 ກຳປັ່ນທ່ອງທ່ຽວ Grand Pioneers |
ປັດຈຸບັນບໍລິສັດ ຫວຽດຖ້ວນ ມີກຳປັ່ນທ່ອງທ່ຽວສອງລຳ ເຊິ່ງແມ່ນກຳປັ່ນທ່ອງທ່ຽວ Grand Pioneers ເລກ 1 ແລະ Grand Pioneers ເລກ 2 ເຊິ່ງລ້ວນແຕ່ແມ່ນກຳປັ່ນທ່ອງທ່ຽວໃຫຍ່ທີ່ສຸດຢູ່ ຫວຽດນາມ. ກຳປັ່ນທ່ອງທ່ຽວຖືກອອກແບບຫຼູຫຼາ ທັນສະໄໝ ມີລວງຍາວເກືອບ 110 ແມັດ ກວ້າງ 18 ກວ່າແມັດ ປະກອບດ້ວຍ 7 ຊັ້ນສາມາດບັນຈຸແຂກທ່ອງທ່ຽວ 320 ຄົນ. ທ່ານ ເລືອງເຖຕວຽນ ຮອງຜູ້ອຳນວຍການບໍລິສັດ ຫວຽດຖ້ວນ ໃຫ້ຮູ້ວ່າ:
“ກຳປັ່ນທ່ອງທ່ຽວ Grand Pioneers ປະຕິບັດການເດີນເຮືອຢ້ຽມຊົມມໍລະດົກ ເຊື່ອມຕໍ່ລະຫວ່າງສອງເຂດມໍລະດົກໃນອ່າວ ຮະລອງ ແລະ ອ່າວ ບ໊າຍຕື໋ລອງ. ອ່າວ ບ໊າຍຕື໋ລອງມີຄວາມສາມາດບົ່ມຊ້ອນ ທ່າໄດ້ປຽບຫຼາຍຢ່າງ ເພື່ອຂຸດຄົ້ນຫຼາຍກວ່າ ກ່ຽວກັບຂົງເຂດວັດທະນະທຳປະຫວັດສາດ. ນີ້ແມ່ນການເດີນເຮືອຢ້ຽມຊົມມໍລະດົກຊຸດທຳອິດ ມາເຖິງປັດຈຸບັນ ໄດ້ເຊື່ອມຕໍ່ລະຫວ່າງສອງມໍລະດົກ”.
ການເດີນເຮືອຢ້ຽມຊົມມໍລະດົກອ່າວ ຮະລອງ ໄດ້ພາແຂກທ່ອງທ່ຽວໄປຢ້ຽມຊົມຜ່ານສາມເຂດມໍລະດົກ ເຊິ່ງເລີ່ມແຕ່ທ່າກຳປັ່ນ ຕ໊ວນເຈົາ ຜ່ານສະຖານທີ່ທ່ອງທ່ຽວທຳອິດຂອງການເດີນທາງຢ້ຽມຊົມອ່າວ ຮະລອງ ນັ້ນແມ່ນຖ້ຳ ເດົ່າໂກ໊ ແລ້ວກໍ່ແວ່ຢ້ຽມຊົມບັນດາສະຖານທີ່ລືຊື່ຕ່າງໆ ໃນບໍລິເວນອ່າວ ຮະລອງ ແລະ ສືບຕໍ່ເປີດກວ້າງການເດີນເຮືອໄປຢ້ຽມຊົມບ້ານ ແຊນ, ເວິນໂດ່ນ, ກວານລ້ານ, ປ່າສະຫງວນແຫ່ງຊາດ ບ໊າຍຕື໋ລອງ ແລະ ແລ່ນກັບຄືນ. ນາງ ເປຍຣິກແຟຣນ ແຂກທ່ອງທ່ຽວໄທ ເປີດເຜີຍວ່າ:
“ຖ້ຳທຽນແກ໋ງເຊີນ ມີຄວາມແຕກຕ່າງເມື່ອທຽບໃສ່ຖ້ຳແຫ່ງຕ່າງໆຢູ່ໄທ. ຖ້ຳຢູ່ໄທນ້ອຍ ແລະ ມືດກວ່າ, ສຳລັບຖ້ຳແຫ່ງນີ້ແມ່ນແຈ້ງສະຫວ່າງ ມີກະແສນ້ຳໄຫຼ. ນີ້ເປັນເທື່ອທີສອງທີ່ຂ້າພະເຈົ້າໄດ້ມາທ່ຽວ ຫວຽດນາມ ແລະ ເປັນຄັ້ງທຳອິດໄດ້ມາທ່ຽວອ່າວ ຮະລອງ ເຊິ່ງເປັນໜ້າຈັບໃຈອີຫຼີ”.
