(vovworld) – ຕອນຄຳ່ວັນທີ 29/7, ຢູ່ແຂວງ ດົ່ງທາບ ໄດ້ຈັດຕັ້ງລາຍການ “ສາຍໃຈເຂດຊາຍແດນ, ທະເລ, ໝູ່ເກາະແຫ່ງບ້ານເກີດເມືອງນອນ”, ດ້ວຍການເຂົ້າຮ່ວມຂອງທ່ານປະທານປະເທດ ເຈືອງເຕີນຊາງ. ລາຍການເພື່ອແນໃສ່ຢັ້ງຢືນແຜນນະໂຍບາຍ, ແນວທາງ, ນະໂຍບາຍຂອງພັກ, ກົດໝາຍຂອງລັດກ່ຽວກັບການປົກປັກຮັກສາອະທິປະໄຕທະເລ, ໝູ່ເກາະທີ່ສັກກະລະບູຊາຂອງປະເທດຊາດ. ພ້ອມທັງລະດົມບັນດາຜູ້ໃຈບຸນໃຈກຸ້ສົນ, ວິສາຫະກິດຮ່ວມແຮງຮ່ວມໃຈໜູນຊ່ວຍທາງດ້ານວັດຖຸໃຫ້ແກ່ກຳລັງທີ່ກ່ຽວຂ້ອງ ແລະ ບັນດາຄອບຄົວທຸກຍາກປະສົບກັບຄວາມຫຍຸ້ງຍາກຢູ່ເຂດຊາຍແດນ, ທະເລ, ໝູ່ເກາະ.
ກ່າວຄຳເຫັນທີ່ລາຍການ, ທ່ານຮອງນາຍົກລັດຖະມົນຕີ ຫວູວັນນີງ ຢືນຢັນວ່າ: ເລື່ອງປົກປັກຮັກສາເຂດຊາຍແດນ, ທະເລ, ໝູ່ເກາະບໍ່ພຽງແຕ່ປົກປັກຮັກສາບ່ອນຢູ່ອາໄສ, ຄວາມສຸກຂອງປະຊາຊົນເທົ່ານັ້ນ, ຫາກຍັງແມ່ນປົກປັກຮັກສາສິ່ງທີ່ສັກກະລະບູຊາທີ່ສຸດເຊິ່ງລຸ້ນກ່ອນໄດ້ປະໄວ້. ທ່ານຮອງນາຍົກລັດຖະມົນຕີ ເນັ້ນໜັກເລື່ອງສືບຕໍ່ຢັ້ງຢືນເຈດຈຳນົງ, ຄວາມຕັດສິນໃຈສູງສຸດແມ່ນປົກປັກຮັກສາຜືນແຜ່ນດິນ ແລະ ເຂດນ່ານນ້ຳທີ່ສັກກະລະບູຊາຂອງ ຫວຽດນາມ ໃນນັ້ນມີໝູ່ເກາະ ເຈື່ອງຊາ ແລະ ຮ່ວາງຊາ, ທ່ານກ່າວວ່າ:
“ຄະນະປະຈຳຄະນະຊີ້ນຳເຂດຕາເວັນຕົກພາກໃຕ້ ແລະ ບັນດາທ້ອງຖີ່ນຕ້ອງຍົກສູງສະຕິຄວາມຮັບຮູ້ຂອງປະຊາຊົນທຸກຊັ້ນວັນນະກ່ຽວກັບທີ່ຕັ້ງ, ບົດບາດ, ຄວາມສາມາດບົ່ມຊ້ອນຂອງເຂດຊາຍແດນ, ທະເລ, ໝູ່ເກາະໃນພາລະກິດສ້າງສາ ແລະ ປົກປັກຮັກສາປະເທດຊາດ, ກໍ່ສ້າງທ່າຮົບປ້ອງກັນປະເທດທົ່ວປວງຊົນ, ປ້ອງກັນຄວາມສະຫງົບປະຊາຊົນ. ບັນດາກຳລັງປ້ອງກັນຊາຍແດນ, ຕຳຫຼວດທະເລ, ກຳລັງກວດກາການປະມົງ, ທະຫານເຮືອ ແລະ ບັນດາກຳລັງປະກອບອາວຸດຕ້ອງເປັນເຈົ້າການກຳແໜ້ນສະພາບການເພື່ອປົກປັກຮັກສາຜືນແຜ່ນດິນອັນຄົບຖ້ວນ, ອະທິປະໄຕເຂດນ່ານຟ້າ, ນ່ານນ້ຳຂອງປະເທດຊາດ”