ໃນອາທິດຜ່ານມາ, ລາຍການພາກພາສາລາວ ໄດ້ຮັບຈົດໝາຍຂອງເພື່ອນ ຄຳຫງ່ຽມ ຢູ່ນະຄອນຫຼວງ ວຽງຈັນ. ເພື່ອນໄດ້ແບ່ງປັນວ່າ, ເພື່ອນເຄີຍຮຽນຢູ່ມະຫາວິທະຍາໄລສັງຄົມສາດ ແລະ ມະນຸດສາດ ຮ່າໂນ້ຍ, ເມື່ອໄດ້ຊົມພາບສາລະຄະດີກ່ຽວກັບລະດູໃບໄມ້ຫຼົ່ນ ຮ່າໂນ້ຍ, ບັນດາຄວາມຊົງຈຳໃນສະໄໝເປັນນັກສຶກສາ ດ້ວຍການສຳຜັດອັນຈັບອົກຈັບໃຈຫຼາຍຢ່າງຢູ່ນະຄອນຫຼວງ ຮ່າໂນ້ຍ ທີ່ສວຍງາມ ກໍໄດ້ຫວນຄືນມາ. ໃນຂະນະນັ້ນ, ເພື່ອນ ສິງຫາ ຢູ່ ຈຳປາສັກ ແບ່ງປັນວ່າ: ຂ້າພະເຈົ້າມັກນັ່ງດື່ມກາເຟຕາມຮ້ານຢູ່ແຄມທາງ ແລະ ຊົມລົດຖີບຂາຍດອກໄມ້, ແມ່ຄ້າຫາບເຄື່ອງຂາຍຕາມທາງ, ມີທັງເຂົ້າເໝົ້າ, ມີທັງໝາກພັບສຸກແດງທີ່ເປັນຕາແຊບ ໃນທ່າມກາງບັນຍາກາດເຢັນສະບາຍຂອງລະດູໃບໄມ້ຫຼົ່ນ ຮ່າໂນ້ຍ.
 (ພາບ: laodongthudo.vn) |
ຕໍ່ໄປນີ້ ແມ່ນເນື້ອໃນຈົດໝາຍຂອງເພື່ອນ ບຸດດີ ຢູ່ນະຄອນຫຼວງ ວຽງຈັນ ທີ່ໄດ້ສົ່ງເຖິງລາຍການໃນອາທິດຜ່ານມາ. ເພື່ອນຂຽນວ່າ: ຫວ່າງມໍ່ໆມານີ້, ຂ້າພະເຈົ້າເຫັນວ່າ ຫວຽດນາມ ພວມຍູ້ແຮງການຮ່ວມມືໃນບັນດາຂົງເຂດຫາກໍ່ພົ້ນເດັ່ນ, ເປັນຕົ້ນແມ່ນກຸ່ມຄຳທີ່ວ່າ “ປັນຍາປະດິດ” ໄດ້ເວົ້າເຖິງຫຼາຍທີ່ສຸດໃນບັນດາການເຄື່ອນໄຫວພົວພັນຕ່າງປະເທດ ແລະ ການຮ່ວມມືຂອງ ຫວຽດນາມ. ຂ້າພະເຈົ້າກໍຄິດວ່າ, ເລື່ອງສ້າງຊັບພະຍາກອນມະນຸດເພື່ອຮັບໃຊ້ໃຫ້ແກ່ຂົງເຂດທີ່ມີກຳລັງບົ່ມຊ້ອນໃນສັງກາດດີຈີຕອນນີ້ ແມ່ນວຽກງານທີ່ຈຳເປັນທີ່ສຸດບໍ່ວ່າສຳລັບປະເທດໃດ. ຂ້າພະເຈົ້າຢາກຮູ້ວ່າ, ປັດຈຸບັນ ຢູ່ ຫວຽດນາມ ມີໂຮງຮຽນແຫ່ງໃດແດ່ ທີ່ພວມກໍ່ສ້າງຊັບພະຍາກອນມະນຸດໃຫ້ແກ່ຂະແໜງປັນຍາປະດິດ?
