ການນຳ, ອະດີດການນຳ ພ້ອມດ້ວຍນັກຮົບ, ທະຫານນັບຮ້ອຍຄົນ ກົມຫົວອາໄລຫານັກຮົບເສຍສະຫຼະຊີວິດເພື່ອຊາດ

ນັກຮົບ ດ້ຽນບຽນ, ທະຫານຕະລຸມບອນ, ເກນແຮງງານເກືອບ 140 ຄົນ ທີ່ມາຈາກບັນດາແຂວງ, ນະຄອນ ດ້ຽນບຽນ, ເຊີນລາ, ລາຍເຈົາ, ລ່າວກາຍ, ອຽນບ໋າຍ, ຮວ່າບິ່ງ, ນະຄອນ ໂຮ່ຈີມິນ ໄດ້ພົບພໍ້ກັນ, ຫວນຄືນຊຸມວັນເດືອນປີຕໍ່ສູ້ທີ່ລຳບາກກາກກຳ, “ຕັດສິນໃຈສູ້ຮົບ, ຕັດສິນໃຈເອົາໄຊຊະນະ”, ປະກອບສ່ວນສ້າງໄຊຊະນະ ດ້ຽນບຽນຝູ ທີ່ສະຫງ່າອົງອາດ, ດັງກ້ອງກັງວານໄປທົ່ວ 5 ທະວີບ. ການພົບພໍ້ກັນຄັ້ງພິເສດນີ້ ໄດ້ດຳເນີນຢູ່ເຂດສຸສານນັກຮົບເສຍສະຫຼະຊີວິດເພື່ອຊາດ A1, ໃນຂອບເຂດລາຍການພົບປະສັງສັນ, ສະແດງຄວາມຮູ້ບຸນຄຸນຕໍ່ບຸກຄົນທີ່ໄດ້ເຂົ້າຮ່ວມບັ້ນຮົບ ດ້ຽນບຽນຝູ ໂດຍກົງ, ໂດຍຄະນະກຳມະການສູນກາງແນວໂຮມປະເທດຊາດ ຫວຽດນາມ ແລະ ແຂວງ ດ້ຽນບຽນ ຈັດຂຶ້ນ.

ມີຫຼາຍຄົນໄດ້ເວົ້າຢອກກັນວ່າ ການເດີນທາງກັບຄືນມາຢ້ຽມຢາມສະໜາມຮົບເກົ່ານີ້ຍັງຍາກກວ່າການແກ່ປືນໃຫຍ່ເຂົ້າສະໜາມຮົບ ກ່ອນນີ້ 70 ປີ,  ເພາະວ່າ ບັນດາຊາວໜຸ່ມຜູ້ເຂັ້ມແຂງໃນຄາວນັ້ນ ກໍມີອາຍຸສູງຫຼາຍແລ້ວ, ສຸຂະພາບກໍເລີ່ມອ່ອນເພຍໄປ. ເຖິງຢ່າງໃດຕາມ, ເຂົາເຈົ້າຍັງຫ້າວຫັນເຂົ້າຮ່ວມການຢ້ຽມຢາມທີ່ມີຄວາມໝາຍນີ້, ເຊິ່ງອາດຈະເປັນການຢ້ຽມຢາມ ດ້ຽນບຽນ ຄັ້ງສຸດທ້າຍຂອງເຂົາເຈົ້າ. ທ່ານ ຫງວຽນທ້ຽນ, ມາຈາກແຂວງ ອຽນບ໋າຍ, ຜູ້ເຮັດວຽກງານຕິດຕໍ່ສື່ສານຢູ່ກອງບັນຊາການບັ້ນຮົບ ດ້ຽນບຽນຝູ, ກອງວິທະຍຸໂທລະເລກ 101, ກົມສື່ສານ, ແບ່ງປັນວ່າ:

“ກອງວິທະຍຸໂທລະເລກຂອງພວກຂ້າພະເຈົ້າໃນປັດຈຸບັນ ຍັງເຫຼືອບໍ່ເທົ່າໃດຄົນ. ຊຸມປີກ່ອນໆຍັງມີຄະນະຕິດຕໍ່ພົວພັນ, ພວກຂ້າພະເຈົ້າກໍໄດ້ພົບປະກັນ, ແຕ່ວ່າຈຳນວນພົນກໍນັບມື້ນັບຫຼຸດໜ້ອຍຖອຍລົງຕາມການເວລາ… ເມື່ອໄດ້ມາພົບພໍ້ເພື່ອນຮ່ວມກົມກອງ ແລະ ມິດສະຫາຍຢູ່ນີ້, ໃຜໆກໍແບ່ງປັນເລື່ອງລາວສະເພາະຂອງຕົນ, ເຖິງວ່າ ປັດຈຸບັນຈະຍັງໜ້ອຍຄົນ, ແຕ່ກໍດີໃຈຫຼາຍ”.

ຕື້ນຕັນໃຈເມື່ອຢືນຢູ່ຕໍ່ໜ້າບັນດານັກຮົບ, ວິລະຊົນທີ່ໄດ້ເສຍສະຫຼະຊີວິດເພື່ອຊາດ.

ທ່າມກາງຄວາມພູມໃຈທີ່ໄດ້ພົບພໍ້ເພື່ອນມິດສະຫາຍ, ເພື່ອນຮ່ວມກົມກອງອີກເທື່ອໜຶ່ງນັ້ນ ແມ່ນຄວາມຕື້ນຕັນໃຈ, ຄວາມສະເທືອນໃຈ ເມື່ອຢືນຢູ່ຕໍ່ໜ້າບັນດານັກຮົບ, ວິລະຊົນທີ່ໄດ້ເສຍສະຫຼະຊີວິດເພື່ອຊາດ. ທ່ານ ຫວູວັນຈີ, ມາຈາກແຂວງ ລາຍເຈົາ, ນັກຮົບ ດ້ຽນບຽນ ກອງພັນໃຫຍ່ 675, ກອງພົນປືນໃຫຍ່ 351, ແບ່ງປັນວ່າ:

“ປີນີ້, ຂ້າພະເຈົ້າ ອາຍຸ 98 ປີ ແລ້ວ, ຂ້າພະເຈົ້າກໍພະຍາຍາມມາຖະຫວາຍທູບທຽນອາໄລຫາເພື່ອນຮ່ວມກົມກອງຂອງຕົນ ທີ່ໄດ້ເສຍສະຫຼະຊີວິດເພື່ອຊາດ. ມາໄດ້ຄືແນວນີ້ ຂ້າພະເຈົ້າກໍຮູ້ສຶກສົມຕາມຄວາມປະສົງແລ້ວ”.

