ເມື່ອເວົ້າອາຫານເຂົ້າປຸ້ນ, ຜູ້ຄົນທັງຫຼາຍຄິດເລິີຍເຖິງເຍື່ອງອາຫານເຂົ້າປຸ້ນປາຫາຍຟ່ອງ. ເຂົ້າປຸ້ນປາຫາຍຟ່ອງແມ່ນເຍື່ອງອາຫານຖືກປຸ່ງແຕ່ງໂດຍປະສົມປະສານລົດຊາດອາຫານເຂດບ້ານນາພ້ອມກັບວັດຖຸດິບສະເພາະຂອງເຂດທະເລ. ຖ້າຫາກໄດ້ກິນແລ້ວ, ກໍລ້ວນແຕ່ຢາກກິນອີກ.
ເຂົ້າປຸ້ນປາຫາຍຟ່ອງ |
ຖ້າຫາກທ່ານມີໂອກາດຍ່າງເລາະຜ່ານຖະໜົນ ເຈືອງດິ້ງ ທີ່ນະຄອນຫຼວງຮ່າໂນ້ຍ, ພວກເພື່ອນອາດຈະເຫັນຮ້ານຂາຍເຂົ້າປຸ້ນປາ ຢາເຮີນ ທີ່ເຮືອນເລກທີ 623 . ນີ້ແມ່ນເຮືອນຫ້ອງແຖວແຄມທາງ ມີເນື້ອທີ່ປະມານ 30 ຕາແມດ ໂດຍຖືກປະດັບປະດາຢ່າງງາມຕາ ແລະ ເວລາໃດກໍມີແຂກມາກິນເຕັມຮ້ານ. ນາງ ເວີນຈາງ ເຈົ້າຂອງ ຮ້ານເຂົ້າປຸ້ນປາຫາຍຟ່ອງ ໃຫ້ຮູ້ວ່າ :
“ ຮ້ານຂອງຂ້າພະເຈົ້າເປີດປະຕູຮັບໃຊ້ແຂກແຕ່ 6 ໂມງເຊົ້າຫາ 14 ໂມງ ແລະ ຕອນແລງແຕ່ 17 ໂມງ 30 ຫາ 22 ໂມງ. ມື້ໜຶ່ງ ມີແຂກປະມານ 200 ຄົນມາກິນ ”
ເຂົາເຈົ້າມານີ້ ບໍ່ພຽງແຕ່ໄດ້ຊິມລົດຊາດອາຫານພິເສດຂອງນະຄອນຫາຍຟ່ອງເທົ່ານັ້ນ, ຫາກຍັງມານີ້ເພື່ອຮັບເອົາຄວາມອົບອຸ່ນຂອງນະຄອນຫາຍຟ່ອງ ການຮັບໃຊ້ແຂກຢ່າງສະໜິດສະໜົມຂອງຮ້ານອີກດ້ວຍ. ສຳລັບເຂົ້າປຸ້ນປາຂອງຮ້າຍຢາເຮີນ, ນອກຈາກມີປາຈືນ, ໄສ້ອົວຊີ້ນງົວ, ປາທູຈືນແລ້ວ, ກໍຍັງມີລູກຊີ້ນປາທີ່ແຊບນົວ, ກິນກັບທູນພ້ອມດ້ວຍເຄື່ອງເຕີມຄື ນ້ຳໝາກຂາມ, ໝາກສົ້ມ…
ທ້າວ ຫງວຽນກົງຮວານ ຊາວຫາຍຟ່ອງ ແຂກປະຈຳຂອງຮ້ານເຂົ້າປຸ້ນປາຢາເຮີນ ເປີດເຜີຍວ່າ :
“ ຂ້າພະເຈົ້າໄດ້ໄປກິນເຂົ້າປຸ້ນຢູ່ຮ້ານທີ່ມີຊື່ສຽງຫຼາຍແຫ່ງທີ່ຮ່າໂນ້ຍແລ້ວ, ແຕ່ເຫັນວ່າ ເຂົ້າປຸ້ນປາຫາຍຟ່ອງມີຄວາມແຕກຕ່າງກັບບັນດາຮ້ານເຂົ້າປຸ້ນຢູ່ຮ່າໂນ້ຍ. ເມື່ອໄດ້ກິນເຂົ້າປຸ້ນປາຫາຍຟ່ອງຈະຮູ້ສຶກເຖິງລົດຫວານຂອງກະດູກ, ຂອງ ຢໍປາ, ລົດເຜັດຂອງໝາກເຜັດ ແລະ ລົດຫອມຂອງຜັກຫອມຊະນິດຕ່າງໆ. ເຂົ້າປຸ້ນປາຫາຍຟ່ອງ ບໍ່ພຽງແຕ່ແມ່ນເພື່ອຮັບປະທານເທົ່ານັ້ນ, ຫາກຍັງແມ່ນຄວາມເປັນເອກະລັກສະເພາະຂອງເຂດດິນຫາຍຟ່ອງອີກດ້ວຍ ”
