ບໍລິສັດຜະລິດການຄ້າ ຮວາມັດເຈີ່ຍ ຟາມ ຈຳກັດ ຢູ່ຕາແສງ Ea Ning, ເມືອງ Cư Kuin ແມ່ນບໍລິສັດລ້ຽງ, ຜະລິດ ແລະ ດຳເນີນທຸລະກິດບັນດາຜະລິດຕະພັນຈາກແມງຈີ່ຫຼີດ, ເຊິ່ງເປັນ 1 ໃນບັນດາວິສາຫະກິດ startup ທີ່ປະສົບຜົນສຳເລັດໃນບໍລິເວນແຂວງ ດັກລັກ. ເຖິງວ່າມີໜ້າໃນຕະຫຼາດຍັງບໍ່ຮອດ 5 ປີ ກໍຕາມ, ແຕ່ບໍລິສັດດັ່ງກ່າວ ມີລະບົບສາຂາຈຳໜ່າຍຢູ່ຫຼາຍນະຄອນ ແລະ ຈຳໜ່າຍແຫຼ່ງສິນຄ້າໄດ້ເປັນປົກກະຕິໃນແຟຼດຟອມການຄ້າເອເລັກໂຕນິກ (e-commerce platform). ທ່ານ ດັ້ງດິ່ງລວນ, ຜູ້ອຳນວຍການບໍລິສັດ, ໃຫ້ຮູ້ວ່າ: ພ້ອມກັບຜະລິດຕະພັນໃໝ່, ການໝູນໃຊ້ເຕັກໂນໂລຢີໃນບັນດາການເຄື່ອນໄຫວຜະລິດຍູ້ແຮງການແນະນຳ, ໂຄສະນາຜະລິດຕະພັນໃນສື່ສັງຄົມອອນໄລ ແລະ ແຟຼດຟອມການຄ້າເອເລັກໂຕນິກ ໄດ້ຊ່ວຍໃຫ້ວິສາຫະກິດຂອງເພິ່ນສຳຜັດກັບຕະຫຼາດໄດ້ໄວ ແລະ ມີປະສິດທິຜົນກວ່າ.
ປັດຈຸບັນ, ເຕັກໂນໂລຢີດີຈີຕອນ ໄດ້ຊ່ວຍໃຫ້ບັນດາວິສາຫະກິດຂະໜາດນ້ອຍ ແລະ ບຸກຄົນລົງທຶນ startup ດ້ວຍແຫຼ່ງທຶນໜ້ອຍ ສາມາດເຂົ້າເຖິງຜູ້ບໍລິໂພກໄດ້ງ່າຍກວ່າ, ໄວກວ່າ. ເພາະວ່າ ປັດຈຸບັນ ການໂຄສະນາໃນສື່ສັງຄົມອອນໄລແມ່ນໄດ້ປະຕິບັດຢ່າງກວ້າງຂວາງ, ລູກຄ້າກໍມີຫຼາຍເກນອາຍຸ, ຄວາມມັກຄວາມນິຍົມທີ່ແຕກຕ່າງກັນ”.
 ການຫັນເປັນດີຈີຕອນຊ່ວຍຫຼຸດຜ່ອນກຳລັງໃຫ້ແກ່ວິສາຫະກິດ startup (ພາບ: VOV) |
ໂດຍກໍຍາດແຍ່ງທ່າໄດ້ປຽບຂອງການຫັນເປັນດີຈີຕອນ ແລະ ການຄ້າເອເລັກໂຕນິກໃນບັນດາແຟຼດຟອມດີຈີຕອນ, ທ່ານ ເຈືອງຮວ່າງກີ໊, ຢູ່ຕາແສງ Ea Tam, ນະຄອນ ບວນມາທວດ ໄດ້ startup ຈາກການປູກເຫັດຖັ່ງເຊົ່າ ຖືວ່າ ນີ້ແມ່ນຊ່ອງທາງສຳຜັດກັບລູກຄ້າໄດ້ງ່າຍດາຍ, ເຫັນໄດ້ກັບຕາ ແລະ ປະຢັດຄ່າໃຊ້ຈ່າຍ, ເໝາະສົມກັບຜູ້ startup ທີ່ມີແຫຼ່ງທຶນຈຳກັດ.
“ທ່າໄດ້ປຽບຂອງການຂາຍຜ່ານທາງສື່ສັງຄົມອອນໄລ ແມ່ນຂາຍໄດ້ຫຼາຍກວ່າ, ພ້ອມດຽວກັນນັ້ນ, ຈຳນວນລູກຄ້າຂອງເຮົາກໍກວ້າງໃຫຍ່ກວ່າ. ເຮົາສາມາດລົງຮູບຜະລິດຕະພັນ, ດັດແປງ, ຖ່າຍດ້ວຍຕົນເອງ ແລະ ສາມາດເປັນເຈົ້າການໃນການອັບເດດຂໍ້ມູນໃນບັນດາແຟຼດຟອມນັ້ນ”.