ໃນກຳປັ່ນທ່ອງທ່ຽວມີພັດທະຄານຫຼູຫຼາສອງແຫ່ງ ສາມາດຮັບໃຊ້ແຂກທ່ອງທ່ຽວຖືສັນຊາດຕ່າງໆ. ແຂກທ່ອງທ່ຽວຈະໄດ້ຊີມບັນດາເຍື່ອງອາຫານທີ່ແຊບນົວ ແລະ ອຸດົມສົມບູນ. ອ້າຍ ຫງວຽນແມັ້ງເຈື່ອງ ພໍ່ຄົວຢູ່ກຳປັ່ນທ່ອງທ່ຽວ Grand Pioneers ໃຫ້ຮູ້ວ່າ:
“ອາຫານຢູ່ກຳປັ່ນທ່ອງທ່ຽວ Grand Pioneers ຖືກນຳໃຊ້ແຫຼ່ງວັດຖຸດິບຕົ້ນຕໍ ແມ່ນສິນທະເລຢູ່ອ່າວ ຮະລອງ. ບັນດາເຍື່ອງອາຫານຖືກປຸງແຕ່ງຕາມແບບພື້ນເມືອງສົມກັບແບບທັນສະໄໝ. ນອກຈາກລາຍການອາຫານທີ່ຮັບໃຊ້ແຂກທ່ອງທ່ຽວໃນກຳປັ່ນທ່ອງທ່ຽວແລ້ວ ກໍ່ຍັງຮັບໃຊ້ຕາມຄວາມຕ້ອງການດ້ານອາຫານຂອງແຂກທ່ອງທ່ຽວຖືສັນຊາດຕ່າງໆອີກດ້ວຍ”.
ການເດີນເຮືອຢ້ຽມຊົມອ່າວ ຮະລອງ ຖືກແຂວງ ກວ໋າງນິງ ເລືອກເຟັ້ນເອົາໂດຍອີງໃສ່ການອະນຸລັກ ແລະ ເຊີດຊູຄຸນຄ່າມໍລະດົກອ່າວ ຮະລອງ. ການເດີນເຮືອຢ້ຽມຊົມມໍລະດົກອ່າວ ຮະລອງ ໄດ້ສ້າງຄວາມປະທັບໃຈໃຫ້ແກ່ແຂກທ່ອງທ່ຽວພິເສດແມ່ນແຂກທ່ອງທ່ຽວສາກົນ. ທ່ານ David Turnbull ແຂກທ່ອງທ່ຽວມາຈາກ ອົດສະຕາລີ ເປີດເຜີຍວ່າ:
“ກຳປັ່ນທ່ອງທ່ຽວລຳນີ້ງາມ ແລະ ທັນສະໄໝ ຜູ້ຮັບໃຊ້ໃນກຳປັ່ນກໍ່ເປີດອົກເປີດໃຈ ຮັກແພງແຂກ. ມີບ່ອນລະຫຼິ້ນບັນເທີງ, ຫ້ອງນອນກໍ່ງາມທີ່ສຸດ. ຖ້ຳທຽນແກ໋ງເຊີນ ກໍ່ເປັນໜ້າຈັບໃຈອີຫຼີ. ເມື່ອຂ້າພະເຈົ້າຢ້ຽມຊົມຖ້ຳ ຊືງໂຊດ ຂ້າພະເຈົ້າກໍ່ເຫັນວ່າ ມີຄວາມແຕກຕ່າງກັນຫຼາຍ ເມື່ອທຽບໃສ່ຖ້ຳອື່ນໆທີ່ຂ້າພະເຈົ້າໄດ້ເຄີຍໄປຢ້ຽມຊົມຢູ່ ອົດສະຕາລີ. ເມື່ອເຂົ້າໄປຖ້ຳ ຂ້າພະເຈົ້າຕົກສະເງິຕໍ່ຄວາມງາມຂອງລະບົບນົມຜາຫີນ ດ້ວຍຮູບຮ່າງງາມຕາ ລຶກລັບມະຫັດສະຈັນ”.
ນີ້ແມ່ນໜຶ່ງໃນບັນດາຜະລິດຕະພັນທ່ອງທ່ຽວໃໝ່ເປັນເອກະລັກຂອງແຂວງ ກວ໋າງນິງ. ການເລີ່ມຕົ້ນຂອງລາຍການທ່ອງທ່ຽວນີ້ກໍ່ເປັນກະແສລົມໃໝ່ ແມ່ນປະຖົມປັດໄຈໃຫ້ແກ່ການນຳໜ້າສ້າງບັນດາຜະລິດຕະພັນໃໝ່ ພ້ອມທັງສ້າງຄວາມໃໝ່ອ່ຽມໃຫ້ແກ່ການທ່ອງທ່ຽວ ຢ້ຽມຊົມອ່າວ ຮະລອງ ເວົ້າສະເພາະ ແລະ ການທ່ອງທ່ຽວທະເລ ຫວຽດນາມ ເວົ້າລວມ.