ການຖະຫວາຍທູບທຽນອາໄລຫາເພື່ອນຮ່ວມກົມກອງ ຜູ້ທີ່ເສຍສະຫຼະຊີວິດເພື່ອຊາດ

 ເຂດສຸສານນັກຮົບເສຍສະຫຼະຊີວິດເພື່ອຊາດ A1 ແມ່ນໜຶ່ງໃນ 4 ເຂດສຸສານນັກຮົບເສຍສະຫຼະຊີວິດເພື່ອຊາດໃນສະໄໝຕ້ານລ່າເມືອງຂຶ້ນ ຝລັ່ງ, ແມ່ນບ່ອນຝັງສົບຂອງນັກຮົບເສຍສະຫຼະຊີວິດໃນບັ້ນຮົບ ດ້ຽນບຽນຝູສ່ວນຫຼາຍ. ໃນທ່າມກາງສະພາບສັດຕູຖີ້ມລະເບີດຢ່າງດຸເດືອດ, ເພື່ອຍາດເອົາເອກະລາດ, ເສລີພາບມາໃຫ້ປະເທດຊາດ, ຍາດເອົາໄຊຊະນະທີ່ “ດັງກ້ອງກັງວານໄປທົ່ວ 5 ທະວີບ, ສັ່ນສະເທືອນໄປທົ່ວໂລກ”ນັ້ນ, ມີປະຊາຊົນຜູ້ດີເດັ່ນຂອງຊາດນັບພັນຄົນ ໄດ້ນອນລົງດິນແດນແຫ່ງນີ້ ໂດຍບໍ່ມີວັນກັບຄືນ. ເລືອດເນື້ອຂອງເຂົາເຈົ້າໄດ້ເຊື່ອມເຂົ້າດິນແດນແຫ່ງສັດສິດຂອງເຂດຕາເວັນຕົກພາກເໜືອ, ດ້ຽນບຽນ ເພື່ອໃຫ້ໃນວັນນີ້, ປະເທດຊາດ ຈຶ່ງມີເອກະລາດ, ເສລີພາບ; ປະຊາຊົນໄດ້ດຳເນີນຊີວິດໃນສັນຕິພາບ, ມີຊີວິດການເປັນຢູ່ຢ່າງອີ່ມໜຳສຳລານສົມບູນພູນສຸກ. ໂດຍມີຄວາມສະເທືອນໃຈຕໍ່ການເສຍສະຫຼະຂອງເພື່ອນຮ່ວມກົມກອງ, ລຸງ ເຈິ່ນກວາງຈ້ຽວ, ອະດີດນັກຮົບ ດ້ຽນບຽນ ສັງກັດກອງພັນໃຫຍ່ 367, ກອງພົນປືນໃຫຍ່ 351 ກ່າວຄວາມໃນໃຈສູ່ຟັງວ່າ:

“ເພື່ອນຮ່ວມກົມກອງຂອງຂ້າພະເຈົ້າໄດ້ນອນຢູ່ນີ້ໂດຍທີ່ບໍ່ມີວັນກັບຄືນມາ, ມື້ນີ້, ຂ້າພະເຈົ້າ ໄດ້ກັບມາຢາມເພື່ອນແລ້ວ. ຂ້າພະເຈົ້າຂໍສະແດງຄວາມຂອບໃຈເຂົາເຈົ້າ, ຂອບໃຈ ດ້ຽນບຽນຝູ ທີ່ໄດ້ສ້າງເຂດສຸສານແຫ່ງນີ້ຂຶ້ນມາ ເພື່ອໃຫ້ມື້ນີ້, ບັນດານັກຮົບຜູ້ທີ່ຍັງມີຊີວິດຢູ່ຄືພວກຂ້າພະເຈົ້າ ໄດ້ມາຢາມນັກຮົບຜູ້ທີ່ເສຍຊີວິດໄປແລ້ວ”.

ບັນດາອາລົມຈິດທີ່ພິເສດໃນການພົບປະສັງສັນນັກຮົບ ດ້ຽນບຽນ ນັ້ນ ອີກຄັ້ງໜຶ່ງໄດ້ເປັນການແຜ່ກະຈາຍນ້ຳໃຈຮັກຊາດ, ກໍາລັງແຮງແຫ່ງມະຫາສາມັກຄີທົ່ວປວງຊົນທັງຊາດ, ກໍຄືສະແດງຄວາມຮູ້ບຸນຄຸນອັນຫຼົ້ນເຫຼືອ ຕໍ່ລຸ້ນພໍ່ລຸ່ນອ້າຍ, ບັນດານັກຮົບວິລະຊົນ,ນັກຮົບເສຍສະຫຼະຊີວິດເພື່ອນຊາດ, ຜູ້ທີ່ໄດ້ສະຫຼະໄລຍະເວລາທີ່ສວຍງາມທີ່ສຸດຂອງຊີວິດ ເພື່ອປະເທດຊາດ, ເພື່ອບ້ານເກີດເມືອງນອນ ແລະ ດິນແດນ ດ້ຽນບຽນຝູ ວິລະຊົນ./.