ປັດຈຸບັນ, ການຫັນເປັນດີຈີຕອນຢູ່ບັນດາວິສາຫະກິດ ບໍ່ພຽງແຕ່ແມ່ນການເຄື່ອນໄຫວຜະລິດ, ຈຳໜ່າຍຜະລິດຕະພັນເທົ່ານັ້ນ ຫາກຍັງແມ່ນການປ່ຽນແປງໃໝ່ໃນການຄຸ້ມຄອງ, ບໍລິຫານການເຄື່ອນໄຫວ. ຕາມທ່ານນາງ ຮວ່າງທິແທັງຖຸຍ, ຜູ້ອຳນວຍການບໍລິສັດໃຫ້ຄຳປຶກສາ ພາສີອາກອນ Saf ຈຳກັດ ແລ້ວ, ຄວາມຫຍຸ້ງຍາກໃຫຍ່ຫຼວງທີ່ສຸດຂອງວິສາຫະກິດເມື່ອສຳຜັດກັບການຫັນເປັນດີຈີຕອນແມ່ນປັດໄຈມະນຸດ, ແຫຼ່ງຊັບພະຍາກອນມະນຸດຕ້ອງການຄວາມເຂົ້າໃຈກ່ຽວກັບການຫັນເປັນດີຈີຕອນ. ແຕ່ວ່າ, ເມື່ອກຳໄດ້ແບບວິທີ ແລະ ໝູນໃຊ້ຢ່າງຖືກຕ້ອງແລ້ວ, ການຫັນເປັນດີຈີຕອນຈະນຳມາເຊິ່ງປະສິດທິຜົນ, ເພີ່ມສະມັດຕະພາບ ແລະ ລາຍຮັບຂອງວິສາຫະກິດໄດ້ດີທີ່ສຸດ.
 ບັນດາແປຼດຟອມ ດີຈີຕອນ ຊ່ວຍດຶງດູດລູກຄ້າຈຳນວນຫຼາຍໃຫ້ແກ່ວິສາຫະກິດ (ພາບ: VOV) |
ດ້ວຍຈຳນວນວິສາຫະກິດເກືອບ 13.000 ແຫ່ງກຳລັງເຄື່ອນໄຫວ, ແຂວງ ດັກລັກ ໄດ້ວາງເປົ້າໝາຍໃນປີ 2024 ນີ້ ຈະມີປະມານ 50% ຈຳນວນວິສາຫະກິດນຳໃຊ້ແຟຼດຟອມດີຈີຕອນ, 100% ວິສາຫະກິດນຳໃຊ້ໃບບິນເອເລັກໂຕນິກ.
ທ່ານ ຫງວຽນຕວັນຮ່າ, ຮອງປະທານຜູ້ປະຈຳການຄະນະກຳມະການປະຊາຊົນແຂວງ ດັກລັກ, ໃຫ້ຮູ້ວ່າ ເພື່ອຊຸກຍູ້ການພັດທະນາລະບົບນິເວດ startup ຢູ່ ທ້ອງຖິ່ນ, ທາງແຂວງ ໄດ້ມີຫຼາຍມາດຕະການຊຸກຍູ້ການ startup ຜ່ານການຫັນເປັນດີຈີຕອນ, ໃນນັ້ນ ມີການເພີ່ມທະວີການລົງທຶນເຂົ້າເຕັກໂນໂລຢີ, ພັດທະນາພື້ນຖານໂຄງລ່າງເຕັກນິກດີຈີຕອນແຫ່ງຊາດ.
“ແຂວງ ຈະສ້າງສູນຂໍ້ມູນ (big data) ປະຕິບັດຕາມຄຳຊີ້ນຳຂອງລັດຖະບານ ແລະ ກະຊວງຖະແຫຼງຂ່າວ ແລະ ການສື່ສານ. ນັ້ນແມ່ນໜຶ່ງໃນບັນດາເງື່ອນໄຂຈຳເປັນຕ້ອງມີ ເພື່ອຫັນເປັນດີຈີຕອນໃນເສດຖະກິດ, ໃນສັງຄົມ ແລະ ສຳລັບມະນຸດ. ນີ້ແມ່ນຄວາມຕ້ອງການທີ່ຈຳເປັນ ແລະ ແມ່ນກຳລັງໜູນໃໝ່ແກ່ການພັດທະນາ, ທ່າອ່ຽງຂອງທົ່ວໂລກ ແລະ ພວກເຮົາຕ້ອງປະຕິບັດ”.
ເລື່ອງໝູນໃຊ້ການຫັນເປັນດີຈີຕອນໄດ້ ແລະ ພວມນຳມາເຊິ່ງຜົນປະໂຫຍດໃຫ້ແກ່ວິສາຫະກິດ startup ຢູ່ດັກລັກ ໃນການເຄື່ອນໄຫວ ແລະ ຫັນຜະລິດຕະພັນເປັນການຄ້າ. ດ້ວຍທ່າອ່ຽງພັດທະນາໃນການປະຕິວັດອຸດສາຫະກຳ 4.0 ນີ້, ວິສາຫະກິດ ອາດຈະໝູນໃຊ້ບັນດາມາດຕະການຫັນເປັນດີຈີຕອນເພື່ອຫຼຸດໄລຍະຫ່າງ, ທຽບທັນກັບການປ່ຽນແປງໃໝ່ຢ່າງວ່ອງໄວຂອງເຕັກໂນໂລຢີ ແລະ ຕະຫຼາດ, ສ້າງທ່າອຽງພັດທະນາຕາມທິດຍືນຍົງ./.