ຄືດັ່ງເພື່ອນ ບຸດດີ ໄດ້ກ່າວມາ, ປັດຈຸບັນ ຫວຽດນາມ ພວມຊຸກຍູ້ ແລະ ເພີ່ມທະວີການຮ່ວມມືໃນບັນດາຂົງເຂດຫາກໍ່ພົ້ນເດັ່ນເຊັ່ນ: ເຄິ່ງຊັກນຳໄຟຟ້າ, ພະລັງງານທົດແທນ, ປັນຍາປະດິດ,… ເພື່ອກໍ່ສ້າງຖັນແຖວຊັບພະຍາກອນມະນຸດຮັບໃຊ້ໃຫ້ແກ່ຂະແໜງປັນຍາປະດິດນີ້, ປັດຈຸບັນ ຢູ່ ຫວຽດນາມ ມີບັນດາໂຮງຮຽນກໍ່ສ້າງດັ່ງລຸ່ມນີ້:
- ຢູ່ພາກເໜືອ ມີມະຫາວິທະຍາໄລສັບພະວິຊາ ຮ່າໂນ້ຍ, ມະຫາວິທະຍາໄລ ທັງລອງ, ມະຫາວິທະຍາໄລ FPT.
- ຢູ່ພາກກາງ ຫວຽດນາມ ມີ ມະຫາວິທະຍາໄລ ຢຸຍເຕິນ (ດ່າໜັງ).
- ຢູ່ພາກໃຕ້ ມີ ມະຫາວິທະຍາໄລສ້າງຄູເຕັກນິກ ນະຄອນ ໂຮ່ຈີມິນ, ມະຫາວິທະຍາໄລອຸດສາຫະກຳ ນະຄອນ ໂຮ່ຈີມິນ, ມະຫາວິທະຍາໄລເຕັກໂນໂລຢີຂໍ້ມູນຂ່າວສານ (ມະຫາວິທະຍາໄລແຫ່ງຊາດ ນະຄອນ ໂຮ່ຈີມິນ).
ເພື່ອນ ຈຳປາພັນ ກໍຢູ່ນະຄອນຫຼວງ ວຽງຈັນ ໄດ້ສົ່ງຈົດໝາຍເຖິງລາຍການ ດ້ວຍເນື້ອໃນດັ່ງນີ້: “ໃນຫຼາຍຄັ້ງໄປເຮັດວຽກຢູ່ ຫວຽດນາມ, ຂ້າພະເຈົ້າມັກໄດ້ຍິນກຸ່ມຄຳວ່າ “ລັດຖະກອນ, ພາລະກອນ”. ສອງເປົ້າໝາຍແຮງງານດັ່ງກ່າວ ມີຄວາມແຕກຕ່າງກັນແນວໃດ? ປັດຈຸບັນ, ຢູ່ລາວ ມີພຽງແຕ່ລັດຖະກອນເທົ່ານັ້ນ.
ຫວຽດນາມ ມີກົດໝາຍວ່າດ້ວຍພະນັກງານ, ລັດຖະກອນ ແລະ ກົດໝາຍວ່າດ້ວຍ ພາລະກອນ ໄດ້ກຳນົດຢ່າງຈະແຈ້ງກ່ຽວກັບສອງເປົ້າໝາຍແຮງງານດັ່ງກ່າວ. ແຕ່ວ່າ, ເພື່ອນສາມາດເຂົ້າໃຈແບບງ່າຍໆຄືດັ່ງນີ້: ເຖິງວ່າສອງເປົ້າໝາຍດັ່ງກ່າວລ້ວນແລ້ວແຕ່ເຮັດວຽກຢູ່ນຳລັດ ແຕ່ຄວາມແຕກຕ່າງກັນພື້ນຖານທີ່ສຸດຂອງ ລັດຖະກອນ ແລະ ພາລະກອນແມ່ນ ລັດຖະກອນ ເຮັດວຽກໃຫ້ແກ່ບັນດາອົງການລັດ ແລະ ໄດ້ຮັບເງິນເດືອນຈາກງົບປະມານຂອງລັດ, ສ່ວນພາລະກອນ ເຮັດວຽກນຳບັນດາຫົວໜ່ວຍຮັບຜິດຊອບວຽກງານສະເພາະກິດຂອງລັດ ແລະ ຮັບເງິນເດືອນຈາກຄັງເງິນເດືອນຂອງຫົວໜ່ວຍນັ້ນໆ.
