທີເຮັດບັນໂຈຍ :
ກ່ຽວກັບການເຮັດບັນໂຈຍນີ້, ຕ້ອງເອົານ້ຳຕານເປັນກ້ອນຍັດໃສ່ແປ້ງເຂົ້າຄືໄດ້ຄົນຕາມການແນະນຳຢູ່ຂັ້ນເທິ່ງ, ແລ້ວກໍປັ້ນເປັນກ້ອຍນ້ອຍໆ ແລະ ເອົາໄປຕົ້ມຄ້າຍຄືກັນກັບຕົ້ມບັນໄຈ. ເມື່ອເຫັນບັນໂຈຍຟູຂຶ້ນ ແລະ ມີສີຂຸ້ນ ແມ່ນສຸກແລ້ວ. ພວກເພື່ອນຕັກເອົາໃສ່ຈານແມ່ນສຳເລັດ. ຫວັງວ່າພວກເພື່ອນຈະກິນແຊບ.