(vovworld) – ຕອນບ່າຍວັນທີ 12/12, ທ່ານນາຍົກລັດຖະມົນຕີ ຫວຽດນາມ ຫງວຽນເຕີນຢູ້ງ ແລະ ຄະນະຜູ້ແທນ ຫວຽດນາມ ເດີນທາງອອກຈາກນະຄອນ ບູຊານ, ສ. ເກົາຫຼີ, ສິ້ນສຸດການເຂົ້າຮ່ວມກອງປະຊຸມຂັ້ນສູງສະເຫຼີມສະຫຼອງ 25 ປີແຫ່ງການພົວພັນຄູ່ເຈລະຈາ ອາຊຽນ - ສ. ເກົາຫຼີ, ຢ້ຽມຢາມ ແລະ ເຮັດວຽກຢູ່ ສ. ເກົາຫຼີ ແຕ່ວັນທີ 10 – 12/12.
ກ່ອນໜ້ານັ້ນ, ກອງປະຊຸມຂັ້ນສູງສະເລີມສະຫຼອງ 25 ປີແຫ່ງການພົວພັນຄູ່ເຈລະຈາອາຊຽນ-ສ.ເກົາຫຼີໄດ້ຖືກໄຂຂຶ້ນໃນວັນດຽວກັນຢູ່ນະຄອນບູຊານປະເທດ ສ. ເກົາຫຼີ. ກອງປະຊຸມໄດ້ຮັບຮອງເອົາຖະແຫຼງການຮ່ວມກ່ຽວກັບວິໄສທັດການພົວພັນ ອາຊຽນ-ສ.ເກົາຫຼີ, ການກຳນົດທິດ ແລະ ສ້າງຂອບເຂດໃຫ້ແກ່ການພັດທະນາການພົວພັນຄູ່ຮ່ວມມືຍຸດທະສາດ ອາຊຽນ-ສ.ເກົາຫຼີໃນທຸກໆຂົງເຂດ : ການເມືອງ-ການປ້ອງກັນຄວາມສະຫງົບ, ເສດຖະກິດ, ວັດທະນະທຳ-ສັງຄົມໃນອະນາຄົດ, ເພື່ອຜົນປະໂຫຍດຂອງ 2 ຝ່າຍກໍຄືປະກອບສ່ວນເຂົ້າໃນສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາໃນພາກພື້ນ.
ເມື່ອຕອບສຳພາດຕໍ່ສື່ມວນຊົນເນື່ອງໃນໂອກາດນີ້, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ດັ້ງມິງຄອຍ, ຢືນຢັນວ່າ: ຫວຽດນາມ ໄດ້ປະກອບສ່ວນຕັ້ງໜ້າເຂົ້າໃນຜົນສຳເລັດລວມຂອງກອງປະຊຸມ. ຫວຽດນາມ ໄດ້ເຂົ້າຮ່ວມການກໍ່ສ້າງ ແລະ ຕັ້ງໜ້າຜັນຂະຫຍາຍບັນດາແຜນການເຄື່ອນໄຫວຜັນຂະຫຍາຍການພົວພັນລະຫວ່າງ ອາຊຽນ ແລະ ສ. ເກົາຫຼີ, ກໍ່ຄືເຫັນດີເປັນເອກະສັນບັນດາການກຳນົດທິດສຳຄັນໃນການພັດທະນາການພົວພັນໃນອະນາຄົດໃຫ້ເໝາະສົມກັບທ່າແຮງໃໝ່ຂອງ ອາຊຽນ ແລະ ສ. ເກົາຫຼີ, ພິເສດໃນສະພາບການ ອາຊຽນຈະກາຍເປັນປະຊາຄົມໃນປີ 2015.
ເມື່ອຕີລາຄາຄວາມໝາຍ ແລະ ໝາກຜົນຂອງການຢ້ຽມຢາມ, ເຮັດວຽກຢູ່ ສ. ເກົາຫຼີ ຂອງທ່ານນາຍົກລັດຖະມົນຕີ ຫງວຽນເຕີນຢູ້ງ, ພິເສດແມ່ນເລື່ອງເຊັນ FTA ຫວຽດນາມ - ສ. ເກົາຫຼີ, ທ່ານລັດຖະມົນຕີຊ່ວຍວ່າການກະຊວງການຕ່າງປະເທດ ດັ້ງມິງຄອຍ ເນັ້ນໜັກວ່າ: ເລື່ອງ 2 ປະເທດຖະແຫຼງສິ້ນສຸດການເຈລະຈາສັນຍາການຄ້າເສລີ ຫວຽດນາມ - ສ. ເກົາຫຼີ (VKFTA) ແມ່ນໝາກຜົນພົ້ນເດັ່ນຂອງການຢ້ຽມຢາມ ແລະ ແມ່ນເຫດການມີຄວາມໝາຍສຳຄັນທີ່ສຸດສຳລັບການພົວພັນ ຫວຽດນາມ - ສ. ເກົາຫຼີ. ສັນຍາມີຄວາມໝາຍສຳຄັນສຳລັບການຊຸກຍູ້ການຮ່ວມມືການຄ້າ 2 ຝ່າຍ, ມຸ່ງໄປເຖິງຈຸດໝາຍບັນລຸວົງເງິນ 70 ຕື້ USD ໃນປີ 2020, ສ້າງເງື່ອນໄຂເພື່ອໃຫ້ສິນຄ້າ ຫວຽດນາມສາມາດແກ້ງແຍ້ງດີກ່ວາຢູ່ຕະຫຼາດ ສ. ເກົາຫຼີ, ພິເສດແມ່ນໃນບັນດາຂົງເຂດຄື: ຜະລິດຕະພັນກະເສດ, ສິນໃນນ້ຳ, ຕ່ຳແຜ່ນຕັດຫຍິບ… ສັນຍາຍັງຈະຊຸກຍູ້ການລົງທຶນຂອງບັນດາວິສາຫະກິດ ສ. ເກົາຫຼີ ເຂົ້າ ຫວຽດນາມ, ສົ່ງເສີມການຖ່າຍທອດເຕັກໂນໂລຢີເພື່ອແນໃສ່ຍົກສູງຄວາມສາມາດ ແລະ ກຳລັງການຜະລິດ, ຜ່ານນັ້ນສ້າງກຳລັງໜູນ ແລະ ກາລະໂອກາດໃໝ່ໃຫ້ແກ່ການຮ່ວມມືເສດຖະກິດລະຫວ່າງ 2 ປະເທດ, ປະກອບສ່ວນນຳການພົວພັນຄູ່ຮ່ວມມືຍຸດທະສາດລະຫວ່າງ 2 ປະເທດຂຶ້ນສູ່ລະດັບສູງໃໝ່.