ລົດຫວານພິເສດຂອງນ້ຳເຂົ້າປຸ້ນ ແມ່ນຖືກເຈົ້າຂອງຮ້ານປຸ່ງແຕ່ງຈາກນ້ຳຕົ້ມຫົວປາ, ກະດູກປາ ເມື່ອກິນຈະມີລົດຫວານ ແລະ ພັດບໍ່ຄາວແຕ່ຢ່າງໃດ. ສຳລັບປາ, ພາຍຫຼັງປາດເອົາຊີ້ນແລ້ວ, ນຳໄປເອືອບກັບເກືອ ແລະ ເຄືອ່ງຫອມ, ແລ້ວກໍຈືນໃຫ້ສຸກເຫຼືອງພໍດີ. ນາງ ເວີນຈາງ ເຈົ້າຂອງ ຮ້ານເຂົ້າປຸ້ນປາຫາຍຟ່ອງ ໃຫ້ຮູ້ກ່ຽວກັບເຂັດລັບເມື່ອປຸ່ງແຕ່ງເຂົ້າປຸ້ນປາວ່າ :
“ ທີ່ໜຶ່ງແມ່ນນ້ຳເຂົ້າປຸ້ນຕ້ອງເຮັດໃຫ້ນ້ຳບໍ່ຄາວ, ແລະ ທີ 2 ແມ່ນຕ້ອງຈືນປາຕ່າງຫາກ ເພາະຈະຮັກສາກິນຫອມ ແລະ ບໍ່ຖືກເປື່ອຍ ”
ເພື່ອມີລົດຊາດພິເສດຂອງເຂົ້າປຸ້ນປາ, ນາງ ເວີນຈາງ ເຈົ້າຂອງ ຮ້ານເຂົ້າປຸ້ນປາຫາຍຟ່ອງແບ່ງປັນຕື່ມອີກວ່າ :
“ ປາເຂັງສົດແມ່ນຕ້ອງຊຶ້ຢູ່ຮ່າໂນ້ຍ, ສ່ວນຢໍປາທູ, ໄສ້ອົວ, ເສັ້ນລ້ອນແມ່ນຕ້ອງສັ່ງຊື້ມາຈາກນະຄອນຫາຍຟ່ອງ. ມີສິ່ງໜຶ່ງທີ່ສາມາດສ້າງໃຫ້ມີລົດຊາດພິເສດຂອງ ເຂົ້າປຸ້ນປາຫາຍຟ່ອງ ນັ້ນແມ່ນຕ້ອງປຸງແຕ່ງນ້ຳໝາກຂາມ ແລະ ເມື່ອກິນເຂົ້າປຸ້ນປາທີ່ໃສ່ຕື່ມນ້ຳໝາກຂາມ ກໍຈະເຮັດໃຫ້ມີລົດຫອມ ແລະ ບໍ່ຖືກສົ້ມແຮງຄືໃສ່ໝາກນາວ ”
ເຂົ້າປຸ້ນປາຫາຍຟ່ອງແມ່ນ ເຍື່ອງອາຫານທີ່ຜູ້ບໍລິໂພກທັງຫຼາຍມັກທີ່ສຸດ ຍ້ອນລົດຫອມພິເສດຂອງປາ ແລະ ນ້ຳເຂົ້າປຸ້ນ. ເຂົ້າປຸ້ນປາຫາຍຟ່ອງ ບໍ່ພຽງແຕ່ແມ່ນ ເຍື່ອງອາຫານເທົ່ານັ້ນ ຫາກຍັງເປັນສິ່ງສະແດງໃຫ້ເຫັນແນວຄິດຈິດໃຈ ແລະ ສ້າງຄວາມເປັນເອກະລັກສະເພາະທາງດ້ານອາຫານການກິນຂອງເຂດດິນຫາຍຟ່ອງອີກດ້ວຍ.
