(vovworld) - ໂດຍສືບຕໍ່ການຢ້ຽມຢາມທາງລັດຖະກິດສ.ອີນເດຍ, ຕອນເຊົ້າວັນທີ 22/11, ຢູ່ນະຄອນ Mumbai, ລັດ Maharashtra, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟຸຈ້ອງ ໄດ້ເຂົ້າຮ່ວມ ແລະ ກ່າວປາໄສທີ່ເວທີປາໄສວິສາຫະກິດອີນເດຍ.
ຕໍ່ໜ້າຜູ້ຕາງໜ້າສະຫະພັນບັນດາຫ້ອງການການຄ້າ ແລະ ອຸດສາຫະກຳ, ພ້ອມກັບບັນດາບໍລິສັດໃຫຍ່, ກຸ່ມບໍລິສັດໃຫຍ່ຂອງອີນເດຍ, ທ່ານເລຂາທິການໃຫຍ່ຫງວຽນຟຸຈ້ອງ ເນັ້ນໜັກວ່າ, ຄວາມສາມາດບົມຊ້ອນ ແລະ ກາລະໂອກາດຮ່ວມມືດ້ານເສດຖະກິດ, ການຄ້າລະຫວ່າງຫວຽດນາມ - ອີນເດຍ ຍັງໃຫຍ່ຫຼວງຢູ່, ຕ້ອງໄດ້ຮັບການຂຸດຄົ້ນ ແລະ ເສີມຂະຫຍາຍ. ທ່ານເລຂາທິການໃຫຍ່ເຊື່ອໝັ້ນວ່າ ດ້ວຍຄວາມສາມາດບົມຊ້ອນຂອງແຕ່ລະປະເທດ ແລະ ຄວາມຕັດສິນໃຈສູງຂອງການນຳ ແລະ ປະຊາຊົນ 2 ປະເທດ, ການພົວພັນຮ່ວມມືລະຫວ່າງ 2 ປະເທດຈະໄດ້ຮັບການພັດທະນາໃນອະນາຄົດຢ່າງບໍ່ຢຸດຢັ້ງ, ໃນນັ້ນມີການຮ່ວມມືດ້ານເສດຖະກິດ, ການຄ້າ ແລະ ການລົງທຶນແມ່ນຈຸດສຸມ. ທ່ານເລຂາທິການໃຫຍ່ຢືນຢັນວ່າ ຍາມໃດຫວຽດນາມ ກໍ່ຍີນດີຕ້ອນຮັບບັນດານັກລົງທຶນອີນເດຍ ເຂົ້າມາດຳເນີນທຸລະກິດຢ່າງຍາວນານ ແລະ ມີປະສິດທິຜົນຢູ່ຫວຽດນາມ. ຫວຽດນາມ ພ້ອມແລ້ວທີ່ຈະເປັນຂົວເຊື່ອມຕໍ່ເພື່ອໃຫ້ບັນດາວິສາຫະກິດອີນເດຍ ແຊກຊຶມເຂົ້າຕະຫຼາດອາຊຽນ.
ຜູ້ຕາງໜ້າສະຫະພັນບັນດາຫ້ອງການການຄ້າ ແລະ ອຸດສາຫະກຳ, ບັນດາວິສາຫະກິດອີນເດຍ ປາດຖະໜາຢາກເພີ່ມທະວີການຮ່ວມມືກັບຫວຽດນາມໃນທຸກຂົງເຂດ ແລະ ສະເໜີໃຫ້ຫວຽດນາມ ພິຈາລະນາເປີດສາຍການບິນໂດຍກົງລະຫວ່າງ 2 ປະເທດ, ສ້າງເງື່ອນໄຂສະດວກໃຫ້ແກ່ນັກລົງທຶນອີນເດຍ ເຂົ້າມາລົງທຶນ, ດຳເນີນທຸລະກິດຢູ່ຫວຽດນາມ ຍິ່ງກວ່າອີກ.