 ປະຊາຊົນແຂວງ ຖ໊າຍງວຽນ ເກັບກ່ຽວ ຊາ |
ກ່ອນຈະສິ້ນສຸດລາຍການໂອ້ລົມກັບເພື່ອນລາວມື້ນີ້, ຂ້າພະເຈົ້າຂໍແນະນຳໂດຍສັງເຂບກ່ຽວກັບບັນດາເຂດປູກຊາຂອງ ຫວຽດນາມ. ນີ້ແມ່ນຄຳຕອບສຳລັບຄຳຖາມຂອງເພື່ອນ ດາລາວັນ ຢູ່ແຂວງ ຈຳປາສັກ ທີ່ໄດ້ສົ່ງເຖິງລາຍການ.
ສຳລັບຄຳຖາມຂອງເພື່ອນ ດາລາວັນ, ພວກຂ້າພະເຈົ້າຂໍຕອບມາຄືດັ່ງນີ້: ດ້ວຍເງື່ອນໄຂດິນຟ້າອາກາດທີ່ເອື້ອອຳນວຍ, ຢູ່ ຫວຽດນາມ, ຕົ້ນຊາໄດ້ປູກແຕ່ເໜືອຮອດໃຕ້, ນຳ ຫວຽດນາມ ກາຍເປັນປະເທດຜະລິດຊາໃຫຍ່ອັນດັບທີ 7 ແລະ ສົ່ງອອກຊາຫຼາຍອັນດັບທີ 5 ໃນໂລກ. ຫວຽດນາມ ມີ 34 ແຂວງ, ນະຄອນ ຜະລິດ ແລະ ດຳເນີນທຸລະກິດກ່ຽວກັບຊາ. ໃນນັ້ນ, ຖ໋າຍງວຽນ ແມ່ນໜຶ່ງໃນບັນດາແຂວງຢືນຢູ່ແຖວໜ້າໃນທົ່ວປະເທດກ່ຽວກັບເນື້ອທີ່ປູກ, ປະລິມານ ແລະ ຄຸນນະພາບຜະລິດຕະພັນຈາກຕົ້ນຊາ ດ້ວຍເນື້ອທີ່ 22.300 ເຮັກຕາ ແລະ ມີຊື່ສຽງກັບຊາ ເຕິນເກືອງ. ແຂວງ ອຽນບ໊າຍ, ເຊີນລາ, ຮ່າຢາງ ໄດ້ຮູ້ຈັກກັນດີກັບຍີ່ຫໍ້ຊາ ຊານຕວຽດ ທີ່ມີຕົ້ນຊາອາຍຸນັບຮ້ອຍປີ. ແຂວງ ຝູທໍ້ ໄດ້ຮັບຖືວ່າ ແມ່ນອູ່ຂອງຂະແໜງຊາ ຫວຽດນາມ ແລະ ແຂວງ ເລິມດົ່ງ ແມ່ນທ້ອງຖິ່ນທີ່ມີປະຫວັດສາດປູກ ກໍຄື ມີຂະແໜງອຸດສາຫະກຳຊາ ໄວກວ່າໝູ່ຢູ່ ຫວຽດນາມ, ເຊິ່ງມີແຕ່ປີ 1927.
ດັ່ງທີ່ກ່າວມາຂ້າງເທິງແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ພວກເພື່ອນກໍ່ສາມາດຝາກຈົດໝາຍມາຍັງລາຍການໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວບໄຊ vovworld.vn.