ທ່ານຜູ້ຟັງທີ່ເຄົາລົບ !
ເພື່ອປຸ່ງແຕ່ງເຂົ້າປຸ້ນປາ 4 ຖ້ວຍ , ພວກເພື່ອນກະກຽມວັດຖຸດິບດັ່ງນີ້ :
- ປາເຂັງ ແລະ ປາໂຄກ : 1 kg.
- ປາທູ 0,5 kg
- ກະດູກໝູ 0,5 kg
- ທູນ 6 ກ້ານ
- ໝາກເລັ່ນ 5 ໜ່ວຍ
- ຂີງ 1 ຫົວ
- ຂີ້ໝິ້ນ 2 ຫົວ
- ໝາກຂາມສຸກ 5 ໜ່ວຍ ພ້ອມດ້ວຍໝາກປີ, ຜັກບົວລະພາ, ຜັກຊີ, ຫອມບົວ, ນ້ຳປາ, ເກືອ, ແປ້ງນົວ…..
ການປຸ່ງແຕ່ງນ້ຳເຂົ້າປຸ້ນ :
ປາທູດິບຕ້ອງປາດ ແລະ ລ້າງໃຫ້ສະອາດ, ແລ້ວປາດເອົາຊີ້ນ ແລະ ກະດູກຕ່າງຫາກ. ສ່ວນກະດູກ ແລະ ຫົວປາແມ່ນເອົາໄປຕົ້ມເອົານ້ຳ. ພ້ອມກັນນັ້ນ ກໍເອົາກະດູກໝູ ໄປຕົ້ມຕ່າງຫາກ ແລ້ວປົນນ້ຳ 2 ໝໍ້ນີ້ໃສ່ກັນ. ຫຼັງຈາກນັ້ນ ຕ້ອງຊິມເບິ່ງ ພໍດີດີຫຼືບໍ່ ?
ເຮັດ ຢໍປາ, ປາຈືນ :
- ເອົາຊີ້ນປາໄປຕ່ຳຫຼືບົດພ້ອມດ້ວຍຜັກຊີ, ແລ້ວເອືອບກັບແປ້ງນົວ, ໝາກພີກໄທ, ເກືອ. ເມື່ອເອືອບປະມານ 30 ນາທີແລ້ວ, ຕ້ອງເຮັດເປັນກ້ອນນ້ອຍໆ ແລ້ວໜີບໃຫ້ແປ ເພື່ອນຳໄປຈືນຈົນສຸກເຫຼືອງ.
- ສຳລັບປາເຂັງ : ກໍຕ້ອງລ້າງໃຫ້ສະອາດ, ຕັດເປັນຕອນຊ່ຳນິ້ວມື, ແລ້ວນຳໄປຈືນຈົນກອບເຫຼືອງ.
- ສຳລັບທູນ, ຜັກຫອມນັ້ນ, ພວກເພື່ອນກໍຕ້ອງລ້າງສະອາດ, ແລ້ວເອົາໄປແຊ່ນ້ຳເກືອປະມານ 10 ນາທີ , ກໍສາມາດກິນໄດ້.
ເມື່ອກິນ, ພວກເພື່ອນເອົາເຂົ້າປຸ້ນໃສ່ຖ້ວຍ, ພ້ອມກັບ ຢໍປາ, ປາຈືນ, ທູນ, ໝາກປີ, ນ້ຳໝາກຂາມ, ໝາກເຜັດ….ແລ້ວກໍຕັກເອົານ້ຳເຂົ້າປຸ້ນໃສ່ຖ້ວຍ. ຫວັງວ່າພວກເພື່ອນຈະກິນແຊບ.